“Bendision Agingga nga Awanen Panagkasapulan”

1, 2. (a) Ania dagiti mabalintay a pilien nga agpaay iti pagimbagan ti tunggal maysa kadatayo? (b) Dagiti bendision a sagsagrapentayo ket adda pakainaiganna iti kaitungpalan ti ania a padto?

AGBIBIAGTAYO iti panawen ti panangukom ken bendision. Tiempo daytoy ti narelihiosuan a panagrakaya ken pannakaisubli ti pudno a panagdayaw. Sigurado a tarigagayam ti bendision agraman dagiti agdama ken masanguanan a makaay-ayo nga epekto ti pannakaisubli ti pudno a panagdayaw! Ngem kasano a masiguradom dagitoy? Nainaig ti sungbat iti maysa a padto a naaddaan iti kangrunaan a kaitungpalan di nagbayag kalpasan a nangrugi ‘dagiti maudi nga aldaw’ idi 1914. (2 Timoteo 3:1) Impadto ni Malakias: “‘Umayto iti templona ti pudno nga Apo [ni Jehova], a sapsapulenyo, ken ti mensahero ti tulag a kenkuana maragsakankayo. Adtoy! Sigurado nga umayto,’ kinuna ni Jehova ti buybuyot.”​—Malakias 3:1.

² Daytoy a padto a napateg unay iti biagmo ket masarakan iti maudi kadagiti 12 a naimpadtuan a libro. Bayat nga ingudotayo ti panangsalaysaytayo kadagitoy a libro, adda napateg a maadaltayo iti insurat ni Malakias. Naglaon ti librona iti napateg a bilin a tumulong kenka ken kadagiti dadduma pay nga adipen ni Jehova a mangsagrap iti “bendision agingga nga awanen panagkasapulan.” (Malakias 3:10) Sukimatentayo a naimbag ti kapitulo 3 ti libro ni Malakias.

 3. Ania ti napasamak iti nagkauna nga ili ti Dios a nakaigapuan ti pannakapili “ti Israel ti Dios”?

³ Agarup lima a siglo kalpasan ti panawen ni Malakias, ni Jehova, nga imbagian ni Kristo (ti “mensahero ti [Abrahamiko] a tulag” nga imbaon ti Dios), ket dimteng iti literal a templo idiay Jerusalem tapno ukomenna ti ili a nakitulag kenkuana. Napaneknekan a saan a maikari dayta a nasion nga umawat iti agtultuloy a parabur, isu a linaksid ni Jehova kas paneknekan ti napasamak idi 70 K.P. (Mateo 23:37, 38) Nangpili ti Dios iti sabali a nasion, “ti Israel ti Dios.” Maysa dayta a naespirituan a nasion a buklen ti 144,000 a naala manipud iti amin a nasion. (Galacia 6:16; Roma 3:25, 26) Nupay kasta, saan a dayta ti maudi a kaitungpalan ti padto ni Malakias. Agaplikar met dayta iti moderno a panawen ken adda direkta a pakainaiganna iti namnamam iti masanguanan nga umawat iti “bendision agingga nga awanen panagkasapulan.”

 4. Ania ti nasken a masungbatan kalpasan ti pannakaisaad ni Jesus kas ari idi 1914?

⁴ Pasingkedan ti kaitungpalan ti padto ti Biblia nga idi 1914, naisaad ni Jesu-Kristo kas Ari iti nailangitan a Pagarian ni Jehova. Kalpasanna, dimteng ti panawen a panangilasin ni Jesus iti grupo dagiti Kristiano nga inanamongan ti Dios. Siasino ti napaneknekan a nadalus iti naespirituan? Maripiripmo ti sungbat iti sasao ni Malakias: “Siasino ti makapaganusto iti aldaw ti iyaayna, ket siasino daydiay agtakderto inton agparang? Ta isu kaslanto iti apuy ti manangpasudi.” (Malakias 3:2) Kaano ken kasano a dimteng ni Jehova iti “templona” tapno mangukom?

5, 6. (a) Idi dimteng ni Jehova iti naespirituan a templona tapno agsukimat, ania ti nasarakanna iti kaaduan kadagiti agkunkuna a managdaydayaw? (b) Ania ti kasapulan idi dagiti napulotan iti espiritu nga adipen ti Dios?

