Ania ti Kuna ti Biblia Maipapan Kadagiti Natural a Didigra?

Sungbat ti Biblia

Saan a ti Dios ti makagapu kadagiti natural a didigra a mapaspasamak ita, ngem maseknan kadagiti tattao a naapektaran kadagita. Ti natural a didigra ket maysa kadagiti makagapu iti panagsagaba nga ikkatento ti Pagarian ti Dios. Kabayatanna, mangipapaay ti Dios iti liwliwa kadagiti naapektaran kadagiti natural a didigra.​—2 Corinto 1:3.

• Apay a masiguradotayo a saan a pannusa ti Dios dagiti natural a didigra?

• Dagiti kadi natural a didigra ket pagilasinan nga agbibiagtayo iti maudi nga al-aldaw?

• Kasano a tulongan ti Dios dagiti biktima ti natural a didigra?

• Matulongannatayo kadi ti Biblia nga agsagana no dumteng ti natural a didigra?

• Dagiti teksto iti Biblia a makaliwliwa kadagiti biktima ti natural a didigra

Apay a masiguradotayo a saan a pannusa ti Dios dagiti natural a didigra?

Agduma ti natural a didigra ken ti panangusar ti Dios iti puersa ti nakaparsuaan kas nailanad iti Biblia.

• Mabalin a matay wenno mabaldado ti asinoman gapu iti natural a didigra. Maisupadi iti dayta, pinili ti Dios ti nangipakatanna iti panangukomna kas mabasa iti Biblia. Kas pagarigan, idi dinadael ti Dios dagiti nagkauna a siudad ti Sodoma ken Gomorra, saanna nga inraman ti naimbag a tao a ni Lot ken ti dua a babbalasangna. (Genesis 19:29, 30) Nakita ti Dios ti puso dagiti indibidual iti daydi a tiempo ket dinadaelna laeng dagidiay managdakdakes.​—Genesis 18:23-32; 1 Samuel 16:7.

• Masansan a di mapakpakadaan dagiti natural a didigra. Iti sabali a bangir, pinakdaaran ti Dios dagiti managdakdakes sakbay nga inusarna dagiti puersa ti nakaparsuaan a nangdusa kadakuada. Dagiti laeng nangipangag kadagiti pakdaar ti nakalasat.​—Genesis 7:1-5; Mateo 24:38, 39.

• Aramid met laeng ti tao ti dadduma a makagapu kadagiti natural a didigra. Kasano? Babaen ti panangdadaelda iti aglawlaw ken panangibangonda kadagiti pasdek kadagiti lugar a masansan a maapektaran iti ginggined, layus, ken saan a nasayaat a paniempo. (Apocalipsis 11:18) Saan a ti Dios ti makimbasol kadagita nga aramid ti tao.​—Proverbio 19:3.

Dagiti kadi natural a didigra ket pagilasinan nga agbibiagtayo iti maudi nga al-aldaw?

Wen, impadto ti Biblia nga addanto dagiti didigra bayat “ti panungpalan daytoy a sistema ti bambanag,” wenno “iti maudi nga al-aldaw.” (Mateo 24:3; 2 Timoteo 3:1) Kas pagarigan, imbaga ni Jesus maipapan iti tiempotayo: “Addanto . . . bisin ken ginggined iti nadumaduma a lugar.” (Mateo 24:7) Asidegen nga ikkaten ti Dios ti amin a makagapu iti ut-ot ken panagsagaba ditoy daga, a pakairamanan dagiti natural a didigra.​—Apocalipsis 21:3, 4.

Kasano a tulongan ti Dios dagiti biktima ti natural a didigra?

• Liwliwaen ti Dios dagiti biktima babaen ti Saona, ti Biblia. Ipasigurado ti Biblia a maseknan ti Dios kadatayo ken masaktan no agsagabatayo. (Isaias 63:9; 1 Pedro 5:6, 7) Ibaga pay ti Biblia ti karina a maawanton dagiti natural a didigra.—Kitaem ti “Dagiti teksto iti Biblia a makaliwliwa kadagiti biktima ti natural a didigra.”

• Tulongan ti Dios dagiti biktima babaen kadagiti agdaydayaw kenkuana. Usaren ti Dios dagiti agdaydayaw kenkuana ditoy daga a mangtulad iti ulidan ni Jesus. Naipadto a liwliwaen ni Jesus dagiti “nasaktan ti pusona” ken ti “amin nga agladladingit.” (Isaias 61:1, 2) Ikagkagumaan met dagiti agdaydayaw iti Dios nga aramiden dayta.​—Juan 13:15.

  Us-usaren met ti Dios dagiti agdaydayaw kenkuana a mangipaay iti praktikal a tulong kadagiti biktima ti natural a didigra.​—Aramid 11:28-30; Galacia 6:10.

Matulongannatayo kadi ti Biblia nga agsagana no dumteng ti natural a didigra?

Wen. Nupay saan a naglaon ti Biblia kadagiti instruksion no kasano ti agsagana no dumteng ti didigra, naglaon dayta kadagiti makatulong a prinsipio. Kas pagarigan:

• Agplano a nasaksakbay. “Makita ti masirib a tao ti peggad ket aglemmeng,” kuna ti Biblia. (Proverbio 22:3) Masiribtayo no iplanotayo ti aramidentayo sakbay a dumteng ti didigra. Mabalin a karaman kadagiti isaganayo ti emergency kit a mabalinyo a bitbiten no adda didigra ken praktisenyo a sangapamiliaan no pagsasarakanyo no adda didigra.

• Ad-adda nga ipateg ti biag ngem ti sanikua. Ibaga ti Biblia: “Awan ti inyegtayo ditoy lubong, ket awan ti maitugottayo no mataytayo.” (1 Timoteo 6:7, 8) Masapul a sidadaantayo a mangpanaw iti balay ken sanikuatayo tapno makalasattayo iti didigra. Masapul a laglagipentayo a napatpateg ti biagtayo ngem ti aniaman a material a sanikuatayo.​—Mateo 6:25.