Ti Biag ken Ministerio ni Jesus

Pannakaliput ken Pannakatiliw

NAPALABASEN ti tengngat’ rabii idi inturong ni Judas ti dakkel a bunggoy dagiti soldado, pangulo a papadi, dagiti Fariseo, ken dadduma pay idiay minuyongan ti Getsemani. Immanamong dagiti papadi a bayadan ni Judas ti 30 kapisi ti pirak tapno liputanna ni Jesus.

Sakbay daytoy, idi napagtalaw ni Judas manipud pannangan ti Paskua, nalawag nga isut’ nagdiretso kadagiti pangulo a papadi. Dagitoy ti dagus a nangurnong kadagiti mismo nga opisialesda, agraman ti maysa a bunggoy dagiti soldado. Nalabit immuna nga inturong ida ni Judas idiay nangrambakan ni Jesus ken dagiti apostolna iti Paskua. Gapu ta nakitana a nakapanawdan, ti dakkel a bunggoy a nagtagiigam ken agaw-awit kadagiti pagsilawan ken aluten simmurotda ken Judas idiay ruar ti Jerusalem ket bimmallasiwda iti Ginget ti Cedron.

Bayat nga indauluan ni Judas ti bunggoy a sumang-at idiay Bantay dagiti Olivo, masiguradona no sadinot’ pakasarakan ken Jesus. Bayat ti napalabas a lawas, bayat nga agsublisubli da Jesus ken dagiti apostolna iti Betania ken Jerusalem, masansan nga agsarsardengda idiay minuyongan ti Getsemani tapno aginana ken agpapatangda. Ngem, ita, ta nalabit nailemmeng ni Jesus iti kinasipnget iti sirok dagiti kaykayo nga olivo, kasano ti panangilasin dagiti soldado kenkuana? Mabalin a dida pay nakitkita idi. Nangted pagilasinan ni Judas, a kunkunana: “No asino ti agepak, daydiay isunto; isu tiliwenyo ket ipanyo nga aywananyo a naimbag.”

Indauluan ni Judas ti dakkel a bunggoy a simrek iti minuyongan, nakitana ni Jesus ken dagiti apostolna, ket dimmiretso kenkuana. “Naimbag nga aldawmo, Rabbi!” kunana ken isut’ inagepanna.

“Gayyem, agpaay iti ania a panggep nga addaka?” insaludsod ni Jesus. Sa, sungsungbatan ti saludsodna met laeng, kunana: “Judas, iti maysa nga agep iyawatmo ti Anak ti tao?” Ngem husto daytan maipapan ti manangliliputna! Immaddang ni Jesus tapno agparang iti lawag dagiti sumsumged nga aluten ken pagsilawan sana insaludsod: “Siasino ti sapulenyo?”

“Ni Jesus a Nazareno,” insungbatda.

“Siak,” insungbat ni Jesus, bayat a sitatakder a situtured iti imatangda. Nasdaawan iti kinaturedna ken gapu ta dida ammo ti aramidenna, nagsanud dagiti lallaki ket napasagda iti daga.

“Kinunak kadakayo a siak,” sikakalma nga intuloy ni Jesus. “No siak ngarud ti sapulenyo, baybay-anyo a pumanaw dagitoy.” Di nabayag sakbay ti kaaddada idiay makingngato a siled, imbaga ni Jesus ken Amana iti kararag nga inaywananna dagiti matalek nga apostolna ket awan uray maysa kadakuada ti napukaw “malaksid daydiay anak ti pannakadadael.” Gapuna, tapno matungpal ti saona, indawatna a mapalubosan koma a pumanaw dagiti paspasurotna.

Idi a mapasubli dagiti soldado ti kinakalmada, timmakderda ket rinugianda a baluden ni Jesus, nailasin dagiti apostol no aniat’ mapasamaken. “Apo, tumagbatkami aya babaen iti kampilan?” insaludsodda. Sakbay a makasungbat ni Jesus, ni Pedro, a mangig-iggem ti maysa kadagiti dua a kampilan nga ikuykuyog dagiti apostol, inatakarna ni Malco, a tagabu ti kangatuan a padi. Ti panangtagbat ni Pedro nailisi iti ulo ti tagabu ngem napingas ti makanawan a lapayagna.

“Bay-anyo agingga itoy,” kuna nga imballaet ni Jesus. Sinagidna ti lapayagna, ket inagasanna ti sugat. Sa nangisuro iti importante a leksion, a binilinna ni Pedro: “Ipulangmo ta kampilanmo iti kalubanna, ta isuamin dagiti mangaramat iti kampilan mataydanto iti kampilan. Wenno pagarupem aya a diak mabalin ti agdawat ken Amak tapno ikkannakto ti nasurok a sangapulo ket dua a lehion dagiti anghel?”

Situtulok ni Jesus a matiliw. Ta inlawlawagna: “Ngem kasanonto ngarud ti pannakatungpal dagiti Sursurat a masapul a maaramid ti kastoy?” Sana innayon: “Ti kopa nga inted ni Ama kaniak, diak aya rebbeng nga inuman?” Isut’ umanamong a naan-anay iti pagayatan ti Dios kenkuana!

Kalpasanna nagsao ni Jesus iti taripnong. “Immaykayo aya a nagtagikampilan ken nagtagipang-or a mangtiliw kaniak kas bumusor iti maysa a tulisan?” insaludsodna. “Kadagiti isuamin nga aldaw nagtugtugawak idiay templo a mangisursuro, ket didak tiniliw. Ngem amin daytoy naaramid tapno matungpal ti sursurat dagiti mammadto.”

Iti kasta ti kompania ti soldado ken ti kumander a militar ken opisiales dagiti Judio tiniliwda ni Jesus ket pinarautanda. Idi makitada daytoy, pinanawan dagiti apostol ni Jesus ket nagtalawda. Nupay kasta, maysa nga agtutubo a lalaki​—mabalin isu ni adalan a Marcos​—nagtalinaed iti ummong dagiti tattao. Nalabit nga isut’ adda idiay pagtaengan a nangrambakan ni Jesus ti Paskua ket kalpasanna sinurotna dagiti adu a tattao manipud sadiay. Ita, nupay kasta, isut’ nailasinda, ket isu koma ti tiliwenda. Ngem inibbatanna ti pagan-anayna a lienso ket timmaray a naingpis laeng ti adda a kawesna. Mateo 26:47-56; Marcos 14:43-52; Lucas 22:47-53; Juan 17:12; 18:3-12.

◆ Apay a sigurado ni Judas a mabirukanna ni Jesus idiay minuyongan ti Getsemani?

◆ Kasanot’ panangiparangarang ni Jesus ti pannakaseknanna kadagiti apostolna?

◆ Aniat’ inaramid ni Pedro a pangidepensa ken ni Jesus, ngem aniat’ kuna ni Jesus kenkuana?

◆ Kasanot’ panangipalgak ni Jesus nga isut’ umanamong a naan-anay iti pagayatan ti Dios kenkuana?

◆ Idi pinanawan dagiti apostol ni Jesus, asinot’ nagbati, ket aniat’ napasamak kenkuana?