⁵ Nabatad a saan a dimteng ti Dios iti literal a templo. Nadadael idi 70 K.P. ti maudi a kasta a literal a templo a maipaay iti pudno a panagdayaw. Imbes ketdi, dimteng ni Jehova iti naespirituan a templo, ti urnos a babaen iti dayta makaadani ken makapagdayaw kenkuana dagiti tattao maibatay iti daton a pangsubbot ni Jesus. (Hebreo 9:2-10, 23-28) Nalawag a saan a dagiti simbaan ti Kakristianuan ti mangbukel iti dayta a naespirituan a templo, ta paset dagitoy ti narelihiosuan a sistema a nakabasol iti panangibukbok iti dara ken naespirituan a panagbalangkantis, a mangitantandudo kadagiti di umiso a sursuro imbes a ti pudno a panagdayaw. Nagbalin ni Jehova a “nasiglat a saksi maibusor” kadagita, ket ammom a nainkalintegan ti nainget a panangukomna. (Malakias 3:5) Nupay kasta, kalpasan ti pannakaipasdek ti Pagarian ti Dios, adda maysa a grupo dagiti pudno a Kristiano nga agserserbi kadagiti paraangan ti naespirituan a templo ti Dios a nangipakita iti kinasungdoda iti Dios iti laksid dagiti nakaro a pannubok. Ngem nasken latta a magugoran dagidi a napulotan. Impakauna dagiti 12 a naimpadtuan a libro ti kasta a pannakagugor, ta naglaon dagitoy kadagiti makaliwliwa a kari maipapan iti naespirituan ken pisikal a panangabaruanan dagiti adipen ti Dios. Impadto ni Malakias nga adda dagiti tattao a ‘pasin-awen ni Jehova a kas iti balitok ken kas iti pirak.’ ‘Sigurado nga agbalinda ken Jehova nga ili a mangidiaya iti daton a sagut iti kinalinteg.’​—Malakias 3:3.

⁶ Sigun iti nalawag a pammaneknek, manipud pay idi 1918 a daldalusan ni Jehova dagiti napulotan a Kristiano, a paspasin-awenna ti panagdayaw, dagiti aramid, ken doktrinada.a Nabenepisiaranda unay, agraman ti “dakkel a bunggoy” a timmipon kadakuada idi agangay, iti kasta a pananggugor. (Apocalipsis 7:9) Kas nagkaykaysa a grupo, agtultuloy a mangipapaayda “iti daton a sagut iti kinalinteg” a ‘makaparagsak ken Jehova.’​—Malakias 3:3, 4.

 7. Ania ti maitutop nga isaludsodtayo maipapan iti takdertayo iti imatang ti Dios?

⁷ Pudno dayta iti ili ti Dios kas grupo, ngem komusta ngay ti tunggal maysa kadatayo? Mabalinmo nga isaludsod: ‘Adda pay kadi dagiti kababalin ken tignayko a nasken a magugoran? Nasken pay kadi a magugoran ti konduktak, kas iti pananggugor ni Jehova kadagiti napulotan nga adipenna?’ Kas nasalaysayen, impaganetget dagiti 12 a mammadto ti maipapan kadagiti dakes a kapanunotan ken kondukta agraman dagiti makaay-ayo a kababalin ken aramid. Ti panangipaganetgetda kadagita tinulongannaka a mangammo no ania ti “kidkiddawen kenka ni Jehova.” (Mikias 6:8) Imutektekam ti sao a “kenka.” Ipagpaganetget dayta no apay a rumbeng a siertuen ti tunggal maysa kadatayo no nasken ti ad-adda pay a pananggugor wenno panangdalus iti personal a kabibiagtayo.

 8. Ania ti iyaw-awis ni Jehova iti ilina?

⁸ Usigem no ania pay ti kuna ni Jehova babaen ken ni Malakias iti kapitulo 3, bersikulo 10. Masarakam dita daytoy a napasnek nga awis: “‘Amin dagiti apagkapullo iyegyo iti kamalig, tapno maadda ti taraon iti balayko; ket subokendak, pangngaasiyo, iti daytoy a banag,’ kinuna ni Jehova ti buybuyot, ‘no saankonto a luktan kadakayo dagiti aribengbeng ti langlangit ket pudno a mangibukbokakto kadakayo iti bendision agingga nga awanen panagkasapulan.’” Naiturong dayta nga awis iti ili ti Dios kas grupo. Ibilangmo kadi a maysa met dayta a personal nga awis kenka?

