Ni Kristo​—Ti Pannakabalin ti Dios

 1. Apay a naikuna ni Pablo a ni “Kristo ti pannakabalin ti Dios”?

ITI nagpaiduma a wagas, imparangarang ni Jehova ti pannakabalinna babaen ken Jesu-Kristo. Mabasa iti uppat nga Ebanghelio dagiti makapabileg iti pammati a detalye ti dadduma a milagro nga inaramid ni Kristo. Adu pay a dadduma a milagro ti inaramidna. (Mat. 9:35; Luc. 9:11) Wen, naiparangarang ken Jesus ti pannakabalin ti Dios. Ngarud, umiso ti kinuna ni apostol Pablo: “Ni Kristo ti pannakabalin ti Dios.” (1 Cor. 1:24) Ngem ania ti epektona iti biagtayo dagiti milagro nga inaramid ni Jesus?

 2. Ania ti maadaltayo kadagiti milagro ni Jesus?

² Kinuna ni apostol Pedro a nagaramid ni Jesus kadagiti milagro, wenno “tanda.” (Ara. 2:22) Dagiti milagro nga inaramid ni Jesus ditoy daga ket pakpakauna laeng ti nasaysayaat a bendision nga aramidenna bayat ti panagturayna kas ari. Ipakita dagitoy ti ad-adu pay a milagro nga aramidento ni Jesus iti baro a lubong ti Dios! Dagitoy a milagro mangtedda met iti nalawlawag a pannakaawattayo iti personalidad ni Jesus ken ti Amana. Usigentayo ti sumagmamano kadagiti milagro ni Jesus ket kitaentayo no kasano nga apektaranna ti biagtayo ita ken iti masanguanan.

 3. (a) Apay a natignay ni Jesus a mangaramid iti kaunaan a milagrona? (b) Kasano a naipakita ti kinaparabur ni Jesus idiay Cana?

³ Iti maysa a padaya ti kasar idiay Cana ti Galilea, inaramid ni Jesus ti kaunaan a milagrona. Nalabit ad-adu a bisita ti immay ngem iti ninamnama. Ngem aniaman ti makagapu, naibus ti arak. Maysa ni Maria nga ina ni Jesus kadagiti bisita. Sigurado nga adu a tawen a pinampanunot ni Maria dagiti naipadto a kari mainaig iti anakna, nga ammona a maawaganto iti “Anak ti Kangatuan.” (Luc. 1:30-32; 2:52) Ammo kadi ni Maria nga adda pannakabalin ni Jesus? Nalawag a makita dayta iti napasamak idiay Cana. Naasian da Maria ken Jesus iti kakaskasar ken kayatda a saan a maibabain dagiti agassawa. Ammo ni Jesus a maysa a rebbengen ti kinamanagpadagus. Gapuna, simimilagro a pinagbalin ni Jesus ti 380 a litro a danum a “nasayaat nga arak.” (Basaen ti Juan 2:3, 6-11.) Napilitan kadi ni Jesus a mangaramid iti daytoy a milagro? Saan. Maseknan ni Jesus kadagiti tattao ken tultuladenna ti kinaparabur ni Amana.

4, 5. (a) Ania ti masursurotayo iti kaunaan a milagro ni Jesus? (b) Ania ti masursurotayo iti milagro idiay Cana maipapan iti masanguanan?

⁴ Simimilagro a nangaramid ni Jesus iti umdas a nasayaat nga arak para iti adu a tattao. Ania ti masursurotayo iti dayta? Ti situtulok a panangaramid ni Jesus kadagiti milagro ipakitana nga ikabkabilanganda ken Amana ti rikrikna dagiti tattao. Naparabur ti Ama ken ti Anak. Panunotem no kasanonto nga usaren ni Jehova ti pannakabalinna a mangipaay iti aglaplapusanan a taraon iti baro a lubong para iti “amin nga ili” ti daga.​—Basaen ti Isaias 25:6.

⁵ Panunotem! Asidegen a mapennek ti amin a kasapulan ken tarigagay ti tao a kas iti nasustansia a taraon ken nasayaat a pagtaengan. Segseggaantayo ti aglaplapusanan a bendision nga ipaayto ni Jehova iti Paraiso a daga.

