“Mangted iti Bileg iti Daydiay Nabannog”

 1. Ania dagiti pakarigatan a masapul a sanguentayo, ngem apay a maragsakan ni Jehova kadagiti matalek nga adipenna? (Kitaen ti ladawan iti rugi ti artikulo.)

KAS pagaammotayo, kakuykuyog ti biag iti daytoy a sistema ti bambanag dagiti problema. Adu kadakayo a maipatpateg a kakabsat ti maipaspasango iti nakaro a sakit. Dadduma met, nupay adda edaddan, ay-aywananda dagiti nataengan a kapamiliada. Marigrigatan met ti dadduma a mangipaay uray laeng dagiti kangrunaan a kasapulan ti pamiliada. Ammotayo met nga adu ti maipaspasango iti agrurutap a problema! Mangibus dayta iti adu a panawen, pigsa, ken kuarta. Nupay kasta, naan-anay nga agtalekka kadagiti kari ti Dios, a sititibker a mangnamnamaka iti nasaysayaat a masanguanan. Sigurado a maragsakan ni Jehova iti dayta!

 2. Ania ti pammabileg kadatayo ti Isaias 40:29, ngem ania a dakkel a kamali ti mabalin a maaramidtayo?

² Gapu kadagiti pakarigatan iti biag, kasla kadi kayatmon ti sumuko no dadduma? No wen, saan la a sika ti kasta. Ipakita ti Biblia a narikna met dagiti nagkauna a matalek nga adipen ti Dios a kasla saandan a makapagtultuloy. (1 Ar. 19:4; Job 7:7) Ngem imbes a sumukoda, nagkiddawda iti bileg ken Jehova. Saanda a napaay ta ti Diostayo “mangted iti bileg iti daydiay nabannog.” (Isa. 40:29) Makapaladingit ta ipagarup ti dadduma nga adipen ti Dios ita a ti kasayaatan a panangsango kadagiti pakarigatan ket, kas iti kunada, ‘aginana pay laeng iti panagserbi iti Dios,’ a kasla ket tay makapadagsen dagiti Nakristianuan nga aktibidad imbes a bendision dagita. Gapuna, isardengdan ti agbasa iti Biblia, makigimong, ken mangasaba—kas iti kayat ni Satanas nga aramidenda.

 3. (a) Ania ti aramidentayo tapno saan nga agballigi ni Satanas a mangpakapuy kadatayo? (b) Ania ti usigentayo iti daytoy nga artikulo?

³ Ammo ti Diablo a bumilegtayo no okupadotayo kadagiti Nakristianuan nga aktibidad, ket saanna a kayat a mapasamak dayta. No mariknam a nabannogkan iti pisikal ken emosional, dika koma ngarud umad-adayo ken Jehova. Ad-adda koma nga umasidegka kenkuana ta ‘patibkerennaka, papigsaennaka.’ (1 Ped. 5:10; Sant. 4:8) Iti daytoy nga artikulo, usigentayo ti dua a situasion a mabalin a mangpabaaw iti regtatayo nga agserbi iti Dios ken no kasano a makatulong ti panangyaplikar kadagiti prinsipio ti Biblia. Usigentayo nga umuna ti maipapan iti abilidad ni Jehova a mangpabileg kadatayo, kas naipakita iti Isaias 40:26-31.

 4. Ania ti maadaltayo iti Isaias 40:26?

⁴ Basaen ti Isaias 40:26. Awan ti makabilang iti amin a bituen iti uniberso. Patien dagiti sientista nga umabut iti 400 a bilion a bituen ti linaon ti Milky Way a galaksi. Ngem adda nagan wenno awag nga inted ni Jehova iti tunggal bituen. Ania ti maadaltayo? No napateg ken Jehova dagiti awan biagna a parsua, saan ngata a napatpategka pay ta agserserbika kenkuana, saan a gapu ta naiprograma dayta, no di ket gapu iti ayatmo kenkuana? (Sal. 19:1, 3, 14) Ammo ti dungdungnguentayo nga Ama ti amin maipapan kenka. Ammo ni Jehova ti bilang ‘dagiti mismo a buok ti ulom.’ (Mat. 10:30) Ipasigurado met kadatayo ti salmista: “Ni Jehova ammona dagiti aldaw dagidiay awan pagkuranganna.” (Sal. 37:18) Wen, makitkitana dagiti pakasuotam, ket kabaelanna nga ipaay ti bileg a kasapulam tapno maibturam ti tunggal maysa kadagita.

