Asino ti Kayatmo a Mangpadayaw Kenka?

 1. Ania ti normal a tarigagaytayo amin, ken ania ti ramanen dayta?

ANIA ti mariknam no ti maysa nga am-ammom ken resrespetuem malipatanna ti naganmo, wenno nakarkaro pay, dinaka mabigbig? Baka madismayaka. Apay? Gapu ta normal a kayattayo amin nga akseptarendatayo ti sabsabali. Saan la a dayta, kayattayo met a mabigbig ti kinasiasinotayo ken mapadayawantayo iti naaramidantayo.​—Num. 11:16; Job 31:6.

2, 3. Apay a posible nga agbalin a saan a balanse ti panagtarigagaytayo a maapresiar? (Kitaen ti ladawan iti rugi ti artikulo.)

² Ngem kas iti adu a normal a tarigagaytayo, posible nga agbalin a saan a balanse ti tarigagaytayo a maapresiar gapu ta imperpektotayo. Dayta ti makagapu nga agtarigagaytayo iti di umiso a pammadayaw. Rubroban ti lubong ni Satanas ti tarigagaytayo nga agbalin a nalatak ken mabigbigbig tapno saantay a maipaay iti nailangitan nga Amatayo, ni Jehova a Dios, ti panangbigbig ken panagdaydayaw a maikari kenkuana.​—Apoc. 4:11.

³ Idi tiempo ni Jesus, di umiso ti panangmatmat ti dadduma a lider ti relihion iti pammadayaw. Impakdaarna kadagiti pasurotna: “Siputanyo dagiti eskriba a tarigagayanda ti agpagnapagna a nagpagan-anay iti nagayad ket kaykayatda dagiti kablaaw kadagiti plasa ken dagiti makinsango [wenno, kasayaatan] a pagtugawan kadagiti sinagoga ken dagiti katan-okan a puesto kadagiti pangrabii.” Intuloyna: “Awatento dagitoy ti nadagdagsen a pannakaukom.” (Luc. 20:46, 47) Ngem inapresiar ni Jesus ti napanglaw a balo a babai a mabalin a saan a nadlaw ti dadduma ti bassit a kontribusionna. (Luc. 21:1-4) Naiduma unay ti panangmatmat ni Jesus iti panangpadayaw. Tulongannatayo daytoy nga artikulo a mangtaginayon iti umiso a panangmatmat, nga awaten ni Jehova a Dios.

 4. Ania ti kasayaatan a kita ti pammadayaw, ken apay?

⁴ Ania ngarud ti kasayaatan a kita ti pammadayaw a mabalin a tarigagayantayo? Saan a ti atension a sapsapulen dagiti tattao iti edukasion, negosio, ken paglinglingayan iti daytoy a lubong. Imbes ketdi, panunotentayo ti kita ti pammadayaw nga inladawan ni Pablo: “Ita ta am-ammoyon ti Dios, wenno imbes ketdi ita ta am-ammonakayon ti Dios, kasano nga agsubsublikayo manen iti nakapuy ken nanumo a pagdamdamuan a bambanag ket kayatyo ti agpaadipen manen kadakuada?” (Gal. 4:9) Anian a nagsayaat a pribilehio ti maibilang nga ‘am-ammo ti Dios,’ ti Kangatuan nga Agturay iti uniberso! Kayatna a nasingedtayo kenkuana. Kas imbaga ti maysa nga eskolar, “adda kadatayo ti atensionna.” No bigbigennatayo ni Jehova kas gayyemna, maar-aramidtayo ti mismo a panggep a naparsuatayo.​—Ecl. 12:13, 14.

 5. Ania ti aramidentayo tapno maam-ammonatayo ti Dios?

⁵ Naipaayan ni Moises iti kasta a bendision. Insungbat ni Jehova idi impakaasi ni Moises a naan-anay koma a maammuanna dagiti dalanna: “Daytoy a banag, . . . a sinaom, aramidekto [met], agsipud ta nakasarakka iti pabor kadagiti matak ken am-ammoka iti nagan.” (Ex. 33:12-17) Umawattayo met kadagiti nagsasayaat a bendision ni Jehova no am-ammonatayo kas indibidual. Ngem ania ti aramidentayo tapno maam-ammonatayo ni Jehova? Ayaten ken idedikartayo ti biagtayo kenkuana.​—Basaen ti 1 Corinto 8:3.

