Ti Panagungar—Sigurado a Namnama!

1-2. Ania ti nagsayaat a namnama dagiti agdaydayaw ken Jehova?

NAMNAMA—nakapatpateg dayta. Nakapokus ti namnama ti dadduma a tattao iti naballigi a panagasawa, panangpadakkel iti annak a nasalun-at, wenno iyiimbag iti nakaro a sakit. Kas Kristiano, mabalin a namnamaentayo met ti kasta a bambanag. Ngem adayo a nasaysayaat ngem kadagita ti namnama a tagtagiragsakentayo; ramanen dayta ti agnanayon a biag iti masanguanan ken ti panagungarto dagiti ipatpategtayo iti biag.

² Imbaga ni apostol Pablo: “Adda namnamak iti Dios . . . nga agungarto agpadpada dagiti nalinteg ken dagiti nakillo.” (Ara. 24:15) Saan a ni Pablo ti kaunaan a nangibaga iti namnama a panagungar. Ninamnama met dayta ti patriarka a ni Job, a nagtalek a lagipen ken pagungarento isuna ti Dios.—Job 14:7-10, 12-15.

 3. Apay a makatulong kadatayo ti 1 Corinto kapitulo 15?

³ “Ti panagungar dagiti natay” ket paset ti “pagdamdamuan a doktrina,” ti amin a Nakristianuan a sursuro. (Heb. 6:1, 2) Nairekord ti imbaga ni Pablo maipapan iti panagungar iti 1 Corinto kapitulo 15. Napabileg la ketdi dagiti Kristiano idi umuna a siglo iti dayta nga insuratna. Mapabilegnatayo met dayta a kapitulo ken mapatibkerna ti namnama a nabayagen a patpatientayo.

 4. Apay a sigurado ti namnamatayo nga agungarto dagiti ipatpategtayo?

⁴ Gapu iti panagungar ni Jesu-Kristo, sigurado ti namnamatayo nga agungarto dagiti ipatpategtayo. Paset dayta ti “naimbag a damag” nga impakaammo ni Pablo kadagiti taga-Corinto. (1 Cor. 15:1, 2) Kinaagpaysuanna, imbagana a no ti maysa a Kristiano ket saan a mamati iti panagungar ni Jesu-Kristo, awan serserbi ti pammatina. (1 Cor. 15:17) Ti pammatitayo a napagungar ni Jesus ti nakaibatayan ti namnamatayo kas Kristiano.

5-6. Ania ti kaipapanan kadatayo ti mabasa iti 1 Corinto 15:3, 4?

⁵ Idi rinugian ni Pablo nga isurat ti maipapan iti panagungar, adda dinakamatna a tallo a kinapudno: (1) “Natay ti Kristo para kadagiti basoltayo.” (2) “Naitabon.” (3) “Napagungar iti maikatlo nga aldaw sigun iti Kasuratan.”—Basaen ti 1 Corinto 15:3, 4.

⁶ Ania ti kaipapanan kadatayo ti ipapatay, pannakaitabon, ken panagungar ni Jesus? Impakpakauna ni propeta Isaias a ti Mesias ket ‘mapapatay iti daga dagiti sibibiag’ ken “maitabon iti nakaitaneman dagiti dakes.” Ngem saan la a dayta ti karaman. Innayon pay ni Isaias nga ibaklayto ti Mesias ti “basol ti adu a tattao.” Inaramid dayta ni Jesus idi impaayna ti subbot. (Isa. 53:8, 9, 12; Mat. 20:28; Roma 5:8) No kasta, gapu iti ipapatay, pannakaitabon, ken panagungar ni Jesus, sigurado ti namnamatayo a mawayawayaantayto iti basol ken ipapatay ken makaduatayto manen dagiti natayen nga ipatpategtayo.

7-8. Ania ti makatulong kadagiti Kristiano tapno mamatida a napagungar ni Jesus?

⁷ Ti namnamatayo iti panagungar ket konektado iti panagungar ni Jesus, isu a masapul a kombinsidotayo a napagungar ni Jesus. Apay a masiguradotayo a pinagungar isuna ni Jehova?

