Maseknan ti Dios Kadakayo

NI Mary, maysa a Kristiano a babai nga agedad iti nasurok nga 40, nagsagaba iti nakaro iti biagna. Nangiturong ti pannakikamalala ni lakayna iti diborsio nasurok a sangadekadan ti napalabas. Sipud idi, inkagumaan ni Mary a tungpalen ti akemna kas agsolsolo a nagannak kadagiti uppat nga annakna. Ngem agmaymaysa pay laeng, ket no dadduma kasla dina maibturan ti kinaliday. Pinampanunot ni Mary, ‘Kaipapanan kadi daytoy a saan a maseknan ti Dios kaniak wenno kadagiti annakko nga awanan ama?’

Napadasanyo man wenno saan ti umasping a rigat, awan duadua a makipagriknakayo ken Mary. Napasarantay amin dagiti narigat a kasasaad, ket mabalin a pinampanunottayon no kaano ken kasano nga agtignay ni Jehova maigapu kadatayo. Dadduma kadagitoy a kapadasan ti direkta a resulta ti panangannurottayo kadagiti linteg ti Dios. (Mateo 10:16-18; Aramid 5:29) Ti dadduma bunga ti kinaimperpektotayo kas tattao nga agbibiag iti lubong nga iturturayan ni Satanas. (1 Juan 5:19) Insurat ni apostol Pablo: “Isuamin a sangaparsuaan agtultuloyda nga agas-asug a sangsangkamaysa ken agpapaut-otda.”​—Roma 8:22.

Nupay kasta, ti kinapudno a maipaspasangokayo iti nakaro a suot dina kayat a sawen a binaybay-annakayon ni Jehova wenno saan nga interesado iti pagimbaganyo. Kasanoyo a masigurado daytoy? Aniat’ mangipakpakita a maseknan ti Dios kadakayo?

Maysa a Nagkauna a Pagarigan

Mangipaay ti Biblia iti nalawag a pammaneknek iti pannakaseknan ni Jehova kadagiti tattao kas indibidual. Usigenyo ni David. Personal nga interesado ni Jehova iti daytoy agtutubo a pastor, a nasarakanna nga isut’ “maysa a lalaki a mayannurot iti pusona.” (1 Samuel 13:14) Kalpasanna, idi nagturay ni David kas ari, inkari ni Jehova kenkuana: ‘Addaakto kenka iti uray sadino a papanam.’​—2 Samuel 7:9.

Kaipapanan kadi daytoy a nagbiag ni David nga addaan “anting-anting,” a nailiklik iti aniaman a parikut? Saan, naipasango ni David kadagiti nakaro a suot agpadpada idi sakbay ken kabayatan ti panagturayna. Adu a tawen sakbay a nagbalin nga ari, awan sardayna nga inan-anup ni mammapatay nga Ari Saul. Kabayatan daytoy a panawen ti panagbiagna, insurat ni David: “Ti kararuak adda iti tengnga dagiti leon . . . uray kadagiti annak dagiti tattao, a dagiti ngipenda pikpika ken panpana.”​—Salmo 57:4.

Kaskasdi, iti daytoy intero [a panawen] ti rigat kombinsido ni David iti personal a pannakaseknan ni Jehova. “Sika bilangem dagiti pannakaisiasik,” kinunana iti maysa a kararag ken Jehova. Wen, para ken David arignat’ pinatalgedan ni Jehova ti intero a suot. Kalpasanna kinuna pay ni David: “Iboteliam iti lalat dagiti luluak. Saan aya nga addada iti librom?”a (Salmo 56:8) Babaen iti daytoy nga ilustrasion, inyebkas ni David ti panagtalek nga ammo ni Jehova saan laeng a ti kasasaad no di ket kasta met ti epektona iti emosion.

