MIRA

Maysa a kangrunaan a siudad iti probinsia ti Licia. Masarakan ti Mira iti asideg ti dapnis ti makin-abagatan a laud nga Asia Menor, ket sinaklawna ti maysa a turod nga agarup 3 km (2 mi) manipud iti igid ti karayan Andracus. Dayta a disso ket pagaammo itan kas Demre. Ti kadaanan a nagan a Mira ket mabalbalin a ramanenna agpadpada ti siudad ken ti nakasaysayaat a sangladanna.

Kas maysa a balud nga agturong idiay Roma, nakagteng ni apostol Pablo idiay Mira manipud Cesarea babaen ti ilalasatna iti Sidon. Sadiay, isu ken dagiti kaduana a nagdaliasat immakarda iti maysa a barko nga agibibiahe iti bukbukel manipud Alejandria nga agturong idiay Italia. (Ara 27:1-6, 38) Ti Mira ket amiananen a mismo ti Alejandria ket ngarud mabalin nga adda iti kadawyan a ruta dagiti barko nga aggapu iti dayta a siudad ti Egipto. Wenno, mabalin a gapu kadagiti sumuba nga angin (Ara 27:4, 7), ti barko ti Alejandria napilitan a mangbaliw iti turongna ket imbabana ti angklana idiay Mira.

Iti Aramid 21:1, sumagmamano a kadaanan a teksto inayonda ti “ken Mira” kalpasan ti “Patara.” (Kitaenyo dagiti footnote iti JB, NE, RS.) Nupay daytoy a pananginayon maitunos met ketdi iti dadduma pay a paset ti salaysay, awan umdas nga ebidensia iti panangsinunuo no pudno nga adda iti orihinal a manuskrito ti nagan a Mira.