Kinatured a Pinabileg ti Ayat

“Ti Dios inikkannatayo saan a ti espiritu ti kinatakrot, no di ket ti pannakabalin ken ti ayat ken ti kinasimbeng ti panunot.”​—2 TIMOTEO 1:7.

1, 2. (a) Ti ayat matignayna ti tao a mangaramid iti ania? (b) Apay a naisangsangayan ti kinatured ni Jesus?

ADDA kakaskasar a bimmatok iti baybay iti asideg ti maysa nga ili iti makindaya a kosta ti Australia. Idi rumkuasda koman, maysa a dakkel a pating ti dimmarup iti babai. Tapno ti lalaki mayalikakana ni baketna, induronna daytoy ket isu ti dinarup ti pating. “Insakripisiona ti biagna gapu kaniak,” kinuna ti nabalo a babai iti pumpon ni lakayna.

² Wen, ti ayat matignayna ti tao a mangipakita iti naisangsangayan a kinatured. Ni Jesu-Kristo a mismo kinunana: “Awan asinoman nga addaan dakdakkel nga ayat ngem iti daytoy, a ti maysa isukona ti kararuana maigapu kadagiti gagayyemna.” (Juan 15:13) Awan pay 24 nga oras kalpasan nga insawang dayta ni Jesus, insakripisiona ti biagna, saan nga agpaay iti maysa laeng a tao no di ket agpaay iti sangatauan. (Mateo 20:28) Saan nga apagkanito laeng a kinatured ti panangidaton ni Jesus iti biagna. Ammonan a nasaksakbay nga isu ket maumsi ken mamaltrato, di nainkalintegan a masentensiaan, ken mapapatay iti kayo a pagtutuokan. Impakpakaunana pay ketdi kadagiti adalanna a kasta ti mapasaranna, idi a kinunana: “Adtoy, sumangsang-attayon idiay Jerusalem, ket ti Anak ti tao mayawatto iti panguluen a papadi ken kadagiti eskriba, ket kondenarendanto a matay ket iyawatdanto kadagiti tattao iti nasnasion, ket pagang-angawandanto ken tupraandanto ken saplitenda ken papatayenda.”​—Marcos 10:33, 34.

 3. Kasano a naaddaan ni Jesus iti naisangsangayan a kinatured?

³ Kasano a naaddaan ni Jesus ti naisangsangayan a kinatured? Dakkel ti naaramidan ti pammati ken nadiosan a panagbuteng. (Hebreo 5:7; 12:2) Ngem ti kangrunaan a makagapu no apay a natured ni Jesus isu ti panagayatna iti Dios ken kadagiti tattao. (1 Juan 3:16) No patanorentayo ti kasta nga ayat agraman ti pammati ken nadiosan a panagbuteng, maiparangarangtayo met ti kinatured nga impakita ni Kristo. (Efeso 5:2) Kasanotayo a mapatanor ti kasta nga ayat? Masapul a bigbigentayo no asino ti Gubuayanna.

“Ti Ayat Naggapu iti Dios”

 4. Apay a nakuna a ni Jehova ti Gubuayan ti ayat?

⁴ Ni Jehova ti personipikasion ken Gubuayan ti ayat. “Dungdungnguen,” insurat ni apostol Juan, “itultuloytayo koma nga ayaten ti maysa ken maysa, agsipud ta ti ayat naggapu iti Dios, ket tunggal maysa nga agayat nayanak manipud iti Dios ket magun-odanna ti pannakaammo iti Dios. Ti saan nga agayat saanna a naam-ammo ti Dios, agsipud ta ti Dios ket ayat.” (1 Juan 4:7, 8) No kasta, mapatanor ti tao ti nadiosan nga ayat no isu ket umadani ken ni Jehova babaen ti umiso a pannakaammo ken agtignay maitunos iti dayta a pannakaammo buyogen ti naimpusuan a panagtulnog.​—Filipos 1:9; Santiago 4:8; 1 Juan 5:3.

5, 6. Ania ti timmulong kadagiti nagkauna a pasurot ni Jesus tapno mapatanorda ti Nakristianuan nga ayat?

