“Ngem no ti di mamati suminanto, sumina laeng; saan a paadipen ti kabsat a lalaki wenno babai kadagitoy a banag, ngem ti Dios inayabannatayo nga agbiag iti talna.”​—1 CORINTO 7:15.

 4. (a) Gupgopenyo iti ababa ti imbaga ni Pablo kadagiti kasado a Kristiano idiay 1 Corinto 7:10-16. (b) Kaano a maikuna a: “Ti Dios inayabannakayo nga agbiag iti talna”?

⁴ Kas naammuantayon iti napalabas nga artikulo, inggunamgunam ni apostol Pablo kadagiti kasado a Kristiano a dida pampanawan ti assawada. (1 Corinto 7:10-16) Gapu iti sasao ni Pablo, no pilien ti di mamati nga asawa a lalaki nga agtalinaed a kadua ti Kristiano nga asawana, ti manamati rebbeng a padpadasenna a tulongan ni lakayna iti naespirituan. (1 Pedro 3:1-4) Ti pannakakumbertena ti dakkel maaramidanna a mamagbalin iti pagtaengan a lugar ti inana ken talna. Kaskasdi, no ti di mamati suppiatenna unay ti pammati ti manamati nga asawana a gapu itoy pilien ti lalaki ti sumina, aniat’ mabalinan ti Kristiano? No padpadasen ti manamati a piliten ni lakayna wenno baketna nga agtalinaed, mabalin a ti di mamati pagbalinenna ti kasasaad a di makaay-ayo unay a ti Kristiano ti mapukawan a naan-anay iti talna. Gapuna iti interes ti talna, ti manamati bay-anna ti di mamati a pumanaw. (Mateo 5:9) Inton laeng pumanaw ti di mamati nga asawa a maikuna: “Ti Dios inayabannakayo iti talna.” Saan a nainkalintegan ti panangaramat kadagitoy a sasao a mangikalintegan ti panagsina dagiti dua nga agassawa a Kristiano kadagiti di nainkasuratan wenno babassit laeng a gapu.

 5. Ania a salsaludsod ti maikari itan iti panangusigtayo?

⁵ Tunggal panagsina wenno diborsio ket addaan kadagiti kabukbukodanna a makagapu, ken awan “pormula” a mangsaklaw ti tunggal kaso. Ngem ania a parparikut ti mabalin a maipasango kadagiti nagsina wenno nagdiborsio a Kristiano? Aniat’ maaramidan maipapan kadakuada? Ken kasano a makatulong dagiti dadduma?

Dagiti Emosional ken Seksual a Kasapulan

 6. Maipapan kadagiti parparikut, aniat’ maikuna maipapan iti panagsina ken diborsio?

⁶ Ti ipalubos ti Kasuratan a panagsina wenno diborsio ti mangsolbar iti sumagmamano a problema. Ngem dagita nga addang kangrunaan nga agbanag iti panangisuksukat laeng ti maysa a kita ti problema iti sabali. Kas pangarigan, kinuna ti maysa a Kristiano a diborsiada: “Diak matngelan a pagyamyamanan ni Jehova itan ta addaanakon ti kinatalna.” Ngem inadmitirna: “Saan a nalaka ti panangpadakkel kadagiti annak iti maymaysa a naganak. Ken no maminsan adda tiempo a ti maysa agbalin a nakaladladingit ken maleddaangan unay. Uray pay iti seksual ket saan a nalaka. Ti maysa ti masapul a bumagay iti maysa nga interamente a naigiddiat a panagbiag.”a

 7. Apay a masapul a panunoten a naimbag ti Kristiano dagiti ibunga ti panagsina wenno diborsio?

⁷ Ngarud, no agpili ti maysa a Kristiano, masapul a panunotenna a naimbag dagiti posible nga ibunga ti panagsina wenno diborsio. Kas pangarigan, panunotenyo dagiti emosional a pakasapulan, nalabit ti tarigagay ti maysa a babai ti pannakikadkadua ti lalaki. (Idiligyo ti Genesis 3:16.) Ti babai a diborsiada mabalin a napigsa ti namnamana a maasawaan manen. Dadduma tarigagayanda ti pannakawayawaya manipud iti narigat nga ibturan a panagasawa, ngem sisasaganada aya a mangakseptar manen ti posibilidad a mabalin nga awanen ti gundaway a makiasawa manen?