 6. Siasino ti nangusaran ni Jesus iti pannakabalinna, ken kasano a matuladtayo dayta?

⁶ Idi sinulisog ti Diablo ni Jesus nga aramidenna a tinapay ti bato, saan nga inusar ni Kristo ti pannakabalinna nga agaramid iti milagro tapno penkenna ti tarigagayna. (Mat. 4:2-4) Imbes ketdi, inusarna ti pannakabalinna tapno penkenna ti kasapulan ti sabsabali. Kasano a matuladtayo ti napudno a pannakaseknan ni Jesus iti sabsabali? Pinaregtana dagiti adipen ti Dios a ‘mangyugali a mangted.’ (Luc. 6:38) Maipakitatayo kadi ti kinaparabur babaen iti panangawis ti sabsabali iti pannangan wenno makaparegta a panaglalangen? Kalpasan ti gimong, makaipaaytayo kadi iti panawen para iti sabsabali, kas koma iti panangdengngeg iti maysa a kabsat a mangensayo iti pasetna? Ania ti mabalintayo nga ipaay kadagiti kakabsat nga agkasapulan iti tulong iti ministerio? Maipakitatayo a nakasursurotayo ken Jesus no sipaparabur a mangipaaytayo iti material ken naespirituan a bambanag iti sabsabali agingga a kabaelantayo.

 7. Ania a kasasaad ti agtultuloy bayat nga adda daytoy dakes a sistema ti bambanag?

⁷ Nabayagen nga adda ti kinapanglaw. Kinuna ni Jehova iti nagkauna nga Israel nga addanto latta napanglaw iti dagada. (Deut. 15:11) Kalpasan ti ginasut a tawen, kinuna ni Jesus: “Kankanayon nga adda kadakayo dagiti napanglaw.” (Mat. 26:11) Kayat kadi a sawen ni Jesus a kanayonto latta nga adda napanglaw ditoy daga? Saan. Ti kayatna a sawen ket adda latta napanglaw bayat nga adda daytoy dakes a sistema ti bambanag. Makapabileg ngarud a maammuan a dagiti milagro ni Jesus ket pakpakauna laeng ti nasaysayaat a kasasaad inton agturay ti Pagarian. Mapnekto ti amin iti aglaplapusanan a taraon!

8, 9. (a) Apay a pinakan ni Jesus ti rinibu a tattao? (b) Ania ti makunam iti dayta a milagro?

⁸ Kinuna ti salmista maipapan ken Jehova: “Uk-ukradem ta imam ken pempennekem ti tarigagay ti tunggal sibibiag a banag.” (Sal. 145:16) Iti panangiparangarangna ken Amana, ni ‘Kristo a pannakabalin ti Dios,’ masansan nga inukradna ti imana ken pinennekna ti tarigagay dagiti pasurotna. Saanna laeng nga inaramid dayta tapno ipakitana ti pannakabalinna, no di ket natignay gapu iti pannakaseknanna iti sabsabali. Kas pagarigan, usigentayo ti Mateo 14:14-21. (Basaen.) Immasideg dagiti adalan ken Jesus ket imbagada nga awan ti umdas a taraon para iti amin. Saan laeng a gapu ta mabisinda no di ket maseknanda pay iti kasasaad ti mabisbisin ken nabambannog a bunggoy a nagnagna a simmurot ken Jesus. (Mat. 14:13) Ania ngata ti aramidenna?

⁹ Babaen iti lima a tinapay ken dua nga ikan, pinakan ni Jesus ti agarup 5,000 a lallaki, kasta met dagiti babbai ken ubbing! Saantayo kadi a matignay no mapanunottayo a gapu iti asina inusar ni Jesus ti pannakabalinna nga agaramid iti milagro tapno ipaayna ti kasapulan ti intero a pamilia, agraman dagiti babassit nga ubbing? “Nanganda amin ket napnekda.” Ipamatmat daytoy nga adda idi aglaplapusanan a taraon. Saan laeng a nangipaay ni Jesus iti pangramanan a taraon no di ket ti taraon a mangpakired iti bunggoy para iti panagawidda nga agsubli kadagiti pagtaenganda. (Luc. 9:10-17) Kinapudnona, napno ti 12 a labba iti tedda a taraon!

