Nangorganisar ni Pablo iti Panagkontribusion Para Kadagiti Nasantuan

TI NAESPIRITUAN a pagimbagan ti kapatgan kadagiti pudno a Kristiano. Nupay kasta, napateg met kadakuada ti pannakaseknan iti pisikal a pagimbagan dagiti dadduma. Masansan a tumulongda kadagiti agpaspasar iti rigat. Ti nainkabsatan nga ayat tignayenna dagiti Kristiano a tumulong kadagiti kapammatian nga agkasapulan.​—Juan 13:34, 35.

Maigapu iti panagayat kadagiti naespirituan a kakabsatna, natignay ni apostol Pablo a mangorganisar iti panagur-or kadagiti kongregasion idiay Acaya, Galacia, Macedonia, ken iti distrito ti Asia. Apay a kasapulan daytoy? Kasano a naorganisar ti programa a panangsaranay? Ania ti tignay dagiti Kristiano? Ken apay a rumbeng a paginteresantayo ti napasamak?

Ti Kasasaad ti Kongregasion Idiay Jerusalem

Kalpasan ti Pentecostes 33 K.P., dagiti Judio ken proselita a nagbalin nga adalan idi Pentecostes ti nagtalinaed idiay Jerusalem iti sumagmamano a tiempo tapno agadal iti ad-adu pay maipapan iti pudno a pammati. Kadagiti gundaway a kasapulan, situtulok a timmulong dagiti pada a managdaydayaw iti panangasikaso kadagiti nagtalinaed sadiay. (Aramid 2:7-11, 41-44; 4:32-37) Ti sibil a riribuk ti mabalin a nagresulta iti kanayonan a panagkasapulan bayat a dagiti nasionalista a Judio rinubrobanda ti iyaalsa ken panagderraaw dagiti tattao. Ngem tapno awan ti agbisin a Kristiano, adda ti inaldaw a panagibunong iti taraon kadagiti agkasapulan a balo. (Aramid 6:1-6) Nakaro ti panangidadanes idi ni Herodes iti kongregasion, ket idi ngalay ti dekada 40 K.P., nadidigra ti Judea iti bisin. Dagitoy ti mabalin a nangipasango kadagiti pasurot ni Jesus iti inawagan ni Pablo a “panagsagaba,” “rigrigat,” ken “pannakasamsam dagiti sanikua.”​—Hebreo 10:32-34; Aramid 11:27–12:1.

Idi agarup 49 K.P., napeggad pay laeng ti kasasaad. Gapuna, kalpasan a napagnunumuanda nga ipamaysa pay laeng ni Pablo ti mangasaba kadagiti Gentil, indagadag kenkuana da Pedro, Santiago, ken Juan a ‘sipapanunot koma kadagiti napanglaw.’ Kasta ti inkagumaan ni Pablo nga inaramid.​—Galacia 2:7-10.

Panangorganisar iti Panagur-or

Indauluan ni Pablo ti panagur-or iti pondo para kadagiti napanglaw a Kristiano idiay Judea. Idi agarup 55 K.P., kinunana kadagiti taga Corinto: “Maipapan iti panagur-or a maipaay kadagiti sasanto, kas kadagiti imbilinko kadagiti kongregasion ti Galacia, aramidenyo met a mismo dayta a pamay-an. Tunggal umuna nga aldaw ti lawas tunggal maysa kadakayo iti bukodna a balay mangilasin koma a mangidulin iti aniaman a kas iti irarang-ayna . . . [Kalpasanna] siasinoman a lallaki nga anamonganyo babaen kadagiti surat, dagitoy ibaonkonto tapno ipanda ti naasi a sagutyo idiay Jerusalem.”(1 Corinto 16:1-3) Kalpasan ti makatawen, kinuna ni Pablo a nakitinnulong ti Macedonia ken Acaya. Idi naipan dagiti naur-or idiay Jerusalem, ti kaadda dagiti delegado manipud distrito ti Asia ipasimudaagna a nangted met iti kontribusion dagiti kongregasion iti dayta a rehion.​—Aramid 20:4; 2 Corinto 8:1-4; 9:1, 2.

