Agimtuod Dagiti Agtutubo . . .

Agtultuloyto Ngata a Gayyemko ti Dios?

NI Ari David ket maysa a tao a nangtagiragsak iti pannakigayyem ti Dios. Ngem nakunana naminsan: “Dagiti dandanag toy pusok dimmadakkelda.” Agsagsagaba idi ni David saan laeng a gapu iti di umiso a panangtrato dagiti sabsabali no di pay ket kadagiti mismo a biddutna. Nangrugin a nariknana nga inlaksid payen ti Dios, ket inyararawna: “Taliawennak, ken kaasiannak, ta matalimpungawak ken madukotanak.”​—⁠Salmo 25:​11, 16-​19.

Nalabit madandanaganka met. Nalabit dakes ti kasasaadmo idiay pagtaengan wenno idiay eskuelaan a kas kettay dimon magebgeban. Sa adu pay ti ag-agalem wenno maup-upaykan gapu iti lablabanam a pagkapuyan. Aniaman ti kasasaad, di rumbeng a bukbukodam ta problemam; sipaparabur nga ituktukon ti Dios ti pannakigayyem ken panangandingayna.⁠a No nakirelasionkan kenkuana, maliwliwakanto a makaammo a dina baybay-an dagiti gagayyemna no addada iti rigat. Nupay kasta, no mariribukanka, mariknam a kaslattay nakaad-adayo ti Dios kenka. Kalattay pulos a dinaka tultulongan. Ngem talaga kadi a kasta?

“Siit iti Lasag”

Umuna iti amin, pangngaasim man ta basaem ti 2 Corinto 12:​7-​10. Ibagbaga ni apostol Pablo sadiay no kasano a nagsagaba iti maawagan “siit iti lasag.” Mabalin a ti “siit” ket maysa a kita ti an-annayen ti bagi, a nalabit nakairamanan ti panagkitana. Aniaman dayta, daytat’ kanayon idi a “mangtungpa” kenkuana nga isut’ pakaup-upayanna. Agpapan pay iti namitlon a napasnek a panangyararawna iti Dios nga ikkatenna dayta, ti “siit” nagtalinaed.

Saan kadi nga inkankano ni Jehova dagiti kararag ni Pablo? Saan man! Kinuna ti Dios kenkuana: “Umdasen kenka ti di kaikarian a kinamanangaasik; ta ti pannakabalinko mapagbalin a naan-anay iti kinakapuy.” Nupay di inikkat ni Jehova dayta a “siit,” saanna a binaybay-an ni Pablo. Babaen ti di kaikarian a kinamanangngaasi ti Dios, tinagiragsak ni Pablo ti nasinged a pannakigayyem kenkuana. Daydit’ “umdasen” tapno madaeran ni Pablo ti an-annayenna. Bayat nga inkarigatan ni Pablo nga aramiden ti kasta, nagun-odanna met ti mangtaginayon a bileg iti baro ken personal a wagas.

Tulong a Mangdaer Kadagiti Pakarigatan

Kas ken Pablo, mabalin nga addaanka met iti “siit,” wenno parikut, a mangap-apektar kenka, a mangpukpukaw iti namnamam ken mangup-upay kenka. Kas iti kasasaad ni Pablo, mabalin nga ipalubos ti Dios nga agtalinaed ti rigat. Dina kaipapanan nga isut’ saanmon a Gayyem. Kinuna ti Dios ken ni apostol Pablo: “Ti pannakabalinko mapagbalin a naan-anay iti kinakapuy.” No agpannurayka iti pannakabalin ti Dios a saan ket a bukbukodmo, makapagibturka. Mariknamto pay a babaen iti tulong ti espiritu ti Dios, maaramidam dagiti bambanag a pulos a dimo impagarup a maaramidam. Kinuna ni Pablo: “Pagragsakak dagiti kinakapuy . . . Ta inton nakapuyak, iti kasta nabilegak.”

Napaneknekan ti maysa nga agtutubo a babai nga agnagan Robin⁠b a pudno daytoy. Idi 14 ti tawenna, din makakita gapu iti glaucoma. Kadaydi met laeng a tawen, kellaat a natay ni nanangna. “Ni Jehova laengen ti adda kaniak,” kuna ni Robin bayat a dadaeranna dagitoy a nasakit a “siit.” “Ammok a tapno madaerak dayta, masapul nga agtalinaedak a nasinged kenkuana.” Kasta nga agpayso ti inaramid ni Robin, nga idi agangay ket nakapagserbi kas amin-tiempo a managebanghelio. Kunana: “Kiniddawko ken ni Jehova a tulongannak iti amin. Talaga a kastat’ inaramidna.”