Iti panagpatingga ti biagna, maisurat ni David manipud iti personal a kapadasanna: “Dagiti panagaddang ti naimbag a tao patalgedan ni Jehova, ket Isu maayatanna ti dalanna. Uray matuang, saanto a madalupisak, ta ni Jehova saranayenna iti imana.” (Salmo 37:23, 24) Makapagtalekkay met nga uray no kanayon nga adda ken agtultuloy dagiti pakasuotanyo, makita ken ipateg ni Jehova ti panagibturyo. Insurat ni Pablo: “Saan a nakillo ti Dios tapno lipatenna ti aramidyo ken ti ayat nga impakitayo iti naganna, iti panagserbiyo kadagiti sasanto ken agtultuloykayo nga agserserbi.”​—Hebreo 6:10.

Maysa pay, mabalin nga agtignay ni Jehova maigapu kadakayo babaen ti panangpapigsana kadakayo nga agibtur iti aniaman a bangen iti danayo. “Adu dagiti siksikor ti nasingpet,” insurat ni David, “ngem ni Jehova ispalenna kadakuada amin.” (Salmo 34:19) Kinapudnona, kuna kadatayo ti Biblia a dagiti mata ni Jehova “mapanda nga agsublisubli iti amin a lubong, tapno isu agparang a napigsa a bumadang kadagidiay a ti pusoda napalungdo a maiturong kenkuana.”​—2 Cronicas 16:9.

Inyasidegnakay ni Jehova

Masarakan iti sasao ni Jesus ti kanayonan a pammaneknek ti personal a pannakaseknan ni Jehova: “Awan ti tao a makaumay kaniak,” kinunana, “malaksid no ti Ama, a nangibaon kaniak, ti mangiyasideg kenkuana.” (Juan 6:44) Wen, tultulongan ni Jehova tunggal maysa dagiti tattao a mangaprobetsar kadagiti gunggona ti daton ni Kristo. Kasano? Kangrunaanna, daytat’ babaen ti trabaho a panangikasaba iti Pagarian. Pudno, agserbi daytoy a trabaho kas “pangsaksi kadagiti isuamin a nasnasion,” nupay kasta madanonna dagiti tattao iti indibidual a pamay-an. Ti banag a dumdumngeg ken ipangpangagyo ti mensahe ti naimbag a damag pammaneknek iti personal a pannakaseknan ni Jehova kadakayo.​—Mateo 24:14.

Babaen ti nasantuan nga espiritu, iyasideg ni Jehova dagiti tattao iti Anakna ken iti namnama a biag nga agnanayon. Daytoy ti tumulong iti tunggal maysa tapno matarusan ken mayaplikarna dagiti naespirituan a kinapudno iti laksid dagiti aniaman a natawid a pagkurkurangan ken kinaimperpekto. Pudno unay, saan a matarusan ti maysa dagiti panggep ti Dios no awan ti tulong ti espiritu ti Dios. (1 Corinto 2:11, 12) Kas insurat ni Pablo kadagiti taga-Tesalonica, “ti pammati saan nga ik-ikutan ti isuamin a tattao.” (2 Tesalonica 3:2) Ipapaay ni Jehova ti espirituna kadagidiay laeng mangipakpakita iti kinatulok a payasideg kenkuana.

Iyas-asideg ni Jehova dagiti tattao gapu ta ay-ayatenna ida kas indibidual ken kayatna a maisalakanda. Anian a nagtibker a pammaneknek iti personal a pannakaseknan ni Jehova! Kinuna ni Jesus: “Di matarigagayan a banag ken Amak nga adda sadi langit a mapukaw ti maysa kadagitoy a babassit.” (Mateo 18:14) Wen, iti imatang ti Dios napateg ti tunggal tao kas maysa a naidumduma nga indibidual. Daytat’ gapuna nga insurat ni Pablo: “Supapakannanto ti tunggal maysa sigun iti ar-aramidna.” (Roma 2:6) Ken kinuna ni apostol Pedro: “Ti Dios saan a mangidumduma, no di ket iti tunggal nasion anamonganna ti tao [ti indibidual a tao] nga agbuteng kenkuana ken agaramid iti kinalinteg.”​—Aramid 10:34, 35.

