TROFIMO

[Panangpakan; Panangtaraon].

Maysa a katrabahuan ni apostol Pablo; maysa a Gentil a Kristiano a taga Efeso. (Ara 21:29) Nalabit nagbalin a Kristiano ni Trofimo idi pimmaut ti ministerio ni Pablo idiay Efeso iti maikatlo a panagdaliasatna kas misionero. Idi agangay, maysa ni Trofimo kadagiti kadua ni Pablo a nagdaliasat bayat ti panagsublida a dimmalan iti Macedonia nga agturong iti Asia Menor ken kalpasanna idiay Jerusalem. (Ara 20:3-5, 17, 22) Sadiay, ni Trofimo ket nakita a kadua ni Pablo, ket idi nangikuyog ni Pablo iti sabsabali pay a sumrek iti paraangan ti templo, impagarup dagiti Judio a ni Trofimo, a maysa a Gentil, ket limmabes iti Paraangan dagiti Gentil, iti kasta tinulawanna ti templo. Gapu iti daytoy a di umiso a panangipapan, ni Pablo ket dinarup dagiti bunggoy ti tattao. (Ara 21:26-30; 24:6) Kalpasan ti sumagmamano a tawen, kalpasan ti umuna a pannakaibalud ni Pablo, nakipagdaliasat manen kenkuana ni Trofimo. Ngem idi nakadanonda idiay Mileto, saan unay nga adayo iti ili ni Trofimo, nagsakit ni Trofimo ket saanna a naituloy ti makikadua ken Pablo.​—2Ti 4:20.