 9. Ania a kita dagiti daton ken apagkapullo ti maipaaymo ken ni Jehova?

⁹ Kasano a maitedmo ken ni Jehova “dagiti apagkapullo”? Siempre, saanka nga obligado a mangidatag kadagiti literal a daton ken apagkapullo a kas iti impaannurot ti Linteg. Dagiti naespirituan a daton ti namnamaen ti Dios ita. Kas nasalaysay iti napalabas a kapitulo, kinuna ni Pablo a ti trabahom a panangasaba ket maysa a daton. (Oseas 14:2) Kalpasanna, adda sabali pay a kita ti daton a dinakamat ti apostol. Insuratna: “Dikay lipatan ti panagaramid iti naimbag ken ti panangiranud iti [material a] bambanag iti sabsabali, ta babaen iti kakasta a sakripisio maay-ayo a naan-anay ti Dios.” (Hebreo 13:15, 16) Nalawag ngarud a “dagiti apagkapullo” a nadakamat iti Malakias 3:10 iladladawanna dagiti naespirituan ken namaterialan a daton. Kas bautisado a Kristiano, naan-anay a nagdedikarka ken ni Jehova, ngem ti apagkapullom iladladawanna ti paset ti aniaman nga adda kenka a kabaelam nga ited ken ni Jehova, wenno usarem iti panagserbi kenkuana. Ramanenna ti panawen, pigsa, sanikua, ken dagiti material a kontribusion nga aramatem iti panagserbi ken ni Jehova.

10. Iti ania nga umiso a wagas a mabalinmo a ‘suboken ni Jehova’?

¹⁰ Anian a maitutop nga idatonmo dagita a simboliko nga apagkapullo ken ni Jehova kas ebkas ti debosion ken ayatmo! Nasken met ti kinaganetget. Ammom a sipapardas nga umad-adani ti naindaklan nga aldaw ni Jehova ken “nakaam-amak unay” dayta. (Joel 2:1, 2, 11) Nakatayá ti biag dagiti tattao. Adda iyaw-awis ti Dios a mabalinmo a patgan. Kidkiddawen kenka ni Jehova nga isu ket ‘subokem.’ Siempre, ti nanumo laeng a tao di rumbeng a subokenna ni Jehova a kas man la saan a mapagtalkan ti Dios. (Hebreo 3:8-10) Ngem mabalinmo a sipapakumbaba a suboken iti umiso a wagas. Kasano? Inkarina ti bendision. No agtulnogka kenkuana, subsubokem ti Dios, a kas man la iyim-imtuodmo, ‘Bendisionannak ngata?’ Kas sungbat, ti Dios obligarenna ti bagina a mangtungpal iti karina. No kasta, ti panangpalubos ti Dios kenka a ‘mangsubok kenkuana’ parayrayenna ti pammatim a sibubuslon a bendisionannaka.

11, 12. Aniada a bendision nga ipapaay ni Jehova iti ilina ti maim-imatangam a mismo?

¹¹ Kas makitam, sipaparabur a mangipapaay ti ili ni Jehova kadagiti namaterialan a daton ken naespirituan a sakripisio. Ket ni Jehova mangibukbukbok iti “bendision agingga nga awanen panagkasapulan.” Nalabit mapalpaliiwmo ti pannakaibukbok ti kasta a bendision iti ili ti Dios, kas makita iti naisangsangayan nga iyaadu ti bilang dagiti Saksi ni Jehova manipud pay iti rugrugi ti maika-20 a siglo agingga kadagitoy a tiempo. Maim-imatangam met ti nakaskasdaaw nga irarang-ay ti pannakaawat kadagiti “nauneg a bambanag ti Dios.” (1 Corinto 2:10; Proverbio 4:18) Ngem panunotem daytoy iti sabali a punto de bista: Ania ti epekto dayta kenka a mismo?

