Naan-anay a Pannakiraman iti Naindaklan a Naespirituan a Panagani

“Aduankayo ti aramiden iti trabaho ti Apo.”​—1 COR. 15:58.

 1. Ania ti inyawis ni Jesus kadagiti adalanna?

BAYAT nga agdaldaliasat iti rehion ti Samaria idi arinunos ti 30 K.P., naginana ni Jesus iti asideg ti bubon iti ili ti Sicar. Kinunana kadagiti adalanna: “Itannawagyo dagiti matayo ket matmatanyo dagiti talon, ta purawdan a maipaay iti pannakaani.” (Juan 4:35) Saan a literal a panagani ti tuktukoyen ni Jesus no di ket ti naespirituan a panangurnong kadagiti nasingpet ti panagpuspusona a tattao nga agbalinto a pasurotna. Babaen kadagita a sasao, aw-awisen ni Jesus dagiti adalanna a makiraman iti panagani. Dakkel ti trabaho a masapul a mairingpas ken ababa laeng ti tiempo a mangibanag iti dayta!

2, 3. (a) Ania ti mangipamatmat nga agbibiagtayo iti tiempo ti panagani? (b) Ania ti usigen daytoy nga artikulo?

² Adda naisangsangayan a kaipapananna iti kaaldawantayo ti kinuna ni Jesus maipapan iti panagani. Agbibiagtayo iti tiempo a ti arig talon a sangatauan ket ‘purawen maipaay iti pannakaani.’ Iti kada tawen, minilion ti umaw-awat iti awis a gumun-od kadagiti mangted-biag a kinapudno, ken rinibu a baro nga adalan ti mababautisaran. Pribilehiotayo ti makiraman iti kadakkelan pay laeng a panagani, iti sidong ti panangimaton ti Apo ti panagani a ni Jehova a Dios. ‘Aduankayo kadi iti aramid’ mainaig iti daytoy trabaho a panagani?​—1 Cor. 15:58.

³ Bayat ti tallo ket kagudua a tawen a ministerio ni Jesus ditoy daga, insaganana dagiti adalanna agpaay iti pasetda kas paraani. Usigen daytoy nga artikulo ti tallo kadagiti adu a napateg a leksion nga insuro ni Jesus kadagiti adalanna. Tunggal leksion itampokna ti galad a tumulong kadatayo bayat nga ikagkagumaantayo nga aramiden ti amin a kabaelantayo a makiraman iti moderno-aldaw a panangurnong iti ad-adalan. Saggaysaentayo nga usigen dagitoy a galad.

Napateg ti Kinapakumbaba

 4. Kasano nga inyilustrar ni Jesus ti kinapateg ti kinapakumbaba?

⁴ Iladawanyo daytoy nga eksena: Kalkalpas laeng a nagsusupiatan dagiti adalan no asino ti katan-okan kadakuada. Gapu ta nakarupangetda pay laeng, nangayab ni Jesus iti maysa nga ubing ket pinatakderna iti tengngada. Inturongna ti atensionda iti ubing ket kinunana: “Siasinoman a mangipakumbabanto iti bagina [wenno, “asinoman a mamagbalin iti bagina a nanumo,” Byington] kas itoy nga ubing isu daydiay kadakkelan iti pagarian ti langlangit.” (Basaen ti Mateo 18:1-4.) Ti lubong matmatanna ti maysa a tao sigun iti pannakabalin, kinabaknang, ken autoridad daytoy. Ngem dagiti adalan masapul a matarusanda a tapno maibilangda a natan-ok, ‘pagbalinenda ti bagida a nanumo’ iti imatang dagiti sabsabali. Bendisionan ken usaren laeng ida ni Jehova no ipakitada ti pudno a kinapakumbaba.

5, 6. Apay a napateg ti kinapakumbaba no kayatyo ti makiraman a naan-anay iti trabaho a panagani? Iyilustraryo.

