Ibilangyo a Pakaidayawan ti Kinakristianoyo!

Ti agpasindayag, agpasindayag koma mainaig ken Jehova.”​—1 CORINTO 1:31.

 1. Ania ti nasaknap a panangmatmat ti tattao maipapan iti relihion?

MAYSA a komentarista iti relihion ti nabiit pay a nangiladawan iti panangmatmat ti adu a tattao maipapan iti pammatida. Kinunana: “Ti kangrunaan a pasamak iti moderno a relihion ket saan a ti pannakabukel ti maysa a baro a relihion no di ket ti panagbalbaliw ti panangmatmat dagiti tattao. Saandan nga ikankano ti mismo a relihionda.” Sigun iti kapaliiwanna, adu a tattao “ti mamati iti Dios . . .  ; ngem saanda nga interesado kenkuana.”

 2. (a) Apay a saan a pakasdaawan a saan nga ikankano dagiti tattao dagiti naespirituan a bambanag? (b) Kasano a mamagpeggad kadagiti pudno a Kristiano ti di panangikankano?

² Ti kasta a di panangikankano ket saan a pakasdaawan dagiti agad-adal iti Biblia. (Lucas 18:8) Ken talaga a manamnama a dagiti tattao maawananda iti interes kadagiti relihion. Nabayag ngaminen nga inallilaw ken pinaay ti palso a relihion ti sangatauan. (Apocalipsis 17:15, 16) Mamagpeggad kadagiti pudno a Kristiano ti agraraira a panagpampamayan ken kinaawan ti kinapasnek. Ditay kayat a tagilag-anen ti pammatitayo agingga a bumaaw ti regtatayo iti panagserbi iti Dios ken ti interestayo iti kinapudno iti Biblia. Namakdaar ni Jesus maipapan iti kasta nga apaganem-em a regta idi binallaaganna dagiti Kristiano nga agnanaed idiay Laodicea idi umuna a siglo: “Saanka a nalamiis wenno uray napudot. Kayatko a nalamiiska koma wenno no saan napudotka. . . . Apaganem-emka.”​—Apocalipsis 3:15-18.

Panangbigbig iti Kinasiasinotayo

 3. Ania dagiti mabalin nga ipagpannakkel dagiti Kristiano no maipapan iti kinasiasinoda?

³ Tapno maliklikan dagiti Kristiano ti panangtagilag-an kadagiti naespirituan a bambanag, masapul a nalawag ti pannakaawatda iti kinasiasinoda, ken rumbeng nga ipagpannakkelda iti umiso a pamay-an ti naisangsangayan a takderda. Kas ad-adipen ni Jehova ken ad-adalan ni Kristo, deskribiren ti Biblia no siasinotayo. Ibagana a ‘saksinatayo’ ni Jehova ken ‘katrabahuan ti Dios’ bayat a siaaktibo nga iranranudtayo ti “naimbag a damag.” (Isaias 43:10; 1 Corinto 3:9; Mateo 24:14) Addaantayo iti ‘ayat iti maysa ken maysa.’ (Juan 13:34) Dagiti pudno a Kristiano ket tattao a ‘babaen iti panangusar nasanay dagiti pannakabalin ti pannakaawatda a mangilasin agpadpada iti umiso ken di umiso.’ (Hebreo 5:14) Maibilangtayo kas “silsilaw iti lubong.” (Filipos 2:15) Ikagkagumaantayo a ‘taginayonen ti nasayaat a kababalintayo iti tengnga dagiti nasion.’​—1 Pedro 2:12; 2 Pedro 3:11, 14.

 4. Ania ti saan a pakipasetan ti maysa nga agdaydayaw ken ni Jehova?

⁴ Ammo met dagiti pudno nga agdaydayaw ken ni Jehova no ania ti saanda a pakipasetan. “Saanda a paset ti lubong,” no kasano a ti Liderda a ni Jesu-Kristo ket saan a paset ti lubong. (Juan 17:16) Agtalinaedda a naisina ‘kadagiti nasion’ nga ‘adda iti kinasipnget no maipapan iti isip, ken naisina iti biag a kukua ti Dios.’ (Efeso 4:17, 18) Kas resultana, dagiti pasurot ni Jesus ‘tinallikudanda ti di kinanadiosan ken nailubongan a tartarigagay ken agbibiagda a buyogen ti kinasimbeng ti panunot ken kinalinteg ken nadiosan a debosion iti tengnga daytoy agdama a sistema ti bambanag.’​—Tito 2:12.