6, 7. Ania ti mabalin a mangdadael iti relasiontayo ken Jehova?

⁶ Nupay kasta, masapul a pagtalinaedentayo ti napateg a relasiontayo iti nailangitan nga Amatayo. Kas kadagiti Kristiano idiay Galacia a sinuratan ni Pablo, masapul met a saantayo nga agpaadipen iti “nakapuy ken nanumo a pagdamdamuan a bambanag” iti daytoy a lubong, kas iti panagtarigagay iti pammadayaw ti lubong. (Gal. 4:9) Rimmang-ay dagidiay a Kristiano idi umuna a siglo ket am-ammo idan ti Dios. Ngem imbaga ni Pablo kadagita a kakabsat nga ‘agsubsublida manen’ iti awan serserbina a bambanag. Kasla ibagbaga ni Pablo: “Apay nga agsubsublikayo iti minamaag ken awan patpategna a bambanag a pinanawanyon?”

⁷ Posible kadi nga agbalintayo met a kasta ita? Wen, posible. Idi naam-ammotayo ni Jehova, mabalin a kas ken Pablo, tinallikudantayo ti kinalatak iti lubong ni Satanas. (Basaen ti Filipos 3:7, 8.) Mabalin a saantayo nga inawat dagiti oportunidad a maaddaan iti nangato nga edukasion wenno ngumato ti posisiontayo iti trabaho wenno bumaknang iti lubong ti negosio. Baka nagbalintayo koma a nalatak wenno sikat ken nabaknang gapu iti talentotayo iti musika ken isports, ngem tinallikudantayo amin dagita. (Heb. 11:24-27) Saan a nainsiriban nga ipapantayo a dagiti kasta a nasayaat a desision ket ‘sayang nga oportunidad’! No kasta ti panagpampanunottayo, baka subliantayo dagiti imbilangtayon a “nakapuy ken nanumo” a bambanag iti daytoy a lubong.a

 8. Ania ti mangpabileg iti determinasiontayo a manggun-od iti pammadayaw ni Jehova?

⁸ Kasanotayo a mapabileg ti determinasiontayo a gumun-od iti pammadayaw ni Jehova imbes nga iti lubong? Maaramidtayo dayta no laglagipentayo ti dua a napateg a banag. Umuna, kanayon a padayawan ni Jehova dagiti matalek nga agserserbi kenkuana. (Basaen ti Hebreo 6:10; 11:6) Apresiarenna ti tunggal adipenna, ken ibilangna a ‘kinakillo’ no baybay-anna dagidiay matalek kenkuana. Kanayon nga “ammo ni Jehova dagidiay kukuana.” (2 Tim. 2:19) “Siaammo iti dalan dagidiay nalinteg” ken ammona no kasano nga ispalen ida iti pannakasuotda.​—Sal. 1:6; 2 Ped. 2:9.

 9. Mangted kadagiti pagarigan no kasano nga impakita ni Jehova ti anamongna iti ilina.

⁹ Adda dagiti gundaway nga impakita ni Jehova ti anamongna iti ilina iti naisangsangayan a pamay-an. (2 Cron. 20:20, 29) Ti maysa a pagarigan ket idi insalakan ni Jehova ti ilina iti Nalabaga a Baybay idi kamkamaten ida ti nabileg nga armada ni Faraon. (Ex. 14:21-30; Sal. 106:9-11) Nakaskasdaaw daytoy a pasamak ta pagsasaritaan pay laeng daytoy dagiti tattao iti dayta a paset ti lubong kalpasan ti 40 a tawen. (Jos. 2:9-11) Makapabileg a lagipen ti kasta a panangipakita ni Jehova iti ayat ken pannakabalin inton maipasangotayo iti nabayagen a naipadto nga iraraut ni Gog ti Magog! (Ezeq. 38:8-12) Agyamantayto iti dayta a gundaway ta sinapultayo ti pammadayaw ti Diostayo imbes a ti lubong.