⁵ Agingga ita, adu a tattao ti agporporsegi a gumun-od iti pannakabalin, kinabaknang, ken autoridad. Kas resultana, awanen wenno bassit ti panawenda iti naespirituan a bambanag. (Mat. 13:22) Iti kasumbangirna, dagiti adipen ni Jehova naragsakda a ‘mamagbalin iti bagida a nanumo’ iti imatang ti sabsabali tapno magun-odda ti bendision ken anamong ti Apo ti panagani.​—Mat. 6:24; 2 Cor. 11:7; Fil. 3:8.

⁶ Usigentayo ti ulidan ni Francisco, maysa a panglakayen iti South America. Idi agtutubo pay, nagsardeng nga ageskuela iti kolehio tapno agpayunir. “Idi dandaniakon agkasar,” malagipna, “kabaelak ti agsapul iti panggedan a mangyegto kadakami nga agassawa iti nanamnam-ay a biag. Nupay kasta, inkeddengmi a pasimplien ti panagbiagmi ken intultuloymi a dua ti nagregular pioneer. Idi naaddaankami kadagiti annak, immadu dagiti karit. Ngem tinulongannakami ni Jehova a mangsalimetmet iti pangngeddengmi.” Kinuna ni Francisco: “Iti nasurok a 30 a tawen, nagtultuloyak a nakapagserbi kas panglakayen, malaksid pay iti adu a kanayonan a pribilehio. Dimi pulos nagbabawyan ti simple a panagbiagmi.”

 7. Kasanoyo nga inyaplikar ti balakad ti Roma 12:16?

⁷ No idianyo dagiti “nangato a bambanag” iti daytoy a lubong ken ‘umabuloykayo iti nababa a bambanag,’ manamnamayo met a matagiragsakyo ti adu a kanayonan a bendision ken pribilehio iti trabaho a panagani.​—Roma 12:16; Mat. 4:19, 20; Luc. 18:28-30.

Ti Kinaanep Mangyeg Kadagiti Gunggona

8, 9. (a) Sumarioenyo ti pangngarig ni Jesus mainaig kadagiti talento. (b) Iti siasino a nangnangruna a makaparegta dayta a pangngarig?

⁸ Tapno maaddaantayo iti naan-anay a pannakiraman iti trabaho a panagani, kasapulantayo met ti kinaanep. Inyilustrar dayta ni Jesus babaen ti pangngarig mainaig kadagiti talento.a Dayta a pangngarig ket maipapan iti maysa nga apo a nangitalek iti sanikuana kadagiti tallo nga adipen sakbay a napan iti adayo a lugar. Ti umuna nga adipen immawat iti lima a talento, ti maikadua immawat iti dua, ket ti maikatlo immawat iti maysa. Idi nakapanaw ti apo, siaanep a nagtignay ti umuna ken maikadua nga adipen ken dagus a ‘pinagnegosioda’ dagiti talento a naitalek kadakuada. Ngem “nabuntog” wenno nasadut ti maikatlo nga adipen. Inkalina ti talento a naitalek kenkuana. Idi nagsubli ti apo, ginunggonaanna ti umuna ken maikadua nga adipen babaen ti panangitalekna kadakuada “iti adu a banag.” No maipapan iti maikatlo nga adipen, innalana ti talento a naitalek kenkuana sana pinagtalaw daytoy iti sangakabbalayanna.​—Mat. 25:14-30.

⁹ Awan duadua a kayatmo a tuladen dagiti naanep nga adipen iti pangngarig ni Jesus ken naan-anay a makiramanka iti trabaho a panagaramid iti adalan agingga iti kabaelam. Ngem kasanon no ti kasasaadmo limitaranna ti kabaelam nga aramiden? Nalabit a gapu iti rigat ti panagbiag, mapilitanka nga agtrabaho iti adu nga oras tapno masuportaram ti pamiliam. Wenno kimmapuyen ti salun-atmo. No kasta ti kasasaadmo, ti pangngarig mainaig kadagiti talento ket naglaon iti makaparegta kenka a mensahe.