Dagiti Milagro ni Jesus

Ti personal nga interes ti Dios kadagiti tao ti makagutugot a naipakita kadagiti milagro nga inaramid ti Anakna, ni Jesus. Dagitoy a panangpaimbag napakuyogan iti nasged a pannakipagrikna. (Marcos 1:40, 41) Yantangay ni Jesus “dina kabalinan nga aramiden ti maysa a banag iti bukodna a nakem, no di laeng ti makitana nga ar-aramiden ti Ama,” ti kinamanangngaasina mangiladawan iti makagutugot a pannakaseknan ni Jehova iti tunggal maysa kadagiti adipenna.​—Juan 5:19.

Usigenyo ti salaysay maipapan iti maysa a milagro nga inaramid ni Jesus, a nailanad iti Marcos 7:31-37. Ditoy pinaimbag ni Jesus ti maysa a tao a tuleng ken adda lapped ti panagsaona. “Inyadayo[na ti lalaki] a pribado manipud iti bunggoy,” isalaysay ti Biblia. Kalpasanna, “bayat a sitatangad sadi langit isu nagsennaay iti nauneg ket kinunana kenkuana: ‘Effatha,’ a kayatna a sawen, ‘Malukatanka.’”

Apay nga inyadayo ni Jesus daytoy a lalaki manipud iti bunggoy? Bueno, nalabit a ti maysa a tao a tuleng a saan a makapagsao mabain iti sanguanan dagiti agbuybuya. Mabalin a nadlaw ni Jesus nga alusiisen daytoy a lalaki, ket daytat’ makagapu no apay a kinaykayatna a paimbagen iti pribado. “Ti intero a pasamak,” kuna ti maysa nga eskolar iti Biblia, “nabatad unay nga ipakpakitana kadatayo a saan nga imbilang ni Jesus ti lalaki kas maysa a pasiente laeng; imbilangna kas maysa nga indibidual. Adda naisangsangayan a kasapulan ken naisangsangayan a parikut ti lalaki, ket buyogen ti nadungngo unay a konsiderasion nakilangen ni Jesus kenkuana iti wagas a masalakniban ti riknana ken iti pamay-an a maawatanna.”

Ipakpakita daytoy a salaysay nga adda personal a pannakaseknan ni Jesus kadagiti tao. Masiguradoyo a kasta met ti interesna kadakayo. Pudno, ti sakripisio nga ipapatayna ti maysa nga ebkas ti ayat iti intero a lubong ti sangatauan a mabalin a masubbot. Nupay kasta, personal a magunggonaannakayo iti dayta nga aramid, a kas ken Pablo, a nagsurat: ‘Ti Anak ti Dios . . . inayatnak ken inyawatna ti bagina maipaay kaniak.’ (Galacia 2:20) Ket yantangay kinuna ni Jesus a ‘ti nakakita kenkuana nakitana met ti Ama,’ makasigurotayo a kasta met ti panaginteres ni Jehova iti tunggal maysa kadagiti adipenna.​—Juan 14:9.

Ni Jehova Agbalin a Mananggunggona

Ti pananggun-od iti pannakaammo iti Dios ramanenna ti panangammo iti tunggal parupa ti personalidadna kas naipalgak iti Biblia. Ti mismo a nagan a Jehova kaipapananna “Isut’ Mamagbalin,” mangipaspasimudaag a kabaelan ni Jehova ti agbalin nga aniaman sigun iti kayatna tapno matungpal ti pagayatanna. Iti intero a pakasaritaan, naaddaanen iti nadumaduma nga akem, a pakairamanan ti panagbalinna a Namarsua, Ama, Soberano nga Apo, Pastor, Jehova dagiti buybuyot, Managdengngeg iti kararag, Ukom, Naindaklan nga Instruktor, ken Mannubbot.b

Tapno matarusantay ti naan-anay a kaipapanan ti nagan ti Dios, masapul met a maam-ammotayo ni Jehova kas maysa a Mananggunggona. Insurat ni Pablo: “No awan ti pammati isu di mabalin nga ay-aywen unay, ta ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.”​—Hebreo 11:6.