¹² Mabalin a sabali idi ti relihionmo, wenno nalabit nabiitka pay a tumabtabuno kadagiti gimong dagiti Saksi ni Jehova. Kasano kaadu idi ti maawatam maipapan kadagiti pamunganayan a kinapudno nga isursuro ti Biblia? Ita idiligmo dayta kadagiti nasursuromon ken mapaneknekam iti Kasuratan a mismo. Wenno saan, panunotem dagiti naun-uneg a banag a maawatam itan, a pakairamanan dagiti padto a matungtungpalen. Ken utobem ti naaramidam a panagrang-ay iti panangyaplikar kadagiti mabasbasam iti Biblia. Pudno a rimmang-aykan! Iti biangmo, maikunam ti kas iti kinuna ni apostol Pedro: “Addaankami iti naimpadtuan a sao nga ad-adda a naipasigurado.” (2 Pedro 1:19) Ti punto isu daytoy: Personal a ‘sinursuruannaka ni Jehova’ ken maysaka kadagiti tattao a mangan-annurot iti pudno a Kristianidad ken agtarigagay nga agserbi ken ni Jehova iti agnanayon. (Isaias 54:13) Talaga a maikunam itan a sibabaknang a bembendisionannaka ni Jehova.

13. Kasano a maisurat ti naganmo iti libro a pakalaglagipan ti Dios?

¹³ Adda dadduma pay a bendision ni Jehova a nadakamat iti Malakias 3:16: “Iti dayta a tiempo nagsao iti maysa ken maysa dagidiay agbuteng ken Jehova, tunggal maysa iti kaduana, ket ni Jehova nangipangpangag ken immim-imdeng. Ket maysa a libro a pakalaglagipan nangrugi a masuratan iti sanguananna maipaay kadagidiay agbuteng ken Jehova ken maipaay kadagidiay mangpampanunot iti naganna.” Dagiti napulotan ken dagiti kameng ti dakkel a bunggoy agpada nga iparparangarangda daytoy napnuan panagraem a ‘panagbuteng ken Jehova.’ Saanmo kadi nga ibilang a pribilehio ti agbalin a maysa kadagiti Saksi ni Jehova, a paset ti naragsak nga ili a mangpampanunot iti nagan ni Jehova ken mangitantan-ok iti dayta iti intero a lubong? Wen, rumbeng a pakaragsakam dayta, ta manamnamam a silalagip ni Jehova iti kinamatalekmo!​—Hebreo 6:10.

14. Kasano nga impabigbig kenka dagiti 12 a mammadto no ania dagiti kababalin ken aramid a karimon ni Jehova?

¹⁴ Ngem ania ti aramidem tapno maikari ti naganmo a mairaman iti dayta a “libro a pakalaglagipan,” a masursuratan uray pay itan iti imatang ni Jehova? Lagipem ti dadduma kadagiti nainsiriban a balakad a naadaltayo kadagiti libro dagiti 12 a mammadto. Naawatantayo no ania a kondukta, galad, ken kababalin ti saan a makaay-ayo ken ni Jehova. Kas pagarigan, binallaagandatayo dagiti mammadto maipapan kadagiti aramid a kuna ti Dios a maikaniwas kadagiti nalinteg a pagalagadanna ken mabalin a mangdadael iti biagtayo, kas iti “nalulok a kababalin” ken ti “espiritu ti pannakiabig.” (Oseas 4:12; 6:9) Karimon ti Dios dagidiay manggulib iti asawa wenno uray kadagiti dadduma pay a kameng ti pamilia. (Malakias 2:15, 16) Pinaltiingan ni Jehova dagiti mammadtona a mangipaganetget a saan a makaay-ayo kenkuana ti amin a kita ti kinaranggas. (Amos 3:10) Pinaigunamgunamna met kadakuada ti panangliklik iti kinaawan hustisia wenno panagkusit iti negosio ken kadagiti banag a mainaig iti kuarta. (Amos 5:24; Malakias 3:5) Ken inyunay-unay dagiti 12 a libro a dagiti lallaki a nakaitalkan ti autoridad nasken a saanda nga ipalubos a maballikug ti pangngeddengda gapu iti panangidumduma wenno gapu iti bukodda nga interes.​—Mikias 7:3, 4.

