Tagiragsakem ti Trabahom

1-3. (a) Ania ti panagrikna ti adu a tattao iti trabahoda? (b) Ania dagiti saludsod nga usigentayo iti daytoy a kapitulo?

ITI intero a lubong, igagaed unay dagiti tattao ti agtrabaho tapno masuportaranda ti bagida ken ti pamiliada. Saan a kayat ti adu a tattao ti trabahoda, ken dadduma ti mabutbuteng a mapan iti pagtrabahuanda iti inaldaw. No kasta ti marikriknam, ania ti maaramidam tapno ad-adda a matagiragsakmo ti trabahom? Kasanoka nga agbalin a naragsak iti trabahom?

² Kuna ni Jehova: “Mangan, uminum, ken tagiragsaken koma ti amin ti bunga ti napasnek a panagtrabahona. Sagut ti Dios dayta.” (Eclesiastes 3:13) Pinarsuanatayo ni Jehova nga addaan iti panagkasapulan ken tarigagay nga agtrabaho. Kayatna a maragsakantayo kadagiti ar-aramidentayo.​—Basaen ti Eclesiastes 2:24; 5:18.

³ No kasta, ania ti makatulong kadatayo a mangtagiragsak iti trabahotayo? Ania dagiti klase ti trabaho a masapul a liklikan dagiti Kristiano? Kasano a mabalansetayo ti trabahotayo ken ti panagdaydayawtayo ken Jehova? Ken ania ti kapatgan a trabahotayo?

4, 5. Ania ti panangmatmat ni Jehova iti trabaho?

⁴ Pagay-ayat ni Jehova ti agtrabaho. Kuna ti Genesis 1:1: “Idi un-unana, pinarsua ti Dios ti langit ken ti daga.” Kalpasan nga inaramid ti Dios ti daga ken ti amin nga adda iti dayta, imbagana a “nakasaysayaat” dagiti pinarsuana. (Genesis 1:31) Napnek ti Namarsua kadatayo kadagiti inaramidna.​—1 Timoteo 1:11.

⁵ Pulos a saan nga agsarsardeng ni Jehova nga agtrabaho. Kinuna ni Jesus: “Agtrabtrabaho ni Amak agingga ita.” (Juan 5:17) Nupay ditay ammo ti amin a nakaskasdaaw nga inaramiden ni Jehova, ammotayo ti dadduma kadagita. Pinilina dagidiay makipagturay iti Anakna a ni Jesu-Kristo, kas paset ti Pagarian. (2 Corinto 5:17) Kanayon met nga idaldalan ken ay-aywanan ni Jehova dagiti tattao. Gapu iti sangalubongan a trabaho a panangasaba, minilionen ti makaam-ammo ken Jehova ken addaan iti namnama nga agbiag nga agnanayon iti paraiso a daga.​—Juan 6:44; Roma 6:23.

6, 7. Ania a klase a trabahador ni Jesus?

⁶ Kas ken Amana, pagay-ayat ni Jesus ti agtrabaho. Sakbay nga immay ni Jesus ditoy daga, isu ti “eksperto a trabahador” ti Dios, ta timmulong iti pannakaparsua ti amin a banag idiay langit ken ditoy daga. (Proverbio 8:22-31; Colosas 1:15-17) Idi adda ditoy daga, intultuloy ni Jesus ti kinagagetna nga agtrabaho. Idi agtutubo, nasursurona ti agbalin nga eksperto a karpintero, nalabit nga iti panagaramid kadagiti muebles ken balay. Nakalalaing ni Jesus iti trabahona isu a pagaammo kas “ti karpintero.”​—Marcos 6:3.

⁷ Ngem ti kapatgan a trabaho ni Jesus ditoy daga ket ti panangikasaba iti naimbag a damag ken panangisuro kadagiti tattao maipapan ken Jehova. Tallo ket kagudua a tawen idi a masapul nga ileppasna ti ministeriona isu a nagaget a nagtrabaho manipud iti bigbigat agingga iti nakarabrabiin. (Lucas 21:37, 38; Juan 3:2) Ginasut a kilometro ti pinagpagna ni Jesus kadagiti natapok a kalsada tapno ipakaammona ti naimbag a damag iti adu a tattao.​—Lucas 8:1.

