Nagkaykaysa a Panangipablaak ti Sao ni Jehova

“Agmaymaysakayo koma iti nakem a maiyannurot ken Kristo Jesus, tapno iti maymaysa a timpuyog ken maymaysa a timek daydayawenyo ti Dios ken Ama ni Apotayo a Jesu-Kristo.”​—ROMA 15:5, 6.

 1. (a) Ania ti urnos ni Jehova a mamagkaykaysa ti ilina? (b) Aniat’ ipamatmat dagiti Kasuratan maipapan ti urnos daytoy a panamagkaykaysa?

INURNONG ni Jehova dagiti saksina iti maysa a nasudi a sangalubongan a panagkaykaysa. Maitunos daytoy iti urnos ti sangakabbalayan ti Dios a sinalaysay ni apostol Pablo idiay Efeso 1:10: “A maipaay iti pannakaisagana ti pannakatungpal dagiti pannawen, tapno mapagkaykaysa dagiti amin a bambanag ken Kristo, dagiti adda sadi langit ken dagiti met adda iti rabaw ti daga.” Ti umuna a maurnong isu dagidiay adda iti “bassit nga ipastoran” dagiti napulotan nga agturong idiay langit a Kristiano ken kalpasanna ti “dakkel a bunggoy . . . manipud amin a nasion” a mangin-inanama a makalasat nga agturongto iti maysa a nalinteg a “baro a daga” nga inkari ti Dios.​—Lucas 12:32; Apocalipsis 7:3, 4, 9, 13-17; 21:1, 5.

 2. Aniat’ mamagbalin a posible para kadagiti Saksi ni Jehova nga agsao a “iti maymaysa a timpuyog”?

² “Iti maymaysa a timpuyog”​—kasta ti pamay-an a panangisasao dagitoy a saksi ni Jehova ti mensahe ti Pagarianna. Apay a nabalinanda nga aramiden daytoy? Ngamin ta, iti intero daytoy a globotayo, ipakpakitada ti “maymaysa a nakem a maiyannurot ken Jesu-Kristo” bayat nga adda ditoy daga. Isut’ di paset daytoy natangsit a lubong. Imbes ketdi, impakumbabana ti bagina iti panagaramid ti pagayatan ti Dios ken iti panangibangon iti maysa a nabara, naayat a panagkaykaysa kadagiti ad-adalanna. Daytoy ti pangrugian ti sangalubongan a panagkaykaysa a mangilasin kadagiti pudno a Kristiano bayat dagiti siglo a sumaruno.​—Filipos 2:5-8; Juan 13:34, 35; 17:14.

 3. (a) Ania a nalawag a panaggiddiat ti makita ditoy daga itatta? (b) Kasano a dagiti Kasuratan tulongannatayo iti panangilasin iti sangalubongan a sosiedad dagiti pudno a Kristiano?

³ Daytoy a panagkaykaysa ti organisasion ti nadanonnan ti nakaskasdaaw unay a pannakaiyebkasna bayat dagitoy “maudi nga al-aldaw,” a maisupadi unay iti pannakasinasina a nangsaplit ti sistema dagiti bambanag ni Satanas, a sadiay aglaplapusanan ti gura ken kinadakes. (2 Timoteo 3:1-5, 13; Mateo 24:3, 12) Nikaanoman a ti historia ti sangatauan naadda iti intero daytoy a dagatayo, kadagiti 203 a dagdaga, ti maysa nga organisasion nga addaan ti naan-anay a panagtitimpuyog iti pammati, panggep ken aramid. Daytoy a sangalubongan a kagimongan dagiti adalan ni Jesus ti mabigbig babaen kadagiti bungbungada.​—Juan 15:8; Hebreo 13:15; Galacia 5:22, 23.

Panagkaykaysa ti Panagtignay

 4. (a) Ania a suppiat ti timmaud iti umuna-siglo a kongregasion? (b) Sigun iti Aramid 15:1-6, ania a teokratiko a panagtignay ti narugian?

⁴ Ti panagkaykaysa ti panagtignay iti organisasion ni Jehova ti naiyilustrar nga agpaay kadatayo idiay Aramid kapitulo 15. Iladawanyo iti mata ti pampanunotyo ti panagtataripnong dagiti natataengan a saksi ni Jehova​—dagiti 12 nga apostoles, dadduma a panglakayen ti kongregasion idiay Jerusalem ken ni Pablo ken ni Bernabe, dagiti panglakayen manipud kongregasion ti Antioquia. Idiay Antioquia, ken kasta met idiay Jerusalem, dadduma kadagiti nakumberte manipud kadagiti Judio ipappapilitda a dagiti tattao kadagiti nasnasion masapul a makugitda ken masapul a surotenda ti Linteg ni Moises tapno maisalakanda. Gapuna dagiti apostol ken dagiti panglakayen “naguurnongda tapno panunotenda daytoy a banag.”​—Aramid 15:1-6.