15. Ania ti sumagmamano a bendision a sagsagrapem gapu iti panangipangagmo iti pammagbaga dagiti 12 a mammadto?

¹⁵ Ngem saan laeng a basta inturong dagiti mammadto iti imatangtayo dagiti banag a rumbeng a liklikantayo. Imbatadda dagiti pagsayaatan ti panangitandudo kadagiti pagalagadan ti Dios. Suminged ti relasiontayo ken ni Jehova. (Mikias 4:5) Ad-adda a natalged ken aktibo ti kongregasiontayo no maannurot ti kinalinteg. Lumagda ti relasion dagiti agassawa, ken ad-adda a nagkaykaysa ti pamilia, a mangipangpangruna kadagiti naespirituan a banag. (Oseas 2:19; 11:4) Raemendatayo dagiti sabsabali no nalinteg dagiti aramidtayo ken napudnotayo. Kas panangtulad iti asi ni Jehova, ipakitatayo ti pannakipagrikna ken naayat a kinamanangngaasi ket kasta met ti isubad kadatayo dagiti kakabsattayo. (Mikias 7:18, 19) Wen, malikmuttayo kadagiti naespirituan ti panagpampanunotda a tattao, dagiti kakabsat a mangipatpateg iti kinapudno ken talna, ken kangrunaan iti amin, ibilangnatayo ni Jehova kas gagayyem. (Zacarias 8:16, 19) Dika kadi umanamong a dagitoy ket bendision a masagsagrapmon?

16. Ania a pagdumaan ti nabatad ita, ket anianto ti kaipapanan daytoy inton dumteng ti aldaw a panagsingir ni Jehova?

¹⁶ Kas resulta dagiti banag a kaus-usigtayo, pudno unay a nabatbatad ita “ti pagdumaan iti nagbaetan daydiay nalinteg ken daydiay nadangkes”​—iti nagbaetan dagiti pudno ken saan a pudno a Kristiano. (Malakias 3:18) Ikagkagumaantayo ti agbiag a mayannurot kadagiti pagalagadan ni Jehova bayat nga umun-uneg ti pannakailumlom ti lubong iti lugnak ti kinadakes. Ket ammom a serioso ti ibunganto daytoy a pagdumaan inton dumteng ti “dakkel nga aldaw ni Jehova.”​—Sofonias 1:14; Mateo 25:46.

17. Iti masanguanan, kasanom a mausar ti impormasion iti daytoy a libro?

¹⁷ Nalawag ngarud nga agaplikar dagiti balakad dagiti 12 a mammadto iti uray ania a panawen. Iti panangrisut kadagiti espesipiko a parikut wenno iti panagdesision, mabalin a kayatmo a repasuen ti praktikal nga impormasion a naidatag kadagiti kapitulo daytoy a libro. Iti kasta maipakitam ti agtultuloy a tarigagaymo nga agsursuro kadagiti dalan ni Jehova ken ‘magna kadagiti danana.’ (Mikias 4:2) Ngem saan laeng nga iti agdama a kayatmo nga aramiden dayta. Saan kadi a sipapasnek a tartarigagayam a maisurat nga agnanayon ti naganmo iti libro a pakalaglagipan ni Jehova? Matulongannaka iti dayta dagiti libro nga insurat dagiti 12 a mammadto.

18. Kas nadakamat iti Joel 2:32, ania ti nasken nga aramidem, ket ania ti innayon iti dayta ni apostol Pablo?

¹⁸ Iti panangipaganetgetna no ania ti nasken nga aramidentayo tapno agnanayon nga anamongannatayo ti Dios, kinuna ni Joel: “Tunggal maysa nga umawag iti nagan ni Jehova makatalawto a sitatalged.” (Joel 2:32) Dua nga apostol, da Pedro ken Pablo, ti nangadaw iti daytoy a napateg a banag a nasken nga aramidentayo. (Aramid 2:21; Roma 10:13) Adda innayon ni Pablo a maysa pay nga aspeto dayta a pammagbaga idi insaludsodna: “Kasano ti panangawagdanto iti daydiay a kenkuana saanda a naaddaan iti pammati?” (Roma 10:14) Awan duadua a kayatmo ti umawag iti nagan ni Jehova ken maaddaan iti pammati kenkuana ita ken iti agnanayon!