Awan ti napilit a mangted iti nalablabes ngem iti kabaelanna. Imbes ketdi, panggepna laeng dayta a maadda ti panagpapada tapno aniaman ti masobra, dayta ti mangpunno kadagiti kasapulan dagiti nasantuan idiay Jerusalem ken Judea. (2 Corinto 8:13-15) Kinuna ni Pablo: “Tunggal maysa aramidenna koma kas iti inkeddengna iti pusona, saan nga iti dakes a nakem wenno iti sidong ti pannakapilit, ta ti Dios ayatenna ti naragsak a manangited.”​—2 Corinto 9:7.

Nangted ti apostol iti nasayaat a rason kadagiti taga Corinto no apay nga agbalinda koma a naparabur. Ni Jesus ‘pimmanglaw maigapu kadakuada, tapno bumaknangda’ iti naespirituan. (2 Corinto 8:9) Kayatda la ketdi a tuladen ti kinaparaburna. Kasta met, yantangay pabpabaknangen ti Dios ida “maipaay iti tunggal kita ti kinamanagparabur,” maitutop a tumulongda a mangipaay iti kasapulan dagiti nasantuan.​—2 Corinto 9:10-12.

Kababalin Dagiti Nakitinnulong

Makasursurotayo iti adu maipapan iti boluntario a panangted babaen ti panangusig iti kababalin dagiti nakitinnulong iti programa a panangsaranay kadagiti nasantuan idi umuna a siglo. Ti panagur-or saanna laeng nga impakita ti pannakaseknan kadagiti napanglaw a padada nga agdaydayaw ken ni Jehova. Ipamatmatna nga adda ti singgalut ti panagkakabsat kadagiti Kristiano a Judio ken Gentil. Ti panangipaay ken panangawat iti kontribusion ipasimudaagna ti panagkaykaysa ken kinasinged dagiti Gentil ken Judio. Agririnnanudda iti material ken iti naespirituan.​—Roma 15:26, 27.

Mabalin a di inawis ni Pablo a tumulong dagiti Kristiano a taga Macedonia idi damo gapu ta napanglawda met. Nupay kasta, ‘intultuloyda ti nagpakpakaasi iti pribilehio a panangted.’ Agasenyo, uray agpaspasarda iti “dakkel a subok iti sidong ti pannakaparigatda,” sirarag-o nga intedda ti “nalablabes ngem iti pudno a kabaelanda”! (2 Corinto 8:1-4) Agparang a ti dakkel a suotda iramanna dagiti pammabasol a mailabsing kano iti linteg dagiti taga Roma ti relihionda. Gapuna, nakaaawat no apay nga addaanda iti empatia para kadagiti kakabsatda idiay Judea nga agsagsagaba iti umasping a rigat.​—Aramid 16:20, 21; 17:5-9; 1 Tesalonica 2:14.

Nupay ti damo a kinaregta dagiti taga Corinto ti inusar nga ulidan ni Pablo tapno paregtaenna dagiti taga Macedonia, bimmaaw ti regta dagiti taga Corinto. Dayta ti gapuna a dinakamat ti apostol ti kinaparabur dagiti taga Macedonia tapno gutugotenna dagiti taga Corinto. Nakitana a masapul nga ipalagipna manen kadakuada a panawenen tapno iringpasda no ania ti rinugianda iti tawen sakbayna. Aniat’ napasamak?​—2 Corinto 8:10, 11; 9:1-5.

Inyussuat ni Tito ti panagur-or idiay Corinto, ngem agparang a napaay ti panagreggetna gapu kadagiti timmaud a parikut. Kalpasan a nakiuman ken ni Pablo idiay Macedonia, nagsubli ni Tito kadua ti dua pay a sabali tapno pabilgenda ti kongregasion idiay Corinto ken leppasenda ti panagur-or. Mabalin a pagarupen ti dadduma a padpadasen ni Pablo a gundawayan dagiti taga Corinto. Nalabit daytoy ti makagapu no apay nga imbaonna ti tallo a lallaki tapno leppasenda ti panagur-or ken nangted iti rekomendasion iti tunggal maysa kadakuada. Kinuna ni Pablo: “Likliklikanmi nga adda asinoman a tao a makasarak iti biddut kadakami mainaig iti daytoy naparabur a kontribusion nga aywananmi. Ta ‘mangaramidkami iti napudno a sagana, saan laeng nga iti imatang ni Jehova, no di ket kasta met iti imatang dagiti tattao.’”​—2 Corinto 8:6, 18-23; 12:18.