10. Ania pay ti laglagipentayo maipapan iti panangpadayaw ni Jehova?

¹⁰ Laglagipentayo met ti maikadua a napateg a banag: Mabalin a padayawannatayo ni Jehova iti pamay-an a ditay pulos namnamaen. Dagidiay agar-aramid iti naimbag tapno laeng makita dagiti tattao ket saanen a gunggonaan ni Jehova. Apay? Naan-anay a naawatdan ti gunggonada idi pinadayawan ida dagiti tattao. (Basaen ti Mateo 6:1-5.) Ngem imbaga ni Jesus a ‘kitkitaen ni Amana iti nalimed’ dagidiay saan a maipapaayan iti maikari a pammadayaw gapu iti naimbag nga ar-aramidenda iti sabsabali. Makitkitana dagita nga aramid ket supapakanna ti tunggal maysa sigun iti aramidna. Ngem no dadduma, gunggonaannatayo ni Jehova iti pamay-an a ditay namnamaen. Usigentayo ti dadduma a pagarigan.

11. Kasano a pinadayawan ni Jehova ti balasang a ni Maria?

¹¹ Idi tiempon a mayanak kas tao ti Anak ti Dios, pinili ni Jehova ti napakumbaba a birhen a ni Maria kas ina daytoy espesial nga anak. Aggigian idi ni Maria iti bassit a siudad ti Nazaret, nga adayo idiay Jerusalem ken iti nadayag a templo. (Basaen ti Lucas 1:26-33.) Apay a ni Maria ti napili iti daytoy a pribilehio? Imbaga ni anghel Gabriel kenkuana a ‘nakasarak iti pabor iti Dios.’ Makita ti nabileg nga espiritualidad ni Maria kadagiti imbagana iti kabagianna a ni Elisabet. (Luc. 1:46-55) Wen, palpaliiwen ni Jehova ni Maria, ket impaayna kenkuana ti dina ninamnama a pribilehio gapu iti kinamatalekna.

12, 13. Kasano a napadayawan ni Jesus idi nayanak ken idi naipan idiay templo 40 nga aldaw kalpasanna?

¹² Idi nayanaken ni Maria ni Jesus, awan nangato nga opisial wenno agturay idiay Jerusalem ken Betlehem ti pinadayawan ni Jehova babaen ti panangipakaammona kadakuada iti daytoy nagpateg a pasamak. Nagparang dagiti anghel kadagiti nanumo a pastor nga agay-aywan iti karnero iti ruar ti Betlehem. (Luc. 2:8-14) Kalpasanna, bimmisita dagitoy a pastor iti kayyanak nga ubing. (Luc. 2:15-17) Nasorpresa la ketdi da Maria ken Jose a makakita iti kasta a pannakapadayaw ni Jesus! Kitaentayo ti nagdumaan ti panagtignay ni Jehova ken ti Diablo. Idi nangibaon ni Satanas kadagiti astrologo a bumisita ken Jesus ken kadagiti nagannakna, nariribuk ti intero a Jerusalem iti damag a pannakayanak ni Jesus. (Mat. 2:3) Daytoy a publiko a pannakaipakaammo iti pannakayanak ni Jesus ket nagresulta iti pannakapapatay ti adu nga inosente nga ubbing.​—Mat. 2:16.

¹³ Uppat a pulo nga aldaw kalpasan a nayanak ni Jesus, obligasion ni Maria ti agdaton ken Jehova iti templo idiay Jerusalem, nga agarup 9 a kilometro (6 a milia) manipud Betlehem. (Luc. 2:22-24) Idi mapmapanen idiay Jerusalem ni Maria a kaduana da Jose ken Jesus, mabalin a pinampanunotna no mangaramid ngata ti padi nga agserserbi iti templo iti espesial a panangbigbig iti akem ni Jesus iti masanguanan. Napadayawan ni Jesus, ngem saan a kas iti pamay-an a mabalin a pampanunoten ni Maria. Inusar ni Jehova ti “nalinteg ken managdayaw” a lalaki nga agnagan Simeon, ken ti 84 ti tawenna a propeta a balo nga agnagan Ana, a mangbigbig nga agbalinto daytoy nga ubing kas naikari a Mesias, wenno Kristo.​—Luc. 2:25-38.