5-7. (a) Iti ania a kaipapanan nga adda ti “dakkel a panagsuppiat”? (b) Ania a pammaneknek dagiti naidatag? (c) Kasano a naiyeg dagiti Kasuratan a mangpaneknek iti dayta a banag? (d) Ania a nataengan a determinasion ti inaramid ni Santiago, a nangiturong iti ania a maudi a desision? (e) Ania a kita ti panagtignay ti simmaruno?

⁵ Adda ti silulukat-panunot a diskusion iti daytoy a problema, a dagitoy a napeklan a lallaki inyebkasda amin dagiti iyaayonda wenno panangkontrada. Saan pay a nabukel dagiti pampanunotda nga immun-una. Situtulokda a mangsukimat iti dayta a banag manipud amin nga anggulona. Napataud ti “dakkel a suppiat,” ngem kaawatan a tinaginayonda met ti urnos ken nagimdengda a sirerespeto kadagiti panangmatmat dagiti dadduma. Pinaneknekan ni apostol Pedro ti kinapudno a ti Dios impaayna ti nasantuan nga espirituna kadagiti di nakugit a tattao dagiti nasnasion​—a pudno a daytat’ nagpigsa a pammaneknek a ti pisikal a pannakakugit ket saanen a maysa a kalikagum para kadagidiay maisalakan. Innayon met da Bernabe ken Pablo ti pammaneknekda, a sinalaysayda dagiti adu a nakaskasdaaw a bambanag nga inaramid ti Dios babaen iti ministerioda kadagiti nasnasion.​—Aramid 15:7-12.

⁶ Sumaganad, inadaw ni Santiago dagiti Kasuratan a mangpaneknek iti argumento a kaidatdatag la unay. Inlawlawagna nga intudo ti Amos 9:11, 12 ti pannakaisubli ti nadiosan a parabur iti sidong ti Dakdakkel a David, ni Jesu-Kristo, ken ti panangidanon ni Jehova ti di kaikarian a kinamanangaasina “kadagiti amin a nasion a mapanagananda ti naganna.” Nakita ni Santiago a saanen a kasapulan pay ti panangriribuk kadagiti naawis manipud kadagiti nasnasion babaen ti panangipapilit a makugitda ken tungpalenda pay amin dagiti al-alagaden nga adda iti Linteg ni Moises. Nupay kasta, sumagmamano a bambanag dagiti kasapulan: Masapul nga adayuanda ti panagdayawda kadagiti didiosen, nga adayuanda ti dara iti aniaman a pormana ken ti seksual nga imoralidad.​—Aramid 15:13-21.

⁷ Ti bagi a manarawidwid idiay Jerusalem nakagtengda iti sangsangkamaysa a desision. Ket imbaonda dagiti mensahero idiay kongregasion ti Antioquia nga addaan surat a nagpatingga babaen iti daytoy a pammaregta: “No agaluadkayto kadagitoy a banag, naimbagto ti aramidenyo. Sapay koma ta naimbagkayo!”​—Aramid 15:22-29.

Ti Nateokratikuan a Pagannurotan

 8. (a) Kasano a ti moderno-aldaw a Bagi a Manarawidwid naiturong iti panagaramid kadagiti desision? (b) Ania dagiti sumagmamano a banag a nalawlawagan iti nabiit pay?

⁸ Kadagiti moderno a pannawen, ti Bagi a Manarawidwid dagiti Saksi ni Jehova, a mangibagbagi ti “matalek ken naannad nga adipen” ti Apo nga adda ditoy daga, sursurotenda daytoy met laeng nga apostoliko a padron. (Mateo 24:45-47) Gapuna, ti Nakristianuan a kapadasan, ti pannakaigiya manipud ti Biblia, ken ti panangiturturong ti espiritu ni Jehova ti mangidirdirekta iti daytoy a grupo dagiti napulotan a Saksi kadagiti nateokratikuan a konklusion kadagiti bambanag a dakkel pakaseknan iti kongregasion. Kas pangarigan, kadagiti nabiit pay a tawtawen sinurot ti Bagi a Manarawidwid ti Nainkasuratan a pamay-an iti pananglawlawag kadagiti bambanag kas ti panangmatmat ti Biblia “kadagiti ministro,” ti inted Dios a konsiensia, ti panagaw-awit kadagiti makapapatay nga igam, ken ti kasaknap a pakaiyaplikar dagiti ramramit ti padto ni Isaias maipapan iti masanguanan a Paraiso ditoy daga.​—Idiligyo iti Juan 14:26; 1 Corinto 2:10.

