Masapul a Maikaskasaba nga Umuna Daytoy Naimbag a Damag

“Iti isuamin a nasnasion masapul a maikaskasaba nga umuna ti naimbag a damag.”​—MARCOS 13:10.

1, 2. Ania ti pakailasinan dagiti Saksi, ken apay?

APAY a di agsarday a mangaskasaba dagiti Saksi ni Jehova? Awan duadua a pagaammodatayo iti intero a lubong gapu iti publiko a ministeriotayo, iti man binalay-balay, kadagiti lansangan, wenno iti impormal a pamay-an. Iti amin a tumutop a gundaway, ipabigbigtayo ti bagbagitayo kas Saksi ken ikagumaantayo nga ipakaammo a sitataktika ti naimbag a damag nga ipatpategtayo. Kinapudnona, maikunatayo a daytoy a ministerio ti pakailasinantayo!​—Colosas 4:6.

² Panunotenyo laengen daytoy​—tunggal makakita dagiti tao iti sangakaarrubaanda iti maysa a grupo dagiti nadalimanek-panagkawkawesda a lallaki, babbai, ken ubbing a naka-bag, ania ti kadawyan a mapanunotda nga umuna? ‘Ay, adda manen dagiti Katoliko (wenno Orthodox)!’ kunada aya, wenno, ‘Adda manen dagiti Pentecostal (wenno Baptist)!’ Saan. Ammo dagiti tattao nga awanan dagiti kasta a relihion kadagiti pamilia a mangar-aramid iti binalay-balay a ministerio. Nalabit mangibaon dagiti dadduma a relihiuso a grupo kadagiti “misionero” nga agserbi iti las-ud ti dua a tawen iti sumagmamano a lugar, ngem saan a makipaspaset iti kasta a ministerio dagiti dadduma pay a kamengda. Dagiti laeng Saksi ni Jehova ti agdinamag iti intero a lubong gapu iti regtada a mangipakaammo iti mensaheda kadagiti sabsabali iti amin a tumutop a gundaway. Ket nalatakda gapu iti magasinda a Ti Pagwanawanan ken Agriingkayo!​—Isaias 43:10-12; Aramid 1:8.

Naidumada Kadagiti Klero ti Kakristianuan

3, 4. Kasano a masansan a mailadawan dagiti klero ti Kakristianuan iti warnakan?

³ Maigidiat unay, maulit-ulit a maipadpadamag iti warnakan nga adu kadagiti klero iti sumagmamano a daga ti mangab-abuso kadagiti ubbing, imoral a manangallilaw, ken suitik. Dagiti nainlasagan nga aramidda ken ti nabarayuboy a panagbiagda ket agdadata a makita ti amin. Nagsayaat ti panangyebkas ti maysa a nalatak a mammutar iti dayta iti kantana a napauluan “Would Jesus Wear a Rolex [nakanginngina a balitok a relo] on His Television Show?” Insaludsodna: “Agbalin aya a napolitikaan ni Jesus no agsubli ditoy Daga? Maaddaan iti maikadua a balay idiay Palm Springs [maysa a nabaknang a komunidad iti California] ket padasenna nga ilemmeng ti kinabaknangna?” Anian a mayanatup ti sasao ni Santiago: “Nagbiagkayo iti kinaluho ditoy rabaw ti daga ket nakiramankayo iti linalasag a ragragsak. Pinalukmegyo ti puspusoyo iti aldaw ti panagparti.”​—Santiago 5:5; Galacia 5:19-21.

⁴ Ti pannakipagayam ti klero kadagiti politiko ken pannakiramanda pay ketdi kadagiti panagpipili kas kandidato politiko ibutaktakna ida kas moderno-aldaw nga eskriba ken Fariseo. Maysa pay, kadagiti pagilian a kas ti Estados Unidos ken Canada, maib-ibusan dagiti relihiuso a grupo iti kuarta gapu iti kinadakkel ti mabusbos iti pannakaidarum ken pannakaisaklang dagiti klero, a bunga ti nalulok a kababalinda kadagiti ubbing ken nataengan.​—Mateo 23:1-3.