⁵ Iti maudi a pannakipagkararagna kadagiti 11 a matalek nga apostolna, impakita ni Jesus no kasano nga agkanaig ti panangammo iti Dios ken ti panangparayray iti ayat, idi a kinunana: “Impakaammok kadakuada ti naganmo ket ipakaammokto dayta, tapno ti ayat a pinangayatmo kaniak maadda koma kadakuada ken siak a maikaykaysa kadakuada.” (Juan 17:26) Tinulongan ni Jesus dagiti adalanna no kasano a mapatanorda ti ayat nga agtigtignay iti nagbaetanda ken ni Amana. Babaen ti sao ken aramidna, impalgak ni Jesus no ania ti kaipapanan ti nagan ti Dios​—nainaig dayta kadagiti agkakaimbag a galad ti Dios. Gapuna, naikuna ni Jesus: “Ti nakakita kaniak nakitana met ti Ama.”​—Juan 14:9, 10; 17:8.

⁶ Ti Nakristianuan nga ayat ket bunga ti nasantuan nga espiritu ti Dios. (Galacia 5:22) Idi Pentecostes 33 K.P., immapay kadagiti nagkauna a Kristiano ti naikari a nasantuan nga espiritu. Kas resultana, saanda laeng a nalagip ti adu nga insuro ni Jesus no di ket ad-adda pay a naawatanda ti kaipapanan ti Kasuratan. Gapu iti dayta a naparayray a pannakaawatda, awan duadua a napabileg ti panagayatda iti Dios. (Juan 14:26; 15:26) Ania ti resultana? Uray no nagpeggad ti biagda, situtured ken sireregta nga inkasabada ti naimbag a damag.​—Aramid 5:28, 29.

Kinatured ken Ayat a Nabuyogan iti Aramid

 7. Ania dagiti inibturan da Pablo ken Bernabe bayat ti panagmisioneroda?

⁷ Insurat ni apostol Pablo: “Ti Dios inikkannatayo saan a ti espiritu ti kinatakrot, no di ket ti pannakabalin ken ti ayat ken ti kinasimbeng ti panunot.” (2 Timoteo 1:7) Agsasao ni Pablo maibatay iti mismo a kapadasanna. Usigenyo ti napasaranda ken ni Bernabe kabayatan ti panagmisioneroda. Nangasabada a dua iti adu a siudad, a pakairamanan ti Antioquia, Iconio, ken Listra. Iti tunggal siudad, adda dagidiay nagbalin a manamati, adda met dagidiay bimmusor. (Aramid 13:2, 14, 45, 50; 14:1, 5) Idiay Listra, adda pay ketdi nakapungtot a bunggoy a nangubor ken ni Pablo, agingga nga impagarupda a natayen! “Nupay kasta, idi linikmut dagiti adalan, timmakder ket simrek iti siudad. Ket iti sumaganad nga aldaw pimmanaw a kaduana ni Bernabe a nagturong idiay Derbe.”​—Aramid 14:6, 19, 20.

 8. Apay a ti kinatured da Pablo ken Bernabe ket pammaneknek a nasged ti panagayatda kadagiti sabsabali?

⁸ Nagsardeng kadi a nangasaba da Pablo ken Bernabe gapu iti dayta a pananggandat iti biag ni Pablo? Saan! Imbes ketdi, kalpasan ti “panangaramidda iti adu nga adalan” idiay Derbe, “nagsublida idiay Listra ken idiay Iconio ken idiay Antioquia.” Apay? Tapno paregtaenda nga agtalinaed a natibker dagiti kabbaro a manamati. “Masapul a sumrektayo iti pagarian ti Dios babaen iti adu a rigat,” kinuna da Pablo ken Bernabe. Nalawag, ti kinaturedda ket maigapu iti nasged a panagayatda kadagiti ‘babassit a karnero’ ni Kristo. (Aramid 14:21-23; Juan 21:15-17) Kalpasan a nangdutokda kadagiti papanglakayen iti tunggal kabbaro a kongregasion, nangidatonda iti kararag ket “intalekda ida ken Jehova a kenkuana nagbalinda a manamati.”

 9. Kasano a sinubadan dagiti papanglakayen idiay Efeso ti panagayat kadakuada ni Pablo?

⁹ Naayat ken natured ni Pablo isu nga adu a nagkauna a Kristiano ti kasta unay a nangipateg kenkuana. Lagipenyo ti napasamak idi nakisarita ni Pablo kadagiti panglakayen manipud Efeso, a nangbusbosanna iti tallo a tawen ken nakapasaranna iti nakaro nga ibubusor. (Aramid 20:17-31) Kalpasan a pinaregtana ida nga ipastoranda ti arban ti Dios a naitalek kadakuada, sipaparintumeng a nakipagkararag kadakuada ni Pablo. Idi kuan, “adu a panagsangit ti napasamak kadakuada amin, ket inapungolda ti tengnged ni Pablo ket sidudungngo nga inagkanda, agsipud ta nasaktanda a nangnangruna iti sao nga insawangna a saandanton a makita ti rupana.” Anian a panagayat dagidi a kakabsat ken ni Pablo! Nagrigat la ketdi para kadakuada ti makipinnakada kada Pablo ken kadagiti kakaduana nga agdaldaliasat, a dida kayat a palubosan ida no mabalbalin.​—Aramid 20:36–21:1.