8, 9. Apay a naragsak ni Jesus iti trabahona?

⁸ Para ken Jesus, ti panangaramid iti trabaho ti Dios ket kas iti taraon. Dayta a trabaho ti nangpaganaygay ken nangpabileg kenkuana. Adda dagiti aldaw a nakagaggaget a nagtrabaho nga uray la awanen ti orasna a mangan. (Juan 4:31-38) Inusarna ti tunggal gundaway a tumulong iti sabsabali a mangammo maipapan iti Amana, isu a naibagana ken Jehova: “Pinadayagka ditoy daga, ta inleppasko ti trabaho nga intedmo.”​—Juan 17:4.

⁹ Nalawag nga agpadpada a nakagaggaget ni Jehova ken ni Jesus ket naragsak ken mapnekda iti trabahoda. Kayattayo a ‘tuladen ti Dios,’ ken ‘suroten a naimbag dagiti addang’ ni Jesus. (Efeso 5:1; 1 Pedro 2:21) Dayta ti rason nga ikagkagumaantayo ti agtrabaho a naimbag ken aramiden ti amin a kabaelantayo iti aniaman a trabahuentayo.

10, 11. Ania ti makatulong tapno positibo ti panangmatmattayo iti trabahotayo?

¹⁰ Kas ili ni Jehova, igagaedtayo ti agtrabaho tapno masuportarantayo ti bagitayo ken ti pamiliatayo. Kayattayo a naragsaktayo iti trabahotayo ngem mabalin a narigat dayta. Ania ngarud ti maaramidantayo no saantayo a naragsak iti trabahotayo?

¹¹ Agbalinka a positibo. Mabalin a ditay mabaliwan no sadino ti pagtrabahuantayo wenno no kasano kaadu ti trabahuentayo, ngem kabaelantayo a baliwan ti panangmatmattayo. Makatulong no maawatantayo ti namnamaen ni Jehova kadatayo. Kas pagarigan: Namnamaen ni Jehova nga ipaay ti ulo ti pamilia dagiti kasapulan ti pamiliana sigun iti amin a kabaelanna. Kinapudnona, kuna ti Biblia a daydiay saan a mangipaay kadagiti kasapulan ti pamiliana ket “dakdakes ngem iti tao nga awanan pammati.” (1 Timoteo 5:8) No maysaka nga ulo ti pamilia, ikagumaam nga ipaay dagiti kasapulan ti pamiliam. Kayatmo man wenno saan ti trabahom, ammom a no ipapaaymo dagiti kasapulan ti pamiliam, maparparagsakmo met ni Jehova.

12. Kasano a makagunggona kadatayo ti kinagaget iti trabaho ken kinamapagtalkan?

¹² Agbalinka a nagaget ken mapagtalkan. Dagita ti ad-adda a makatulong kenka tapno matagiragsakmo ti trabahom. (Proverbio 12:24; 22:29) Ti maysa a rason ket pagtalkannaka ti amom. Ipatpateg dagiti amo dagiti mapagtalkan nga empleado ta saanda nga agtakaw iti kuarta, materiales, wenno oras. (Efeso 4:28) Napatpateg pay, ammo ni Jehova no nagaget ken mapagtalkanka. ‘Nadalus ti konsiensiam’ ta ammom a maparparagsakmo ti Dios nga ay-ayatem.​—Hebreo 13:18; Colosas 3:22-24.

13. Ania pay ti mabalin a resulta no mapagtalkantayo iti trabaho?

¹³ Panunotem a ti kababalinmo iti trabahom ket pakaidayawan ni Jehova. Dayta ti maysa pay a rason a mangparagsak kadatayo nga agtrabaho. (Tito 2:9, 10) Mabalin pay ketdi a kayat ti maysa kadagiti katrabahuam ti makipagadal iti Biblia gapu iti nasayaat nga ulidanmo.​—Basaen ti Proverbio 27:11; 1 Pedro 2:12.

14-16. Ania dagiti masapul a tingitingentayo no agpilitayo iti trabaho?