10. Kasano a nangipakita iti kinanainkalintegan ti apo iti pangngarig mainaig kadagiti talento, ken apay nga ibilangyo a makaparegta dayta?

¹⁰ Imutektekanyo ta ti apo iti pangngarig, ammona nga agduduma ti kabaelan dagiti adipenna. Impamatmatna dayta idi intalekna dagiti talento ‘iti tunggal maysa sigun iti bukodda a kabaelan.’ (Mat. 25:15) Kas ninamnama, ad-adu ti nagapuanan ti umuna nga adipen ngem iti maikadua. Kaskasdi, impateg ti apo ti kinaanep dagitoy dua nga adipen babaen ti panangibilangna kadakuada kas “naimbag ken matalek” ken panangitedna kadakuada iti agpada a gunggona. (Mat. 25:21, 23) Umasping iti dayta, ti Apo ti panagani a ni Jehova a Dios ammona a ti kasasaadmo apektaranna ti magapgapuanam a panagserbi kenkuana. Ngem sigurado nga ipatpategna ti amin-kararua a panagreggetmo nga agserbi ken gunggonaannaka maitunos iti dayta.​—Mar. 14:3-9; basaen ti Lucas 21:1-4.

11. Iyilustrar no kasano a ti panagbalin a naanep bayat dagiti narigat a kasasaad mangyegda iti aglaplapusanan a bendision.

¹¹ Ti ulidan ni Selmira, maysa a Kristiano a taga-Brazil, ipakitana a saan a masapul a nasayaat ti biag ti maysa tapno siaanep a makapagserbi iti Dios. Dua pulo a tawenen ti napalabas, pinapatayda ti asawa ni Selmira isu a maymaysan a mangbibiag iti tallo nga annakna. Simrek a katulong ket masapul nga agtrabaho iti adu nga oras ken agbiahe babaen kadagiti napekpek a pangpubliko a lugan. Iti laksid dagita a pakarigatan, inyurnosna ti eskediulna tapno makapag-regular pioneer. Idi agangay, nagbalin met a regular pioneer ti dua kadagiti annakna. “Iti panaglabas ti tawtawen, nasurok a 20 a tattao ti nayadalak iti Biblia ken nagbalinda a kameng ti ‘pamiliak,’” kinunana. “Agingga ita, ipatpateg ken ibilangdak a gayyem. Maysa dayta a gameng a di magatang ti kuarta.” Awan duadua a ti Apo ti panagani ginunggonaanna dagiti panagregget ni Selmira!

12. Kasanotayo a maipakita ti kinaanep iti trabaho a panangasaba?

¹² No ti agdama a kasasaadmo limitaranna ti mabusbosmo nga oras iti ministerio, maparayraymo latta ti pannakipasetmo iti trabaho a panagani babaen ti panangikagumaam a mamagbalin iti dayta a nabungbunga. No naan-anay nga iyaplikarmo dagiti praktikal a singasing a maipapaay kadagiti linawas a Gimong ti Serbisio, mapasayaatmo ti abilidadmo a mangasaba ken matignayka a mangpadas kadagiti baro a wagas ti panangasaba. (2 Tim. 2:15) Ken no posible, baliwam ti eskediulmo wenno isakripisiom dagiti saan a napateg nga aktibidad tapno regular a masuportaram ti urnos ti kongregasion a mangasaba.​—Col. 4:5.

13. Ania ti tulbek tapno mapatanor ken mataginayon ti kinaaneptayo?

¹³ Laglagipem a ti kinaanep ket resulta ti panagayat ken panagyaman iti Dios. (Sal. 40:8) Ti maikatlo nga adipen iti pangngarig ni Jesus pagamkanna ti apona gapu ta ibilangna daytoy kas naturay ken saan a nainkalintegan. Kas resultana, inkalina ti talento a naitalek kenkuana imbes a paaduenna. Tapno saantayo nga agbalin a kas iti dayta nga adipen, masapul a patanorentayo ti nasinged a relasion iti Apo ti panagani a ni Jehova. Mangyeskediulka iti oras nga agadal ken mangutob kadagiti makaay-ayo a galadna​—ti ayat, kinaanus, ken kinaasina. Iti kasta, matignay ti pusom a mangaramid iti amin a kabaelam nga agserbi kenkuana.​—Luc. 6:45; Fil. 1:9-11.