 9. Ania a pamay-an ti masapul a suroten dagiti panglakayen iti panangtaming kadagiti parikut itatta?

⁹ Ti pamay-an idiay Aramid kapitulo 15 masapul a suroten met dagiti panglakayen ti kongregasion iti panangtamingda kadagiti parikut itatta. Umuna, bay-an a ti problema ken dagiti nainaig a bambanag ti maiyebkas. Sumaganad, bay-an a dagiti mapagtalkan a saksi itdenda dagiti nalawag, maitunos iti kinapudno nga ebidensia a mainaig iti dayta a banag. Sukimaten dagiti Kasuratan tapno magun-odan ti panangmatmat ni Jehova, nga usaren met ti tulong nga adda kadagiti publikasion ti Watch Tower Society. Buyogen iti panagkararag agtrabaho nga agturong iti pannakagteng iti sangsangkamaysa a solusion, a maitunos iti pannursuro ti Sao ni Jehova, a makagunggona iti kongregasion.​—Isaias 48:17; 1 Corinto 14:33.

Panagragragsak​—Idi ken Ita

10. (a) Kas idi umuna-siglo a kongregasion, kasano ti rebbeng a panangapektar dagiti teokratiko a desision kadatayo itatta? (b) Kasano a dagiti moderno a pasamak nangiturong iti pannakapapigsa ken irarang-ay ti ili ti Dios?

¹⁰ Idi nangngeganda ti desision ti bagi a manarawidwid, dagiti kameng ti kongregasion idiay Antioquia “nagragsakda gapu iti panangliwliwa.” Kasta met itatta, agragsak dagiti Saksi ni Jehova a makaammo kadagiti organisasional a pangngeddeng ken panangilawlawag iti doktrina a mangted ti naespirituan a salun-at iti ili ti Dios ken ti iyaadelantar ti trabaho ni Jehova. (Idiligyo iti Tito 2:1.) Ngem saanen a kasapulan para iti Bagi a Manarawidwid nga agsurat pay laeng kadagiti sursurat ti instruksion babaen ti ima ken isirkular dagitoy babaen kadagiti mensahero nga agdaldaliasat babaen iti saka. Dagiti moderno a pamay-an ti komunikasion ken dagiti pagimprentaan iti nasurok a 30 a sangsanga ti Watch Tower iti intero a daga pinagbalinna a posible a maiyallatiw ti “naimbag a damag ti sao ni Jehova” kadagiti minilmilion a tattao iti ababa laeng a tiempo. Daytoy ti maar-aramid nangnangruna babaen iti magasin a Ti Pagwanawanan. Gapuna, dagiti kongregasion iti intero a lubong agtultuloy a “napabilegda iti pammati ken ti bilangda immadu nga inaldaw.”​—Aramid 15:30–16:5.

11. Kasano nga us-usaren ni Jehova Ti Pagwanawanan iti pannakaitungpal ti Isaias 30:18-21?

¹¹ Dagidiay managbasa Ti Pagwanawanan kadagiti adun a tawtawen pagragsakanda met a makita iti ngumatngato a sirkulasionna. Iti 105 a tawtawen a pannakaipablaak daytoy ti immadu manipud 6,000 a kopia iti Ingles a maminsan iti makabulan ingganat’ 11,150,000 kopias iti 102 a pagsasao, amin dagiti kangrunaan nga edisionna ti mamindua iti makabulan. Awan duadua, maus-usar a sipipigsa Ti Pagwanawanan babaen ti Naindaklan nga Instruktortayo, ni Jehova a Dios, iti panangitungpal iti karina: “Naragsak dagiti isuamin nga agpannuray kenkuana. . . . Ket dagiti lapayagmo makangngegdanto ti maysa a sao iti likudam, a kunkunana: ‘Isu daytoy ti dalan. Magnakayo kenkuana.’ Intono agbaw-ingkayo iti makanawan ken intono agbaw-ingkayo iti makatigid.”​—Isaias 30:18-21.