10. Kasano a dagiti Saksi ni Jehova iti kaaldawantayo situtured nga impakitada ti ayatda iti maysa ken maysa?

¹⁰ Iti kaaldawantayo, maipatpateg unay dagiti agdaldaliasat a manangaywan, papanglakayen iti kongregasion, ken adu pay a kakabsat gapu iti kinatured nga ipakpakitada maipaay kadagiti karnero ni Jehova. Kas pagarigan, kadagiti pagilian a dinadael ti guerra sibil wenno maiparit ti panangasaba, dagiti agdaldaliasat a manangaywan ken dagiti assawada inrisgoda ti biag ken wayawayada tapno masarungkaranda dagiti kongregasion. Umasping iti dayta, adu a Saksi ti nagsagaba kadagiti naulpit nga agtuturay ken kadagiti pasurotda gapu ta dida kayat a liputan dagiti padada a Saksi wenno ipalgak no sadino ti pangal-alaanda iti naespirituan a taraonda. Rinibu met ti naidadanes, naparigat, ken napapatay pay ketdi gapu ta dida kayat nga isardeng ti panangikasabada iti naimbag a damag wenno ti pannakitimpuyogda kadagiti kapammatianda kadagiti Nakristianuan a gimong. (Aramid 5:28, 29; Hebreo 10:24, 25) Tuladentayo koma ti pammati ken ayat dagitoy a natured a kakabsat!​—1 Tesalonica 1:6.

Diyo Ipalubos a Lumamiis ti Ayatyo

11. Kasano a makidangdangadang ni Satanas kadagiti adipen ni Jehova iti naespirituan a wagas, ket ania ti masapul nga aramidenda?

¹¹ Sipud idi naitapuak ni Satanas ditoy daga, determinado a pinagpapasanna dagiti adipen ni Jehova gapu ta ‘tungtungpalenda dagiti bilin ti Dios ken saksaksianda ni Jesus.’ (Apocalipsis 12:9, 17) Ti maysa kadagiti taktikana isu ti panangidadanes. Ngem masansan nga agballatek dayta nga estratehiana gapu ta ad-adda a pasingedenna dagiti adipen ti Dios iti singgalut ti Nakristianuan nga ayat ken tignayenna ti adu nga agbalin a naregregta iti panagserbi. Ti sabali pay a taktika ni Satanas isu ti pananggargarina iti pagannayasan ti tao nga agbasol. Tapno madaerantayo dayta a taktikana, kasapulantayo ti sabali a kita ti kinatured gapu ta ti mismo a bagitayo ti pakidangadangantayo, a pakairamanan dagiti dakes a tarigagay nga adda iti ‘nagulib ken desperado’ a pusotayo.​—Jeremias 17:9, Santiago 1:14, 15.

12. Kasano nga us-usaren ni Satanas “ti espiritu ti lubong” tapno pabaawenna ti panagayattayo iti Dios?

¹² Ti sabali pay a nabileg nga armas ni Satanas isu “ti espiritu ti lubong,” ti agraraira a pagannayasan wenno impluensiana a direkta a maibusor iti nasantuan nga espiritu ti Dios. (1 Corinto 2:12) Ti espiritu ti lubong itantandudona ti kinaagum ken materialismo​—“ti derrep dagiti mata.” (1 Juan 2:16; 1 Timoteo 6:9, 10) Nupay saan met a dakes dagiti mismo a material a banag wenno kuarta, mabalin latta nga agballigi ni Satanas no iyun-unatayo ti panagayattayo kadagita ngem iti panagayattayo iti Dios. Adda bileg wenno “autoridad” ti espiritu ti lubong gapu ta makakayaw daytoy iti managbasol a lasag, nasikap, awan sardayna, ken nasaknap a kas iti angin. Diyo koma ipalubos a maimpluensiaan ti pusoyo iti espiritu ti lubong!​—Efeso 2:2, 3; Proverbio 4:23.