 5. Apay a makapagtalektayo a kabaelannatayo a pabilgen ni Jehova?

⁵ Basaen ti Isaias 40:28. Ni Jehova ti Gubuayan ti dinamiko nga enerhia. Kas pagarigan, panunotentayo ti kaadu ti enerhia nga ipapaayna iti init. Napaliiw ti mannurat iti siensia a ni David Bodanis: “Ti enerhia a patpatauden ti inittayo iti tunggal segundo ket katupag ti [binilion nga atomika a] bomba.” Sigun pay iti kalkulasion ti maysa a researcher, ti enerhia nga ipugpug-aw ti init iti maysa a segundo ket umanay a mangsuplay iti kasapulan ti amin a tao iti 200,000 a tawen! Adda kadi pay laeng agduadua a kabaelannatayo nga ikkan iti bileg a mangsango iti aniaman a problema Daydiay mangipapaay iti enerhia iti init?

 6. Kasano a makapagin-awa ti sangol ni Jesus, ken ania ti epektona kadatayo dayta a pannakaammo?

⁶ Basaen ti Isaias 40:29. Mangyeg iti dakkel a rag-o ti agserbi ken Jehova. Imbaga ni Jesus kadagiti adalanna: “Ibaklayyo ti sangolko.” Ken innayonna: “Makasarakkayto ti gin-awa a maipaay kadagiti kararuayo. Ta ti sangolko nalanay [wenno, mangpagin-awa] ken ti awitko nalag-an.” (Mat. 11:28-30) Agpayso dayta! No dadduma, mabalin a mariknatayo a nabambannogtayo sakbay ti gimong wenno panangasaba. Ngem ania ti mariknatayo inton agawidtayon? Nagin-awaantayo—ken ad-adda a nakasaganatayo a mangsango kadagiti problema. Talaga a mangpagin-awa ti sangol ni Jesus!

 7. Mangisalaysay iti kapadasan a mangpaneknek a pudno ti Mateo 11:28-30.

⁷ Maysa a sister nga awagantayo iti Kayla ti addaan iti chronic fatigue syndrome, depression, ken migraine. Marigatan a mapan makigimong no dadduma. Ngem kalpasan nga inkarigatanna nga atenderan ti maysa a palawag, insuratna: “Maipapan iti pannakaupay ti palawag. Addaan empatia ken pannakaseknan ti pannakaipalawag dagiti impormasion isu a nakasangitak. Napalagipanak a masapul a kanayonak a makigimong.” Napalalo ti ragsakna ta inkarigatanna ti nakigimong!

8, 9. Ania ti kayat a sawen ni apostol Pablo idi insuratna: “Inton nakapuyak, iti kasta nabilegak”?

⁸ Basaen ti Isaias 40:30. Kasanoman ti kalaingtayo, limitado latta ti maaramidantayo iti bukodtayo. Leksion dayta a masapul a masursurotayo. Naabilidad ni apostol Pablo, ngem adda dagiti dina naaramidan gapu iti limitasionna. Idi inyebkasna dagiti pakaseknanna iti Dios, naibaga kenkuana: “Ti pannakabalinko maan-anay iti pagkapuyan.” Naawatan ni Pablo ti punto. Kinunana: “Inton nakapuyak, iti kasta nabilegak.” (2 Cor. 12:7-10) Ania ti kayatna a sawen?

⁹ Naamiris ni Pablo a limitado laeng ti maaramidanna no awan ti tulong ti Dios. Maited ti nasantuan nga espiritu ti Dios ti bileg a kasapulanna. Kabaelan pay ti espiritu ti Dios a pabilgen ni Pablo a mangaramid kadagiti trabaho a dina kabaelan nga iringpas iti bukodna a bileg. Kasta met laeng kadatayo. No aggapu ken Jehova ti bilegtayo, sigurado a napigsatayo!

10. Kasano a tinulongan ni Jehova ni David a mangsango kadagiti pakarigatanna?

¹⁰ Namin-adu a narikna ni salmista David ti bileg ti nasantuan nga espiritu ti Dios. Inkantana: “Babaen kenka makapagtarayak a sumaranget iti buyot dagiti tulisan; ket babaen ti Diosko makakalay-atak iti pader.” (Sal. 18:29) Adda dagiti pader, wenno problema, a ditay ‘makalay-at’ a bukbukodtayo; kasapulantayo ti tulong ni Jehova.

11. Iyilustrar no kasano a makatulong ti nasantuan nga espiritu tapno mapagballigiantayo dagiti problematayo.

¹¹ Basaen ti Isaias 40:31. Saan a makapagpangato ken makapagampayag ti agila iti adayo iti bukodna laeng a pigsa. Ti nabara nga angin ti mangipangato kenkuana isu a bassit laeng nga enerhia ti mausarna. Gapuna, no maipasangoka iti narigat nga annongen, laglagipem ti agila. Kiddawem ken Jehova nga “ipangatonaka” babaen “ti katulongan, ti nasantuan nga espiritu.” (Juan 14:26) Makaparagsak ta mabalintayo a dawaten dayta kaanoman a kasapulantayo. Ken mabalin nga ad-adda a mariknatayo a kasapulantayo ti tulong ti Dios no adda ditay pagkinnaawatan iti maysa a kakongregasiontayo. Ngem apay a tumaud ti kasta a problema?