12. (a) Apay nga addaantay ita ti kanayonan a gapuanan ti panagrag-o? (b) Kasano a gunggonaannatayo daytoy baro nga urnos?

¹² Ita adda pay kanayonan a rason nga agragragsak. Mangrugi iti tawen 1985 Ti Pagwanawanan ti maipablaaken nga aggigiddan, no maipapan kadagiti linaonna, iti 23 a pagsasao!a Amin dagitoy nga edision ti addaan parpareho a disenio ti akkubna. Naglaonda iti isu met laeng a serie dagiti panglukat nga artikulo ken isu met laeng nga artikulo a pagadalan. Daytoy ti mangipaay iti aggigiddan a programa ti “panangpakan” a mamagkaykaysa ti ili ni Jehova iti idadakkel a naespirituan “agingga iti makagtengtay amin iti panagmaymaysa ti pammati.” Rebbeng a daytat’ mangpasaranta pay kadatayo nga ad-adda, ‘tapno iti maymaysa a timpuyog ken maymaysa a timek daydayawentayo ti Dios ken Ama ni Apotayo a Jesu-Kristo.’​—Efeso 4:13; Roma 15:6.

13. (a) Kasano kasaknap wenno kalawa daytoy a programa? (b) Ania nga aplikasion ngarud ita ti maaramid a maipaay iti 1 Corinto 1:10?

¹³ No ig-iggamanyo daytoy a magasin iti ima iti linawas a panagadal ti kongregasion Ti Pagwanawanan, dikay aya pagragsakan a maammuan a kaaduan kadagiti kakabsatyo iti intero lubong ket napagkaykaysa babaen ti pannangan iti daytoy isu met laeng a naespirituan a taraon iti isu met laeng nga aldaw? Wen, daytoy ti mapaspasamak iti intero a Norte ken Sud America, iti kaaduan a paset ti Europa, idiay Japan ken kadagiti adu pay a luglugar iti umabagatan nga Africa! Napattapatta a nasuroken ngem 90 porsiento kadagidiay tumabtabuno iti panagadal Ti Pagwanawanan iti intero a daga​—agangay 2,500,000 a tattao iti kada lawas​—ti makiranranuden iti daytoy aggigiddan nga urnos ti “panangpakan.” Iti sangsangkamaysa dagitoyen ti adda iti “panagtitimpuyog iti maymaysa a panunot ken maymaysa a panagrikna.” (1 Corinto 1:10) Ket kas ipalubos dagiti sirkumstansia, dadduma a pagsasao ti mainayonto pay.

14. Kasano a magunggonaan dagiti pamilia?

¹⁴ Agingga itatta, gapu iti panagduduma ti pagsasao, dagiti miembro ti maysa a pamilia ti mabalin nga iti adu a bulbulan nagsisinada iti panagad-adal kadagiti partikular nga artikulo Ti Pagwanawanan. Ngem itan mabalindan ti agkaykaysa iti daytoy a banag. Kas pangarigan, dagiti dayo wenno imigrante a nagannak ti pagaammo unay ti sabali a pagsasao ti mabalindan ti makikatugaw kadagiti Ingles-pagsasaoda nga annakda nga agsagana a sangsangkamaysa iti leksion ti Pagwanawanan iti dayta met laeng a lawas kadagiti dua a pagsasao. Kadagiti pamilia a dua ti pagsasaoda, dagiti nagannak ti nasayaat pannakakabaldan a mangitungpal iti bilin ti Efeso 6:4 ken 2 Timoteo 3:14, 15.

15. (a) Iti publiko a ministeriotayo, ania itan ti mabalintayo nga aramiden maitunos iti Isaias 52:8, 9? (b) Aniat’ naaramid a posible idi karrugi ti 1985, ken iti masanguanan?