 8. (a) Gapu iti 1 Corinto 7:11, iti ania ti rebbeng nga ikkan dagiti separado a Kristiano nga assawa ti sikakararag a panagpanunot? (b) Ania a pagkasapulan ti di koma laglag-anen no pampanunoten ti panagsina wenno diborsio?

⁸ Insurat ni Pablo: “Ngem no sumina, agtaeng a di makiasawa wenno makikappia koma ken asawana.” (1 Corinto 7:11) Babaen iti bassit panagregget, mabalin a posible para iti babai a ‘makikappia’ ken lakayna. No ngarud nagsina dagiti Kristiano a pagassawaan, rebbeng nga ikkanda ti panagkappiada iti nainget, buyogen panagkararag a panagpanunot. Mainayon pay, saanda koma a liplipatan ti kinapudno a dagiti seksual a rikna ti mabalin a mangiparang ti pagpeggadan. Kasano ngatat’ panangmatmat ti Dios kadakuada no ti pannakapaayda a makapagkinnappia ket agtinnagto iti imoralidad? Kas mangiyilustrar iti daytoy a peggad isut’ kapadasan ti maysa a bautisado a babai. Kalpasan ti diborsio, nangrugi a makipag-date iti lalaki a taga lubong, di nagbayag isut’ nagsikog, ket nailaksid. Nupay iti kamaudianan isu met laeng ti naisubli, ti kapadasanna ti mangipaganetget ti pannakasapul ti panagannad ken sikakararag a panagpannuray ken Jehova tapno maliklikan ti ‘panagbasol iti Dios.’ (Genesis 39:7-12) Kaawatan met a dagiti emosional ken seksual a pakasapulan ti di rebbeng a laglag-anen no pampanunoten ti panagsina wenno diborsio iti damo pay laeng.

Mabalin a Maksayan ti Kinaladingit

 9. Kasano ti mabalintay a pannakatulong kadagiti separado wenno diborsiado a Kristiano tapno maparmekda ti panagladladingit?

⁹ No ti panagsina wenno diborsio ket di maliklikanen, dagiti problema nga ibungana ti rebbeng a sanguen. Kas pangarigan, ti panagladingit ti maysa a serioso a problema kadagiti dadduma a naisina wenno naidiborsio a Kristiano. Aniat’ maaramidan dagiti dadduma maipapan iti daytoy? Dagiti panglakayen ti kongregasion ken ti dadduma pay ti mabalin a makaipakita ti naespirituan nga interes iti kakasta nga indibidual, a biruken ti panangparegta kadakuada. (Idiligyo ti 1 Tesalonica 5:14.) Ti maysa, ket mabalin a sagpaminsan awisentay dagitoy a tattao ken ti annakda iti pagtaengantayo a maipaay iti nanumo a pannangan ken makapatibker a panagpapatang kadua ti pamiliatayo. Saanen a nesesita ti panangaramid ti bankete, ta “nasaysayaat ti pangngaldaw a natnateng nga addaan ayat ngem ti napalukmeg a baka ket gura ti kakuyogna.” (Proverbio 15:17) Dayta a rabii mabalin nga iramanna ti panangsalaysay ti kapkapadasan a tinagiragsak iti ministerio wenno maysa a panagadal ti grupo a panagsagana iti Nakristianuan a panaggigimong.

10, 11. (a) Iti ania pay a sabali a pamay-an a matulongan ti separado wenno diborsiado a Kristiano? (b) Aniat’ adda a rason maipaay iti panagannad?

¹⁰ Ti panangikuyog ti pamiliayo iti naidiborsio wenno naisina a naganak ken iti annakda iti tay-ak ti ministerio ti makatulong met kadakuada a mangparmek ti ladingitda. Siempre, saan a mabalin nga alaen ti dadduma ti lugar ti nagawan a naganak, ngem kinuna ti maysa a Kristiano a babai a naidiborsio: “Dagiti rigat ti panangpadakkel kadagiti annakko nga awan lalaki iti balay ti napabassit unay babaen iti tulong dagiti panglakayen ken ad-adipen iti kongregasion a nagreggetanda a sumupusop kadagiti praktikal a pamay-an.”

