SAGSAGUT MANIPUD ITI DIOS

Ti sagsagut nga ited ti Dios kadagiti tattao ket ebkas ti di kaikarian a kinamanangngaasina. Ti mismo a sao a khaʹri·sma (iti literal, naparabur a sagut), nga agparang iti 17 a daras iti Kristiano a Griego a Kasuratan, ket mangipasimudaag iti maysa a sagut a mainaig iti “di kaikarian a kinamanangngaasi” (khaʹris) iti biang ti Dios. (Ro 6:23, Rbi8 ftn; 1Co 12:4; 2Ti 1:6; 1Pe 4:10) Ngarud, maitutop laeng a ti sagsagut nga impaay ni Jehova ket aramaten agpaay a pagimbagan ti pada a tattao ken pakaipadayagan ti Dios a nangted iti dayta. (1Pe 4:10, 11) Dagitoy a sagut ket saan a pagimbagan laeng ti immawat iti dayta. Yantangay ti kasta a tao ‘immawat nga awan bayadna,’ pagrebbenganna ti ‘mangted nga awan bayadna.’​—Mt 10:8.

“Tunggal naimbag a sagut ken tunggal naan-anay a rangkap aggapu iti ngato.” (San 1:17) Naparabur ti panangted ni Jehova, a bay-anna nga agpada a magunggonaan dagiti nalinteg ken nadangkes iti lawag ti init ken iti tudo. Iti kinapudnona, “mangted iti biag ken anges ken amin a bambanag iti amin a tattao.” Dagiti sagut ti Dios, a pakairamanan ti taraon ken inumen ken ti pannakakita ti maysa a tao iti naimbag a bunga ti napinget a panagtrabahona, ket agpaay a pagragsakan ti tao. (Mt 5:45; Ara 17:24, 25; Ec 3:12, 13; 5:19; 1Ti 6:17) Ti kaadda wenno kaawan ti asawa ket agpada a sagut manipud iti Dios, a rumbeng a tagiragsaken maitunos kadagiti kalikagumanna. Kadagitoy a dua a sagut, nasaysayaat ti tao nga awanan asawa agsipud ta nawaywaya a mangipamaysa iti panagserbina ken Jehova nga awan ti makasinga.​—Pr 18:22; Mt 19:11, 12; 1Co 7:7, 17, 32-38; Heb 13:4.

Sagut ti Dios Babaen iti Sakripisio ni Jesus. Ti di kaikarian a kinamanangngaasi ni Jehova iti panangipaayna iti Anakna kas subbot a sakripisio ket di magatadan a sagut, ket dagidiay mamati iti sakripisio ni Jesu-Kristo mabalinda ngarud a gun-oden ti sagut nga agnanayon a biag. (Ro 6:23; Jn 3:16) Ti ‘awanan bayad a di mailadawan a sagut’ ti Dios nabatad a ramanenna ti isuamin a kinaimbag ken naayat a kinamanangngaasi nga ipapaay ti Dios iti ilina babaen ken Jesu-Kristo.​—2Co 9:15; idiligyo ti Ro 5:15-17.

Nasantuan nga Espiritu. Iburay ti Dios ti espirituna kas sagutna iti ilina, iti kasta maliklikanda iti nakababain nga ar-aramid ti lasag ket masukayda ti bunga ti espiritu​—ti ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, ken panagteppel. (Ara 2:38; Ro 8:2-10; Ga 5:16-25) Ti espiritu ni Jehova ket mapagtalkan a giya ken mangipaay iti pannakabalin a nalablabes ngem ti gagangay, iti kasta matulongan ti maysa a Kristiano a mangtungpal kadagiti annongen nga inted kenkuana ti Dios uray no adda dagiti dumteng a parikut. (Jn 16:13; 2Co 4:7-10) Impasigurado ni Jesus kadagiti adalanna a ti espiritu ti Dios ti mangisuro kadakuada iti amin a bambanag, mangipalagip kadakuada iti bambanag nga insurona kadakuada, ken tumulong kadakuada a mangidepensa iti pammatida uray iti sanguanan dagiti agtuturay.​—Jn 14:26; Mr 13:9-11.