19. Ania ti kaipapanan ti panangawag iti nagan ni Jehova?

¹⁹ Saan laeng a panangammo ken panangusar iti personal a nagan ti Dios ti kaipapanan ti panangawag iti nagan ni Jehova. (Isaias 1:15) Ti konteksto ti Joel 2:32 ipaganetgetna ti pudno a panagbabawi ken panagtalek iti pammakawan ni Jehova. (Joel 2:12, 13) Ti panangawag iti nagan ti Dios ipasimudaagna ti pudpudno a panangam-ammo, panagtalek, panagtulnog, ken panangipangpangruna kenkuana iti biagtayo. Wen, ti panagserbi ken ni Jehova ti kangrunaan a pakaseknantayo. Mangyeg dayta iti makapnek ken manayon a biag, a maysa a bendision nga aggapu iti Dios.​—Mateo 6:33.

20. No agbiagka a mayannurot iti pammatim, ania a nagsayaat a gunggona ti masagrapmo?

²⁰ Kinuna ni Jehova babaen ken ni Habakuk: “No maipapan iti daydiay nalinteg, babaen ti kinamatalekna agtultuloyto nga agbiag.” (Habakuk 2:4) Siguraduem nga imula dayta iti panunot ken pusom. Maysa dayta kadagiti napateg unay a kinapudno a linaon ti Biblia. Namitlo a dinakamat ni Pablo dayta a teksto kadagiti naipaltiing a suratna.b (Roma 1:16, 17; Galacia 3:11, 14; Hebreo 10:38) Kalikaguman daytoy ti panangipakitam iti pammati iti daton nga impaay ni Jesu-Kristo gapu kadagiti basoltayo. Inlawlawag ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana . . . ket maaddaan iti agnanayon a biag.” Kinuna pay ni Jesus: “Ti mangwatwat iti pammati iti Anak adda agnanayon a biagna.” (Juan 3:16, 36) Dayta a daton ti pakaibatayan ti pannakapaimbag a ti laeng Mannubbottayo ti makaiyeg. Kalpasan ti panangilanadna iti kuna ni Jehova no anianto ti mapasamak iti dakes a lubong ni Satanas inton dumteng ti naindaklan nga aldawna, innayon ni Malakias: “Kadakayo nga agbuteng iti naganko sigurado nga agsilnagto ti init ti kinalinteg, a kadagiti payakna adda pannakapaimbag.” Wen, agsilnagto ni Jesus tapno mangpaimbag. Ramanen dayta ti naespirituan a pannakapaimbag a mapaspasarantayon. Ngem anian a makaparagsak a panunoten nga agtultuloyto dayta iti naan-anay a pisikal a pannakapaimbag iti baro a lubong!​—Malakias 4:2.

21. Apay a makapagtalekka a kabaelan ni Jehova a tungpalen ti pagayatanna?

²¹ Nasken met ti panamati iti pannakabalin ti Dios a mangibanag iti pagayatanna. Idi kaaldawan ni Mikias, narigat ti agtalek kadagiti tattao. Kinuna ti mammadto: “Dikay maaddaan pammati iti maysa a kadua. Dikay agtalek iti piaren a gayyem.” Ngem nagtalek ni Mikias ken ni Jehova, ket kastaka met koma. Kinuna ni Mikias: “No maipapan kaniak, ken Jehova nga agtultuloyakto nga agsiput.” (Mikias 7:5, 7) Saan a kas kadagiti agbaliwbaliw ti panunotda a tattao, determinado ken adda pannakabalin ni Jehova a mangtungpal iti panggepna tapno maalangon ti kinasoberanona ken agpaay iti agnanayon a pagimbagan dagiti tattao nga addaan pammati.

