Salimetmetan Dagiti “Bambanag a Mamataud iti Talna”

KASLA natangken ken saan a madadael ti kabbaro a sementado a dalan. Ngem inton agangay, agrengngat ken agbalinen a lasonglasong. Masapul a matarimaan tapno sigurado a natalged ken mamantener ti dalan.

Umasping iti dayta, mabalin a tumaud ti parikut wenno arigna a maaddaan iti rengngat ti relasiontayo iti sabsabali. Bigbigen ni apostol Pablo nga agduduma ti kapanunotan dagiti Kristiano idiay Roma. Isu a binalakadanna dagiti padana a Kristiano: “Surotentayo [wenno salimetmetantayo] koma ti bambanag a mamataud iti talna ken ti bambanag a makapabileg iti maysa ken maysa.” (Roma 14:13, 19) Apay a napateg a ‘salimetmetan ti bambanag a mamataud iti talna’? Kasano a situtured ken sieepektibo a mataginayontayo ti talna?

Apay a Taginayonen ti Talna?

Agbalin a napeggad ken lasonglasong ti dalan no di matarimaan dagiti babassit a rengngat. Kasta met, mabalin a napeggad no mabaybay-an dagiti di pagkikinnaawatan. Insurat ni apostol Juan: “No ti asinoman kunaenna: ‘Ay-ayatek ti Dios,’ ket kaskasdi a gurguraenna ni kabsatna, isu ket naulbod. Ta ti saan nga agayat iti kabsatna, a nakitana, saanna a mabalin nga ayaten ti Dios, a saanna a nakita.” (1 Juan 4:20) Ti saan a panangrisut iti di pagkinnaawatan mabalin nga agresulta iti pananggura ti maysa a Kristiano iti kabsatna.

Impakita ni Jesu-Kristo a saan a makaay-ayo ken Jehova ti panagdayawtayo no saantayo a makikappia iti sabsabali. Binilin ni Jesus dagiti adalanna: “No, ngarud, ip-ipanmo ti sagutmo iti altar ket sadiay malagipmo a ti kabsatmo addaan iti maysa a banag a maibusor kenka, panawam ti sagutmo sadiay sanguanan ti altar, ket mapanka; umuna a makikappiaka ken kabsatmo, ket kalpasanna, inton nakasublikan, idatonmo ti sagutmo.” (Mat. 5:23, 24) Wen, ti kangrunaan a rason a taginayonentayo ti talna ket kayattayo a maay-ayo ni Jehova a Dios.a

Ti maysa a kasasaad iti kongregasion ti Filipos itampokna ti sabali pay a rason no apay a taginayonentayo ti talna. Adda di natukoy a parikut a timmaud iti nagbaetan ti dua a Kristiano a kakabsat a babbai, da Euodia ken Sintique, a nalawag a namagpeggad iti talna ti intero a kongregasion. (Fil. 4:2, 3) Nalaka la nga agdinamag dagiti saan a narisut a di pagkikinnaawatan. Ti koma tarigagaytayo a mangtaginayon iti ayat ken panagkaykaysa ti kongregasion ti mangtignay kadatayo a makikappia kadagiti kapammatiantayo.

“Naragsak dagiti mannakikappia,” kinuna ni Jesus. (Mat. 5:9) Mangyeg iti ragsak ken pannakapnek ti panangtaginayon iti talna. Kasta met, makapasalun-at ti pannakikappia ta “ti natalinaay a puso isu ti biag ti nainlasagan a bagi.” (Prov. 14:30) Iti sabali a bangir, dakdakkel ti posibilidad nga agsakittayo no agim-impentayo iti sakit ti nakem.

Nupay umanamong ti dandani amin a Kristiano a napateg ti panangtaginayon iti talna, mabalin a pampanunotenyo no kasano a risuten ti personal a di pagkikinnaawatan. Usigentayo dagiti Nainkasuratan a prinsipio a makatulong kadatayo.

