“Ti Kinapudno Wayawayaannakayto”​—Kasano?

IPAGARUP ti minilion a tattao a siwayawayada ngem kinaagpaysuanna, saanda a kasta. Kas pagarigan, adu ti agpapaadipen iti an-anito. Mabuteng ti dadduma kadagiti natay, isu nga agkakangina ti iyatangda tapno ay-aywenda ida. Adda met dagidiay napalalo ti butengda a matay gapu ta dida ammo ti mapasamak no matay ti tao. Mabalin kadi a mawayawayaanda kadagita a mental, emosional, ken pinansial a pakadagsenan? Wen! Kas ipakita ti sasao ni Jesu-Kristo a nakotar iti ngato, ti kinapudno ti tulbek iti pannakawayawaya. Ngem ania a kinapudno? Pangkaaduan a kinapudno wenno espesipiko a kita ti kinapudno?

Silalawag nga imbaga ni Jesus ti sungbat. “No agtalinaedkayo iti saok,” kinunana, “maammuanyonto ti kinapudno, ket ti kinapudno wayawayaannakayto.” (Juan 8:31, 32) Ti ‘sao’ wenno dagiti pannursuro ni Jesus ket masarakan iti Biblia.

Idi imbaga ni Jesus a “ti kinapudno wayawayaannakayto,” ti pannakawayawaya manipud basol ken ipapatay ti kangrunaan a tuktukoyenna. Ngem ti pannakaammo iti kinapudno nga adda iti Sao ti Dios wayawayaannatayo met kadagiti banag a kas iti an-anito, panagbuteng kadagiti natay, ken ti napalalo a buteng iti ipapatay. Kasano?

1. Pannakawayawaya iti an-anito. Adu ti mamati nga adda bambanag wenno numero a mangyeg iti malas. Ti dadduma agbirokda nga umuna iti nasayaat a seniales wenno agkonsultada iti horoscope wenno espiritista sakbay nga agaramidda kadagiti napateg a desision.

No kasano a mangwayawaya ti kinapudno iti Biblia: Idi panawen ti Biblia, ti dadduma iti mismo nga ili ti Dios ket namati iti an-anito nga uray la nagdaydayawda iti “dios ti Naimbag a Gasat” ken “dios ti Keddeng”! Ania ti panangmatmat ni Jehova iti dayta? “Inar-aramidyo no ania ti dakes kadagiti matak,” kinunana. (Isaias 65:11, 12) Kasta met laeng ti panangmatmat ti Dios kadagidiay agkonsulta ken agpaiwanwan kadagiti espiritista: “Asinoman nga umuman iti mannakiuman iti espiritu . . . ket nakarimrimon ken Jehova.”​—Deuteronomio 18:11, 12.

Makadangran dagiti an-anito ken espiritista ta dagita ket “pangallilaw a pamuspusan ti Diablo.” Isu ket “ama ti kinaulbod” sigun ken Jesus. (Efeso 6:11; Juan 8:44) No kasapulam ti tulong maipapan iti napateg a banag, agpatulongka kadi iti managulbod? Siempre saan! Masiribka ngarud no liklikam ti aniaman a konektado iti “ama ti kinaulbod.”

Ti tulbek iti panangaramid kadagiti nasayaat a desision iti biag ket ti sirib a naibasar iti umiso a pannakaammo kadagiti prinsipio ti Biblia ken panggep ti Dios para iti sangatauan. “Ni met laeng Jehova mangted iti sirib; manipud ngiwatna adda pannakaammo ken panangilasin,” kuna ti Proverbio 2:6.

2. Pannakawayawaya iti panagbuteng kadagiti natay. Adu ti mamati a ti “espiritu” dagiti natay nga inapo ket makaimpluensia kadagiti sibibiag. Patienda a tapno di agunget dagita nga “espiritu,” masapul a maay-ayoda babaen ti nadumaduma nga atang. Gapu iti dayta, adu ti mailumlom iti utang tapno adda gastuenda kadagiti iyatangda ken nagarbo a seremonia.

