Malagipyo Kadi?

Nagustuanyo kadi a binasa dagiti kallabes a ruar Ti Pagwanawanan? Kitaentayo no masungbatanyo dagiti sumaganad a saludsod:

• Ania dagiti nakaro a karit a nakaipasanguan ti dadduma a Kristiano kalpasan ti kasar, ket ania ti nasken nga ikagumaanda nga aramiden?

Mabalin a mabigbig ti dadduma a Kristiano a bassit laeng ti pagpadaanda iti asawada. Ngem gapu ta ammoda a saan a maakseptar a solusion ti di nainkasuratan a diborsio, masapul nga ikagumaanda a taginayonen ti relasionda kas agassawa.​—4/15, panid 17.

• Ania dagiti pakarigatan a mabalin a pakaipasanguan ti maysa a Kristiano nga agnanaed iti pagaywanan kadagiti babbaket ken lallakay?

Mabalin a saanna a kabesado ti kongregasion iti asideg ti pagaywanan. Mabalin a nagduduma ti relihion ti kaaduan nga agnanaed iti pagaywanan ket nalabit awisenda a makiraman kadagiti narelihiosuan nga aramid. Masapul nga ammo dagiti kabagianna ken dagiti miembro ti kongregasion dagitoy a parikut ket mangipaayda iti pannaranay ken pannakaseknan.​—4/15, panid 25-27.

• Ania dagiti uppat nga addang a makatulong kadagiti agassawa a mangrisut kadagiti parikutda?

Iwayaanyo a pagsaritaan ti parikut. (Ecl. 3:1, 7) Sipupudno ken siraraem nga iyebkasyo ti kapanunotanyo. (Efe. 4:25) Imdengan ken anagenyo ti marikrikna ti asawayo. (Mat. 7:12) Mangikeddengkayo iti solusion a nagtinonganyo sa ikagumaanyo nga aramiden dayta. (Ecl. 4:9, 10)​—5/1, panid 10-12.

• Idi indagadag ni Jesus nga ikararagtayo ti pannakapakawan dagiti utangtayo, ania dagiti tuktukoyenna nga utang?

No pagdiligen ti Mateo 6:12 ken ti Lucas 11:4, nalawag a saan a tuktukoyen ni Jesus ti pinansial nga utang. Tuktukoyenna dagiti basol. Masapul a tuladentayo ti Dios a situtulok a mangpakawan.​—5/15, panid 9.

• Agserserbi dagiti kameng ti Bagi a Manarawidwid kadagiti ania a komite?

Coordinators’ Committee; Personnel Committee; Publishing Committee; Service Committee; Teaching Committee; Writing Committee.​—5/15, panid 29.

• Kasano a masiguradotayo a sangalubongan ti Layus idi kaaldawan ni Noe?

Patien ni Jesus a napasamak ken sangalubongan ti Layus. Dagiti pakdaar a nailanad iti Biblia ket naibatay iti agpaypayso a sangalubongan a Layus.​—6/1, panid 8.

• Ti kadi aramid a nadeskribir iti Roma 1:24-32 ket agaplikar kadagiti Judio wenno kadagiti Gentil?

Maitutop ti deskripsion iti aniaman kadakuada, ngem espesipiko a tuktukoyen ni apostol Pablo dagiti nagkauna nga Israelita a saan a nangannurot iti Linteg iti sinigsiglo. Ammoda dagiti nalinteg a bilin ti Dios, ngem saanda a nagbiag a maitunos kadagita.​—6/15, panid 29.

• Sadino ti ayan ti Tel Arad, ken apay a napateg dayta?

Daytoy a munturod iti Israel ti pakabigbigan ti nagkauna a siudad ti Arad iti laud ti Natay a Baybay. Dagiti agkalkali natakuatanda iti daytoy a munturod ti adu a damili a nausar a pagsuratan. Dadduma ti addaan kadagiti nagan a masarakan iti Biblia, ken ipakitada a nausar ti personal a nagan ti Dios kadagiti sekular a dokumento.​—7/1, panid 23-24.

• Apay nga ad-adda a naragsaktayo no ikagumaantayo a ragpaten dagiti rasonable a kalat?

No ikagumaantayo a ragpaten dagiti saan a rasonable a kalat aniaman ti isakripisiotayo tapno laeng magun-od dagita, mabalin nga irubrubotayo ti bagitayo iti nalabes a pakarigatan. Kaskasdi, ditay met koma ay-ayen unay ti bagitayo nga uray la pagpambartayo dagiti limitasiontayo tapno bassit laeng ti aramidentayo iti ministerio.​—7/15, panid 29.

• Apay a marigatan dagiti nagannak a makikomunikar kadagiti agtutubo?

Dadduma kadagiti lapped ket mabalin a ti kinamanagbabain ti agtutubo, ti tarigagayna a maaddaan iti dakdakkel a wayawaya, ken ti tarigagayna nga agbukbukod. Mabalin a makatulong no dagiti nagannak makisaritada kadagiti annakda kabayatan dagiti gagangay a kasasaad ken ikagumaanda a tarusan no ania a talaga ti adda iti puso ti anakda bayat nga iyeb-ebkasna ti riknana.​—8/1, panid 10-11.