Sirib ken Pannakaammo. Ti pudno a sirib ken pannakaammo ket sagsagut manipud iti Dios. Iti kinapudnona, aw-awisen ni Jehova dagiti adipenna nga ikararagda ti sirib ken pannakaammo, kas inaramid ni Solomon. (San 1:5; 2Cr 1:8-12) Nupay kasta, tapno magun-odan ti pannakaammo, kasapulan ti panagregget a mangadal iti impaay ti Dios babaen ti sagut a Saona. (Pr 2:1-6; 2Ti 2:15; 3:15) Ngem ti mismo a panangadal iti Sao ti Dios ket saan a mangipasigurado a maawat ti sagsagut ti pannakaammo ken sirib. Ti pudno a pannakaammo ken sirib ket magun-odan laeng babaen ken Jesu-Kristo ken buyogen ti tulong ti espiritu ti Dios.​—1Co 2:10-16; Col 2:3.

Ti nadiosan a sirib ket agpaay a salaknib ken giya iti panagbiag. (Ec 7:12; Pr 4:5-7) Ti sirib nga agtaud iti Dios ket nabatad a naiduma iti nailubongan a sirib, a kinamaag iti panangmatmat ni Jehova ken makadangran met dayta ta saanna nga ikabilangan ti Dios. (1Co 1:18-21) “Ngem ti sirib manipud ngato umuna iti amin nadalus, kalpasanna natalna, nainkalintegan, sisasagana nga agtulnog, napno iti asi ken naimbag a bungbunga, saan a mangpataud kadagiti panangidumduma, saan a managinsisingpet.”​—San 3:17.

Ti agik-ikut iti umiso a pannakaammo iti pagayatan ni Jehova ket matulongan a ‘mangsigurado iti napatpateg a bambanag,’ tapno saanna a maitibkol ti sabsabali, ken ‘tapno makapagna a maikari ken Jehova iti panggep a panangay-ayo a naan-anay kenkuana.’ (Fil 1:9-11; Col 1:9, 10) Kanayonanna, ti pannakaammo ket maysa kadagiti banag a tumulong iti maysa a Kristiano tapno agbalin nga aktibo ken nabunga iti panagserbina iti Dios. (2Pe 1:5-8) Daytoy a sagut manipud iti Dios ramanenna ti ad-adda pay ngem iti panangammo laeng iti bambanag a pudno. Saklawenna ti panangtarus kadagita a bambanag ken no kasano nga aramaten dagita iti “isusungbat iti tunggal maysa.”​—Col 4:6.

Sagsagut ti Panagserbi ken “Sagut a Tattao.” Pudno a sagsagut manipud ken Jehova dagiti annongen iti urnos wenno organisasion ti Dios ditoy daga. (Nu 18:7; Ro 12:6-8; Efe 3:2, 7) Dagidiay nakaitalkan dagiti annongen babaen iti di kaikarian a kinamanangngaasi ti Dios naawaganda met iti ‘sagsagut a tattao,’ ket ni Jesu-Kristo, kas pannakabagi ti Dios ken ulo ti kongregasion, impaayna dagitoy iti kongregasion tapno mapabileg ti tunggal kameng ken maragpatna ti kinamataengan. (Efe 4:8, 11, 12) Tapno naan-anay a maitungpalna dagiti pagrebbenganna agpaay a pakagunggonaan ti sabsabali, daydiay nakaitedan ti sagut masapul nga itultuloyna a pasayaaten dayta, a saanna a pulos baybay-an. (1Ti 4:14; 2Ti 1:6) Buyogen ti tulong ni Jehova, mapasayaat ti asinoman ti panangitungpalna iti aniaman nga annongen nga inted ti Dios babaen iti nasged a panagreggetna a naan-anay a mangaramat kadagiti abilidadna ken mangsaranget kadagiti tubeng a mabalin a tumaud.​—Fil 4:13.