22. Anianto ti pagbanagan dagidiay addaan pammati nga umawag iti nagan ni Jehova?

²² Addaan panagtalek a maibagam met ti kinuna ni Habakuk: “Agragsakakto ken Jehova a mismo; agrag-oakto iti Dios ti pannakaisalakanko.” (Habakuk 3:18) Imbatad ni propeta Joel no apay a rumbeng nga agrag-o dagidiay addaan pammati nga umawag iti nagan ni Jehova: ‘Makatalawdanto a sitatalged’ wenno, kas kuna ni Pablo, ‘maisalakandanto.’ (Joel 2:32; Roma 10:13) Iti ania nga anag a makatalawda a sitatalged, wenno maisalakanda? Ti pammatim insalakannakan kadagiti nasikap nga aramid ni Satanas ken iti adu a nasaem a kasasaad a mapaspasaran dagiti nadangkes. (1 Pedro 1:18) Ngem malaksid iti dayta, mainanamam a maisalakankanto inton madadael daytoy agdama a dakes a sistema ti bambanag. Kalpasanna matagiragsakmonto ti aglaplapusanan a bendision nga impakpakauna dagiti 12 a mammadto.

23, 24. (a) Ania ti dadduma kadagiti kasasaad iti Paraiso nga impakauna dagiti 12 a mammadto? (b) Kasano a ti panangmatmatmo iti masanguanan ket inapektaran ti insurat dagiti 12 a mammadto?

²³ Manayon a bendision ti agur-uray kadagidiay “agbuteng ken Jehova.” (Malakias 3:16) Inladawan ti dadduma kadagiti 12 a mammadto ti kasasaad iti asidegen a Paraiso ditoy daga, a mangparag-o ken mangpagagar kenka. Kas pagarigan, insurat ni Mikias: “Pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada.” (Mikias 4:4) Wen, iti sidong ti Pagarian ti Dios, natalgedkanto ken sagrapemto dagiti bunga ti nagbannogam!

²⁴ Saan nga arapaap laeng ti panangnamnamam iti panagpatingga ti sakit, ladingit, ken uray ipapatay. Panunotem ti rag-o dagidiay mapagungar nga addaan iti namnama nga agbalin a perpekto a tattao! Naan-anay a mapasarandanto ditoy daga ti naipadto iti Oseas 13:14: “Subbotekto ida iti ima ti Sheol; alangonekto ida ken patay. Sadino ti ayan dagiti panniludmo, O Patay? Sadino ti ayan ti kinamanangdadaelmo, O Sheol?” Inyaplikar ni Pablo dayta a bersikulo iti nailangitan a panagungar.​—1 Corinto 15:55-57.

25. Anianto ti mariknam iti baro a lubong?

²⁵ Saan a narigat a patien a mapasamakto ti panagungar ditoy daga. (Zacarias 8:6) Idi impadto da Amos ken Mikias nga agsublinto iti dagada ti naidestiero nga ili ti Dios, mabalin a kasla narigat a patien dayta. Ngem ammom a napasamak dayta. (Amos 9:14, 15; Mikias 2:12; 4:1-7) Kinuna dagiti nagsubli: “Nagbalintayo a kas kadagidiay nagtagtagainep. Iti dayta a tiempo napno ti ngiwattayo iti katawa, ken ti dilatayo iti narag-o nga ikkis. . . . Nagaramid ni Jehova iti naindaklan a banag iti daydiay naaramidanna kadatayo. Nagbalintayo a narag-o.” (Salmo 126:1-3) Kastanto ti mariknam iti baro a lubong inton masagrapmo ti “bendision agingga nga awanen panagkasapulan.”

26. Ania ti agur-uray kadagidiay agbiag a silalagip iti aldaw ni Jehova?

²⁶ Kalpasan a maikkat ti kinadakes ditoy daga inton “aldaw ni Jehova,” naan-anayto nga ‘agbalin a kukua ni Jehova ti kinaari.’ (Abdias 15, 21) Saan kadi a nagsayaat a bendision dayta maipaay kadagiti amin nga iturayanna ditoy daga? Ket mabalin a maysakanto kadagidiay pakatungpalan ti sasao ti Malakias kapitulo 3: “‘Sigurado nga agbalindanto a kukuak,’ kinuna ni Jehova ti buybuyot,  . . ‘Ket ipakitakto ti panangngaasi kadakuada, no kasano a ti maysa a tao ipakitana ti panangngaasi iti anakna nga agserserbi kenkuana.’” (Malakias 3:17) Nalawag a ti kinamatalekmo, a mangiturong iti pannakaisalakanmo, ti mangyegto kenka iti “bendision agingga nga awanen panagkasapulan.” Anian a nagsayaat a namnama!