Inaramidda ti Pagayatan ni Jehova

Binautisaran ni Felipe ti Opisial nga Etiope

BAYAT a nakasakay iti karuahena, sisisirib nga us-usaren ti maysa nga Etiope ti panawenna. Agbasbasa a sipipigsa​—maysa a gagangay nga ugali dagiti agbibiahe idi umuna a siglo. Daytoy a tao ket maysa nga opisial “nga adda iti pannakabalin iti sidong ni Candace a reina dagiti Etiope.”a Isu idi “ti agaywan kadagiti isuamin a gamengna”​—no ar-arigen, maysa idi a ministro iti finance. Daytoy nga opisial agbasbasa idi manipud iti Sao ti Dios tapno makagun-od iti pannakaammo.​—Aramid 8:27, 28.

Adda iti asideg ni ebanghelisador a Felipe. Maysa nga anghel ti nangiturong kenkuana iti daytoy a lugar, ket ita naibaga kenkuana: “Umasidegka ket makikuyogka iti daytoy a karuahe.” (Aramid 8:26, 29) Mapanunottayo ti panangisaludsod ni Felipe iti bagina, ‘Asino daytoy a lalaki? Aniat’ basbasaenna? Apay a naiturongak kenkuana?’

Bayat nga immasibay ni Felipe iti karuahe, nangngegna ti Etiope a mangbasbasa kadagitoy a sasao: “Kas maysa a karnero naipan iti pagpartian, ken kas maysa a kordero nga awan timekna iti sanguanan ti mamukpukis kenkuana, kasta met a dina luktan ti ngiwatna. Kabayatan ti pannakaipababana naikkat kenkuana ti panangukom. Asinonto ti mangibaga kadagiti detalye ti kaputotanna? Agsipud ta ti biagna naikkat iti daga.”​—Aramid 8:32, 33.

Dagus a nabigbig ni Felipe ti kasuratan. Naadaw iti surat ni Isaias. (Isaias 53:7, 8) Nariribukan ti Etiope iti basbasaenna. Rinugian ni Felipe ti saritaan babaen ti panagsaludsodna: “Ammom kadi nga agpayso no ania ti basbasaem?” Simmungbat ti Etiope: “Pudno unay, kasano a maaramidak ti kasta, malaksid no adda nangidalan kaniak?” Kalpasanna nagpakaasi ken Felipe a makikadua iti karuahena.​—Aramid 8:30, 31.

“Ania ti Makalapped Kaniak a Mabautisaran?”

“Ipakaasik kenka,” kinuna ti Etiope ken ni Felipe, “maipapan iti siasino a kunaen daytoy ti mammadto? Maipapan iti bagina a mismo wenno maipapan iti sabali a tao?” (Aramid 8:34) Saan a nakaskasdaaw ti pannakariro ti Etiope, ta ti pakabigbigan ti “karnero,” wenno “adipen,” iti padto ni Isaias ket nabayag idin a misterio. (Isaias 53:11) Anian a naglawag daytoy idi impakaammo ni Felipe iti Etiope “ti naimbag a damag maipapan ken Jesus”! Kalpasan ti sumagmamano a kanito kinuna ti Etiope: “Adtoy! Maysa a bagi ti danum; ania ti makalapped kaniak a mabautisaran?” Iti kasta dagus a binautisaran ni Felipe.​—Aramid 8:35-38.

Inaapura kadi daytoy a panagtignay? Pulos a saan! Ti Etiope ket maysa a Judio a proselita.b Gapuna maysa idin a managdaydayaw ken Jehova nga addaan pannakaammo iti Kasuratan, agraman dagiti Mesianiko a padto. Nupay kasta, kurang pay ti pannakaammona. Ita ta naawatnan daytoy napateg nga impormasion maipanggep iti akem ni Jesu-Kristo, natarusan ti Etiope no aniat’ kalikaguman ti Dios kenkuana ket sisasaganan nga agtulnog. Maikanatad ti bautismo.​—Mateo 28:18-20; 1 Pedro 3:21.

Kalpasanna, “ti espiritu ni Jehova dagus nga impanawna ni Felipe.” Napan iti sabali a pakaitudingan. Ti Etiope “sirarag-o a napan a nagtultuloy iti dalanna.”​—Aramid 8:39, 40.

Leksion Agpaay Kadatayo

Kas agdama nga ad-adipen ni Jehova, addaantayo iti annongen a tumulong kadagiti nasingpet panagpuspusona a tattao a mangadal iti kinapudno ti Sao ti Dios. Adu ti nagballigi a nangipaay iti naimbag a damag kadagiti sabsabali bayat nga agbibiaheda wenno iti dadduma pay a di-pormal a kasasaad. Kas resulta ti trabaho a panangikasaba iti Pagarian, ginasut a ribu kada tawen ti mangisimsimbolo iti dedikasionda ken Jehova a Dios babaen ti panagpabautisar.

Siempre, saan a rumbeng nga apuraen dagiti kabbaro nga agpabautisar. Umuna masapul a gun-odenda ti umiso a pannakaammo maipapan ken ni Jehova a Dios ken ti Anakna, ni Jesu-Kristo. (Juan 17:3) Kalpasanna masapul nga agbabawida, a panawanda dagiti di umiso a kababalin ken tallikudanda tapno tumunosda kadagiti pagalagadan ti Dios. (Aramid 3:19) Kalikaguman daytoy ti tiempo, nangruna no naigamer unayen ti di umiso a panagpampanunot ken kababalin. Nupay kasapulan ti sipapasnek a panangutob dagiti kabbaro no aniat’ nairaman iti panagbalin a Kristiano nga adalan, naindaklan a bembendision ti ibunga iti iseserrek iti dedikado a pannakirelasion ken Jehova a Dios. (Idiligyo ti Lucas 9:23; 14:25-33.) Sipipinget nga iturturong dagidiay a Saksi ni Jehova dagiti kasta a kabbaro iti organisasion nga us-usaren ti Dios a mangiringpas iti pagayatanna. (Mateo 24:45-47) Kas iti Etiope, agrag-o dagitoy a mangammo ken tumunos kadagiti kalikaguman ti Dios kadakuada.

[Dagiti Footnote]

[Kahon iti panid 8]

Apay a Naawagan Eunuko?

Iti intero a salaysay iti Aramid kapitulo 8, nadakamat ti Etiope kas maysa a “eunuko.” Nupay kasta, tangay saan nga awaten ti Linteg Mosaico ti nakapon a lalaki iti kongregasion, nabatad a saan a literal a eunuko daytoy a lalaki. (Deuteronomio 23:1) Ti Griego a sao para iti “eunuko” mabalin nga agaplikar iti maysa a tao a nangato ti saadna. Gapuna, ti Etiope ket maysa nga opisial iti sidong ti reina ti Etiopia.