Sagsagut ti Espiritu. Idi umuna a siglo K.P. ti pannakabautisar iti nasantuan nga espiritu ket napakuyogan kadagiti namilagruan a sagut. Nagpaay dagitoy kas pagilasinan a ti Judio a kongregasion ket saanen nga ar-aramaten ti Dios nga agserbi Kenkuana, no di ket ti kongregasion Kristiano nga impasdek ti Anakna ti an-anamonganna. (Heb 2:2-4) Bayat ti aldaw ti Pentecostes, adda dagiti namilagruan a sagut a naipakuyog idi naiparukpok ti nasantuan nga espiritu. Kalpasanna, iti tunggal kaso a nadakamat iti Kasuratan maipapan iti pannakaited ti namilagruan a sagsagut ti espiritu, presente ni Pablo (a direkta a pinili ni Jesus) wenno ti maysa wenno ad-adu pay kadagiti 12 nga apostol. (Ara 2:1, 4, 14; 8:9-20; 10:44-46; 19:6) Nabatad nga idi natayen dagiti apostol, nagpatinggan ti pannakaited dagiti sagut ti espiritu, ket naan-anayen a nagsardeng dagiti namilagruan a sagut ti espiritu bayat nga awanen dagidiay immawat kadagitoy a sagut.

Ti panangaramid kadagiti milagro ket saan nga isu ti kakaisuna a pammaneknek nga inautorisaran dagitoy ti Dios; saanna met a kayatna a sawen a no di makaaramid iti milagro dagiti adipen ti Dios babaen iti tulong ti espirituna ket saanna idan nga ar-aramaten. (Mt 7:21-23) Saan a tunggal Kristiano idi umuna a siglo kabaelanna ti mangaramid iti milagro, mangpaimbag, agsao kadagiti pagsasao, ken agipatarus. Ni Pablo, ken ti sumagmamano a sabsabali pay, ket naipaayan iti sumagmamano kadagitoy a sagut ti espiritu babaen iti di kaikarian a kinamanangngaasi ti Dios. Nupay kasta, naaramat dagitoy a namilagruan a sagsagut idi rugrugi ti kongregasion Kristiano ket naipadto nga agsardengto dagita. Iti kinapudnona, dinakamat a mismo ni Jesus a mailasin dagiti pasurotna babaen iti ayatda iti maysa ken maysa, saan a babaen iti panagaramidda kadagiti milagro.​—1Co 12:29, 30; 13:2, 8-13; Jn 13:35.

Imbinsabinsa ni Pablo ti siam a nadumaduma a panagtignay ti espiritu: (1) panagsao iti kinasirib, (2) panagsao iti pannakaammo, (3) pammati, (4) sagsagut a panangpaimbag, (5) mannakabalin nga ar-aramid, (6) panagipadto, (7) pannakatarus iti naipaltiing a sasao, (8) nadumaduma a pagsasao, ken (9) panangipatarus kadagiti pagsasao. Amin dagitoy a sagut ti espiritu ket nakatulong iti idadakkel ti bilang ti kongregasion ken nangibunga pay iti naespirituan a pannakapabileg dayta.​—1Co 12:7-11; 14:24-26.

“Panagsao iti kinasirib.” Nupay mabalin a magun-od ti sirib babaen ti panagadal, panangyaplikar, ken kapadasan, ti “panagsao iti kinasirib” a nadakamat ditoy ket nalawag a maysa a namilagruan a pannakabael a mangaramat a sibaballigi iti pannakaammo tapno marisut dagiti parikut a tumaud iti kongregasion. (1Co 12:8) “Maitunos iti sirib a naited” ken Pablo, nangaramid iti sursurat a nagbalin a paset ti naipaltiing a Sao ti Dios. (2Pe 3:15, 16) Agparang a naiparangarang met daytoy a sagut iti abilidad ti indibidual a mangaramid iti panangikalintegan a di kabaelan a balusingsingen wenno supiaten dagiti bumusbusor.​—Ara 6:9, 10.