¹⁴ Awan ti mabasa iti Biblia a listaan dagiti trabaho a masapul nga awaten wenno saan nga awaten dagiti Kristiano. Ngem naglaon dayta kadagiti prinsipio a tumulong kadatayo a mangaramid kadagiti umiso a desision maipapan iti trabaho. (Proverbio 2:6) Usarentayo dagiti prinsipio ti Biblia a mangisaludsod iti bagitayo kadagitoy:

¹⁵ Daytoy kadi a trabaho ti pakapilitak a mangaramid iti dakes iti imatang ni Jehova? Naammuantayon dagiti aramid a kagura ni Jehova kas iti panagtakaw ken panagulbod. (Exodo 20:4; Aramid 15:29; Efeso 4:28; Apocalipsis 21:8) No kasta, liklikantayo ti aniaman a trabaho a maikontra kadagiti pagalagadan ni Jehova.​—Basaen ti 1 Juan 5:3.

¹⁶ Suportaran wenno itandudo kadi daytoy a trabaho ti aramid nga iparit ni Jehova? Kas pagarigan, no ngay ti trabaho a maited kenka ket receptionist iti klinika a pagpaaborsionan? Saan a dakes ti agbalin a receptionist. Ngem ammom ti panangmatmat ni Jehova iti aborsion. Isu nga uray no saan a sika ti mismo a mangregreg iti sikog, dimo kadi mapanunot a para ken Jehova, makiramramanka iti panagbasol?​—Exodo 21:22-24.

17. Ania ti makatulong kadatayo a mangaramid kadagiti desision a mangparagsak iti Dios?

¹⁷ Babaen ti panangusartayo kadagiti prinsipio ti Dios, agbalintayo a kas kadagiti klase ti tattao a nailadawan iti Hebreo 5:14, “a gapu iti kanayon a panangusarda iti abilidadda nga agpanunot, nasursurodan nga ilasin ti umiso ken di umiso.” Isaludsodmo iti bagim: ‘Adda kadi maitibkol no awatek daytoy a trabaho? Gapu iti daytoy a trabaho, kapilitan kadi nga agyanak iti lugar wenno iti sabali pay ketdi a pagilian nga adayo iti asawak ken annakko? Ania ti epekto daytoy kadakuada?’

18. Apay a mabalin a narigat nga ipangpangruna ti panagdaydayawtayo?

¹⁸ Mabalin a narigat nga ipangpangruna ti panagdaydayawtayo ken Jehova kabayatan dagitoy “delikado ken narigat a tiempo.” (2 Timoteo 3:1) Talaga a narigat ti agbirok iti trabaho ken agtalinaed iti dayta. Masapul nga ipaaytayo dagiti kasapulan ti pamiliatayo ngem ammotayo a ti panagdaydayawtayo ti kangrunaan. Ditay ipalubos nga agbalin a nakapatpateg unay iti biagtayo dagiti material a banag. (1 Timoteo 6:9, 10) Kasanotayo ngarud a ‘masigurado ti napatpateg a bambanag’ ngem maipaaytayo latta dagiti kasapulan ti pamiliatayo?​—Filipos 1:10.

19. Kasano a makatulong ti panagtalek ken Jehova tapno agbalintayo a balanse maipapan iti trabahotayo?

¹⁹ Naan-anay nga agtalekka ken Jehova. (Basaen ti Proverbio 3:5, 6.) Ammotayo nga ammo ni Jehova dagiti eksakto a kasapulantayo ken ipatpategnatayo unay. (Salmo 37:25; 1 Pedro 5:7) Kuna ti Saona: “Iti panagbiagyo, saanyo nga ayaten ti kuarta, no di ket kontentokayo koman kadagiti agdama a bambanag. Ta imbagana: ‘Saankanto a pulos panawan ken saankanto a pulos baybay-an.’” (Hebreo 13:5) Saan a kayat ni Jehova nga agtultuloytayo a madanagan maipapan iti panangipaay iti kasapulan ti pamiliatayo. Maulit-ulit nga impakitana a kabaelanna nga ipaay dagiti kasapulan ti ilina. (Mateo 6:25-32) Aniaman ti kasasaadtayo iti trabaho, regular nga adalentayo ti Sao ti Dios, ikasabatayo ti naimbag a damag, ken makigimongtayo.​—Mateo 24:14; Hebreo 10:24, 25.