No kasano a mangwayawaya ti kinapudno iti Biblia: Ibaga kadatayo ti Biblia ti pudno a kasasaad dagiti natay. Kas pagarigan, kinuna ni Jesus a ‘matmaturog’ dagiti natay. (Juan 11:11, 14) Ania ti kayatna a sawen? Masarakan ti sungbat iti Eclesiastes 9:5: “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman.” Wen, dagiti natay ket kasda la matmaturog iti nargaan, awan a pulos ti puotda. Kinapudnona, awandan isu a didan makaaramid kadatayo iti aniaman a naimbag wenno didatay madangran.

Ngem ibagbaga ti dadduma a napadasanda kanon ti nakisarita iti natay. Kasano koma a kasta? Sumungbat manen ti Biblia. Isalaysayna nga idi un-unana, adda dagiti anghel a nagrebelde iti Dios. (2 Pedro 2:4) Dagitoy a dakes nga espiritu a maawagan iti sairo wenno demonio ikagkagumaanda nga allilawen ti sangatauan. (1 Timoteo 4:1) Ti maysa a pamay-anda ket ti panagpammarangda kas dagiti natay a tattao. Isaksaknapda ngarud ti kinaulbod a dagiti natay ket sibibiag iti sabali a kasasaad wenno lubong.

3. Pannakawayawaya iti napalalo a buteng iti ipapatay. Kuna ti Biblia a ti ipapatay ket talaga a kabusor. (1 Corinto 15:26) Gagangay la ngarud a kabutengtayo ti matay ken ditay kayat ti matay. Ngem di kasapulan ti sobra a panagbutengtayo iti ipapatay.

No kasano a mangwayawaya ti kinapudno iti Biblia: Malaksid iti panangipakaammona iti pudno a kasasaad dagiti natay, ipakita met ti Biblia a panggep ti Dios a pagungaren dagiti natay. Kinuna ni Jesus: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timek [ni Kristo] ket rummuarda.”​—Juan 5:28, 29; Aramid 24:15.

Anianto ti langada inton “rummuarda”? Nangted ni Jesus iti pamalatpatan idi nangpagungar iti sumagmamano a natay. Iti tunggal pasamak, ti natay ket napagungar kas tao​—kas iti sigud a kinataona. (Marcos 5:35-42; Lucas 7:11-17; Juan 11:43, 44) Maitunos daytoy iti Griego a sao a naipatarus a “panagungar,” nga “itatakder” ti kayuloganna. Kastoy ti kinuna ti Dios idi kinasaritana ti lakayen nga adipenna a ni Daniel: “Aginanakanto [wenno maturogka ken patay], ngem tumakderkanto maipaay iti bingaymo iti panungpalan dagiti aldaw.” (Daniel 12:13) Sigurado a naliwliwa ni Daniel kadagita a nangngegna isu a nabaelanna a sinango ti ipapatay buyogen ti tured ken dignidad!

Ti maysa a rason nga immay ni Jesus ditoy daga ket ‘tapno ikasabana ti pannakaluk-at kadagiti kautibo’​—dagidiay naadipen kadagiti palso a sursuro. (Lucas 4:18) Yantangay masarakan iti Biblia dagiti pannursurona, dagita ti agtultuloy a mangwayawaya iti tattao iti inaldaw. Sapay koma ta ti kinapudno iti Biblia ti mangyeg kenka iti manayon a wayawaya.

NAPANUNOTMO KADIN?

Kasano a ti kinapudno iti Biblia wayawayaannatayo manipud iti

● an-anito?​—Isaias 8:19, 20; 65:11, 12.

● panagbuteng kadagiti natay?​—Eclesiastes 9:5; Juan 11:11, 14.

● panagbuteng iti ipapatay?​—Juan 5:28, 29; Aramid 24:15.

[Blurb iti panid 11]

Ti kinapudno iti Biblia wayawayaanna dagiti tattao manipud iti an-anito, panagbuteng kadagiti natay, ken iti napalalo a panagbuteng iti ipapatay