PEMPENNET, UR-URAT

Natibker a punipon dagiti tisyu a mamagsilpo iti tultulang wenno mangpatibker iti kamkameng. Ti nagduduma nga agdama a patarus ti Biblia ipatarusda ti Griego a sao a syn·deʹsmon (maysa a porma ti synʹde·smos) iti Colosas 2:19 kas “ur-urat” (ED; NE; NW; RS), idinto ta ti dadduma ipatarusda dayta kas “binggas” (Fn; Mo), “mamagkaykaysa a singgalut” (Ro), wenno “singgalut” laeng (AS; KJ). Ti synʹde·smos kaipapananna ti “daydiay mamagkaykaysa, singgalut ti panagkaykaysa, mamagkinnapet” ken maar-aramat mainaig kadagiti binggas wenno pempennet. (A Greek-English Lexicon, da H. G. Liddell ken R. Scott, rinebisar ni H. Jones, Oxford, 1968, p. 1701) Daytoy met laeng a Griego a termino naaramat iti sasao a “kawar ti kinakillo” (Ara 8:23), “mamagkaykaysa a singgalut ti talna” (Efe 4:3), ken “naan-anay a singgalut ti panagkaykaysa” (Col 3:14).

Idi namakdaar maibusor iti “sinsinan a kinapakumbaba” ti maysa nga agkunkuna laeng a Kristiano, kinuna ni Pablo: “Saan a kumkumpet a sititibker iti ulo, iti daydiay a manipud kenkuana ti intero a bagi, yantangay maipapaayan ken natunos ti pannakasangalna babaen iti nagsusuopan ken ur-uratna [syn·deʹsmon], agtultuloy a dumakkel iti idadakkel nga ipapaay ti Dios.” (Col 2:18, 19) Ditoy nayasping ti napulotan a kongregasion Kristiano iti maysa a bagi nga addaan iti ulo. Ti panagpannuray iti maysa ken maysa dagiti kamengna ipakita ti komento a “natunos ti pannakasangalna babaen iti nagsusuopan ken ur-uratna,” iti kasta mangiladawan nga inaramat ni Pablo ti ‘ur-urat’ mainaig iti naespirituan a bagi ni Kristo, a ni Jesus ti ulo dayta. Kas ulo, ipapaayan ni Jesus dagiti kameng ti bagi iti kasapulanda babaen kadagiti ‘nagsusuopan ken ur-urat,’ ti pamay-an ken ur-urnos maipaay iti panangyabasto iti naespirituan a taraon, kasta met iti komunikasion ken panagtutunos. (Idiligyo ti 1Co 12:12-30; Jn 15:4-10.) Iti literal a natauan a bagi adda akmen ti tunggal kameng maipaay iti naannayas a panaggunay ken idadakkel, agpadpada iti panangawat iti pagtaraon ken pannakaiwanwan ken iti panangipasa iti dayta iti dadduma pay a kameng ti bagi. Umasping dagiti kasasaad no iti kongregasion a bagi ni Kristo.