20. Kasanotayo a mapagtalinaed a simple ti biagtayo?

²⁰ Pagtalinaedem a naipamaysa ti matam. (Basaen ti Mateo 6:22, 23.) Kaipapananna a pagtalinaedem a simple ti biagmo tapno maipangpangrunam ti agserbi ken Jehova. Ammotayo a kinamaag no ipalubostayo a ti kuarta, nanam-ay a biag, wenno dagiti kabaruan a gadyet ti agbalinen a napatpateg kadatayo ngem iti pannakigayyemtayo iti Dios. Ania ngarud ti makatulong tapno mayun-unatayo dagiti kangrunaan? Ikagumaantayo ti saan nga umutang. No adda utangmo, mangaramidka iti praktikal a pamay-an a main-inutam a mabayadan wenno mabayadam amin. No ditay agannad, dagiti material a banag ti mangibus iti adu a tiempo ken pigsatayo, ket mabalin nga awanen ti tiempotayo nga agkararag, agadal, wenno mangasaba. Imbes nga ipalubostayo nga agbalin a komplikado ti biagtayo gapu iti material a bambanag, sursuruentayo ti agbalin a kontento kadagiti kangrunaan a kasapulan kas iti ‘taraon ken bado.’ (1 Timoteo 6:8) Aniaman ti situasiontayo, nasayaat no pasaray usigentayo ti kasasaadtayo tapno makitatayo no kasano nga ad-adda pay a makapagserbitayo ken Jehova.

21. Apay a masapul nga ikeddengtayo no ania ti ipangpangrunatayo iti biagtayo?

²¹ Maaddaanka kadagiti umiso a prioridad. Masapul nga usarentayo a nainsiriban ti tiempotayo, pigsatayo, ken material a bambanag. No ditay agannad, dagiti saan unay a napateg, kas iti edukasion wenno kuarta, ti mangibus iti napateg a tiempotayo. Kinuna ni Jesus: “Itultuloyyo . . . a sapulen nga umuna ti Pagarian.” (Mateo 6:33) Ipakita ti amin a desision, ugali, inaldaw nga ar-aramiden, ken kalattayo no ania ti ipangpangruna ti pusotayo.

22, 23. (a) Ania ti kapatgan a trabahotayo kas Kristiano? (b) Ania ti makatulong tapno matagiragsaktayo ti trabahotayo?

²² Ti panagserbi ken Jehova ken ti panangikasaba iti naimbag a damag ti kapatgan a trabahotayo. (Mateo 24:14; 28:19, 20) Kas ken Jesus, kayattayo nga aramiden ti amin a kabaelantayo iti daytoy a trabaho. Dadduma ti immakar iti lugar nga agkasapulan iti ad-adu a manangaskasaba. Nagsursuro ti dadduma iti sabali a lengguahe tapno makasabaanda dagiti tattao iti dayta a lengguahe. Kasaritam dagiti nangaramiden iti kasta ket isaludsodmo ti maipapan iti dayta. Ibagadanto a naragragsak ken ad-addan a makapnek ti biagda.​—Basaen ti Proverbio 10:22.

²³ Adu kadatayo ita ti agtrabtrabaho iti adu nga oras wenno addaan pay ketdi iti nagduduma a trabaho tapno laeng maipaaytayo dagiti kangrunaan a kasapulan ti pamiliatayo. Ammo ni Jehova daytoy ken ap-apresiarenna ti amin nga ar-aramidentayo a mangaywan iti pamiliatayo. Isu nga itultuloytayo amin ti agbalin a nagaget kas panangtulad ken Jehova ken ni Jesus, aniaman ti klase ti trabahotayo. Laglagipentayo koma a ti kapatgan a trabahotayo ket ti panagserbi ken Jehova ken ti panangikasaba iti naimbag a damag maipapan iti Pagarian ti Dios. Mangyeg dayta iti pudpudno a ragsak.