 5. Apay a dagiti klero ti Kakristianuan ket saan nga isu “ti matalek ken masirib nga adipen”?

⁵ Siuumiso a maikuna ni Jesus kadagiti klero idi kaaldawanna: “Asikayo pay, eskriba ken Fariseo, a managinsisingpet! agsipud ta umarngikayo kadagiti napapudaw a tanem, nga iti ruar pudno nga agparangda a napintas ngem iti uneg napnoda kadagiti tulang dagiti natay a tattao ken tunggal kita ti kinarugit. Iti dayta a pamay-an dakayo met, pudno nga iti ruaryo, agparangkayo a nalinteg kadagiti tattao, ngem iti uneg napnokayo iti panaginsisingpet ken kinakillo.” Gapuna, saan a dagiti klero ti Kakristianuan, Katoliko man, Protestante, Orthodox, wenno aniaman a relihiuso a grupo a di nainaig iti aniaman a pormal a relihiuso nga organisasion, ti tinudingan ti Dios a mangikasaba iti naimbag a damag. Saan nga isuda ti naipadto a “matalek ken masirib nga adipen.”​—Mateo 23:27, 28; 24:45-47.

Apay a Maikaskasaba nga Umuna ti Naimbag a Damag?

 6. Ania dagiti pasamak nga asidegen a maaramid?

⁶ Iti ababa ngem nabagas a bersionna iti bilin ni Jesus nga ikasaba ti naimbag a damag iti amin a nasion, ni laeng Marcos ti nagaramat iti sao nga “umuna.” (Marcos 13:10; idiligyo ti Mateo 24:14.) Kastoy ti panangipatarus ni J. B. Phillips: “Ta sakbay a dumteng ti panungpalan masapul a maiwaragawag ti ebanghelio iti amin a nasion.” Ti pannakaaramat ti adverbo nga “umuna” ipasimudaagna nga adda dadduma pay a pasamak a sumaruno iti sangalubongan a trabaho a panagebanghelio. Karaman kadagidiay a pasamak ti naikari a dakkel a rigat ken ti nalinteg a panagturay ni Kristo iti baro a lubong.​—Mateo 24:21-31; Apocalipsis 16:14-16; 21:1-4.

 7. Apay a kayat ti Dios a maikaskasaba nga umuna ti naimbag a damag?

⁷ Isu nga apay a kayat ti Dios a maikaskasaba nga umuna ti naimbag a damag? Maysa a rason, isu ket Dios ti ayat, kinahustisia, sirib, ken pannakabalin. Iti kaitungpalan ti sasao ni Jesus idiay Mateo 24:14 ken Marcos 13:10, makasaraktayo iti nakaskasdaaw a pannakaiparangarang dagitoy a galad ni Jehova. Saggaysaentay nga usigen dagitoy iti apagbiit ket kitaentayo no kasano a nainaig dagitoy iti pannakaikaskasaba ti naimbag a damag.

Ti Naimbag a Damag ken ti Ayat ni Jehova

 8. Kasano nga iparangarang ti pannakaikaskasaba ti naimbag a damag ti ayat ti Dios? (1 Juan 4:7-16)

⁸ Kasano a ti pannakaikaskasaba ti naimbag a damag yanninawna ti ayat ti Dios? Umuna iti amin, gapu ta saan dayta a maysa a mensahe a nairanta nga agpaay iti maymaysa laeng a pulí wenno grupo. Maysa dayta a naimbag a damag nga agpaay iti “isuamin a nasnasion.” Gapu iti kasta unay a panagayat ti Dios iti natauan a pamilia, imbaonna ti bugbugtong nga Anakna ditoy daga tapno agbalin a daton a subbot gapu kadagiti basol ti intero a sangatauan, saan laeng a maymaysa a pulí. Insurat ni apostol Juan: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag. Ta ti Dios imbaonna ti Anakna iti lubong, saan a tapno ukomenna ti lubong, no di ket tapno ti lubong maisalakan babaen kenkuana.” (Juan 3:16, 17) Awan duadua a ti naimbag a damag, maysa a mensahe a mangikarkari iti baro a lubong nga adda talna, panagtutunos, ken kinahustisia, ket maysa a pammaneknek iti ayat ti Dios.​—2 Pedro 3:13.

Ti Naimbag a Damag ken ti Pannakabalin ni Jehova

 9. Apay a saan nga us-usaren ni Jehova dagiti nabileg a relihion ti Kakristianuan a mangikasaba iti naimbag a damag?

⁹ Kasano a maiparangarang ti pannakabalin ni Jehova iti pannakaikaskasaba ti naimbag a damag? Usigenyo daytoy, siasino ti us-usarenna a mangitungpal iti daytoy a trabaho? Dagiti aya kabibilgan a relihiuso nga organisasion ti Kakristianuan, kas ti Iglesia Romana Katolika wenno dagiti prominente a Protestante a denominasion? Saan, saanda a maikari iti dayta nga annongen gapu iti pannakiramanda iti politika. (Juan 15:19; 17:14; Santiago 4:4) Saan a bigbigen ni Jehova a Dios ti dakkel a kinabaknangda ken ti pannakainaig ken impluensiada kadagiti natan-ok nga agtuturay, kasta met ti teolohiada a naibatay iti tradision. Saan a kasapulan ti pannakabalin ti tao iti pannakaibanag ti pagayatan ti Dios.​—Zacarias 4:6.