 5. Ania ti ipasimudaag ti balakad nga ‘agpasindayag mainaig ken Jehova’?

⁵ No nalawag ti pannakaawattayo iti kinasiasinotayo ken iti relasiontayo iti Soberano nga Agturay iti uniberso, ‘makapagpasindayagtayo mainaig ken Jehova.’ (1 Corinto 1:31) Ania a kita ti panagpasindayag dayta? Kas pudno a Kristiano, ipagpannakkeltayo a ni Jehova ti Diostayo. Surotentayo daytoy a balakad: “Daydiay agpangpangas maipapan iti bagina agpangas koma maipapan iti bagina gapu itoy mismo a banag, ti kaadda ti pannakatarus ken ti kaadda ti pannakaammo kaniak, a siak ni Jehova, Daydiay mangwatwatwat iti naayat a kinamanangngaasi, kinahustisia ken kinalinteg iti daga.” (Jeremias 9:24) ‘Ipasindayagtayo’ ti pribilehio a naam-ammotayo ti Dios ken us-usarennatayo a tumulong kadagiti dadduma.

Ti Karit

 6. Apay a marigatan ti dadduma a mangtaginayon iti nalawag a pannakaawatda iti takderda kas Kristiano?

⁶ Bigbigentayo a saan a kanayon a nalaka a taginayonen ti nalawag a pannakaawattayo iti naisangsangayan a takdertayo kas Kristiano. Malagip ti maysa nga agkabannuag a lalaki a napadakkel kas Kristiano no kasano a kimmapuy idi ti espiritualidadna: “No dadduma, kasla diak ammo no apay a nagbalinak a Saksi ni Jehova. Dimmakkelak iti kinapudno. No maminsan, pampanunotek a maysa laeng daytoy kadagiti nabayagen ken maakseptar a relihion.” Nagpaimpluensia ti dadduma iti tay-ak ti panaglinglingay, media, ken iti agdama a di nadiosan a panangmatmat iti biag. (Efeso 2:2, 3) Mabalin nga adda dagiti gundaway a pagduaduaan ti dadduma a Kristiano ti bagida ket pasaray sukimatenda manen dagiti patpatien ken kalatda.

 7. (a) Ania a panangsukimat iti bagi ti maitutop kadagiti adipen ti Dios? (b) Ania ti mangyeg iti peggad?

⁷ Dakes kadi no sukimatentayo a naimbag ti bagitayo? Saan. No malagipyo, imparegta ni apostol Pablo kadagiti Kristiano nga itultuloyda a sukimaten ti bagbagida: “Itultuloyyo a suboken no addakayo iti pammati, itultuloyyo a paneknekan no aniakayo.” (2 Corinto 13:5) Iparparegta ti apostol ti positibo a panangikagumaan a mangilasin iti aniaman a mabalin a timmaud a naespirituan a pagkapuyan, buyogen ti panggep a mangaramid kadagiti nesesita nga addang a mangatur kadagita. Tapno masubok ti Kristiano no isu ket adda iti pammati, nasken a sukimatenna no ti sasao ken tigtignayna ket maitunos iti pammatina. Nupay kasta, awan serserbina ken mamagpeggad pay ketdi iti naespirituan no saan nga umiso ti panggeptayo a mangsukimat iti bagitayo, a kayattay la a maammuan ti “katataotayo” wenno kayattay la a masungbatan dagiti saludsod nga awan pakainaiganna iti relasiontayo ken ni Jehova wenno iti kongregasion.a Pulos a ditay kayat a ‘mapasaran ti pannakarba maipapan iti pammatitayo’!​—1 Timoteo 1:19.

Maipasangotayo Amin iti Rikna ti Pannakapaay

8, 9. (a) Kasano nga inyebkas ni Moises ti panagduaduana iti bagina? (b) Ania ti sungbat ni Jehova kadagiti panagduadua ni Moises? (c) Ania ti epektona kadakayo dagiti pammatalged ni Jehova?

