PALASIO TI GOBERNADOR

Ti Griego a termino a prai·toʹri·on (manipud Lat., praetorium) tumukoy iti opisial a pagtaengan dagiti gobernador ti Roma. Iti palasio ti gobernador idiay Jerusalem, ni Poncio Pilato sinaludsodanna ni Kristo Jesus, ket iti paraangan dayta, isu rinabrabak dagiti Romano a soldado. (Mr 15:16; Jn 18:28, 33; 19:9) Adda dagiti mangibaga a ti palasio ti gobernador isu met laeng ti Torre ti Antonia, ngem isingasing ti dadduma a nalabit dayta ti palasio a binangon ni Herodes a Dakkel. Kas pammatalged iti panangmatmat a naud-udi a nadakamat, naidatag dagiti sumaganad a rason: (1) Sigun iti umuna-siglo a Judio a pilosopo a ni Philo (The Embassy to Gaius, XXXIX, 306), ti palasio ni Herodes naawagan “balay dagiti gobernador,” ket sadiay ti nangisab-itan ni Gobernador Pilato kadagiti kalasag a nagpaay kas pammadayaw ken Tiberio Cesar. (2) Ti Judio a historiador a ni Josephus dakamatenna a nagkuartel sadiay ti prokurador a ni Gessius Florus. (The Jewish War, II, 301 [xiv, 8]) (3) Ti palasio ni Herodes idiay Cesarea nagpaay kas palasio ti gobernador iti dayta a siudad.​—Ara 23:33-35.

Ti palasio ni Herodes idiay Jerusalem nagsaad iti makin-amianan a laud a nagsulian ti makinngato a siudad, a dayta ket, iti makin-abagatan a paset ti siudad. Sigun iti panangiladawan ni Josephus, napalikmutan dayta iti 30-kasiko ti kangatona (13 m; 44 pie) a pader nga addaan kadagiti agpapada ti kaaddayona a torre. Iti las-ud dagiti pader, adda dagiti portico, paraangan, ken kakaykaywan. Naluho ti pannakaarkos dagiti siled babaen kadagiti aruaten a balitok, pirak, ken marmol. Adda dagiti siled a pagturogan maipaay iti sangagasut a sangaili.​—Jewish Antiquities, XV, 318 (ix, 3); The Jewish War, V, 173-182 (iv, 4).