¹¹ Kaskasdi, adda rason a pagannadan. Inadmitir ti maysa a kabsat a babai: “Gapu ta ti anakko a lalaki awan amana, maysa a kabsat a lalaki ti siaasi a naginteres kenkuana. . . . Nangrugi a makitak met ti kinaasi ken kinamanagparaburna iti anakko, ket nangrugi a tumaud ti dakes a tartarigagay kaniak. Arigna ken David a timmaud ti dakes a tarigagay iti maysa a banag a dina kukua.” (2 Samuel 11:1-4) Nupay awan naaramid a seksual nga imoralidad, daytoy a babai ti mababain iti pampanunotna ken panagal-alembongna, dinawatna ti pammakawan ni Jehova, ket ginupednan ti pannakitimtimpuyogna iti kabsat a lalaki. Anian a nagsayaat ti panangiyilustrar daytoy ti pannakasapul ti panangilaksid ti dakes a tartarigagay ken “idian ti aniaman a kaasping ti kinadakes”!​—1 Tesalonica 5:22, The New American Bible; Galacia 5:24.

12. Makissayan ti maysa a lalaki wenno babai ti panagladladingitna babaen ti panangalana ti ania a positibo a panagtignay?

¹² Ti kinaladingit ti mabalin a makissayan babaen ti panangaramid ti bambanag para kadagiti dadduma. “No okupadoka a gumawgaw-at ken tumultulong kadagiti dadduma, awan lugar ti panangay-ay-ay ti bagim met laeng ken ti panagladladingit,” kuna ti maysa a kabsat a babai a nawaswasen ti singgalut ti panagasawana. Ti kasta nga ‘igagaw-at’ babaen ti naisina wenno naidiborsio a tao mabalin a ramanenna ti panangawis ti maysa a pamilia iti pagtaenganda a maipaay iti maysa a rabii a makapabileg iti naespirituan a panaglalangen. No mammano a posible daytoy gapu iti pinansial wenno dadduma pay a rasrason, mabalinyo a sarungkaran ken paregtaen dagiti masakit ken dadduma pay. Mabalin met a matulonganyo dagiti natataengan iti panag-shopping-da wenno kadagiti dadduma pay a trabaho. Ipaayyo ti bagiyo kadagiti kakasta a pamay-an, ket maaddaankayto ti naparang-ay a pammaneknek a “naragragsak a banag ti mangted ngem ti umawat.”​—Aramid 20:35.

13. Ania pay ti sabali a tulong a mangparmek ti panagladladingit?

¹³ Ti sabali pay a katulongan a mangparmek ti panagladladingit isut’ regular a panagregget a makikuyog kadagiti kapammatian iti trabaho a panangikasaba ti Pagarian. “No maminsan, mariknak ti ladingit ti kaawan ti maysa nga asawa,” inamin ti maysa a kabsat a babai, “ngem gapu iti napawadwad a serbisiok iti tay-ak ken ti baro a wayawaya a makilanglangen kadagiti kakabsat a lallaki ken babbai, dagitoy a kanito mammanodan ken apagbiitda laeng.” Ti regular a panagbalaybalay iti panangasaba ti mabalin a mangiturong kadagiti panagsarungkar ken panangiyadal ti Biblia kadagiti tattao nga interesado, a dadduma ti mabalin nga agbalindanto met a dedikado nga ad-adipen ni Jehova. Siempre, ti panangparmek ti ladingit ket saan nga isut’ rason a pakiramramanantayo iti ministerio, ngem mabalin a daytat’ maysa nga epekto daytoy naragsak ken bendito a trabaho.​—Proverbio 10:22.

14. Ania nga ar-aramid ti rebbeng nga addaan nasayaat nga epekto kadagiti separado wenno diborsiado a Kristiano?

¹⁴ Amin iti ili ni Jehova ti magunggonaan iti naespirituan manipud pannakiramraman iti ministerio, ti pannakiraman iti Nakristianuan a panaggigimong, ken iti ‘panangbiruk nga umuna iti Pagarian.’ (Mateo 6:33) Yantangay dagitoy makaay-ayo nga ar-aramid ti addaan nagsayaat nga epekto iti ad-adipen ni Jehova nga en heneral, dagita a pagannurotan ti makapabileg met kadagiti separado wenno diborsiado a Kristiano. Saan, dagitoy nga ar-aramid dinanto solbaren amin a parparikutda, ngem rebbeng a parang-ayenna ti panangmatmatda.

