ARISTARCO

[Kasayaatan (Kataknengan) nga Agturay].

Maysa kadagiti nasinged a kadua ni Pablo, kakuyogna nga agdaldaliasat ken padana a balud, taga Macedonia a naggapu idiay Tesalonica. (Ara 20:4; 27:2) Nadakamat iti salaysay maipapan iti maikatlo a panagbaniaga ni Pablo kas misionero; sipupuersa a naulod da Aristarco ken Gayo a naipan iti teatro idi kangitingitan ti maysa a panagderraaw dagiti taga Efeso. (Ara 19:29) Mabalin nga isu “ti kabsat” a timmulong ken Pablo mainaig iti kontribusion a naur-or idiay Macedonia ken Grecia nga agpaay kadagiti taga Judea.​—2Co 8:18-20.

Ni Aristarco kinuyogna ni Pablo iti panaglayag nga agturong idiay Roma, ngem saan a masinunuo no kasano a napalubosan nga aglugan iti barko, nalabit kas maysa nga adipen maipaay ken Pablo. (Ara 27:2) Bayat nga adda idiay Roma, tinulongan ken pinaregtana pay ni Pablo ket kaduana a naibalud iti maysa a tiempo. Dagiti kablaaw ni Aristarco ket naidanon babaen ti sursurat ni Pablo kadagiti taga Colosas (4:10) ken ni Filemon (23, 24).