⁸ Maiparbeng kadi a panunoten dagiti Kristiano a napaayda no sagpaminsan a pagduaduaanda ti bagida? Saan! Kinapudnona, makaliwliwa a maammuan a gagangay laeng dagita a rikna ti pannakapaay. Napasaran dayta dagiti nagkauna a matalek a saksi ti Dios. Usigenyo ni Moises, a nangiparangarang iti naisangsangayan a pammati, kinasungdo, ken debosion. Idi naipabaklay kenkuana ti kasla narigat nga annongen, inyimtuodna buyogen ti panagduadua: ‘Siasinoak koma?’ (Exodo 3:11) Agparang a ti pampanunotenna a sungbat ket, ‘Nanumoak laeng!’ wenno ‘Diak kabaelan!’ Dadduma nga aspeto ti nalikudan ni Moises ti mabalin a pakaigapuan ti pannakariknana nga awan kaimudinganna: Isu ket naggapu iti nasion dagiti tagabo. Inlaksid pay dagiti Israelita. Saan a nalaing a pumapalawag. (Exodo 1:13, 14; 2:11-14; 4:10) Isu ket pastor, maysa a trabaho a karimon dagiti Egipcio. (Genesis 46:34) Di pakasdaawan nga iti panagriknana, saan a maikari a mangwayawaya iti naadipen nga ili ti Dios!

⁹ Ni Jehova pinakiredna ni Moises babaen ti dua a nabileg a kari: “Addaakto kenka, ket daytoy ti pagilasinan maipaay kenka a siak ti nangibaon kenka: Kalpasan a mairuarmo ti ili manipud Egipto, agserbikayto iti pudno a Dios itoy a bantay.” (Exodo 3:12) Impanamnama ti Dios a dina pulos baybay-an ti bimdeng nga adipenna. Kanayonanna, impasimudaag ni Jehova a sigurado nga ispalenna ti ilina. Iti panaglabas dagiti panawen, inkari ni Jehova ti umasping a saranay. Kas pagarigan, babaen ken Moises, kinunana iti nasion ti Israel idi ngannganida sumrek iti Naikari a Daga: “Bumilegkayo ken pumigsakayo. . . . Ni Jehova a Diosmo ti makipagmarmartsa kenka. Saannakanto a baybay-an wenno panawan a naan-anay.” (Deuteronomio 31:6) Impasigurado met ni Jehova ken Josue: “Awanto ti asinoman nga agtakder a sititibker iti sanguanam iti amin nga al-aldaw ti panagbiagmo. . . . Addaakto kenka. Saankanto a baybay-an wenno panawan a naan-anay.” (Josue 1:5) Inkarina pay kadagiti Kristiano: “Saankanto a pulos panawan ket saankanto a pulos baybay-an.” (Hebreo 13:5) Gapu ta tagtagiragsakentayo ti kasta a nabileg a suporta, rumbeng a pagragsakantayo a Kristianotayo!

10, 11. Kasano a natulongan ti Levita a ni Asaf tapno masalimetmetanna ti umiso a panangmatmat iti kinapateg ti panagserbi ken Jehova?

¹⁰ Agarup lima a siglo kalpasan ni Moises, maysa a matalek a Levita nga agnagan Asaf ti sipaprangka a nagsurat mainaig kadagiti panagduaduana iti kinapateg ti panangsalimetmet iti nalinteg a dana. Bayat nga inkagumaanna ti nagserbi iti Dios iti laksid dagiti pakasuotan ken pannulisog, nakita ni Asaf no kasano a nagbalin nga ad-adda a nabileg ken narang-ay ti dadduma a mangum-umsi iti Dios. Ania ti narikna ni Asaf? “No maipapan kaniak, gistay simiasi dagiti sakak,” inaminna. “Nganngani naikaglis dagiti addangko. Ta nagbalinak a naapal kadagiti managpasindayag, no makitak ti mismo a talna dagiti nadangkes a tattao.” Nangrugi a pagduaduaanna ti kinapateg ti panagserbi ken ni Jehova. “Sigurado a kinaubbaw ti panangdalusko iti pusok ken ti panangbuggok kadagiti imak iti mismo a kinaawan basol,” napanunot ni Asaf. “Ket nasaplitak iti intero nga agmalem.”​—Salmo 73:2, 3, 13, 14.

¹¹ Kasano a tinaming ni Asaf dagita a rikna ti panagduadua? Binaybay-anna latta kadi dagita? Saan. Inkararagna dayta iti Dios, kas makitatayo iti maika-73 a Salmo. Nagbalbaliw ti amin idi napan ni Asaf iti templo a santuario. Bayat ti kaaddana sadiay, nausigna a kasayaatan pay laeng a dana ti panagtalinaed a nasungdo iti Dios. Buyogen ti napabaro a naespirituan nga apresasion, naawatanna a kagura ni Jehova ti kinadakes ken dusaenna ti nadangkes iti naikeddeng a tiempo. (Salmo 73:17-19) Kalpasan a nailintegna ti panangmatmatna, ad-adda a naapresiar ni Asaf ti kinasiasinona kas maysa a naparaburan nga adipen ni Jehova. Kinunana iti Dios: “Patinayon nga addaak kenka; tinengngelmo ti makannawan nga imak. Babaen iti pammatigmaanmo idalannakto, ket kalpasanna ipannakto iti mismo a kinadayag.” (Salmo 73:23, 24) Iti kasta, impannakkel manen ni Asaf ti Diosna.​—Salmo 34:2.