14. Ania dagiti bendision ni Jehova ken ni Maria?

¹⁴ Ni ngay Maria? Nagtultuloy kadi a pinadayawan ni Jehova gapu iti matalek a panangaywan ken panangpadakkelna iti Anakna? Wen. Impaisurat ti Dios iti Biblia ti inaramid ken imbaga ni Maria. Mabalin a saan idin a kabaelan ni Maria ti sumurot ken Jesus bayat ti tallo ket kagudua a tawen a ministeriona. Nalabit gapu ta balo ni Maria, nagtalinaed laengen idiay Nazaret. Nupay naikapis iti adu a pribilehio, adda iti sibay ni Jesus idi matay. (Juan 19:26) Idi agangay, adda ni Maria idiay Jerusalem a kaduana dagiti adalan sakbay ken kabayatan ti Pentecostes idi naiparukpok ti nasantuan nga espiritu. (Ara. 1:13, 14) Karaman la ketdi ni Maria kadagita a napulotan. No kasta, kaipapananna ngarud a naikkan iti oportunidad a makikadua ken Jesus idiay langit iti agnanayon. Anian a nagsayaat a gunggona gapu iti matalek a panagserbina!

15. Idi adda ni Jesus ditoy daga, kasano nga impakita ni Jehova ti anamongna iti Anakna?

¹⁵ Saan a tinarigagayan ni Jesus ti pammadayaw dagiti lider ti relihion wenno agtuturay idi tiempona. Ngem naparegta la ketdi idi binigbig isuna ni Jehova iti tallo a nagduduma a gundaway a nagsao manipud langit. Kalpasan unay ti bautismo ni Jesus idiay Karayan Jordan, kinuna ni Jehova: “Daytoy ti Anakko, ti dungdungnguen, nga inanamongak.” (Mat. 3:17) Ni laeng Juan a Mammautisar ti tao a kaduana a nakangngeg kadagita a sasao. Agarup makatawen sakbay ti ipapatay ni Jesus, nangngeg ti tallo nga apostol ti imbaga ni Jehova maipapan ken Jesus: “Daytoy ti Anakko, ti dungdungnguen, nga inanamongak; agimdengkayo kenkuana.” (Mat. 17:5) Sumagmamano nga aldaw sakbay ti ipapatay ni Jesus, nagsao manen ni Jehova iti Anakna manipud langit.​—Juan 12:28.

16, 17. Kasano a pinadayawan ni Jehova ni Jesus iti di ninamnama a pamay-an?

¹⁶ Uray ammo ni Jesus a nakababainto ti ipapatayna ta mapabasol kas managtabbaaw, inkararagna a maaramid koma ti pagayatan ni Jehova, saan a ti pagayatanna. (Mat. 26:39, 42) “Inibturanna ti kayo a pagtutuokan, nga inumsina ti bain,” ta tinarigagayanna ti pammadayaw ni Amana, saan a ti lubong. (Heb. 12:2) Kasano nga impakita ni Jehova dayta a pammadayaw?

¹⁷ Idi adda ni Jesus ditoy daga, inyebkasna ti tarigagayna a maisubli ti dayag nga adda idi kenkuana idiay langit iti sibay ni Amana. (Juan 17:5) Awan ti mangipakita nga ar-arapaapen ni Jesus ti nalablabes ngem iti dayta. Saan a nangnamnama a maitan-ok idiay langit. Ngem ania ti inaramid ni Jehova? Pinadayawanna ni Jesus iti di ninamnama a pamay-an idi pinagungarna nga addaan iti “nangatngato a saad” ken inikkanna iti banag nga awan pay idi ti nakaitedanna​—ti immortal a biag kas espiritu!b (Fil. 2:9; 1 Tim. 6:16) Anian a nagsayaat a pammadayaw iti matalek a panagserbi ni Jesus!

18. Ania ti makatulong tapno ditay sapulen ti anamong daytoy a lubong?

¹⁸ Ania ti makatulong tapno ditay sapulen ti anamong daytoy a lubong? Laglagipentayo a kanayon a bigbigen ni Jehova dagiti matalek nga adipenna ken masansan a gunggonaanna ida iti pamay-an a dida namnamaen. Saantayo nga ammo dagiti di ninamnama a bendisiontayo iti masanguanan! Ngem ita, bayat nga ib-ibturantayo dagiti rigat ken pakasuotan iti daytoy dakes a lubong, kanayon koma a laglagipentayo nga aglabasto daytoy a lubong ken ti aniaman a pammadayaw nga ipaayna. (1 Juan 2:17) Ti naayat nga Amatayo a ni Jehova ket ‘saan a nakillo tapno lipatenna ti aramidtayo ken ti ayat nga impakitatayo maipaay iti naganna.’ (Heb. 6:10) Wen, ipaayannatayto iti pabor​—nalabit uray iti pamay-an a ditay namnamaen ita!