⁸ Adu ti nakakita ken Jesus kalpasan a napagungar. (1 Cor. 15:5-7) Ti umuna kadakuada a dinakamat ni Pablo ket ni apostol Pedro (Cefas). Imbaga met ti maysa a grupo dagiti adalan a nakita ni Pedro ti napagungaren a ni Jesus. (Luc. 24:33, 34) Kanayonanna, ti “Sangapulo ket Dua,” nga isu dagiti apostol, nakitada ni Jesus kalpasan a napagungar. Kalpasanna, “nagparang [ni Kristo] iti nasurok a 500 a kakabsat iti maysa a gundaway,” nalabit iti maysa a naragsak a panagtataripnong idiay Galilea a nadakamat iti Mateo 28:16-20. “Nagparang [pay] ken Santiago,” a kabsatna iti ina, a dati a saan a mamati kenkuana kas ti Mesias. (Juan 7:5) Nakombinsir ni Santiago kalpasan a nakitana ti napagungaren a ni Jesus. Makapainteres ta idi agarup 55 C.E. idi insurat ni Pablo daytoy a suratna, sibibiag pay ti adu a nakakita ken Jesus a napagungar. Isu nga asinoman nga agduadua idi ket mabalin nga agdamag kadagiti sibibiag pay ken mapagtalkan a nakakita.

 9. Kas mabasa iti Aramid 9:3-5, ania ti mangipakita nga ad-adu pay ti imbaga ni Pablo nga ebidensia maipapan iti panagungar ni Jesus?

⁹ Idi agangay, nagparang ni Jesus ken Pablo. (1 Cor. 15:8) Mapmapan idi ni Pablo (Saulo) idiay Damasco idi nakitana iti sirmata ti napagungaren a ni Jesus a nakisarita kenkuana. (Basaen ti Aramid 9:3-5.) Ti napasamak ken Pablo ket sabali pay nga ebidensia a saan a sarsarita ti panagungar ni Jesus.—Ara. 26:12-15.

10. Ania ti inaramid ni Pablo idi nakombinsir a napagungar ni Jesus?

¹⁰ Naginteres unay ti dadduma a nakangngeg iti imbaga ni Pablo ta dati nga indadanesna dagiti Kristiano. Kombinsido ni Pablo a napagungaren ni Jesus isu nga inaramidna ti amin a kabaelanna a kombinsiren ti dadduma iti daytoy a kinapudno. Inibturanna ti pannakakabkabil, pannakaibalud, ken pannakarba ti barko bayat nga inkasabana ti kinapudno a natay ni Jesus ngem napagungar. (1 Cor. 15:9-11; 2 Cor. 11:23-27) Sigurado unay ni Pablo a napagungar ni Jesus nga uray la situtulok a matay tapno maidepensana ti patpatienna. Saan kadi a dagita a pammaneknek ti mangkombinsir kenka a napagungar ni Jesus? Ken saan kadi a dagita ti ad-adda a mangpabileg iti pammatim iti panagungar?

11. Apay a mabalin a di umiso ti patpatien ti dadduma a Kristiano idiay Corinto maipapan iti panagungar?

¹¹ Di umiso ti patpatien ti dadduma a Kristiano iti siudad ti Corinto idiay Grecia maipapan iti panagungar. Ibagbagada pay ketdi a “saan nga agungar dagiti natay.” Apay? (1 Cor. 15:12) Dagiti pilosopo idiay Atenas, a sabali pay a siudad ti Grecia, inumsida ti impormasion a napagungar ni Jesus. Mabalin a naapektaran iti dayta ti dadduma idiay Corinto, uray ti kongregasion Kristiano. (Ara. 17:18, 31, 32) Mabalin nga impagarup ti dadduma a saan a literal ti panagungar, kayatna a sawen, ti maysa a tao ket ‘natay’ idi iti basol ngem ‘napagbiag’ kas Kristiano. Aniaman ti rasonda, ti saan a panamati iti panagungar kaipapananna nga awan serserbi ti pammatida. No saan a pinagungar ti Dios ni Jesus, awan ti subbot a naibayad ken agtalinaed ti amin a managbasol. Isu nga awan ti napaypayso a namnama dagidiay saan a mamati iti panagungar.—1 Cor. 15:13-19; Heb. 9:12, 14.