Sipapanunotda iti Kinasiasinoda

12, 13. Mangdakamat iti tattao a nadakamat iti Biblia a nangipannakkel iti relasionda iti Dios.

¹² Ti maysa a pamay-an tapno kanayon a sipapanunottayo a Kristianotayo isu ti panangusig ken panangtulad iti pammati dagiti nasungdo nga agdaydayaw, a nagragsakanda ti relasionda iti Dios iti laksid ti ibubusor. Usigenyo ni Jose, nga anak ni Jacob. Idi ubing pay, sililiput a nailako kas adipen sa naipan idiay Egipto, a ginasut a kilometro ti kaadayona manipud iti amana a managbuteng iti Dios, ken maysa a lugar a nakaad-adayo ken naidumduma unay manipud iti nabara ken manangsaranay a pamiliana. Bayat ti kaaddana idiay Egipto, awan ti tao a maasitganna a makaipaay iti nadiosan a balakad, ken masapul a sanguenna dagiti makakarit a situasion a mangsubok kadagiti prinsipiona ken panagtalekna iti Dios. Nupay kasta, nalawag nga inkagumaanna ti nagtalinaed a sipapanunot iti takderna kas adipen ti Dios, ket simamatalek a sinalimetmetanna ti ammona nga umiso. Para kenkuana, maysa a pribilehio ti agdayaw ken ni Jehova iti tengnga dagiti bumusbusor, ket saan a nagkedked a nangyebkas iti riknana.​—Genesis 39:7-10.

¹³ Walo a siglo kalpasanna, adda maysa a kautibo nga Israelita a balasitang a nagbalin nga adipen ni Naaman, ti heneral ti Siria. Dina linipatan ti kinasiasinona kas maysa nga agdaydayaw ken ni Jehova. Idi nakakita iti gundaway, situtured ken sieepektibo a sinaksianna ni Jehova babaen ti panangyam-ammona ken ni Eliseo kas mammadto ti pudno a Dios. (2 Ar-ari 5:1-19) Sumagmamano a tawen kalpasanna, iti laksid ti nalulok a kagimongan, ti agtutubo a ni Ari Josias nangipaulog kadagiti napaut a narelihiosuan a panagbalbaliw, tinarimaanna ti templo ti Dios, ken indauluanna ti panagsubli ti nasion ken ni Jehova. Dina imbain ti pammati ken panagdayawna. (2 Cronicas, kapitulo 34, 35) Ni Daniel ken ti tallo a Hebreo a kakaduana idiay Babilonia dida pulos linipatan ti takderda kas ad-adipen ni Jehova, ken uray nakaro ti nakaipasanguanda a suot ken pannulisog, sinalimetmetanda ti kinatarnawda. Nalawag, minatmatanda a pakaidayawan ti agbalin nga adipen ni Jehova.​—Daniel 1:8-20.

Ibilangyo a Pakaidayawan ti Kinakristianoyo

14, 15. Ania ti nairaman iti panangipannakkel iti Kinakristianotayo?

¹⁴ Nagballigi dagita nga adipen ti Dios gapu iti umiso a panangipannakkelda iti relasionda iti Dios. Komustatay met ita? Ania ti nairaman iti panangipannakkeltayo iti Kinakristianotayo?

¹⁵ Kangrunaanna, iramanna ti dakkel a panagyamantayo gapu ta awit-awittayo ti nagan ni Jehova kas ilina, a tagtagiragsakentayo ti bendision ken anamongna. Ammo ti Dios no siasino dagiti kukuana. Ni apostol Pablo, a nagbiag iti panawen a nakaro ti narelihiosuan a pannakariro, insuratna: “Ammo ni Jehova dagidiay kukuana.” (2 Timoteo 2:19; Numeros 16:5) Ipagpannakkel ni Jehova dagidiay “kukuana.” Kinunana: “Ti mangsagid kadakayo sagidenna ti bukel ti matak.” (Zacarias 2:8) Nalawag nga ay-ayatennatayo ni Jehova. No kasta, ti relasiontayo kenkuana ket nasken a naibatay iti nasged a panagayat kenkuana. Kinuna ni Pablo: “No ti asinoman ayatenna ti Dios, am-ammona daytoy a tao.”​—1 Corinto 8:3.