Inkari ni Jehova ti biag nga agnanayon iti paraiso a daga kadagidiay mangpili ita nga agserbi kenkuana iti amin a puso. Saan a kinaagum ti mangnamnama iti kaitungpalan dayta naindaklan a kari, ket saan met a kinamananggundaway ti panangarapaap iti panagbiag sadiay. “Kimmita [ni Moises] a sipapasnek iti pannakabayad ti gunggona.” (Hebreo 11:26) Sinegseggaan met ni Pablo ti kaitungpalan ti kari ti Dios kadagiti matalek a napulotan a Kristiano. Insuratna: “Agtultuloyak nga agturong iti kalat maipaay iti gunggona a panagpangato nga ayab ti Dios babaen ken Kristo Jesus.”​—Filipos 3:14.

Mabalinyo met ti mangnamnama iti gunggona nga ikarkari ni Jehova kadagidiay makapagibtur. Maysa a napateg a paset iti pannakaammoyo ti Dios ken ti kinaanduryo nga agserbi kenkuana ti panangnamnama iti dayta a gunggona. Gapuna, mennamennaenyo nga inaldaw dagiti bendision nga isagsagana ni Jehova kadakayo. Ni Mary, a nadakamat iti pangrugian, naisangsangayan ti panagreggetna a mangaramid iti daytoy. “Iti umuna a gundaway iti biagko,” kunana, “nabiit pay nga inawatko nga agaplikar kaniak ti daton a subbot ni Jesus. Mariknakon a maseknan ni Jehova kaniak kas maysa a persona. Nasurok a 20 a tawenen a Kristianoak, ngem itay laeng nabiit a talaga a namatiak iti daytoy.”

Babaen ti panagadal ken naimpusuan a panangmennamenna iti Biblia, nasursuro ni Mary, agraman ti riniwriw a dadduma pay, a maseknan ni Jehova kadagiti tattaona saan laeng a kas maysa a grupo no di pay ket kas indibidual. Namati unay ni apostol Pedro iti daytoy ta insuratna: “Iyallatiwyo [iti Dios] amin a pakaringgoranyo, agsipud ta isu maseknan kadakayo.” (1 Pedro 5:7) Wen, maseknan ti Dios kadakayo!

[Dagiti Footnote]

[Kahon iti panid 6]

Ti Panagungar​—Pammaneknek a Maseknan ti Dios

MASARAKAN iti Biblia iti Juan 5:28, 29 ti makakombinsir a pammaneknek iti interes ti Dios iti tunggal indibidual: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timek [ni Jesus] ket rummuardanto.”

Makapainteres, ti Griego a sao a mne·meiʹon (pakalaglagipan a tanem) ti nausar ditoy imbes a taʹphos (tanem). Ti sao a taʹphos ipaspasimudaagna laeng ti kapanunotan maipapan iti pumpon. Ngem iparipirip ti mne·meiʹon a malaglagip ti rekord ti tao a natay.

Maipanggep iti daytoy, panunotenyo laengen no ania ti kasapulan nga aramiden ni Jehova a Dios iti panagungar. Tapno mapagungarna ti maysa, masapul nga ammona ti isuamin maipapan iti dayta a tao​—agraman ti natawidna nga ugali ken kompleto a memoria. Kalpasan laeng dayta a maisubli iti tao ti isu met laeng a pakabigbigan.

Siempre, imposible daytoy no iti kapanunotan ti tao, ngem “amin a bambanag posible iti Dios.” (Marcos 10:27) Masiguradona pay ketdi ti adda iti puso ti maysa a tao. Uray adun a siglo a natay ti maysa a tao, saan nga agbalbaliw iti lagip ti Dios maipapan kenkuana; saan nga agkupas. (Job 14:13-15) Gapuna, no dakdakamatenna da Abraham, Isaac, ken Jacob, naikuna ni Jesus uray sinigsiglon ti napalabas sipud idi natayda a ni Jehova “ket Dios, saan a dagiti natay, no di ket dagiti sibibiag, ta sibibiagda amin kenkuana.”​—Lucas 20:38.

No kasta, binilion a natnatay ti adda iti lagip ni Jehova a Dios iti naan-anay a detalye. Anian a nakaskasdaaw a pammaneknek a maseknan ti Dios kadagiti tao iti indibidual a pamay-an!

[Ladawan iti panid 7]

Nangipakita ni Jesus iti personal nga interes kadagidiay pinaimbagna