Ipakitam nga Agyamyamanka iti Inaramid ni Jehova ken ni Jesus Para Kenka

Ania ti mariknam no inikkannaka ti gayyemmo iti napintas a regalo? Posible a nakaragragsakka ken kayatmo nga ipakita iti gayyemmo nga ap-apresiarem ti regalona. Inted ni Jehova ken Jesus kadatayo ti kasayaatan pay laeng a regalo. Ania dayta? Ken kasanotayo a maipakita nga agyamyamantayo iti dayta?

1. Ania ti maysa a pamay-an a maipakitatayo nga agyamyamantayo iti inaramid ti Dios ken ni Kristo para kadatayo?

Ikarkari ti Biblia nga “asinoman a mangipakita iti pammati [ken Jesus]” ket agbiag nga agnanayon. (Juan 3:16) Ania ti kayat a sawen ti panangipakita iti pammati? Saan nga umanay ti basta panamati ken Jesus. Masapul met nga ipakitatayo ti pammatitayo babaen kadagiti desision ken ar-aramidentayo. (Santiago 2:17) No ipakitatayo ti pammatitayo iti sao ken aramid, agbalintayo a nadekdekket a gagayyem ni Jesus ken ti Amana, ni Jehova.​—Basaen ti Juan 14:21.

2. Ania nga espesial nga okasion ti makatulong kadatayo tapno maipakitatayo ti panagyamantayo iti inaramid ni Jehova ken ni Jesus?

Iti rabii sakbay ti ipapatay ni Jesus, imbagana kadagiti pasurotna ti sabali pay a pamay-an a maipakitada ti panagyamanda iti sakripisiona. Inrugina ti espesial nga okasion nga aw-awagan ti Biblia iti “Pangrabii ti Apo,” a maawagan met iti Memorial ti ipapatay ni Kristo. (1 Corinto 11:20) Inrugi ni Jesus dayta nga okasion tapno malaglagip dagiti apostolna​—ken ti amin a pudno a Kristiano​—nga intedna ti biagna para kadatayo. Maipapan iti daytoy nga okasion, imbilin ni Jesus: “Itultuloyyo nga aramiden daytoy kas panglaglagip kaniak.” (Lucas 22:19) No makimemorialka, ipakpakitam nga agyamyamanka iti dakkel nga ayat ni Jehova ken ni Jesus para kadatayo.

AMMUEM TI AD-ADU PAY

3. Ipakitatayo ti panagyamantayo

Imadyinem a malmalmeska ket adda nangalaw kenka. Lipatem latta kadin ti inaramid dayta a tao para kenka? Wenno mangbirokka iti pamay-an tapno maipakitam nga agyamyamanka iti inaramidna?

Utangtayo ti biagtayo ken Jehova. Basaen ti 1 Juan 4:8-10, sa pagsaritaan dagitoy a saludsod:

• Apay nga espesial a regalo ti sakripisio ni Jesus?

• Ania ti mariknam iti inaramid ni Jehova ken ni Jesus para kenka?

Kasanotayo a maipakita ti apresasiontayo iti inaramid ni Jehova ken ni Jesus para kadatayo? Basaen ti 2 Corinto 5:15 ken 1 Juan 4:11; 5:3. Kalpasan a mabasa ti tunggal teksto, pagsaritaan daytoy a saludsod:

• Sigun iti teksto, kasanotayo a maipakita ti panagyamantayo?

4. Tuladentayo ni Jesus

Ti sabali pay a pamay-an a maipakitatayo ti panagyamantayo ket no tuladentayo ni Jesus. Basaen ti 1 Pedro 2:21, sa pagsaritaan daytoy a saludsod:

• Kasanotayo a masurot a naimbag dagiti addang ni Jesus?

5. Atenderantayo ti Memorial ti ipapatay ni Kristo

Tapno maammuam ti napasamak iti umuna a Pangrabii ti Apo, basaen ti Lucas 22:14, 19, 20. Kalpasanna, pagsaritaan dagitoy a saludsod:

• Ania ti napasamak iti Pangrabii ti Apo?

• Ania ti isimbolo ti tinapay ken arak?​—Kitaen ti bersikulo 19 ken 20.

Kayat ni Jesus a laglagipen dagiti adalanna ti Pangrabii ti Apo maminsan iti makatawen iti anibersario ti ipapatayna. Isu a tinawen nga agkakadua dagiti Saksi ni Jehova tapno laglagipenda ti ipapatay ni Kristo iti pamay-an nga imbilinna. Tapno maammuam ti maipapan iti daytoy a napateg nga okasion, i-play ti VIDEO. Kalpasanna, pagsaritaan ti sumaruno a saludsod.

VIDEO: Laglagipenyo ti Ipapatay ni Jesus (1:41)

• Ania ti maar-aramid iti Memorial?

Adda isimbolo ti tinapay ken arak. Isimbolo ti tinapay ti perpekto a bagi ni Jesus kas tao nga insakripisiona para kadatayo. Isimbolo ti arak ti darana

SUMARIO

Maipakitatayo nga agyamyamantayo iti inaramid ni Jesus para kadatayo no ipakitatayo ti pammatitayo kenkuana ken no umatendertayo iti Memorial ti ipapatayna.

Rebiu

• Ania ti kaipapanan ti panangipakita iti pammati ken Jesus?

• Ania ti kayatmo nga aramiden tapno maipakitam ti panagyamanmo iti inaramid ni Jehova ken ni Jesus para kenka?

• Apay a napateg nga atenderam ti Memorial ti ipapatay ni Kristo?

AGDISKOBREKA PAY

Gapu ta natay ni Kristo para kadatayo, ania ti kayattayo nga aramiden?

Inusarna ti Bagina a Mangidayaw ken Jehova (9:28)

Ammuem ti ad-adu pay maipapan iti pammati ken no kasanotayo a maipakita dayta.

“Ipakitam ti Pammatim Kadagiti Kari ni Jehova” (Ti Pagwanawanan, Oktubre 2016)

Iti artikulo a “Mariknakon a Nadalusak ken Naan-anay a Naragsak,” kitaem ti epektona iti biag ti maysa a babai idi naammuanna ti maipapan iti sakripisio ni Kristo.

“Ti Biblia Balbaliwanna ti Biag” (Ti Pagwanawanan, Agosto 1, 2011)

Ammuem no apay a bassit ti makiramraman iti emblema iti Memorial.

“Apay a Naiduma iti Dadduma a Relihion ti Panangselebrar Dagiti Saksi ni Jehova iti Pangrabii ti Apo?” (Artikulo iti website)