COS

Ti kabesera a siudad iti makin-amianan a daya nga ungto ti maysa nga isla a kasta met laeng ti naganna. Masarakan dayta iti asideg ti makin-abagatan a laud a kosta ti Asia Menor. Gapu iti nagsayaat a nagsaadanna, nasapa a nagbalin ti Cos a nakapatpateg a lugar mainaig iti komersio ken panagdaliasat iti taaw.

Nupay nalawag a limmabas ni apostol Pablo iti daytoy a siudad bayat ti panagdaliasatna manipud Efeso nga agturong iti Cesarea idi agngudon ti maikadua a panagbaniagana kas misionero idi agarup 52 K.P. (Ara 18:21, 22), nainaganan daytoy a siudad iti libro nga Aramid idi laeng nagleppas ti maikatlo a panagdaliasatna, agarup uppat a tawen kalpasanna. Kalpasan a ‘simmina’ ni Pablo kadagiti manangaywan a taga Efeso a nakisaritaanna idiay Mileto (Ara 20:17, 36-38), ‘nagdaliasat a nagtartarus’ ti barko a naglugananda ken Lucas, kayatna a sawen, naglayag a maibulon iti angin, a di nagsikkosikko, ken buyogen dagiti natalinaay nga angin, agingga a ‘nakagteng idiay Cos’​—panagbaniaga nga agpaabagatan nga agarup 75 km (47 mi). Pinattapatta ti sumagmamano a komentarista a buyogen dagiti gagangay a puyupoy ti angin nga aggapu iti amianan a laud ti Aegeano, madaliasat ti kasta a distansia iti agarup innem nga oras. Gapuna, kas dakamaten ni Lucas, nakagteng ti barko ni Pablo idiay Cos iti isu met laeng nga aldaw nga ipapanawna manipud Mileto. Mabalbalin a daytoy a barko agpatnag a nakaangkla iti asideg ti makindaya a kosta ti Cos ket nakagteng idiay Rodas “iti sumaganad nga aldaw,” kalpasan a nagluas iti bigat maipaay iti panagbaniaga nga agarup 120 km (75 mi).​—Ara 21:1.

Nabayagen a nagdindinamag ti isla ti Cos kas maysa a sentro dagiti Judio kadagiti isla iti Aegeano. Dayta ket siwayawaya a Romano nga estado iti probinsia ti Asia, ket sigun ken Tacitus, saanen nga inobligar ni Claudio idi 53 K.P. nga agbayad iti buis.