10. Siasino ti pinili ti Dios a mangasaba?

¹⁰ Kastoy ti kinuna ni apostol Pablo iti suratna iti kongregasion sadi Corinto: “Makitayo ti panangayabna kadakayo, kakabsat, a saan nga adu a mamasirib iti nainlasagan a pamay-an ti naayaban, saan nga adu a mannakabalin, saan nga adu a natan-ok ti pannakaiyanakna; no di ket ti Dios pinilina dagiti minamaag a bambanag ti lubong, tapno maibabainna dagiti masirib a tattao; ket ti Dios pinilina dagiti nakapuy a bambanag ti lubong, tapno maibabainna dagiti napigsa a bambanag; ket ti Dios pinilina dagiti awan mamaayna a bambanag ti lubong ken dagiti bambanag a maum-umsi, dagiti bambanag nga awan, tapno pukawenna dagiti bambanag nga adda, tapno iti kasta awan ti lasag nga agpasindayag iti imatang ti Dios.”​—1 Corinto 1:26-29.

11. Aniadat’ pakaidumaan dagiti Saksi?

¹¹ Manmano kadagiti Saksi ni Jehova ti nabaknang ken pulos nga awan kadakuada ti mannakabalin iti politika. Ti nainget a neutral a takderda kadagiti napolitikaan a banag kaipapananna nga awan ti napolitikaan nga impluensiada. Iti kasupadina, masansan nga isuda ti biktima ti nakaam-ames a panangidadanes nga isungsungsong dagiti relihiuso ken napolitikaan a papangulo iti daytoy maika-20 a siglo. Kaskasdi, iti baet ti narungsot a panangbusor kadakuada dagiti pasurot ti Nazismo, Fascismo, Komunismo, nasionalismo, ken ulbod a relihion, saan laeng nga ikaskasaba dagiti Saksi ti naimbag a damag iti intero a lubong no di pay ket nakaskasdaaw ti yaadu ti bilangda.​—Isaias 60:22.

12. Apay a naballigi dagiti Saksi?

¹² Iti ania nga ipagapu dagiti Saksi ti panagballigida? Inkari ni Jesus kadagiti adalanna: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.” Isu nga, ania aya a talaga ti gubuayan ti balligida? Kinuna ni Jesus: “Umawatkayto iti pannakabalin inton dumteng kadakayo ti nasantuan nga espiritu.” Kasta met itatta, ti pannakabalin nga agtaud iti Dios, saan a ti kabaelan ti tao, ti kangrunaan a mamagballigi kadagiti Saksi iti sangalubongan a ministerioda. Iti panangusarna kadagiti kasla nakakapsut unay a tattao, ipatpatungpal ti Dios ti kadakkelan a trabaho a panangisuro iti historia.​—Aramid 1:8; Isaias 54:13.

Ti Naimbag a Damag ken ti Sirib ni Jehova

13. (a) Apay a sibubulos nga agserbi ken saan nga agpabpabayad dagiti Saksi? (b) Kasano ti panangsungbat ni Jehova iti pananguyaw ni Satanas?

¹³ Ti naimbag a damag ket ikaskasaba dagiti boluntario. Kinuna ni Jesus: “Inawatyo nga awan bayadna, itedyo nga awan bayadna.” (Mateo 10:8) Gapuna, awan kadagiti Saksi ni Jehova ti umaw-awat iti sueldo iti panagserbida iti Dios, wenno agsapsapul iti sueldo. Kinapudnona, saanda man la a mangur-or iti kuarta kadagiti gimongda. Maragsakanda, babaen ti napasnek ken sibubulos a panagserbi, a mangipaay iti Dios iti sungbat iti mangak-akusar kenkuana, ni Satanas a Diablo. No an-anagen, kinuna daytoy espiritu a kabusor ti Dios nga agserserbi dagiti tattao iti Dios gapu iti managimbubukod a motibo. Iti kinasiribna nakapataud ni Jehova iti di masupiat a sungbat iti pananguyaw ni Satanas​—dagiti riniwriw a nasungdo a Kristiano a Saksi a mangikaskasaba iti naimbag a damag iti binalay-balay, kadagiti lansangan, ken iti impormal a pamay-an.​—Job 1:8-11; 2:3-5; Proverbio 27:11.