“Panagsao iti pannakaammo” ken “pammati.” Ti amin a kameng ti kongregasion Kristiano idi umuna a siglo ket addaan iti pamunganayan a pannakaammo maipapan ken Jehova ken iti Anakna kasta met maipapan iti pagayatan ti Dios ken kadagiti kalikagumanna tapno magun-od ti biag. Ngarud, natantan-ok ti “panagsao iti pannakaammo” ken lab-awanna ti pannakaammo nga ik-ikutan ti kaaduan a Kristiano; dayta ket namilagruan a pannakaammo. Kasta met, ti “pammati” kas sagut ti espiritu ket nabatad a pammati nga inted ti Dios, a dayta ti nakatulong iti indibidual a mangparmek kadagiti arig-bantay a tubeng a makalapped iti panagserbina iti Dios.​—1Co 12:8, 9; 13:2.

“Panangpaimbag.” Maiparangarang ti sagut a panangpaimbag babaen ti naan-anay a panangagas iti saksakit, aniaman a kita ti sakit dayta. (Ara 5:15, 16; 9:33, 34; 28:8, 9) Sakbay ti Pentecostes, addan dagiti panangpaimbag nga inaramid ni Jesus ken dagiti adalanna. Nupay nabatad a nangiparangarang iti pammati ti sumagmamano a tattao a napaimbag, saan a nakalikaguman a mangiparangarang iti pammati daydiay masaksakit tapno maagasan. (Idiligyo ti Jn 5:5-9, 13.) Iti maysa a gundaway, imbaga ni Jesus a ti makagapu a saan a kabaelan nga agasan dagiti adalanna ti maysa nga adda kissiwna ket gapu iti bassit a pammati dagiti adalanna, saan a ti kaawan ti pammati daydiay agtartarigagay a maagasan ti anakna. (Mt 17:14-16, 18-20) Awan a pulos nadakamat iti Kasuratan a saan a nabaelan ni Jesus wenno dagiti apostolna a paimbagen ti sabsabali maigapu iti kaawan ti pammati dagidiay agtarigagay a maagasan. Kanayonanna pay, imbes nga aramaten ni Pablo ti sagut a panangpaimbag tapno agasanna ti sakit ti rusok ni Timoteo wenno ibagana a masansan nga agsaksakit gapu iti kaawan ti pammatina, inrekomenda ti apostol nga agusar ni Timoteo iti bassit nga arak a pangagas iti sakit ti rusokna.​—1Ti 5:23; kitaenyo ti PAMMATI; PANANGPAIMBAG.

“Mannakabalin nga ar-aramid.” Ti mannakabalin nga ar-aramid ramanenna ti panangpagungar kadagiti natay a tattao, panangparuar kadagiti sairo, ken uray pay ti panamagbulsek kadagiti bumusbusor. (1Co 12:10) Ti pannakaiparangarang ti kakasta a mannakabalin nga ar-aramid ket nangibunga iti pannakainayon dagiti manamati iti kongregasion.​—Ara 9:40, 42; 13:8-12; 19:11, 12, 20.

“Panagipadto.” Ti panagipadto ket dakdakkel a sagut ngem iti panagsao kadagiti pagsasao, agsipud ta mapabilegna ti kongregasion. Kanayonanna, matulonganna dagiti di manamati tapno mabigbigda a pudno nga adda ti Dios iti tengnga dagiti Kristiano. (1Co 14:3-5, 24, 25) Amin a kameng idi ti kongregasion Kristiano ket makapagsao maipapan iti kaitungpalan dagiti padto a nailanad iti Sao ti Dios. (Ara 2:17, 18) Nupay kasta, dagidiay mismo nga addaan iti namilagruan a sagut ti panagipadto nabaelanda nga ipadto ti masanguanan a paspasamak, kas iti inaramid ni Agabo.​—Ara 11:27, 28; kitaenyo ti MAMMADTO (Dagiti Mammadto iti Kristiano a Griego a Kasuratan); PADTO.