Natakuatan ti adu nga agtutubo a ti panaglak-am kadagiti pakasuotan ti aktual a tumulong kadakuada nga agbalin a nasingsinged iti Dios. Usigem ti agtutubo a ni Jeff. Binaybay-an ni tatangna ti pamiliana, a pinanawanna ti nanang ni Jeff a mangaywan iti pito nga annak. “Nariknak unay ti kinaawan ti maysa nga ama,” aminen ni Jeff nga agtawen la idi iti 12. “Il-iliwek nga adda koma mangpunno iti kurang a nariknak iti kada aldaw.” Aniat’ inaramid ni Jeff? “Nagkararagak ken ni Jehova tapno tulongannak a mangpunno iti kasta a kasapulan.” Nagtignay ni Jeff a maitunos kadagiti kararagna ket nagbalin nga okupado kadagiti naespirituan nga aramid. Idi agangay, nariknana nga an-andingayen ni Jehova​—⁠nga impaayna ti mamabileg a nasantuan nga espirituna ken ti kongregasion Kristiano. (Idiligmo ti Salmo 27:10.) Ita iti edad a 27 malagip ni Jeff: “Awan sabalin a pakariknaak iti kinatalged, isu a nakasingsingedak ken ni Jehova.” Awaganna dayta a nasinged a relasion kas “nagsudi a bendision nga imbunga daytoy a pannubok.”

No Kasano a Gun-oden ti Tulong ti Dios

Tulongannakanto met ti nailangitan a Gayyemmo kadagiti pakarigatam. Ngem aniat’ rumbeng nga aramidem? Bueno, tapno agtalinaed ti aniaman a pannakigayyem, masapul nga adda komunikasion. Ti panagkararag ti pamay-an a mabalintay ti makikomunikar iti Dios. Babaen iti dayta, maipakaammotay kenkuana a kasapulantayo ti tulongna. Ngem bassit laeng ti pateg ti kararag no daytat’ saan a napasnek, wenno mekanikal. Kas kadagiti agtutubo a nadakamat, masapul nga ‘ibukbokmo ti pusom’ iti Dios! (Salmo 62:⁠8) Mabalin a kasapulan nga iyararawmo pay. (Filipos 4:⁠6) Dagiti araraw ket karkararag a napinget ken napasnek unay.

Ipapantayon a problemam a kontrolen ti panunotmo wenno marigatanka a mangparmek iti dakes a kababalin. Iyararawmo ken ni Jehova! Iyarungaingmo ti tulongna kabayatan ti tiempo ti pannakasulisog. Mabalin nga adda rigrigatna. “No mariknak a maguyugoyak unay nga agaramid iti dakes, agkararagak,” inamin ni Gary. “No dadduma panunotek, ‘Kasano a makaadaniak ken ni Jehova?’ Kaskasdi nga ipakpakaasik a tulongannak. Ipapaayannak iti bileg a kasapulak tapno makapagtultuloyak.” Nupay narigat iti damo, kanayon a lukatam ti pusom iti Dios.

Ngem kasanon no kasla di masungsungbatan dagiti kararagmo? Ni Lora, kas pagarigan, ti mangikagkagumaan a mangparmek iti dakes nga aramid a masturbasion. “Ipudnok ken ni Jehova ti parikut,” ilawlawagna, “ngem basta diak maisardeng.” No dadduma mabalin a palubosannatayo ni Jehova a mangipakita no kasano ti kapudnotayo kadagiti kiddawtayo. (Idiligmo ti Salmo 88:​13, 14.) Masapul ngarud nga agtultuloytayo nga agkararag! (Mateo 7:7; Roma 12:12) Kasta nga agpayso ti inaramid ni Lora. Maigiddato, rinugianna nga iyaplikar dagiti singasing a nagparang iti material kadagiti tema dagiti publikasion ti Watch Tower Society.⁠c Idi agangay, nakitanan dagiti resulta. Malagipna: “Kada mapagballigiak ti sulisog, agyamanak ken ni Jehova agsipud ta ammok a sarsaranayennak.” Pudno, mabalin a mapaayka no dadduma bayat nga ikagkagumaam a parmeken ti parikutmo. Ngem la ketdi no labanam ken dimo igagara ti tumulok kadagiti pagkapuyam, maay-ayonto ti Dios kadagiti “napasnek a panagregget[mo]” ken agtalinaedto kas Gayyemmo.​—⁠2 Pedro 1:⁠5.