¹⁵ Usigenyo, met, ti publiko a ministeriotayo a kadua dagiti magasin. Iti daytoy kanayonan a pamay-an, dagiti agibumbunannag ti Pagarian iti intero a globo mabalindan ti “pumgaak a sirarag-o a sangsangkagiddan” bayat nga ituktukonda dagiti agkaasping nga impormasion iti lubong iti publiko iti isu met laeng a tiempo. (Isaias 52:8, 9) No mangaskasaba kadagiti lansangan babaen kadagiti magasin kadagiti teritoria nga adu ti pagsasaoda, mabalinen nga iparang dagiti agibumbunannag dagiti magasin nga agkakapareho ti tema iti abbongda iti dua wenno ad-adu pay a pagsasao. Panunotenyo dayta! Bayat ti karrugi a paset ti 1985, dagiti agibumbunannag ti Pagarian iti intero a lubong mangmangtedda iti makapatignay, sangsangkamaysa a pammaneknek maipapan iti Armagedon! Iti tiempona, mabalin nga iturongto ni Jehova ti ilina a mangaramid iti dadduma pay a napigsa, sangsangkamaysa a deklarasion iti intero a lubong bayat nga agserserbida a “sangsangkamaysa a kararua nga umag-agawa a maipaay iti pammati iti naimbag a damag.” (Filipos 1:27) Ti aggigiddan a pannakaipablaak Ti Pagwanawanan kadagiti adu a pagsasao ti mamagbalin a posible kadagiti kasta a panangiyebkas.​—Idiligyo iti Daniel 11:44.

Kumitkita iti Masanguanan

16. (a) Ania ti ibagbaga daytoy a Pagwanawanan kadatayo maipapan iti trabaho ti magasin idiay panid 8, 9, ken 25? (b) Apay a kasapulan dagiti tattao dagiti magasintayo itatta?

¹⁶ Bayat ti tawen 1984, inikkan dagiti Saksi ni Jehova ti nalawa a panagiwaras dagiti agkadua a magasin Ti Pagwanawanan ken Agriingkayo! Daytoy a trabaho ti sibabaknang a binendisionan ni Jehova, kas makita manipud kadagiti estadistika a naipablaak iti panid 8, 9, ken 25 iti daytoy a magasin. Iti sangalubongan, ti panagiwaras iti tay-ak kadagiti magasintayo bayat ti 1984 ti rimmang-ay iti 11.1 porsiento iti engrande a dagupna a 287,358,064, bayat a dagiti panagipaima met ti suskripsion ti magasin ti rimmang-ay ti 3.2 porsiento ingganat’ 1,812,221. Awan duadua nga umadu nga umadu dagiti tattao nga agtartarigagay a makaammo no apay a dagiti nasnasion agdandanagda, “a dida ammo ti ruaranda.” (Lucas 21:25, 26) Kayat dagiti nagannak a maaddaan ti naragsak a masakbayan dagiti annakda​—banag a nasaysayaat ngem iti maysa a daga a naksetto iti maysa a nuklear a gubat. Dagiti magasintayo ti mangituktukon iti kasta a sibibiag a namnama!​—Mateo 12:18, 21; Roma 15:4

17. Kasano a dagiti magasintayo tulongannatayo a mangbakal iti Diablo?

¹⁷ Ania ngarud ita, ti maipaay ti 1985? Ti mensahe Ti Pagwanawanan ken Agriingkayo! ti agbalbalin nga ad-adda a nalawlawag wenno natadtadem pay. Daytoy ti manamnama bayat a dagiti maudi nga al-aldaw ti lubong ni Satanas ket agpatinggan. (Apocalipsis 12:12) Dikayo agkamkamali! Kayat ti Diablo nga upayennatayo manipud pannakipaset a regular iti serbisio ni Jehova. Wen, kayat ni Satanas nga isinanatayo manipud bagi ti ili ti Dios ken kadagiti ar-aramidna, ken tapno alun-onennatayo. (1 Pedro 5:8) Ngem isut’ mabalintayo a lapdan babaen iti regular a panagtataripnong tapno gumun-od iti umiso a pannakaammo, ken babaen ti panangusar iti daytoy naparang-ay a pannakaammo iti panagserbi ken Jehova.​—Efeso 6:11, 14-16; Colosas 1:9-11.

18. (a) Kasano kadakkel ti responsabilidadyo kas agibumbunannag ti Pagarian? (b) Kasanotay a maiyaplikar ti balakad ti Roma 12:10, 11 ken 15:5, 6?

¹⁸ Maysakayo aya nga agibumbunannag ti Pagarian? No kasta, petpetpetanyo ti maysa a kangrunaan a posision iti moderno-aldaw a teokratiko a kagimongan. Kas maysa a dedikado a Kristiano, mabalin nga addaankayo kadagiti dadduma pay a responsabilidad iti kongregasion, kaskasdi, iti panagbiag a maipaay iti nagan ni Jehova, masapul ti panagbalinyo a naregta a ministro iti tay-ak. Sangsangkamaysa iti nainkabsatan nga ayat ken ti kaadda iti dungngo iti maysa ken maysa, agtultuloytay koma a nasged iti espiritu bayat nga “agserbitayo ken Jehova.” (Roma 12:10, 11) Aniaman dagiti rigat a lak-amentayo manipud ken Satanas ken ti lubongna, masapul nga agtultuloytayo kas maysa a bagi, wen, ‘iti maymaysa a timpuyog ken maymaysa a timek,’ tapno maidayawtayo ni Jehova babaen iti panangipakaammotayo kadagiti pangpanggep ti Pagarianna.