16, 17. Apay a dagiti Kristiano, ubbing man wenno nataengan, maipagpannakkelda ti naespirituan a tawidda?

¹⁶ No kadagiti agtutubo a napadakkel kas Saksi ni Jehova, masapul a sukimatenda no tumibtibker met laeng ti takderda kas Kristiano, a naibatay iti nasinged a relasionda iti Dios. Saan a mabalin a basta agpannurayda iti pammati dagiti dadakkelda. Nagsurat ni Pablo maipapan kadagiti amin nga adipen ti Dios: “Iti bukodna nga apo isu agtakder wenno maikulbo.” Gapuna, intuloy ni Pablo: “Tunggal maysa kadatayo makikuentanto iti Dios maipaay iti bagina.” (Roma 14:4, 12) Nalawag a saan a suminged ken saan nga agpaut ti relasionyo ken ni Jehova no basta sumursurotkayo laeng iti panagdayaw dagiti dadakkelyo.

¹⁷ Iti intero a historia, kanayon nga adda dagiti saksi ni Jehova. Mangrugi dayta ken ni matalek nga Abel​—agarup 60 a siglon ti napalabas​—agingga iti “dakkel a bunggoy” dagiti moderno-aldaw a Saksi ken iti riniwriw nga agdaydayaw ken ni Jehova a mangtagiragsakto iti agnanayon a biag. (Apocalipsis 7:9; Hebreo 11:4) Datayo ti kaudian iti daytoy nagatiddog a listaan dagiti matalek nga agdaydayaw. Nagsayaat la ketdi ti naespirituan a tawidtayo!

18. Kasano a naidumatayo iti lubong no maibatay kadagiti prinsipio ken pagalagadantayo?

¹⁸ Ti Kinakristianotayo ramanenna met dagiti prinsipio, galad, pagalagadan, ken kababalin a pakailasinantayo kas Kristiano. Isu dayta “Ti Dalan,” ti kakaisuna a naballigi a wagas ti panagbiag ken pakaay-aywan ti Dios. (Aramid 9:2; Efeso 4:22-24) ‘Siguraduen dagiti Kristiano ti amin a bambanag’ ken ‘kumpetda a siiirut iti nasayaat’! (1 Tesalonica 5:21) Nalawag ti pannakaawattayo iti dakkel a nagdumaan ti Kinakristiano ken ti lubong a naisina iti Dios. Nalawag a pinagduma ni Jehova no ania ti pudno ken palso a panagdayaw. Babaen iti mammadtona a ni Malakias, kinunana: “Sigurado a makitayonto manen ti pagdumaan iti nagbaetan daydiay nalinteg ken daydiay nadangkes, iti nagbaetan daydiay agserserbi iti Dios ken daydiay saan a nagserbi kenkuana.”​—Malakias 3:18.

19. Ania ti saan a pulos a pagbalinan dagiti pudno a Kristiano?

¹⁹ Gapu ta napateg ti panangipannakkel ken ni Jehova iti daytoy nariribuk a lubong, ania ti makatulong tapno masalimetmetantayo ti umiso a panangipannakkel iti Dios ken agtultuloy a sipapanunottayo iti takdertayo kas Kristiano? Masarakan iti sumaganad nga artikulo dagiti makatulong a singasing. Bayat nga us-usigenyo dagita, daytoy ti masiguradoyo: Dagiti pudno a Kristiano dida pulos agbalin a maysa kadagidiay di mangikankano iti Dios.

[Footnote]

Malagipyo Kadi?

• Kasano a dagiti Kristiano ‘agpasindayagda mainaig ken Jehova’?

• Ania ti naadalyo kadagiti ulidan da Moises ken Asaf?

• Siasino dagiti tattao a nadakamat iti Biblia a nangibilang a pakaidayawanda ti panagserbida iti Dios?

• Ania ti nairaman iti panangipannakkel iti Kinakristianotayo?

[Ladawan iti panid 14]

Adda panawen a pinagduaduaan ni Moises ti bagina

[Dagiti Ladawan iti panid 15]

Adu a nagkauna nga adipen ni Jehova ti nangipannakkel iti naisangsangayan a takderda