10. Ania ti asidegen a mapasamak iti kinapanglaw?

¹⁰ Saan a mapempennek ita ti kangrunaan a kasapulan ti minilmilion a tattao gapu iti di umiso a panangituray ti tao. Nupay adda pagtaraon ti dadduma a kakabsattayo, saan a makaipaay dayta iti ‘pannakapnek.’ Ngem asidegen a tagiragsaken dagiti natulnog a tattao ti lubong nga awan ti korapsion ken kinapanglaw. No adda pannakabalinmo, saan kadi nga ipaaymo ti kasapulan dagiti tattao? Kayat ken kabaelan ti Mannakabalin-amin a Dios nga aramiden dayta. Wen, asidegen ti pannakabang-ar!​—Basaen ti Salmo 72:16.

11. Apay a kombinsidoka a mabiiten nga usaren ni Kristo ti pannakabalinna iti intero a daga, ket ania ti pakatignayam nga aramiden?

¹¹ Idi adda ni Jesus ditoy daga, bassit laeng ti teritoria a nangaramidanna kadagiti milagrona ken inaramidna dagita iti tallo ket kagudua laeng a tawen. (Mat. 15:24) Kas naitronon nga Ari, ti teritoriana ket agsaknapto iti uppat a suli ti daga. (Sal. 72:8) Dagiti milagro ni Jesus pabilgenna ti pammatitayo a kabaelan ken asidegen a kayatna nga usaren ti autoridadna agpaay iti pagimbagantayo. Nupay saantayo a makaaramid kadagiti milagro, sigaganetget a matulongantayo dagiti tattao tapno maammuanda ti maipapan iti naipaltiing a Sao ti Dios. Patalgedan dagiti padto ti Biblia nga adda nasaysayaat a masanguanan. Kas dedikado a Saksi ni Jehova a makaammo iti mapasamak iti masanguanan, mabigbigtayo kadi nga adda utangtayo iti sabsabali? (Roma 1:14, 15) No utobentayo dayta, matignaytayo a mangiranud iti naimbag a damag ti Pagarian ti Dios iti sabsabali.​—Sal. 45:1; 49:3.

12. Apay a masiguradotayo a naan-anay a matarusan ni Jesus ti ekolohia ti daga?

¹² Idi pinarsua ti Dios ti amin a banag ditoy daga, adda iti sibayna ti bugbugtong nga Anakna kas “nasigo a managobra.” (Prov. 8:22, 30, 31; Col. 1:15-17) Gapuna, naan-anay a matarusan ni Jesus ti ekolohia ti daga (balanse a relasion dagiti sibibiag a parsua ken ti aglawlaw). Ammona no kasano nga umiso nga usaren ken kontrolen ti puersa ti nakaparsuaan.

13, 14. Mangted iti pagarigan a kabaelan ni Jesus a kontrolen dagiti puersa ti nakaparsuaan.

¹³ Idi adda ditoy daga, impakita ni Jesus nga isu “ti pannakabalin ti Dios” babaen ti panangkontrolna kadagiti puersa ti nakaparsuaan. Usigentayo no ania ti inaramid ni Jesus iti bagyo a namagpeggad kadagiti adalanna. (Basaen ti Marcos 4:37-39.) Kinuna ti maysa nga eskolar ti Biblia: “Ti Griego a sao [para iti “allawig” iti Marcos 4:37] kaipapananna ti napigsa a bagyo. Saanna a kayat a sawen a maysa laeng a napigsa nga angin . . . no di ket bagyo nga addaan nadawel nga angin, nangisit nga ulep, a napakuyogan iti bayakabak ket iburaisna dagiti bambanag.”

¹⁴ Iladawanyo ti eksena: Ipalla-pallayog ti dalluyon ti barangay ken masabsabuagan iti danum ken labutab. Nupay dumaranudor ti bagyo ken maipalla-pallayog ti barangay, nakaturog latta ni Jesus gapu ta nabannog iti ministerio ket kasapulanna ti aginana. Dagiti mabutbuteng nga adalan riniingda ni Jesus ket kinunada: “Mapukawkamin!” (Mat. 8:25) Bimmangon ni Jesus ket binilinna ti angin ken ti baybay: “Agtalnaka! Agulimekka!” Ania ti napasamak? Nagsardeng ti bumanesbes nga angin ket “naglinak” ti baybay. (Mar. 4:39) Talaga a nakaskasdaaw ti pannakabalin ni Jesus!