13. Kasano a mabalin a masubok ti turedtayo nga agtalinaed a nadalus iti moral?

¹³ Ngem tapno madaeran ken maliklikantayo ti dakes nga espiritu ti lubong, masapul a naturedtayo nga agtalinaed a nadalus iti moral. Kas pagarigan, masapul a naturedka tapno mapanawam ti maysa a pagsinean wenno maiddepmo ti kompiuter wenno telebision no agparang dagiti naalas a buya. Masapul a naturedka tapno mapagkedkedam ti panangpilit dagiti kapatadam ken maisardengmon ti makitimpuyog kadagiti dakes a kakadua. Malaksid iti dayta, masapul a naturedka tapno maitandudom dagiti linteg ken prinsipio ti Dios iti laksid ti panangumsi dagiti kaeskuela, katrabahuan, kaarruba, wenno kakabagiam.​—1 Corinto 15:33; 1 Juan 5:19.

14. Ania ti rumbeng nga aramidentayo no naimpluensiaannatayo ti espiritu ti lubong?

¹⁴ Anian a nagpateg ngarud a pabilgentayo ti panagayattayo iti Dios ken kadagiti kapammatiantayo! Sukimatenyo a naimbag dagiti kalatyo ken ti estilo ti panagbiagyo tapno makitayo no naimpluensiaannakayon ti espiritu ti lubong. No wen​—uray pay bassit laeng​—ikararagyo ken ni Jehova a maaddaankayo iti tured a mangiwaksi ken mangliklik iti dayta. Saan nga iyaleng-aleng ni Jehova dagiti kasta nga araraw. (Salmo 51:17) Maysa pay, nabilbileg nga amang ti espirituna ngem iti espiritu ti lubong.​—1 Juan 4:4.

Situtured a Panangdaer Kadagiti Personal a Pakasuotan

15, 16. Kasano a ti Nakristianuan nga ayat tulongannatayo a mangdaer kadagiti personal a pakasuotantayo? Mangted iti pagarigan.

¹⁵ Karaman kadagiti karit a nasken a sanguen dagiti adipen ni Jehova isu dagiti epekto ti kinaimperpekto ken panaglakay, a masansan nga agresulta iti sakit, kinabaldado, leddaang, ken adu a dadduma pay a parikut. (Roma 8:22) Makatulong ti Nakristianuan nga ayat tapno madaerantayo dagitoy a pakasuotan. Usigenyo ti kapadasan ni Namangolwa, a napadakkel iti maysa a Kristiano a pamilia idiay Zambia. Idi agtawen iti dua, nabaldado ni Namangolwa. “Mababainak,” kunana, “di la ket ta kaamak dagiti tattao ti langak. Ngem dagiti naespirituan a kakabsatko tinulongandak a maaddaan iti naiduma a panangmatmat kadagiti bambanag. Kas resultana, nadaerak ti bainko ket nabautisaranak idi agangay.”

¹⁶ Adda wheelchair ni Namangolwa ngem masansan nga agbakabaka no adda iti nadarat a dalan. Kaskasdi, makiramraman iti ministerio kas auxiliary pioneer iti di kumurang a dua a bulan iti kada tawen. Nakasangit ti maysa a bumalay idi nakasarita ni Namangolwa. Apay? Gapu ta natignay iti nakitana a pammati ken kinatured daytoy a kabsattayo. Kas pammaneknek iti nabaknang a bendision ni Jehova, nabautisaran ti lima kadagiti iyad-adalan ni Namangolwa iti Biblia, ket maysa itan ti agserserbi kas panglakayen iti kongregasion. “Masansan a nakaut-ut-ot dagiti luppok,” kunana, “ngem saan a dayta ti makalapped kaniak.” Daytoy a kabsat ket maysa laeng kadagiti adu a Saksi iti intero a lubong a nakapuy ti pammagida ngem nabileg ti espiritualidadda gapu ta ay-ayatenda ti Dios ken dagiti kaarrubada. Anian a makaay-ayo iti imatang ni Jehova ti kasta a tattao!​—Haggeo 2:7.

17, 18. Ania ti nakatulong kadagiti adu tapno maibturanda ti sakit ken dadduma pay a pakasuotan? Mangtedkayo kadagiti kapadasan iti lugaryo.