“Panangilasin iti naipaltiing a sasao.” Ti panangtarus iti naipaltiing a sasao nabatad a ramanenna ti pannakabael a mangtarus no ti maysa a naipaltiing nga ebkas ket nagtaud iti Dios wenno saan. (1Co 12:10) Gapu iti daytoy a sagut, daydiay agik-ikut iti dayta ket saan a maallilaw ken maisiasi manipud iti kinapudno ken masalaknibanna ti kongregasion manipud kadagiti ulbod a mammadto.​—1Jn 4:1; idiligyo ti 2Co 11:3, 4.

“Pagsasao.” Ti namilagruan a sagut a panagsao iti nadumaduma a pagsasao ket naipakuyog iti pannakaiparukpok ti espiritu ti Dios idi Pentecostes, 33 K.P. Gapuna, ti agarup 120 nga adalan a naguummong iti maysa a makinngato a siled (mabalin nga asideg iti templo) nakapagsaoda maipapan iti “natan-ok a bambanag ti Dios” iti nabangonan a pagsasao dagiti Judio ken proselita a napan idiay Jerusalem a naggapuda iti adayo a luglugar tapno rambakanda ti piesta. Daytoy a kaitungpalan ti padto ni Joel pinaneknekanna nga ar-aramaten ti Dios ti baro a kongregasion Kristiano, ket saannan nga ar-aramaten ti Judio a kongregasion. Tapno awaten dagiti Judio ken dagiti proselita ti awanan bayad a sagut ti nasantuan nga espiritu, kasapulan nga agbabawida ken mabautisaranda iti nagan ni Jesus.​—Ara 1:13-15; 2:1-47.

Ti sagut kadagiti pagsasao ket nakatulong unay kadagiti Kristiano idi umuna a siglo iti panangasabada kadagidiay agsasao iti sabali pay a pagsasao. Babaen iti dayta, mailasin dagiti di manamati no siasino dagiti kameng ti kongregasion. Nupay kasta, idi nagsurat ni Pablo iti kongregasion Kristiano idiay Corinto, imbilinna a no aguummongda a sangsangkamaysa, saanda koma nga aggigiddan nga agsao kadagiti pagsasao, tapno saan nga ipapan dagiti ganggannaet ken dagiti di manamati a tumabuno ken saan a makatarus kadagita nga agmauyong dagiti Kristiano. Insingasingna met a ti panagsao kadagiti pagsasao ket ‘makedngan agingga iti dua wenno tallo laeng, ken agsisinnublatda.’ Nupay kasta, daydiay agsasao iti sabali a pagsasao agulimek iti kongregasion no awan ti makabael nga agipatarus, nga agsao laengen iti bagina ken iti Dios. (1Co 14:22-33) No ti panagsaona iti sabali a pagsasao ket saan a maipatarus, saan a makapabileg iti sabsabali, ta awan ti umimdeng iti palawagna gapu ta awan mamaay dayta ken awan ti makaawat.​—1Co 14:2, 4.

No ti tao nga agsasao iti maysa a pagsasao saanna a kabaelan ti agipatarus, saanna ngarud a matarusan ti sasawenna ket saan met a matarusan dayta ti sabsabali a saan a makaammo iti dayta a pagsasao. Gapuna, imparegta ni Pablo a dagidiay addaan iti sagut kadagiti pagsasao agkararagda koma tapno maipatarusda met dagita, iti kasta mapatibker dagiti amin nga agim-imdeng. Manipud iti nadakamaten, nalaka a matarusan no apay a ti napaltiingan a ni Pablo ibilangna ti panagsao kadagiti pagsasao kas nababbaba a sagut ken no apay kunaenna nga iti kongregasion nasaysayaat nga agsao iti lima a sao iti ammona a pagsasao ngem iti 10,000 a sao babaen ti sabali a pagsasao.​—1Co 14:11, 13-19.