19. (a) Kasanotay a sibaballigi a masaranget dagiti pannakaidadanes ken dadduma pay a parikut? (b) Ania a balakad ti ipaay ti Sofonias 3:8, 9 kadatayo?

¹⁹ Adu kadatayo ti masapul a makisalisal iti pannakaidadanes wenno kadagiti teritoria a natangken iti panangaskasabatayo. Nupay kasta, agtultuloytay koma a mangipakita ti isu met laeng a kababalin kas adda ken Kristo Jesus. (Juan 16:33; 1 Pedro 4:1, 2) Kas nagkaykaysa a bagi iparangarangtayo koma ti pudpudno a kinatured​—ti makin-uneg a naespirituan a pigsa a makapagibtur ken saan a marpuog iti sidong dagiti adu a rigat. (Salmo 27:14; Filipos 1:14) Ditay koma lippayen dagiti im-imatayo iti panagsapsapul kadagiti kimmarnero a tattao. Sapay koma ta salimetmetantayo dagiti bagbagitayo a “siuuray” ken Jehova ken ti aldaw a panagsingirna, nga agserserbi kenkuana a sangsangkatunos bayat nga umaw-awagtayo iti naganna ken sawen ti “nadalus a pagsasao” ti kinapudno.​—Sofonias 3:8, 9.

20. (a) Kasanotay a masarakan ti pudpudno a ragsak? (b) Ti Isaias 11:6-9 ti addaan ti ania a nakaskasdaaw a kaitungpalan?

²⁰ Sangsangkamaysa, sapay koma ta amin dagiti mangidaydayaw iti Dios, ikawesda ti baro a personalidad a naparsua a maitunos iti Dios iti kinalinteg ken kinasanto ti kinapudno. (Efeso 4:24) Daytoy ti mangibunga ti pudpudno a ragsak. Daytat’ naiyilustrar iti Isaias 11:6-9, a mangibagbaga iti adda itan a naespirituan a paraiso iti naisublin nga ili ni Jehova. Anian a kinatalna ken panagtutunos! Anian a kinaawan ti agum, dagiti makadangran a kababalin ti personalidad! Kas panamagpatingga iti daytoy naparaisuan a panangiladawan, maammuantayo dagitoy a sasao: “Didanto mangranggas wenno mangdadael iti amin a bantayko a nasantuan; ta ti daga mapnonto iti pannakaammo ken Jehova a kasla dagiti dandanum saknapanda ti baybay.” Ti “nasantuan a bantay” ni Jehova ti sangsangkamaysa a panagdayaw ti naipasdeken a sititibker itatta iti intero a daga. Apay? Agsipud ta ni Jehova tinignayna dagiti saksina a mangidayaw ti naganna ‘iti maymaysa a timpuyog ken iti maymaysa a timek.’ Gapuna “ti daga,” ti naespirituan a kasasaad ti ili ti Dios, ti napunnon iti “pannakaammo ken Jehova.”

21. Apay a rebbeng nga ikkantayo dagiti magasintayo ti kasaknapan pay a pannakaiwaras?

²¹ Sapay koma, ta iti pigsa nga impaay ni Jehova, itdentayo Ti Pagwanawanan ken ti kaduana a magasin nga Agriingkayo! ti kasaknapan pay a pannakaiwaras nga adda a mabalin. Ket sapay koma ta aramidentay dayta a manginanama nga amin nga ungto ti daga ken amin dagiti pamilia ti lubong, mairepresentardanto, “a lumagip ken agpulangdanto ken Jehova.”​—Salmo 22:27; Apocalipsis 15:4.

[Dagiti Footnote]

Panangrepaso iti Daytoy nga Artikulo​—

◻ Kasano ti panagtignay ti umuna-siglo a kongregasion?

◻ Ania dagiti gunggona nga ibunga ti aggigiddan a pannakaipablaak Ti Pagwanawanan?

◻ Ania a nagsayaat a panagregget ti magasin ti naipakita iti 1984?

◻ Kasanotay a rumang-ay a naespirituan, uray pay kadagiti panawen ti pannakasuot?