¹⁷ Saan laeng a makapaupay ti nakaro a sakit no di ket mamagleddaang pay. Kuna ti maysa a panglakayen iti kongregasion: “Iti grupo ti panagadal iti libro ti kongregasion a tabtabunuak, maysa a kabsat a babai ti agsagsagaba iti diabetes ken sakit iti bato, maysa ti addaan iti kanser, dua ti addaan iti nakaro a rayuma, ken maysa ti addaan iti lupus ken nakaro a sakit iti piskel ken susuop. No dadduma, makariknada iti pannakaupay. Nupay kasta, aglanganda laeng kadagiti gimong no masakitda unay wenno no maospitalda. Regularda amin iti tay-ak ti pangasabaan. Ipalagipda kaniak ni Pablo, a nagkuna: ‘Inton nakapuyak, iti kasta nabilegak.’ Apresiarek ti ayat ken kinaturedda. Nalabit a gapu iti kasasaad ti salun-atda, nalawlawag ti panangmatmatda iti biag ken no ania a talaga ti napateg.”​—2 Corinto 12:10.

¹⁸ No makidangdangadangkayo iti maysa nga an-annayen, sakit, wenno dadduma a parikut, ‘di agressat nga ikararagyo’ ti tulong tapno dinakay lapunosen ti pannakaupay. (1 Tesalonica 5:14, 17) Siempre, adda dagiti gundaway a dumteng ti rigat, ngem ikagumaanyo nga ipamaysa ti atensionyo kadagiti makapabileg ken naespirituan a bambanag, nangnangruna ti napateg a namnamatayo iti Pagarian. “Para kaniak, maysa nga agas ti panangasaba,” kinuna ti maysa a kabsat a babai. Nakatulong ti panangiranudna iti naimbag a damag tapno mataginayonna ti positibo a panangmatmatna.

Ti Ayat Tulonganna nga Agsubli ken ni Jehova ti Maysa a Nakabasol

19, 20. (a) Ania ti makatulong kadagidiay nakaaramid iti basol tapno maaddaanda iti tured nga agsubli ken ni Jehova? (b) Ania ti usigentayo iti sumaganad nga artikulo?

¹⁹ Marigatan nga agsubli ken ni Jehova ti adu a limmamiis iti naespirituan wenno nakaaramid iti basol. Ngem maparayrayda ti kasapulanda a tured no la ket ta pudno nga agbabawida ken pabaraenda manen ti ayatda iti Dios. Usigenyo ni Marioa a taga-Estados Unidos. Pinanawan ni Mario ti kongregasion Kristiano, nagbalin nga alkoholiko ken adikto iti droga, ket kalpasan ti 20 a tawen, naibalud. “Nangrugi nga inutobko ti masakbayak ken binasak manen ti Biblia,” kuna ni Mario. “Idi agangay, nasursurok nga apresiaren dagiti galad ni Jehova, nangnangruna ti asina, a masansan nga ikarkararagko. Idi nawayawayaanakon manipud pagbaludan, liniklikakon dagiti sigud a kakaduak, timmabunoak kadagiti Nakristianuan a gimong, agingga a naisubliak iti kongregasion. Agpayso nga inapitko ti immulak, ngem uray kaskasano, addaanak itan iti nagsayaat a namnama. Agyamanak unay ken ni Jehova gapu iti kinamanangngaasi ken pammakawanna.”​—Salmo 103:9-13; 130:3, 4; Galacia 6:7, 8.

²⁰ Awan duadua a dagidiay adda iti kasasaad a kas ken Mario masapul a pagreggetanda ti agsubli ken ni Jehova. Ngem ti napabara manen nga ayatda​—a resulta ti panagadal iti Biblia, panagkararag, ken panagmennamenna​—ti mangted kadakuada iti kasapulanda a tured ken determinasion. Napabileg met ni Mario gapu iti namnama iti Pagarian. Wen, buyogen ti ayat, pammati, ken nadiosan a panagbuteng, ti namnama ket agserbi a nabileg nga impluensia a mangpasayaat iti biagtayo. Iti sumaganad nga artikulo, usigentayo a naimbag daytoy a nagpateg a naespirituan a sagut.

[Footnote]

Ania ti Sungbatyo?

• Kasano a ti ayat pinarayrayna ti naisangsangayan a kinatured ni Jesus?

• Kasano a ti panagayat kadagiti kakabsat pinarayrayna ti naisangsangayan a kinatured da Pablo ken Bernabe?

• Ania dagiti pamay-an ni Satanas a mangpabaaw iti ayat dagiti Kristiano?

• Gapu iti ayattayo ken ni Jehova, ania dagiti pakasuotan a situtured a maibturantayo?

[Ladawan iti panid 23]

Situtured a nakapagibtur ni Pablo gapu iti panagayatna kadagiti tattao

[Ladawan iti panid 24]

Kasapulan ti tured tapno maitandudo dagiti pagalagadan ti Dios

[Ladawan iti panid 24]

Namangolwa Sututu