14. Ania “ti nailemmeng a sirib” a tuktukoyen ni Pablo?

¹⁴ Ti maysa pay a pammaneknek iti sirib ti Dios iti pannakaikaskasaba ti naimbag a damag isu daytoy: Ti naikari a Pagarian a mismo ket maysa a parangarang ti sirib ti Dios. Insurat ni apostol Pablo: “Ita sawenmi ti sirib kadagidiay a natataengan, ngem saan a ti sirib daytoy a sistema ti bambanag wenno ti adda kadagiti agtuturay daytoy a sistema ti bambanag, isuda a mapukaw. No di ket sawenmi ti sirib ti Dios iti sagrado a palimed, ti nailemmeng a sirib, nga intuding a nasaksakbay ti Dios kasakbayan dagiti sistema ti bambanag maipaay iti dayagtayo.” Dayta “nailemmeng a sirib” tuktukoyenna ti nainsiriban a pamuspusan ti Dios a manggibus iti yaalsa a nangrugi idiay Eden. Naipalgak ti sirib dayta sagrado a palimed ken ni Jesu-Kristo, a nakaisentruan ti naimbag a damag ti Pagarian ti Dios.a​—1 Corinto 2:6, 7; Colosas 1:26-28.

Ti Naimbag a Damag ken ti Kinahustisia ti Dios

15. Kasanotay nga ammo a ni Jehova ket maysa a Dios ti kinahustisia? (Deuteronomio 32:4; Salmo 33:5)

¹⁵ Ti pateg ti sao nga “umuna” idiay Marcos 13:10 ket makitatayo a nangnangruna mainaig iti kinahustisia. Ni Jehova ket maysa a Dios ti kinahustisia a natimbeng iti naayat a kinamanangngaasi. Kinunana babaen ken mammadtona a Jeremias: “‘Ti agpasindayag agpasindayag koma iti daytoy, nga isu adda pannakaawatna ken ammonak, a siak ni Jehova nga agaramid ti naayat a kinamanangngaasi, kinahustisia ken kinalinteg ditoy daga; ta kadagitoy a bambanag agragsakak,’ kuna ni Jehova.”​—Jeremias 9:24.

16. Kasano a mayilustrar a ti kinahustisia sapulenna ti panangipaay nga umuna iti pakdaar?

¹⁶ Kasano a maiparangarang ti kinahustisia ni Jehova iti pannakaikaskasaba ti naimbag a damag? Mabalintay a yilustrar dayta iti maysa nga ina a nagaramid iti naimas a tsokolate a cake a pagsasanguanda inton sumangpet dagiti bisita. No panawanna dayta iti rabaw ti lamisaan iti kusina a dina ibaga kadagiti annakna no kaanoda a kanen dayta, ania ngata ti nakaisigudan nga aramiden dagiti ubbing? Napadasantay amin ti nagubing! Kayat a ramanan ti ubing dayta a cake babaen ti panangkiddisna iti dayta! Ita no saan a binagaan ti ina ti anakna, awan ti natibker a panggapuanna a mangdisiplina. Iti sabali a bangir, no inyunay-unayna a sadanto la kanen ti cake inton sumangpet dagiti bisita ket ngarud awan ti mangkutkuti iti dayta, no kasta nalawag a nangted iti ballaag. No adda agsukir, adda karbenganna a mangaramid iti natibker ken nainkalintegan a tignay.​—Proverbio 29:15.

17. Kasano nga iparparangarang ni Jehova ti kinahustisia iti naisangsangayan a pamay-an nanipud 1919?

¹⁷ Gapu iti kinahustisiana, saan nga ukomen ni Jehova daytoy dakes a sistema ti bambanag a di mangted nga umuna iti pakdaar. Gapuna, nangruna nanipud 1919, kalpasan nga inyeg ti umuna a sangalubongan a gubat “dagiti ut-ot ti panagrigat,” addaan ni Jehova kadagiti Saksi a sireregta a mangiwarwaragawag iti naimbag a damag iti intero a daga. (Mateo 24:7, 8, 14) Awan ti pagpambar dagiti nasion a saanda a naammuan daytoy naisangsangayan a pakdaar.

Kasano Kalawa a Nasaknapanen ti Lubong?