Pannakipagtrabaho iti Dios

Ti sabali pay a pamay-an a magundawayam ti tulong ti Dios ket awaten ti imbitasionna nga agbalin a maysa kadagiti “katrabahuan[na].” (1 Corinto 3:⁠9) Karaman daytoy ti pannakipaset a tumulong iti sabsabali a mangammo maipapan iti Dios. (Mateo 28:​19, 20) No mariribukan wenno maupayka, kasla saan a makaallukoy ti pannakipaset iti aniaman a kita ti trabaho. Nupay kasta, talaga a makatulong kenka no ‘aduanka iti aramiden iti trabaho ti Apo.’ (1 Corinto 15:58) Uray kaskasano, saanmonton a sangkapanunot dagiti bukodmo a parikut. (Idiligmo ti Proverbio 18:⁠1.) Ni Robin, a naadaw itay, kunana maipapan kadagiti napasaranna a rigat: “Ti trabahok para ken ni Jehova ti nakatulong kaniak nga agtultuloy!”

Ti pannakipagtrabahom iti Dios ti makatulong met kenka a mangparmek iti aniaman a sumken a rikna a kaslattay pinanawannakan ti Dios. No agtimpuyog nga agtrabaho ti dua a tao para iti maymaysa a kalat, saan kadi a masansan nga agbalinda a nasingsinged nga aggayyem? Bayat a makipasetka iti trabaho a panangasaba, kanayon a masarangetmo dagiti karit. Mariknamto ti bagim nga agpatulong iti Dios. Ket bayat a bendisionan ti Dios dagiti bannogmo, napaypaysonton ti pannakigayyemna. Maamirismonton nga agtalek ti Dios kenka kas katrabahuan. Talaga a mangnayonto daytoy iti panagtalekmo iti bagim.

Ni Carol, kas pagarigan, kurang ti panagtalekna iti bagina. Nagpakamatay ni nanangna, ket kanayon nga irurumen ti abusado a tatangna. Ngem idi agtawen iti 17, nagbalin a maysa kadagiti Saksi ni Jehova ken nakipaset iti trabaho a panangasaba. Ita, kalpasan ti sangapulo a tawen kas amin-tiempo a managebanghelio, kunana: “Dakkel unay ti naitulong kaniak daytoy a trabaho agsipud ta makitkitak ti bendision ni Jehova kaniak. Kunak iti bagik, ‘No ay-ayatennak ti Dios, adda met la ngarud pategko.’ Ti panangusar ni Jehova kaniak a mangiwaragawag iti naganna ti nangnayon iti panagtalekko iti bagik.”

“Nanamenyo ket Kitaenyo ta ni Jehova Naimbag”

“Inispalnak [ti Dios] kadagiti amin a panagbutbutengko,” insurat ni Ari David kalpasan a medio nalasatanna ti mamagpeggad-biag a kasasaad. (Salmo 34:​4, 6, superscription ti NWT; 1 Samuel 21:​10-​12) Naikuna ngarud ni David manipud iti kapadasanna: “O nanamenyo ket kitaenyo ta ni Jehova naimbag, nagasat ti tao a kumamang kenkuana.”​—⁠Salmo 34:⁠8.

Nupay ti biagmo mabalin a pulos a dinto agpeggad a kas idi ken David, sigurado a pasaray mapasaram ti dadduma a pagpulkokan ken rigat. No ‘dagiti dandanag ta pusom dimmadakkelda,’ umararawka iti Dios. (Salmo 25:17) Dika pagamkan nga ilusulos ti Dios ti pannakigayyemna. Bayat a siaanus nga ibturam ken mapasaram a mismo ti panangandingay ken panangaywan ni Jehova, ‘mananam ken makita[mto]’ a mismo “a ni Jehova naimbag.” Ket isut’ agtalinaedto a Gayyemmo iti agnanayon.​—⁠Santiago 4:⁠8.

[Dagiti Footnote]

[Ladawan iti panid 19]

Baybay-an kadi ti Dios dagiti gagayyemna no tiempo ti rigat?