12, 13. (a) Apay nga adda dagiti di pagkikinnaawatan dagiti Kristiano? (b) Ania ti masursurotayo maipapan ken Jehova iti kapadasan ni Jose?

¹² Tumaud ti di panagkikinnaawatan gapu ta imperpektotayo amin. Isu a no dadduma, masurontayo iti ibaga wenno tigtignay dagiti kapammatiantayo—wenno isuda ti masuron kadatayo. Mabalin a dakkel a pakasubokan dayta. Kas iti dadduma a pakasubokan, ipalpalubos ni Jehova a paneknekantayo a matalektayo babaen ti panagsursuro a makipagtrabaho a sangsangkatunos kadagiti dedikado a tattao nga ay-ayatenna uray imperpektoda.

¹³ Ipakita ti kapadasan ni Jose a saan a lapdan ni Jehova a masubok dagiti adipenna. Idi agtutubo ni Jose, inlako dagiti naimon a kakabsatna iti ama tapno agbalin a tagabo idiay Egipto. (Gen. 37:28) Makitkita idi ni Jehova ti mapaspasamak ken sigurado a nasaktan bayat a makitkitana ti pannakatrato ti nalinteg a gayyemna a ni Jose. Ngem saan a nakibiang ni Jehova. Idi agangay, idi naibalud ni Jose gapu ta naakusaran a ginandatna a ramesen ti asawa ni Potifar, saan latta a bimmallaet ni Jehova. Ngem binaybay-an kadi ti Dios ni Jose? Saan. Imbes ketdi, “ti ar-aramiden [ni Jose] pinagbalin ni Jehova a naballigi.”—Gen. 39:21-23.

14. Ania dagiti naespirituan ken pisikal a pagimbagan ti panangikkat iti pungtot?

¹⁴ Daytoy pay ti sabali a pagarigan. Manmano ti nakapadas iti dakes a pannakatrato a napasaran ni David. Ngem saan nga impalubos daytoy a gayyem ti Dios a lapunosen ti sakit ti nakem. Imbes ketdi, insuratna: “Baybay-am ti unget ket panawam ti pungtot; dika agpudpudot ta dakes laeng ti maaramidam.” (Sal. 37:8) Ti kangrunaan a rason a ‘panawantayo’ ti pungtot ket tapno matuladtayo ni Jehova a ‘saan a nangaramid kadatayo ti mismo a maitutop kadagiti basoltayo.’ (Sal. 103:10) Adda pay dagiti pagimbagan ti ‘panangpanaw’ iti pungtot. Ti panagpungtot ket mabalin nga agresulta iti sakit a kas iti altapresion ken problema iti panaganges. Mabalin met nga apektaranna ti dalem ken pali (pancreas), ken mangpataud pay dayta iti problema iti tian. Masansan a ditay makapagpanunot a naimbag no agpungpungtottayo. Ken no dadduma, kalpasan ti nakaro a panagpungtot, mabalin a makapasartayo iti napaut a depresion. Ngem kuna ti Biblia: “Ti natalinaay a puso isu ti biag ti nainlasagan a bagi.” (Prov. 14:30) Ania ngarud ti aramidentayo no nasaktan ti riknatayo ken kasano a makikappiatayo iti kabsattayo? Maaramidtayo dayta no iyaplikartayo dagiti nainsiriban a balakad ti Biblia.

15, 16. Kasanotayo a makikappia iti nakasair kadatayo?

¹⁵ Basaen ti Efeso 4:26. Ditay masdaaw no dakes ti panangtrato ti lubong kadatayo. Ngem no adda makapasakit unay a naibaga wenno naaramid kadatayo ti kapammatian wenno kapamiliatayo, mabalin a maupaytayo. Ipapantayon a ditay basta malipatan dayta. Bay-antayo kadi a kumaro ken agtultuloy ti sakit ti nakemtayo iti adu a tawen? Wenno iyaplikartayo kadi ti balakad ti Biblia a dagus a mangsolbar kadagiti bambanag? No itantantayo a risuten ti situasion, narigrigattayton a makikappia iti kabsattayo.