“Panangipaulog kadagiti pagsasao.” Ti sagut ti panangipaulog kadagiti pagsasao ket maiparangarang iti abilidad a mangipatarus iti maysa a pagsasao a saan nga ammo daydiay addaan iti daytoy a sagut. (1Co 12:10) Daytoy a sagut ket pudno a katulongan ti sagut ti panagsao kadagiti pagsasao, yantangay mapabileg ti intero a kongregasion iti pannakangngegda iti panagipatarus.​—1Co 14:5.

Dadduma Pay a Panagtignay ti Espiritu. Kunaen ni Pablo idi dakdakamatenna ti sumagmamano kadagiti panagtignay ti espiritu mainaig iti panagsasaganad ti annongen ti tunggal kameng ti bagi ni Kristo: “Ti Dios insaadna ti tunggal maysa kadagitoy iti kongregasion, umuna, dagiti apostol; maikadua, dagiti mammadto; maikatlo, dagiti mannursuro; sumaganad dagiti mannakabalin nga aramid; sumaganad sagsagut kadagiti panangpaimbag; dagiti makatulong a panagserbi, dagiti pannakabael a mangiwanwan, dagiti nadumaduma a pagsasao.” (1Co 12:27, 28) “Dagiti makatulong a panagserbi” mabalin a ramanenda dagiti naaramid nga urnos iti panangtulong kadagiti kakabsat a marigrigat iti material, kas iti panagiwaras iti taraon kadagiti marigrigat a balo a babbai, a dayta ti makagapu a nadutokan ti pito a lallaki a “napno iti espiritu ken sirib” iti kongregasion ti Jerusalem. (Ara 6:1-6) Kasapulan idi “dagiti pannakabael a mangiwanwan” tapno matarawidwidan ti annongen iti panagaramid iti ad-adalan nga imbalabala ni Jesus. (Mt 28:19, 20) Kasapulan ti nasigo a panangiwanwan iti trabaho a panagmisionero, kasta met iti panangipasdek kadagiti baro a kongregasion ken iti panangidalan iti ar-aramid dagitoy a kongregasion. Maipapan iti daytoy, mainaig iti paset ni Pablo iti trabaho a panagbangon ti Dios, tukoyenna ti bagina kas “masirib a manangiturong kadagiti trabaho.”​—1Co 3:10.

Panangkontrol Kadagiti Sagut ti Espiritu. Agparang a kadagidiay addaan kadagiti sagut ti espiritu, maaramatda laeng dagita no agtignay kadakuada ti espiritu ni Jehova tapno mausarda ti sagut. Kas pagarigan, idiay Cesarea, nupay nagyan ni Pablo iti pagtaengan ni Felipe nga “addaan uppat nga annak a babbai, birhen, a nagipadpadto,” saan a ti maysa kadagitoy nga annak ti nangipadto iti pannakaaresto ni Pablo no di ket impadto dayta ni Agabo a maysa a mammadto a naggapu idiay Judea. (Ara 21:8-11) Iti maysa a gimong ti kongregasion, ti maysa a mammadto mabalin nga umawat iti paltiing bayat nga agsasao ti sabali pay a mammadto; ngem dagidiay addaan kadagiti sagut ti espiritu makontrolda dagitoy no agsaad kadakuada ti espiritu ti Dios, kayatna a sawen, kabaelanda a lapdan ti bagida nga agsao agingga a maipaayanda iti gundaway. Gapuna, ti panagipadto, panagsao kadagiti pagsasao, ken panagipatarus ket mabalin a maaramid iti kongregasion iti naurnos a pamay-an, agpaay a pakapabilgan ti amin.​—1Co 14:26-33.