12. Maitunos iti 1 Pedro 3:18, 22, kasano a naiduma ti panagungar ni Jesus kadagiti immuna a napagungar?

¹² Ammo a mismo ni Pablo a “napagungar ni Kristo.” Adayo a nasaysayaat dayta a panagungar ngem kadagiti immuna a napagungar ta natayda met laeng idi agangay. Imbaga ni Pablo a ni Jesus “ti umuna a bungbunga kadagidiay naturogen ken patay.” Iti ania a pamay-an a ni Jesus ti umuna? Isu ti immuna a tao a napagungar kas espiritu nga immuli idiay langit.—1 Cor. 15:20; Ara. 26:23; basaen ti 1 Pedro 3:18, 22.

13. Ania ti imbaga ni Pablo a nakaidumaan ni Adan ken ni Jesus?

¹³ Kasano a ti ipapatay ti maysa a tao ket mangyeg iti biag iti minilion a tattao? Nangted ni Pablo iti lohikal a sungbat iti dayta a saludsod. Pinagdumana ti inyeg ni Adan iti sangatauan ken ti resulta ti daton ni Kristo. Insuratna maipapan ken Adan: “Adda ipapatay gapu iti maysa a tao.” Idi nagbasol ni Adan, nagresulta dayta iti ipapatayna ken dagiti kaputotanna. Agingga ita, marikriknatayo pay laeng dagiti nagdakes nga epekto dayta a panagsukirna. Ngem gapu ta pinagungar ti Dios ti Anakna, addaantayo iti nagsayaat a masanguanan! “Adda met panagungar dagiti natay gapu iti maysa a tao,” ni Jesus. “Ta no kasano a matmatay ti amin gapu ken Adan,” imbaga ni Pablo, “mapagbiagto met ti amin gapu iti Kristo.”—1 Cor. 15:21, 22.

14. Mapagungarto kadi ni Adan? Ilawlawag.

¹⁴ Ania ti kayat a sawen ni Pablo idi imbagana a “matmatay ti amin gapu ken Adan”? Tuktukoyen idi ni Pablo dagiti kaputotan ni Adan, a nakatawid iti basol ken kinaimperpekto ni Adan isu a matayda amin. (Roma 5:12) Saan a karaman ni Adan kadagidiay “mapagbiagto.” Saan a magunggonaan iti subbot ni Kristo, ta perpekto idi isuna ngem sipapakinakem a sinukirna ti Dios. Ti napasamak ken Adan ket mapasamakto met kadagidiay ukomen ti “Anak ti tao” kas “kalding,” kayatna a sawen, “madadaelto dagitoy iti agnanayon.”—Mat. 25:31-33, 46; Heb. 5:9.

15. Siasino ti karaman iti “amin” a “mapagbiagto”?

¹⁵ Paliiwentayo ta imbaga ni Pablo a “mapagbiagto met ti amin gapu iti Kristo.” (1 Cor. 15:22) Ti surat ni Pablo ket para kadagiti napulotan a Kristiano idiay Corinto, a mapagungarto nga agbiag idiay langit. Dagidiay a Kristiano ket “inlasin ti Dios kas adalan ni Kristo Jesus, [ken] naayaban nga agbalin a nasantuan.” Dinakamat pay ni Pablo “dagidiay naturog ken patay a naikaykaysa ken Kristo.” (1 Cor. 1:2; 15:18; 2 Cor. 5:17) Imbaga ni Pablo iti sabali pay a suratna a dagidiay ‘naikaykaysa ken Jesus kas iti ipapatayna’ ket ‘maikaykaysanto met kenkuana kas iti panagungarna.’ (Roma 6:3-5) Napagungar ni Jesus kas espiritu ken napan idiay langit. Daytanto met ti pagbanagan ti amin a “naikaykaysa ken Kristo,” kayatna a sawen, amin a Kristiano a napulotan iti espiritu.

16. Ania ti kayat a sawen ni Pablo idi dinakamatna ni Jesus kas “ti umuna a bungbunga”?

¹⁶ Insurat ni Pablo a ni Kristo ket napagungar kas “ti umuna a bungbunga kadagidiay naturogen ken patay.” Laglagipem a ti dadduma, kas ken Lazaro, ket napagungar met ditoy daga. Ngem ni Jesus ti kaunaan a napagungar kas espiritu nga immawat iti biag nga agnanayon. Isu ket mayarig iti umuna nga apit nga indaton dagiti Israelita iti Dios. Ken ti panangawag ni Pablo ken Jesus kas “ti umuna a bungbunga,” kayatna a sawen nga adda pay dadduma a mapagungar nga agbiag idiay langit. Dagiti apostol ken ti dadduma pay a “naikaykaysa ken Kristo” ti sumaruno ken Jesus. Iti naikeddeng a tiempo, agungardanto met a kas iti panagungar ni Jesus.