18. (a) Ania ti pammaneknek iti trabaho dagiti Saksi kadagiti adayo a lugar? (b) Ania dagiti sabali pay a pagarigan nga ammoyo?

¹⁸ Makita iti libro a Last Places​—A Journey in the North ti maysa a pammaneknek iti kinaepektibo daytoy sangalubongan a trabaho a panangisuro. Kinuna ti autor daytoy nga idi sinukimatna dagiti tsart ti taaw iti naiputputong nga isla ti Foula, maysa kadagiti Shetland Islands iti amianan ti Scotland, namarkaan dagiti tsart iti “WKS (wrecks), RKS (rocks), LDGS (ledges), ken OBS (obstructions) iti aglawlaw ti isla.” Dagitoy ti “mamakdaar iti maysa a marino nga umadayo. Ti taaw ti Foula ket kasla maysa a napeggad a minefield [lugar a nakailemmengan dagiti eksplosibo a minas], a manglapped kadagiti managlayag, day-tripper, ken uray kadagiti tao ti Natan-ok a Reyna nga agserserbi iti obras publikas, ngem dagitoy a tubeng saanda a malapdan dagiti Saksi ni Jehova​—kas naammuak kalpasan ti sumagmamano nga aldaw.” Intuloyna: “No kasano a winanasda dagiti kaeskuateran kadagiti dadakkel a siudad ken dagiti napanglaw a pagilian tapno mangawis kadagiti pasurot, kasta met nga inkaskasabada ti pammatida iti adayo a Foula.” Kinunana a sumagmamano a bulan sakbayna, adda maysa a kopia ti Pagwanawanan a naibati iti ruangan ti balay ti maysa a lokal nga agnaed, ni Andrew. Sana innayon: “Kalpasan ti makalawas nakakitaak iti maysa a kopia ti [Agriingkayo! iti Danes] idiay Faeroe [dagiti isla ti North Sea] ket dua a bulan kalpasanna, maysa a kopia ti [Ti Pagwanawanan iti Danes] idiay Nuuq, Greenland.” Anian a nagsayaat a pammaneknek iti naanep a trabaho dagiti Saksi ni Jehova kadagidiay a deppaar ti amianan!

Aniat’ Mangtigtignay Kadagiti Saksi nga Agtultuloy a Mangasaba?

19, 20. (a) Aniat’ mangtigtignay kadagiti Saksi ni Jehova nga agtultuloy a mangasaba? (b) Ania a salsaludsod ti sumaruno a masungbatan?

¹⁹ Siempre, saan a nalaka ti panangasaba iti binalay-balay kadagiti tattao a di am-ammo, uray no mano a tawenen a Saksi ti maysa a tao. No kasta, aniat’ mangtigtignay kadagitoy a Kristiano nga agtultuloy [a mangasaba]? Ti kinapasnekda kas Kristiano ken ti panangbigbigda iti responsabilidad. Insurat ni Pablo: “Ita, no idekdeklarak ti naimbag a damag, saan a rason dayta tapno agpasindayagak, ta ti panagkasapulan naipabaklay kaniak. Pudno unay, asiak pay no diak indeklara ti naimbag a damag!” Addaan dagiti pudno a Kristiano iti mensahe a kaipapananna ti biag, isu a kasano koma a bukbukodanda dayta? Ti laengen prinsipio ti pannakabasol iti dara gapu iti di panangipaay ti pakdaar iti tiempo ti peggad ket maysa a napigsa a rason nga ikasaba ti naimbag a damag.​—1 Corinto 9:16; Ezequiel 3:17-21.

²⁰ Ngarud, kasano a maikaskasaba ti naimbag a damag? Ania ti tulbek iti panagballigi dagiti Saksi? Aniada a benneg ti ministerio ken organisasionda ti tumulong a mangilasin kadakuada kas ti pudno a relihion? Sungbatan ti sumaganad nga artikulomi dagitoy a saludsod.

[Footnote]

Malagipyo Pay Aya?

◻ Aniat’ pakaigidiatan dagiti Saksi ni Jehova kadagiti klero?

◻ Kasano a yanninaw ti panangasaba ti ayat, pannakabalin, ken sirib ti Dios?

◻ Kasano a yanninaw ti pannakaikaskasaba ti naimbag a damag ti kinahustisia ti Dios?

◻ Aniat’ mangtigtignay kadagiti Saksi ni Jehova nga agtultuloy iti ministerioda?

[Dagiti Ladawan iti panid 15]

Uray kasano kaadayo ti pagnanaedan dagiti tattao, kayat dagiti Saksi ni Jehova a danonen ida