Maisubli ti Talna Babaen ti Kalmado a Panagsasarita

Masansan a matarimaan dagiti babassit a rengngat iti dalan babaen ti panangpalitada iti nadadael a pasetna. Mabalintayo kadi a pakawanen ken abbongan dagiti babassit a kamali dagiti kakabsattayo? Mabalin nga epektibo daytoy iti kaaduan kadagiti personal a di pagkikinnaawatan, ta insurat ni apostol Pedro a “ti ayat abbonganna ti nakaad-adu a basol.”​—1 Ped. 4:8.

Ngem no dadduma, serioso unay ti maysa a parikut ket saan a mabalin a palabsen lattan. Usigenyo ti napasamak kadagiti Israelita kalpasan la unay a tinagikuada ti Naikari a Daga. “Ti annak ni Ruben ken ti annak ni Gad ken ti kagudua a tribu ni Manases” nangibangonda iti “maysa nga altar a kasta unay ti kinalatakna” sakbay a bimmallasiwda iti Karayan Jordan. Impagarup ti dadduma a tribu ti Israel a ti altar ket agpaay a pagdayawan kadagiti didiosen isu a dida mabalin a baybay-an lattan. Nagsaganada a makigubat.​—Jos. 22:9-12.

Nalabit a patien ti dadduma nga Israelita nga umdasen ti ebidensia nga adda naaramid a basol ken napanunotda a no kellaat a rumautda, mabalin a basbassit ti matay. Ngem imbes a sidadarasudos a nagtignay dagiti tribu iti laud ti Jordan, nangibaonda kadagiti delegado a makilinnawag kadagiti kakabsatda. Inimtuodda: “Ania daytoy tignay a di kinamatalek nga inaramidyo maibusor iti Dios ti Israel iti panagtallikudyo ita nga aldaw manipud isusurot ken Jehova?” Kinapudnona, saan nga iyaalsa iti Dios dayta nga inaramid dagiti tribu a nangibangon iti altar. Ngem ania ti reaksionda iti dayta nga akusasion? Pinagsasawanda ngata wenno didan kinasarita dagiti nangakusar kadakuada? Saan. Siaalumamay a simmungbat dagiti naakusar a tribu. Inlawlawagda nga inaramidda dayta gapu iti tarigagayda nga agserbi ken Jehova. Gapu iti kasta a tignayda, nataginayon ti relasionda iti Dios ken naispal dagiti biag. Narisut ti parikut ken naisubli ti talna gapu iti kalmado a panagsasaritada.​—Jos. 22:13-34.

Sakbay a nagtignayda, nainsiriban a nakisarita ti dadduma nga Israelita kadagiti tribu da Ruben ken Gad ken iti kagudua ti tribu ni Manases maipapan iti parikutda. “Dika agdarasudos iti espiritum nga agrurod,” kuna ti Sao ti Dios, “ta ti panagrurod isu ti agsaad iti saklot dagidiay maag.” (Ecl. 7:9) Sigun iti Kasuratan, nasken a marisut dagiti serioso a di pagkikinnaawatan babaen ti kalmado ken prangka a panagsasarita. Manamnamatayo kadi ti bendision ni Jehova no agim-impentayo iti sakit ti nakem ken ditay kasarita ti tao a nangsair kadatayo?

Iti kasumbangirna, ania ti aramidentayo no ibaga kadatayo ti padatayo a Kristiano nga isu ket nasairtayo wenno nalabit nga akusarannatayo pay ketdi? “Ti maysa a sungbat, no naalumamay, pagbaw-ingenna ti pungtot,” kuna ti Biblia. (Prov. 15:1) Dagiti naakusar a tribu dagiti Israelita inlawlawagda a siaalumamay ti takderda, isu a bimmaaw ti nabara a komprontasionda kadagiti kakabsatda. Datayo man wenno ti kabsattayo ti umuna a makisarita maipapan iti parikut, mabalin nga iyimtuodtayo iti bagitayo, ‘Ania a sasao, tono ti boses, ken kababalin ti ad-adda a mangtaginayon iti talna?’