“Masapul a Nasantuankayo”

14. Ania a nagpateg a kalikagum ti masapul a tungpalen dagiti mayat nga agbalin a paraani?

¹⁴ Iti panangadaw ni apostol Pedro iti Hebreo a Kasuratan, dinakamatna ti nayebkas a pagayatan ti Dios agpaay kadagiti adipenna ditoy daga. Kinunana: “Maitunos iti Daydiay Santo a nangayab kadakayo, agbalinkayo met a nasantuan a mismo iti isuamin a kababalinyo, agsipud ta adda a naisurat: ‘Masapul a nasantuankayo, agsipud ta nasantuanak.’” (1 Ped. 1:15, 16; Lev. 19:2; Deut. 18:13) Itampok dagita a sasao a masapul a nadalus dagiti paraani no maipapan iti moral ken iti naespirituan. Matungpaltayo dayta a nagpateg a kalikagum babaen ti panangaramidtayo kadagiti addang a mamagbalin kadatayo a nadalus. Kasanotayo a maaramid dayta? Babaen ti kinapudno nga isursuro ti Dios.

15. Ania ti kabaelan nga aramiden kadatayo ti kinapudno nga isursuro ti Dios?

¹⁵ Ti kinapudno nga isursuro ti Dios ket nayarig iti mangdalus a danum. Kas pagarigan, insurat ni apostol Pablo a ti kongregasion dagiti napulotan a Kristiano ket nadalus iti imatang ti Dios, kas nasin-aw a nobia agpaay ken Kristo, a nangdalus kenkuana iti ‘pangbuggo a danum babaen ti sao tapno nasantuan koma dayta ken awan pakapilawanna.’ (Efe. 5:25-27) Dinakamat met idi ni Jesus nga adda bilegna a mangdalus ti sao ti Dios nga inwaragawagna. Kinuna ni Jesus kadagiti adalanna: “Nadaluskayon gapu iti sao a sinaok kadakayo.” (Juan 15:3) Gapuna, ti kinapudno nga isursuro ti Dios kabaelannatayo a dalusan iti moral ken iti naespirituan. Agbalin laeng a makaay-ayo iti Dios ti panagdayawtayo no agpadalustayo iti kinapudno nga isursurona.

16. Kasanotayo a makapagtalinaed a nadalus iti naespirituan ken moral?

¹⁶ Gapuna, tapno maikaritayo kas paraani ti Dios, masapul nga iwaksitayo nga umuna ti amin nga aramid a mangmulit kadatayo iti naespirituan ken iti moral. Wen, makapagtultuloytayo a kualipikado iti dayta a pribilehio no siiinget a salimetmetantayo dagiti nangato a pagalagadan ni Jehova iti moral ken naespirituan. (Basaen ti 1 Pedro 1:14-16.) No kasano a tagtaginayonentayo ti pisikal a kinadalustayo, masapul met a regular nga agpagugortayo kadagiti kinapudno nga isursuro ti Dios. Ramanen dayta ti panagbasa iti Biblia ken pannakigimong. Kaipapananna met ti napasnek a panangyaplikar kadagiti pammalagip ti Dios. No aramidentayo dayta, maparmektayo dagiti pagannayasan nga agbasol ken masarangettayo dagiti mangmulit nga impluensia daytoy a lubong. (Sal. 119:9; Sant. 1:21-25) Anian a makaliwliwa a maammuan a babaen ti tulong ti kinapudno nga isursuro ti Dios, mabalin a ‘maugasantayo’ uray nakaaramidtayo iti nadagsen a basol!​—1 Cor. 6:9-11.