17. Kaano a magun-odan dagidiay “naikaykaysa ken Kristo” ti nailangitan a gunggonada?

¹⁷ Ti nailangitan a panagungar dagidiay “naikaykaysa ken Kristo” ket saan pay a nangrugi idi nagsurat ni Pablo kadagiti taga-Corinto. Imbes ketdi, tuktukoyen ni Pablo a mapasamak dayta iti masanguanan: “Kastoy ti panagsasaruno dagiti mapagungar: ti Kristo ti umuna a bungbunga, kalpasanna, dagidiay kukua ti Kristo bayat ti kaaddana.” (1 Cor. 15:23; 1 Tes. 4:15, 16) Ita, agbibiagtayon iti naipadto a “kaadda” ni Kristo. Dagiti natay nga apostol ken ti dadduma pay a Kristiano a napulotan iti espiritu ket masapul idi nga urayenda dayta a kaadda ni Kristo tapno maawatda ti nailangitan a gunggonada ken ‘maikaykaysadanto kenkuana kas iti panagungarna.’

18. (a) Apay a maibagatayo nga addanto pay sabali a panagungar kalpasan ti nailangitan a panagungar? (b) Sigun iti 1 Corinto 15:24-26, anianto dagiti mapasamak idiay langit?

¹⁸ Anianto ngarud ti mapasamak iti amin a matalek a Kristiano nga awan ti namnamada nga agbiag idiay langit a kadua ni Kristo? Adda met namnamada a mapagungar. Ibaga ti Biblia a ni Pablo ken ti dadduma a mapan idiay langit ket karaman kadagiti ‘mapagungar a nasapsapa.’ (Fil. 3:11) Saan kadi nga ipakita dayta nga addanto pay sumaruno a panagungar? Maitunos dayta iti imbaga ni Job maipapan iti masanguananna. (Job 14:15) “Dagidiay kukua ti Kristo bayat ti kaaddana” ket addan idiay langit a kadua ni Jesus inton pagpatinggaenna ti amin a gobierno ken amin nga autoridad ken pannakabalin. Mapukawton uray ti “maudi a kabusor, ni patay.” Saanton a pulos a matay dagidiay mapagungar nga agbiag idiay langit. Ngem ti ngay dadduma?—Basaen ti 1 Corinto 15:24-26.

19. Ania ti ekspektaren dagidiay addaan iti naindagaan a namnama?

¹⁹ Ania ti ekspektaren dagidiay addaan iti naindagaan a namnama? Namnamaenda daytoy nga imbaga ni Pablo: “Adda namnamak . . . nga agungarto agpadpada dagiti nalinteg ken dagiti nakillo.” (Ara. 24:15) Nalawag nga awan ti nakillo a tao a makapan idiay langit, isu nga ipakita dagita a sasao nga addanto panagungar ditoy daga.

20. Kasano a napabileg ti namnamam?

²⁰ Di pagduaduaan nga addanto ‘panagungar’! Mainanama dagidiay mapagungar ditoy daga nga agbiagdanto iti agnanayon. Makapagtalekka iti dayta a kari. Dayta a namnama ti mangliwliwa kenka no malagipmo dagiti natayen nga ipatpategmo. Mapagungardanto inton ni Kristo ken ti dadduma pay ‘agturayda iti 1,000 a tawen.’ (Apoc. 20:6) Makapagtalekka a no bilang matayka sakbay nga agturay ni Kristo iti 1,000 a tawen, siguradonto a mapagungarka. Daytoy a “namnama saannatayo a paayen.” (Roma 5:5) Mapabilegnaka dayta ita ken manayonanna pay ti rag-om nga agserserbi iti Dios. Ngem adda pay masursurotayo iti 1 Corinto kapitulo 15, kas ipakita ti sumaruno nga artikulo.