¹⁶ Kasano no nasairnaka ti maysa a kabsat ket dimo mapalabas dayta? Ania dagiti nasayaat nga addang nga aramidem? Umuna, napasnek nga agkararagka ken Jehova. Kiddawem a maaddaankayo iti makapabileg a panagsarita iti kabsatmo. Laglagipem, isu ket gayyem ni Jehova. (Sal. 25:14) Ay-ayaten ti Dios isuna. Nasayaat ti panangtrato ni Jehova kadagiti gagayyemna, ket kasta met ti namnamaenna kadatayo. (Prov. 15:23; Mat. 7:12; Col. 4:6) Kalpasanna, panunotem nga umuna dagiti ibagam. Dimo ipapan nga inggagaranaka a saktan ti kabsatmo, amangan no dimo la naawatan ti situasion. Ken bigbigem a mabalin nga adda met naibaga wenno naaramidmo isu a kasta ti napasamak. Mabalinmo nga ibaga kenkuana, “Siguro, sensitiboak la unay, ngem idi kinasaritanak idi kalman, nariknak a . . .” No saan a napasamak ti namnamaem, mangkitaka iti sabali a gundaway a makikappia. Kabayatanna, ikararagam ti kabsatmo ken kiddawem a bendisionan ni Jehova. Ikararagmo a tulongannaka nga agpokus kadagiti positibo a galad ti kabsatmo. Aniaman ti resultana, masiguradom a maragsakan ni Jehova iti naimpusuan a panangikagumaam a makikappia iti kabsatmo a gayyem ti Dios.

17. Ania ti us-usaren ni Jehova a tumulong kadatayo a makaungar iti naespirituan no makaaramidtayo iti basol, ken apay a masapul a gundawayantayo dayta a tulong?

¹⁷ Marikna ti dadduma a saanda a maikari nga agserbi ken Jehova gapu ta nakabasolda iti nadagsen. Nakaro a mangparigat ti pannakakonsiensia. Kastoy ti kinuna ni Ari David idi makonkonsiensia: “Idi nagulimekak narunot dagiti tulangko babaen ti panagasugko iti intero nga agmalem. Ta iti aldaw ken rabii nadagsen kaniak ta imam.” Makaparagsak ta situtured a sinango ni David ti problema a kas naespirituan a tao. “Ti basolko impudnok kenka iti kamaudianan,” insuratna, “ket sika pinakawanmo ti biddut dagiti basolko.” (Sal. 32:3-5) No adda naaramidmo a nadagsen a basol, nakasagana ni Jehova a tumulong kenka a makaungar iti naespirituan. Ngem masapul nga awatem ti tulongna babaen ti kongregasion. (Prov. 24:16; Sant. 5:13-15) Dimo itantantan—nakataya iti dayta ti agnanayon a masakbayam! Ngem kasanon no makonkonsiensiaka latta uray nabayagen a napakawan ti basolmo?

18. Kasano a makatulong ti pagarigan ni Pablo kadagiti makarikna a saanda a maikari nga agserbi?

¹⁸ Adda dagiti tiempo a naburiboran ni apostol Pablo gapu kadagiti napalabas a kamalina. Binigbigna: “Siak ti kanunumuan kadagiti apostol, ken saanak a maikari a maawagan apostol, agsipud ta indadanesko ti kongregasion ti Dios.” Ngem innayon ni Pablo: ‘Babaen ti di kaikarian a kinamanangngaasi ti Dios kastoyak itan.’ (1 Cor. 15:9, 10) Inawat ni Jehova ni Pablo aniaman ti napalabasna, ken namnamaenna a kasta met ti aramiden ni Pablo iti bagina. No naimpusuan a nagbabawyamon dagiti basolmo ken no ipudnom dagita kadagiti panglakayen no kasapulan, masiguradom ti asi ni Jehova. Gapuna, agtalekka iti sao ni Jehova, ket awatem ti pammakawanna!—Isa. 55:6, 7.

19. Ania ti teksto iti tawen 2018, ken apay a maitutop dayta?

¹⁹ Bayat nga umas-asidegen ti panungpalan daytoy a sistema, manamnamatayo a kumaro dagiti pakarigatan iti biag. Ngem makapagtalekka a Daydiay ‘mangmangted iti bileg iti nabannog ken naan-anay a pannakabalin kadagidiay awanan dinamiko nga enerhia’ kabaelanna nga ipaay ti kasapulam tapno makapagtultuloyka. (Isa. 40:29; Sal. 55:22; 68:19) Bayat ti 2018, maipalagip kadatayo dayta a nagpateg a kinapudno tunggal makigimongtayo. Maitampok dayta iti sasao iti tekstotayo ita a tawen a makita iti Kingdom Hall: “Dagidiay mangin-inanama ken Jehova mapasublidanto ti bilegda.”—Isa. 40:31.