17. Tapno makapagtalinaed a nadalus, ania a balakad ti Biblia ti masapul nga ipangagtayo?

¹⁷ Agpagpagugorka kadi kadagiti kinapudno nga isursuro ti Dios? Kas pagarigan, ania ti aramidem no adda mangpalagip kenka maipapan kadagiti peggad nga itden daytoy nalulok a paglinglingayan ti lubong? (Sal. 101:3) Likliklikam kadi dagiti saan a nesesita a pannakikadua kadagiti kaeskuelaan ken katrabahuan a saanmo a kapammatian? (1 Cor. 15:33) Sipapasnek kadi a parparmekem dagiti pagkapuyam a mamagbalin kenka a narugit iti imatang ni Jehova? (Col. 3:5) Naan-anay kadi a dika makipaspaset iti politika daytoy a lubong ken iti nasionalismo a nasaknap iti adu a kompetision iti isport?​—Sant. 4:4.

18. Kasano a ti kinadalus iti moral ken naespirituan pagbalinennatayo a nabunga a paraani?

¹⁸ Mangyeg iti agkakaimbag a resulta no naan-anay nga ipangagmo dagitoy a balakad. Dagiti napulotan nga adalan ni Jesus ket inyarigna kadagiti sanga ti ubas, a kinunana: “Tunggal sanga nga adda kaniak a saan a mangpatpataud iti bunga [ti Amak] ikkatenna, ket tunggal maysa a mangpatpataud iti bunga dalusanna, tapno mangpataud iti ad-adu pay a bunga.” (Juan 15:2) No agpagugorka iti kinapudno iti Biblia, agbalinka a nabungbunga.

Dagiti Bendision Ita ken iti Masanguanan

19. Kasano a nabendisionan ti panagregget dagiti adalan ni Jesus kas paraani?

¹⁹ Dagiti matalek nga adalan a nagpaisuro ken Jesus ket pinabileg ti nasantuan nga espiritu idi Pentecostes 33 K.P. tapno agbalinda a saksi “agingga iti kaadaywan a paset ti daga.” (Ara. 1:8) Dadduma kadakuada ti nagserbi kas miembro ti bagi a manarawidwid, misionero, ken agdaldaliasat a panglakayen, ken naaddaanda iti napateg a paset iti pannakaikasaba ti naimbag a damag “iti isuamin a parsua nga adda iti baba ti langit.” (Col. 1:23) Anian a bendision ti inapitda, ken anian a rag-o ti inyegda iti sabsabali!

20. (a) Ania dagiti bendision a natagiragsakyo gapu iti naan-anay a pannakiramanyo iti naespirituan a panagani? (b) Ania ti determinado nga aramidenyo?

²⁰ Wen, babaen ti panangipakita iti kinapakumbaba, kinaanep, ken panangsalimetmet kadagiti nangato a pagalagadan ti Sao ti Dios, agtultuloy a maaddaantayo iti naan-anay ken makagunggona a paset iti naindaklan a naespirituan a panagani a maar-aramid ita. Nupay adu ti agpaspasar iti saem ken pannakaupay nga itden ti panagbiag iti lubong a naisentro iti material ken ragragsak, tagtagiragsakentayo ti pudno a rag-o ken pannakapnek. (Sal. 126:6) Kangrunaan iti amin, “ti panagbannogyo saan nga ubbaw mainaig iti Apo.” (1 Cor. 15:58) Ti Apo ti panagani a ni Jehova a Dios, agnanayonto a gunggonaannatayo maibatay iti ‘aramidtayo ken iti ayat nga impakitatayo maipaay iti naganna.’​—Heb. 6:10-12.

[Footnote]

Malagipyo Kadi?

Bayat nga ikagkagumaanyo ti naan-anay a pannakiraman iti panagani . . .

• apay a napateg ti agbalin a napakumbaba?

• kasano a mapatanor ken mataginayonyo ti kinaanep?

• apay a napateg ti panagtalinaed a nadalus iti moral ken naespirituan?

[Ladawan iti panid 17]

Ti kinapakumbaba tulongannatayo a mangsalimetmet iti simple a panagbiag a naisentro kadagiti interes ti Pagarian