Ti Panagkararag Addaan Nasken a Paset

15. Ti panagkararag ti addaan ania a paset iti panagbiag dagidiay masapul a bumagay manen iti panagmaymaysa?

¹⁵ Maysa a Kristiano a babai a masapul makibagay manen iti panagmaymaysa ti natulongan babaen “ti panagbalin nga okupado iti tay-ak ti serbisio. . . ken ti panangbisbisita kadagiti masakit, natataengan, ken dagiti inaktibo.” Ngem innayonna: “Kada maladladingitak, mapanak agsarungkar ken agkararagak a maipaay iti pammigsa, ta pagaammok a ni Satanas ti okupado met.” Wen, ti naimpusuan a panagkararag ti nasken no kayat a masalimetmetan ti kinatarnaw iti Dios. Ti karkararag dagiti separado wenno diborsiado a Kristiano ket mabalin a ramanenna ti panagdawat iti espiritu ni Jehova ken ti bungana a panagteppel tapno malapdan ti seksual a rikrikna. (Lucas 11:13; Galacia 5:22, 23; Colosas 3:5, 6) Mainayon pay, yantangay ti panagar-aramid ti desision a dati nga ar-aramiden ti asawa a lalaki ti mangted parikut iti dadduma a separada wenno diborsiada, mabalin a kasapulanda ti agkararag iti Dios maipaay iti tulongna a mangdesidir kadagiti bambanag a sisisirib ken mangparmek kadagiti nadumaduma a pakasuotan.​—Santiago 1:2-8.

16. Maipapan iti panagsina wenno diborsio, aniat’ mabalin a maikuna maipapan iti panagrikna ti basol?

¹⁶ Ti panagrikna ti basol ti mabalin a makasuot met. Inamin ti maysa a Kristiano: “Ti basol a marikriknam bayat ti diborsio, uray no saan a sika ti makimbasol, ti nakaro unay.” Siempre, maawatan unay ti panagrikna ti basol no ti panagsina wenno diborsio mapasamak gapu ta ti maysa di nainkalintegan ti panagmadina a mangtungpal kadagiti obligasion ti panagasawa. (1 Corinto 7:3-5) Ngem no ti panagsina wenno diborsio naaramid gapu iti Nainkasuratan a rason kalpasan ti sikakararag a panagpampanunot, maiyanatup met ti panangikararag ti tulong ni Jehova a mangparmek iti di maikarkari a panagrikna ti basol. Mainayon pay met a rebbeng a naannad koma dagiti panglakayen ti kongregasion a mangted kadagiti naibatay iti Biblia a balakad ket saanda a dagdagsenan ti pammagbagada iti pamay-an a ti Kristiano agrikna ti basol maipapan iti panangalana wenno panangipalubosna ti ipalpalubos met ti Biblia a panagsina wenno diborsio.

Masaluadan Babaen “ti Talna ti Dios”

17. Aniat’ makatulong kadagiti amin a Kristiano nga agbalin a naragsak ken natibker iti daytoy nariribuk a lubong?

¹⁷ Dagiti separado wenno diborsiado a Kristiano ti masansan nga addaan naisangsangayan a problema. Kaskasdi, no iyar-arig, “dagiti kastoy a sagsagabaen madamada a mapasamak kadagiti kakabsat[tayo] nga adda ditoy lubong.” (1 Pedro 5:6-11) Kas pangarigan, ti panangidadanes ap-apektaranna amin nga agserserbi ken Jehova, ken kaaduan a Kristiano ti maipaspasango kadagiti problema iti kuarta wenno salun-at, pannakapapaay, pannakasulisog, ken dadduma pay. Kas met laeng kadagiti dadduma a saksi ni Jehova, ngarud, ti separado wenno diborsiado a Kristiano masapul a maragpatna koma dagiti naespirituan a pakasapulanna babaen iti panagad-adal ti Biblia, ti regular nga itatabuno kadagiti gimong, aktibo a ministerio iti tay-ak, ti maysa a naan-anay a panagbiag iti sagrado a serbisio, ken ti kankanayon a panagkarkararag tapno makapagtalinaed a nasinged ken ni Jehova. (Mateo 5:3) Ti pannakaapay a mangaramid iti dayta ti mamagpeggad ti espiritualidad ti aniaman a Kristiano, ngem ‘ti panangbiruk nga umuna ti Pagarian’ mangted iti tunggal nasungdo a saksi ni Jehova ti kalalainganna a rukod ti ragsak ken kinatibker iti daytoy nariribuk a lubong.