15. Kasano nga impakita ti Mannakabalin-amin a Dios a kabaelanna a kontrolen ti puersa ti nakaparsuaan?

¹⁵ Ni Jehova ti Gubuayan ti pannakabalin ni Kristo, isu nga adda panggapuantayo a mamati a kabaelan ti Mannakabalin-amin a Dios a kontrolen dagiti puersa ti nakaparsuaan. Usigentayo ti sumagmamano a pagarigan. Sakbay ti Layus, kinuna ni Jehova: “Iti pito laengen nga aldaw pagtuduek iti rabaw ti daga iti uppat a pulo nga aldaw ken uppat a pulo a rabii.” (Gen. 7:4) Mabasatayo met iti Exodo 14:21: “Rinugian ni Jehova a pasublien ti baybay babaen ti napigsa . . . nga angin.” Kuna met ti Jonas 1:4: “Ni met laeng Jehova nangipalladaw iti dakkel nga angin iti baybay, ket naadda ti nakadawdawel a bagyo iti baybay; ket no maipapan iti barko, ngannganin marba.” Makapabileg a maammuan a kabaelan ni Jehova a kontrolen ti paniempo. Nalawag a nasayaatto ti masanguanan ti planeta a Daga.

16. Apay a makapabileg a maammuan a kabaelan ti Namarsua ken ti Anakna a kontrolen ti puersa ti nakaparsuaan?

¹⁶ Talaga a makapabileg ti panangpampanunot iti nakaskasdaaw a pannakabalin ti Namarsua ken ti “nasigo a managobra.” Inton naan-anayen a maiturong ti atensionda iti daga iti las-ud ti 1,000 a tawen, natalgedton ti kasasaad ti tao. Awanton dagiti nakabutbuteng a natural a didigra a kas iti bagyo, tsunami, panagbettak ti bulkan, wenno ginggined. Nagsayaat a panunoten ti panawen inton awanen dagiti makapapatay wenno makadangran a natural a didigra, ta ‘ti tolda ti Dios addanto iti sangatauan’! (Apoc. 21:3, 4) Masiguradotayo ngarud nga usarento ni Kristo ti pannakabalin ti Dios a mangkontrol iti puersa ti nakaparsuaan bayat ti Sangaribu a Tawen a Panagturayna.

17. Kasano a matuladtayo ita ti Dios ken ti Kristo?

¹⁷ Siempre, saantayo a kabaelan a kontrolen dagiti natural a didigra a kas ken Apo Jehova ken ni Jesus, ngem addaantayo met iti pannakabalin. Kasano nga usarentayo dayta? Mabalin nga iyaplikartayo ti Proverbio 3:27. (Basaen.) No agsagaba dagiti kakabsattayo, mabalintayo a liwliwaen ken tulongan ida iti material, emosional, ken iti naespirituan. (Prov. 17:17) Kas pagarigan, mabalintayo a tulongan ida a bumangon manipud iti natural a didigra. Kastoy ti naimpusuan a panagyaman ti maysa a balo a babai kalpasan a dinadael ti bagyo ti balayna: “Agyamanak la unay ta addaak iti organisasion ni Jehova, saan laeng a gapu ta tinulongandak iti material no di ket uray iti naespirituan.” Maysa a kabsat a balasang ti naawanan iti namnama ken madandanagan idi nakitana ti balayna a dinadael ti bagyo. Ngem kalpasan a nakaawat iti tulong, kinunana: “Nakaragragsakak! Saanko a mailadawan ti ragsakko . . . Pagyamanan, Apo Jehova!” Maragsakantayo ta kamengtayo ti sangalubongan a panagkakabsat a pudno a maseknan iti maysa ken maysa. Ad-adda pay nga agragsaktayo ta ammotayo a maseknan kadatayo ni Jehova ken ni Jesu-Kristo.

18. Ania ti motibo ni Jesus idi nagaramid iti milagro?

¹⁸ Bayat ti ministerio ni Jesus, pinaneknekanna nga isu “ti pannakabalin ti Dios.” Ngem ania ti motibo ni Jesus? Saantayo a pulos nakita nga inusarna ti pannakabalinna tapno agpasikat wenno agpaay laeng iti pagimbaganna. Imbes ketdi, ipakita dagiti milagro ni Jesus ti panagayatna kadagiti tattao. Mausig dayta iti sumaruno nga artikulo.