Panangitulod iti Kontribusion

Iti primavera ti 56 K.P., ti naidonar a kuarta nakasaganan a maipan idiay Jerusalem. Nakikuyog ni Pablo iti delegasion a pinili dagiti nagdonar. Kuna ti Aramid 20:4: “Isu kinuyog ni Sopatro nga anak ni Pirro a taga Berea, da Aristarco ken Segundo a taga Tesalonica, ken ni Gayo a taga Derbe, ken ni Timoteo, ket manipud iti [distrito ti] Asia isu da Tiquico ken Trofimo.” Nalawag a kaduada met sadiay ni Lucas, a mabalin a nangibagi kadagiti Kristiano idiay Filipos. Gapuna, adda ti di kumurang a siam a lallaki iti dayta a mision.

“Mabalin a dakkel ti nakolekta,” kuna ti eskolar a ni Dieter Georgi, “gapu ta kadagiti naudi a panagur-or, a nakairamanan da Pablo ken ti adu unay a delegado, uray la nagpeggadda ken nagastosanda.” Nagserbi ti delegasion saan laeng a tapno siguruen ti kinatalged no di ket tapno idepensada ni Pablo iti aniaman a pammabasol a panagsuitik. Dagiti naibaon inrepresentarda dagiti Gentil a kongregasion iti sango dagiti nasantuan idiay Jerusalem.

Gapu ta naglayagda manipud Corinto nga agturong idiay Syria, mabalin koma a nakasangpet ti delegasion idiay Jerusalem kabayatan ti Paskua. Nupay kasta, nabaliwan ti plano gapu iti nadamagda a pananggandat iti biag ni Pablo. (Aramid 20:3) Nalabit panggep dagiti kabusorna a papatayenda idiay baybay.

Adda pay sabali a pakaseknan ni Pablo. Sakbay a nagdaliasat, nagsurat kadagiti Kristiano idiay Roma tapno ikararagda a ‘maispal koma manipud kadagiti di manamati idiay Judea ken tapno ti ministeriona nga agpaay iti Jerusalem mapaneknekan koma a makaay-ayo kadagiti sasanto.’ (Roma 15:30, 31) Nupay awan duadua a dagiti nasantuan awatenda dagiti kontribusion buyogen ti napasnek a panagyaman, mabalin a maseknan idi ni Pablo maipapan iti isasangbayna a mabalin a mamataud iti riribuk iti kaaduan a Judio.

Sigurado a silalagip ti apostol kadagiti napanglaw. Nupay saan a dinakamat ti Kasuratan no kaano a naipaima ti kontribusion, dayta a panangitulod intandudona ti panagkaykaysa ken ginutugotna dagiti Kristiano a Gentil tapno ipakitada ti panagyaman kadagiti Judio a kapammatianda gapu iti naespirituan a kinabaknang a naawatda manipud kadakuada. Saan a nagbayag kalpasan ti isusublina iti Jerusalem, namataud iti gulo ti panagparang ni Pablo idiay templo a nagresulta iti pannakaarestona. Ngem daytoy kamaudiananna ti nangipaay kenkuana iti gundaway a mangasaba kadagiti gobernador ken ar-ari.​—Aramid 9:15; 21:17-36; 23:11; 24:1–26:32.

Dagiti Kontribusiontayo Ita

Sipud idi umuna a siglo, adun ti nagbalbaliw​—ngem saan a kasta kadagiti napapateg a prinsipio. Siuumiso a mapakaammuan dagiti Kristiano maipapan kadagiti pinansial a kasapulan. Aniaman a kontribusion nga ipaayda para kadagiti agkasapulan, rumbeng a boluntario daytoy, a tinignay ti ayat iti Dios ken kadagiti pada a tattao.​—Marcos 12:28-31.

Dagiti panangtulong kadagiti nasantuan idi umuna a siglo ipakitana a masapul nga organisado ken pudno a mapagpiaran ti panagkolekta kadagiti kontribusion. Siempre, ammo ni Jehova a Dios no ania dagiti kasapulan, ken mangipaay iti probision kadagiti ad-adipenna tapno maitultuloyda a maikasaba ti naimbag a damag ti Pagarian kadagiti dadduma iti laksid dagiti pakarigatan. (Mateo 6:25-34) Kaskasdi, mabalinantayo amin ti makipaset, aniaman ti kasasaad ti panagbiagtayo. Iti kasta a pamay-an, ‘ti tao nga aduan saan nga addaan iti adu unay, ket ti tao a bassitan saan nga addaan iti bassit unay.’​—2 Corinto 8:15.