Ti Tiempo Tapno Biruken ti Dios
TI LADAWAN iti daytoy a panid ket maipapan iti Acropolis ti Atenas, naminsan maysa a sentro ti panagdayaw kadagiti adu a didios ken didiosa. Iti baba ti Acropolis isu ti Areopago, a masasao nga isu ti lugar ti maysa a pangukoman ti kinahustisia idi immuna a tiempo. Iti daytoy a disso, agarup 2,000 a tawen ti napalabasen, a nagtakder ni apostol Pablo ken impaayna ti maysa a pudpudno a naisangsangayan a diskurso. Ti sumaganad ket dadduma kadagiti sinaona:
“Iti maymaysa a tao [ti Dios] inaramidna a pagtaudan dagiti amin a nasion dagiti tao tapno agnaedda iti amin a rabaw ti daga, ket intudingna ti panagsasaganad dagiti tiempo ken dagiti beddeng ti pagtaenganda, tapno birukenda ti Dios, bareng no iti panagar-arikapda isu masarakanda, uray pay, iti kinapudnona, saan nga adayo iti tunggal maysa kadatayo. Ta kenkuana adda biagtayo ken aggunaytayo ken addatayo.”—Aramid 17:26-28.
Anian a naiduma koma a historia no ti sangatauan iti pakabuklanna ket impangagna dagiti sasao ni Pablo! Nakaad-adu a gubat, nakaad-adu a panagsagaba, ti naliklikan koma no dagiti tattao binigbigda ti pagkaykaysaan nga interes kas dagiti annak ti maymaysa a tao a naparsua babaen iti Soberano nga Apo, ni Jehova.
Ita, ti sangatauan ket pinagsisina ti nasionalismo, panangidumduma ti klase, guranggura dagiti rasa, ken sosial a di panagpapada. Kaskasdi, dagiti sasao ni Pablo agaplikarda. Amintayo ket saringit daydiay maymaysa a tao a pinarsua ti Dios. Amintayo ket, iti dayta a pannakaawat, agkakabsat. Ket saan pay a naladaw unay tapno birukentayo ti Dios bayat a masarakan pay.
Dagiti sasao ni Pablo ket ad-adda pay a serioso no usigentayo dagiti maudi a sasao ti diskursona. Kunana: “[Ti Dios] intudingna ti maysa nga aldaw a pinanggepna nga ukomen ti mapagnaedan a daga iti kinalinteg babaen iti maysa a lalaki a dinutokanna, a nangipaay pammasiguro kadagiti amin a tattao nga isut’ pinagungarna manipud kadagiti natay.”
Ti panagungar ni Jesus ket maysa a historikal a kinapudno, ket kas ipakita ni Pablo, daytat’ maysa a pammasiguro nga addanto maysa nga aldaw a panangukom agpaay iti sangatauan. Kaano? Bueno, ammotayo a daytat’ agarup 2,000 a tawen nga as-asidegen ngem idi nagtakder ni Pablo idiay Areopago ken insawangna dagitoy a sasao. Pudno, ti kaitungpalan ti padto ti Biblia ipasimudaagna a daytat’ nakaas-asidegen. Anian a mamagulimek a kapanunotan! Anian a nagganat a birukentayo ti Dios iti amin a kinapasnek, yantangay, kas imbaga ni Pablo kadagiti taga Atenas, “ita ibagbagana iti sangatauan nga aminda iti isuamin a lugar agbabawida koma.”—Aramid 17:30,31.