18. Ania a salsaludsod ken addang ti maikari iti nainget a panagpanunot dagiti separado a Kristiano a pagassawaan?

¹⁸ Ti naespirituan a kinatibkertayo agpannuray iti personal a panangiyaplikar iti Sao ti Dios. Gapuna, no maysakayo a Kristiano a naisina manipud asawayo a dedikado met iti Dios, impapusoyon aya ti balakad ni Pablo idiay 1 Corinto 7:10-16? Nangnangruna no ti panagsina ti nagtultuloy metten iti sumagmamano a panawen, nasayaat no pagbalinenyo ti panagkappia a maysa a banag a kararagen a sipapasnek. Mabalin a maisaludsodyo met iti bagiyo: Aniat’ namnamaen ni Jehova kaniak kas kasado a tao? Di aya rebbeng nga itunos dagiti Kristiano nga assawa ti biagda kadagiti nasantuan a pagannurotan para kadagidiay simreken iti kasamiento? Mabalin kadi a ditay mapaspasaran ti bendision ni Jehova agsipud ta saantayo a padpadayawan dagiti karitayo iti panagasawa? Panunotenyo man laeng ti imbag a magapuananna no pagsasaritaan dagiti bambanag a sipapakumbaba, agkararag a sipapasnek, ken sipipinget nga iyaplikar ti Sao ti Dios iti panagbiagyo. Anian a nagsayaat koma no dakay a dua risutenyo dagiti parikut ti panagasawayo ken tagiragsakenyo manen a dua ti maysa a pagtaengan ti inana ken talna!

19. Sigun iti Filipos 4:6, 7, ania a nasudi a banag ti mabalin a tagiragsaken amin nga ad-adipen ni Jehova?

¹⁹ Amin a matalek nga ad-adipen ni Jehova kasapulan ken mabalinda a tagiragsaken ti maysa a banag a nagsudi​—“ti talna ti Dios a daeganna ti amin a pannakaawat.” Kas dagiti Kristiano, maaddaantay iti daytoy nalmeng a gameng ti kinatalna no ipangagtay ti sasao ni Pablo: “Dikay madanagan iti uray ania, no di ket kadagiti isuamin maipakaammo koma dagiti dawdawatyo iti Dios gapu iti kararag ken araraw agraman panagyaman; ket ti talna ti Dios a daeganna ti amin a pannakaawat aywanannanto dagiti puspusoyo ken dagiti panunotyo ken Kristo Jesus.”​—Filipos 4:6, 7.

20. (a) Ania daydiay “talna ti Dios”? (b) Aniaman ti naasawaan a kasasaadtayo, aniat’ rebbeng nga aramidentayo?

²⁰ Dayta a talna isut’ inted-Dios a kinatalinaay ken kinakalma, uray iti tengnga ti nakaro unay a makasuot a sirkumstansia. Daytat’ agtaud manipud nasinged a pannakirelasion ken Jehova ken ti pannakaammo nga ar-aramidentayo dagiti makaay-ayo kadagiti matana. Dagidiay agikut “ti talna ti Dios” ti mangipalubos a ti espirituna ti mangtignay kadakuada, ket saanda a maringbawan ti panagdanag. Apay? Agsipud ta ammoda nga awan ti mapalubosan a mapasamak kadakuada a di nasantuan pannakaipalubosna. (Efeso 4:30; idiligyo ti Aramid 11:26.) Gapuna agmaymaysatay man wenno kasado, separado wenno diborsiado, patpatgentay koma “ti talna ti Dios.” Ket sapay koma ta maaddaantayo ti isu met laeng a panagtalek kas ti adda ken David, a nagkuna: “Sitatalnaak nga agpadpada iti panagiddakto ken iti pannaturogko, ta sika, Jehova, siksika laeng ti mangisaad kaniak iti kinatalged.”​—Salmo 4:8.