GAYO

[nagtaud iti sao a kaipapananna ti “daga”].

1. Maysa a taga Macedonia a kimmuyog ken apostol Pablo iti maikatlo a panagdaliasatna kas misionero ken napilit a naipan iti teatro idiay Efeso kaduana ni Aristarco bayat ti derraaw a pinarnuay ti agpampanday iti pirak a ni Demetrio.​—Ara 19:29.

2. Maysa a Kristiano manipud Derbe idiay Asia Menor a nailista a karaman iti innem a sabsabali pay a kimmuyog ken apostol Pablo iti maudi a panagdaliasatna kas misionero. Nabatad a simmina ken Pablo ni Gayo ken dagitoy a sabsabali pay ket kalpasanna napanda idiay Troas, iti makinlaud a kosta ti Asia Menor, a sadiay ti nangurayanda kenkuana. (Ara 20:4, 5) Daytoy a Gayo ket mabalin nga isu met laeng ti Num. 1, yantangay nadakamat met ni Aristarco iti salaysay. No kasta, nalabit kaipapanan daytoy nga idiay Macedonia ti nakayanakan (wenno nagtaudan) ni Gayo ngem nagnanaed idiay Derbe.

3. Maysa a Kristiano iti Corinto a binautisaran a mismo ni Pablo. Idi insurat ni Pablo ti suratna kadagiti taga Roma, nalawag a daytoy a Gayo ti mangsangsangaili kenkuana ken kasta met iti kongregasion. Ipasimudaag daytoy nga idiay pagtaengan ni Gayo ti pakaang-angayan dagiti gimong ti kongregasion idiay Corinto.​—1Co 1:14; Ro 16:23.

4. Maysa a Kristiano a sinuratan ni apostol Juan iti maikatlo a naipaltiing a suratna ken kinomendaranna gapu iti pannagnana iti kinapudno ken iti matalek nga aramidna ken ayatna ken gapu iti kinamanagpadagusna.​—3Jn 1, 3-6.