Usaren a Nainsiriban ti Dila

Ammo ni Jehova a normal laeng a kayattayo nga iyebkas ti riknatayo. Ngem no ditay marisut ti parikut, mabalin nga agannayastayo a mangyestoria iti dayta iti sabali. Ti ing-ingpen a sakit ti nakem ti mabalin a mangituggod kadatayo a mangbabalaw. No maipapan iti di umiso a panangusar iti dila, kuna ti Proverbio 11:11: “Gapu iti ngiwat dagidiay nadangkes marba [ti maysa nga ili].” Kasta met, mariribuk ti talna ti kongregasion gapu iti di naannad a panagsao maipapan iti pada a Kristiano.

Ngem ti panangtaginayon iti talna dina kayat a sawen a naan-anay a liklikantayo a pagsasaritaan dagiti kakabsattayo. Binalakadan ni apostol Pablo dagiti kapammatianna: “Dikay agsao iti makapasakit.” Sana innayon: “Usarenyo laeng dagiti balikas a nasayaat ken maiparbeng tapno matulongan ti siasinoman a kasasaoyo. . . . Agkikinnaasi ken agiinnayatkayo ketdi. Agpipinnakawankayo.” (Efe. 4:29-32, Ti Baro a Naimbag a Damag Biblia) No kasaritanakayo ti kabsat a nasair gapu iti panagsasao wenno kababalinyo, saan kadi a nalaklaka ti agpadispensar ken makikappia no ammoyo a nasayaat dagiti komentona maipapan kadakayo iti naglabas? Gapuna, no makapabileg dagiti estoriaentayo maipapan kadagiti padatayo a Kristiano, nalaklakatayto a makikappia no tumaud dagiti di pagkikinnaawatan.​—Luc. 6:31.

Agserbi iti Dios iti “Abagan-abaga”

Gapu ta managbasoltayo, kadawyan nga umadayo ken umikaytayo kadagidiay nangsair kadatayo. Ngem di nainsiriban dayta a tignay. (Prov. 18:1) Kas nagkaykaysa nga ili nga umaw-awag iti nagan ni Jehova, determinadotayo nga ‘agserbi kenkuana iti abagan-abaga.’​—Sof. 3:9.

Pulos a ditay koma ipalubos a bumaaw ti regtatayo agpaay iti nasin-aw a panagdayaw gapu laeng iti di umiso a panagsasao wenno kababalin ti sabsabali. Sumagmamano nga aldaw sakbay a sinukatan ti sakripisio ni Jesus dagiti daton iti templo ken di nagbayag kalpasan a kinondenar ni Jesus dagiti eskriba, nakitana ti maysa a napanglaw a balo a nangipisok iti “isuamin a pagbiag nga adda kenkuana” iti baul ti gameng iti templo. Linapdan kadi ni Jesus ti balo? Saan, pinadayawanna ti nasungdo a panangsuportarna iti kongregasion ni Jehova idi a tiempo. (Luc. 21:1-4) Ti di umiso nga ar-aramid ti dadduma ket saan a nanglapped iti balo tapno aramidenna ti obligasionna a mangsuportar iti panagdayaw ken Jehova.

Nupay pagarupentayo a di umiso wenno di pay ketdi nainkalintegan ti inaramid ti maysa a Kristiano a kabsat, ania ti rumbeng a panagtignaytayo? Palubosantayo kadi daytoy a mangapektar iti amin-kararua a panagserbitayo ken Jehova? Wenno situtured ketdi nga agtignaytayo a mangrisut iti aniaman a personal a di pagkinnaawatan tapno mataginayon ti nakapatpateg a talna ti kongregasion ti Dios ita?

“No mabalin,” ibalakad ti Kasuratan kadatayo, “agingga a makapagpannuray kadakayo, makikappiakayo iti amin a tattao.” (Roma 12:18) Sapay koma ta ikagumaantayo nga aramiden dayta ket iti kasta, sitatalged nga agtalinaedtayo iti dalan ti biag.

[Footnote]

[Ladawan iti panid 17]

Masapul nga agkappia da Euodia ken Sintique

[Ladawan iti panid 18]

Ania a sasao, tono ti boses, ken kababalin ti ad-adda a mangtaginayon iti talna?