Ti Biag ken Ministerio ni Jesus

Ti Maikadua a Milagro Idiay Cana

IDI nagsubli ni Jesus idiay ili a teritoriana kalpasan ti nabayag a panangaskasaba a kampania idiay Judea, daytat’ saan a tapno aginana. Imbes ketdi, rinugianna ti dakdakkel pay a ministerio idiay Galilea, ti daga a dinakkelanna. Ngem dagiti adalanna, imbes a makipagianda kenkuana nagsublida kadagiti pampamiliada ken kadagiti dati a panggedanda.

Ania a mensahe ti rinugian nga inkaskasaba ni Jesus? Daytoy: “Ti pagarian ti Dios asidegen. Agbabawikayo, ket mamatikayo iti naimbag a damag.” Ket ti sungbatda? Inawat dagiti taga Galilea ni Jesus. Isu ti indaydayaw dagiti isuamin. Nupay kasta, daytoy ket saan a nangnangruna gapu iti mensahena no di ket, gapu ta adu kadakuada ti adda idiay Jerusalem idi Paskua adu a bulan sakbayna ket nakitada dagiti nakaskasdaaw a pagilasinan nga inaramidna.

Kaawatan a rinugian ni Jesus ti naindaklan a ministeriona iti Galilea idiay Cana. Iti nasapsapa, nalabit malagipyo pay, idi nagsubli manipud Judea, pinagbalinna ti danum nga arak iti maysa a pagbodaan sadiay. Iti daytoy maikadua nga okasion ti anak ti maysa nga opisial ti gobierno ni Ari Herodes Antipas ti masakit unay. Idi nangngegna a ni Jesus ti immay manipud Judea idiay Cana, nagdaliasat ti opisial manipud iti pagtaenganna idiay Capernaum tapno isut’ sarakenna. Iti ladingitna, indawatna: ‘Pangngaasim umayka daras sakbay a matay ti anakko.’

Simmungbat ni Jesus: ‘Agawidkan. Ti anakmo naimbaganen!’ Namati ti opisial ni Herodes ket nangrugin nga agsubli iti adayo a pagtaenganna. Idiay dalan isut’ sinabat dagiti ad-adipenna, a nagdardaras a nangibaga kenkuana nga amin ket nasayaaten​—ti anakna ti naimbaganen! ‘Kaano nga immimbag?’ inimtuodna.

‘Idi kalman iti ala 1:00 t.m.,’ insungbatda.

Naawatan ti opisial a daytoy daydiay mismo a panagkuna ni Jesus, ‘Ti anakmo naimbaganen!’ Kalpasan dayta, ti lalaki ken ti intero a sangakabbalayanna nagbalinda nga ad-adalan ni Kristo.

Ngarud ti Cana naparaburan kas ti lugar a sadiay, ipamatmatna ti panagsublina idiay Judea, ti namindua a nangaramiden ni Jesus kadagiti milagro. Dagitoy, siempre, ket saan nga isuda laeng dagiti milagro nga inaramidna agingga itoy a kanito, no di ket napategda agsipud ta tinandaanda ti panagsublina idiay Galilea.

Itan agturongen ni Jesus idiay Nasaret. Aniat’ agur-uray kenkuana sadiay? Juan 4:43-54; Marcos 1:14, 15; Lucas 4:14, 15.

◆ Idi nagsubli ni Jesus idiay Galilea, aniat’ napasamak kadagiti adalanna, ket kasanot’ panangawat dagiti tattao kenkuana?

◆ Ania a milagro ti inaramid ni Jesus, ket kasanot’ panangapektarna kadagidiay nairaman?

◆ Kasano a ti Cana ngarud ti pinaraburan ni Jesus?

[Ladawan iti panid 8]