Panangisaknap ti Sayamusom ti Pannakaammo iti Dios

“Ngem yaman pay iti Dios isu nga agnanayon a mangiturong kadakami iti prusision ti panagballigi a makikadua ken Kristo ket gapu iti pannakaaramatmi iparangarangna ti sayamusom ti pannakaammo kenkuana met laeng iti isuamin a disso!”​—2 CORINTO 2:14.

 1. Ania a sayamusom ti pagsasaritaantayo ditoy, ket kasanot’ rebbeng a panangmatmattayo iti pribilehio a mangisaknap iti dayta?

SAY-OPEM, say-opem! M-m-m-m! Maangotmo kadi ti makaay-ayo a sayamusom? Saantay a tuktukoyen ditoy ti sayamusom ti aguk-ukrad a sabsabong ngem, imbes ketdi, ti maysa a piguratibo a sayamusom nga aggapu kadagiti napili a sursurat ditoy daga. Saan a dagitoy dagiti sursurat nga aggapu iti kadawyan a tattao no di ket piguratiboda a reppet ti sabsabong nga impaltiing Daydiay namarsua kadagiti nabanglo a sabsabong a nangarkos iti daga. Ti pribilehio a mangisaknap iti daytoy a sayamusom ti pannakaammo iti Dios ket maysa a dakkel a gameng. Wen, daytat’ panagserbi a naisangsangayan ti pategna​—saan nga ik-ikutan ti amin, saan a pakiramanan ti kaaduan ti sangatauan.

 2. Kaanot’ panangrugi a panangisaknap dagiti adalan ni Kristo iti piguratibo a sayamusom, ket aniat’ resultana?

² Daytoy a napateg a gameng naited kadagiti apostol ni Jesus idi naiyegda iti aktibo a panagserbi ken Jehova a Dios iti aldaw ti Pentecostes idi tawen 33 ti Kadawyan a Panawentayo. Napnuan iti nasantuan nga espiritu, inrugida nga insaknap ti piguratibo a sayamusom, nga inlawlawagda “dagiti nakaskasdaaw nga aramid ti Dios.” (Aramid 2:1-4, 11) Babaen kadakuada ti sayamusom ti pannakaammo iti Dios maidanon kadagiti dadduma, saan laeng a kadagiti natural a nakugit a Judio no di ket kasta met kadagiti di nakugit a nasion, tribo, ili, ken pagsasao. (Aramid 10:34, 35) Minatmatan dagiti pudno nga adalan daytoy a panagserbi a kas napatpateg ngem iti amin a material a kinabaknang nga inurnong ti tattao maipaay iti bagbagida.

 3. Kasanot’ kalawana ti agdama a pannakaisaksaknap ti sayamusom ti pannakaammo ti Dios, ket aniat’ kasapulan nga iyimtuodtay iti bagitayo?

³ Itatta, ti grande a trabaho a panangisaknap ti sayamusom ti pannakammo iti Dios ket agdama a maar-aramid iti intero a daga​—iti kasasaknapan pay laeng iti historia ti tao. Iramanna ti panangaskasaba iti intero a sangatauan maipapan iti naipasdeken a Pagarian ti Dios iti sidong ti nadutokan nga Arina, ni Jesu-Kristo. (Mateo 6:10; Aramid 1:8) Matmatmatanyo kadi ti trabaho a panangipakaammo iti Ari ken ti Pagarianna a kas maysa a di magatadan a gameng? Ni Jesu-Kristo, a nangiyun-una ti pannakaikaskasaba ti naimbag a damag ti Pagarian, kastat’ panangapresiarna, a nangipaay iti pagwadan.​—Mateo 4:17; 6:19-21.

Panangpabanglo iti Dalan ti Prusision ti Panagballigi

 4. Sigun iti 2 Corinto 2:14, kasanot’ panagiturturong ita ti Dios kadagiti adipenna ditoy daga, ket iti ania nga kaugalian idi ugma ti iparparipirip dagiti sasao ni Pablo?

⁴ Apay a ti panagserbi iti Dios maysa a banag a maipatpateg unay? Maysa a rason a ta uray itan dagidiay agserserbi ken Jehova addaanda iti nakaskasdaaw a pribilehio nga iturong ida ti Dios iti grande a prusision ti panagballigi. Sigun iti New International Version, ti 2 Corinto 2:14 kunana: “Ngem yaman pay iti Dios, isu a mangiturong kadakami iti prusision ti panagballigi a makikadua ken Kristo ket babaen kadakami iwarasna ti sayamusom ti pannakaammo kenkuana met laeng [“pagbalinenna a ti pannakaammotay kenkuana maisaknap iti intero a lubong a kas makaay-ayo a bangbanglo!” Phillips].” Dagidiay a sasao ni apostol Pablo agparang a tuktukoyenda ti ugali idi ugma a pannakaadda ti prusision ti panagballigi.a

 5, 6. (a) Aniat’ napasamak bayat ti prusision ti panagballigi dagiti Romano idi ugma, ket aniat’ kaipapanan ti makaay-ayo a sayamusom kadagiti dadduma? (b) Aniat’ naespirituan a pakaiyaplikaran ti ilustrasion idiay 2 Corinto 2:14-16?

⁵ Idi kaaldawan ti republika ti Romano, maysa kadagiti kangatuan a dayaw a mabalin a maipaay ti Senado iti maysa a naballigi a heneral ket isut’ panangipalubos kenkuana a mangrambak ti panagbiktoriana buyogen iti naranga a prusision ti panagballigi. Ti Romano a prusision nabannayat a dumalan iti Via Triumphalis ken sumang-at iti nasikko-sikko a dalan nga agturong iti templo ni Jupiter iti tuktok ti Capitoline Hill. Dagiti ari, prinsipe, ken heneral a nakautibo iti gubat, agraman dagiti annak ken katulonganda, ket maisurotda a nakawaran, a masansan a nalabosan, agpaay a pakalaisan ken pakaibabainanda.

⁶ Bayat a lumabas ti prusision iti siudad ti Roma, mangipurruak dagiti umili iti sabsabong iti sanguanan ti karuahe ti nagbiktoria, ket ti mapupuoran nga insienso pabangluenna ti intero a pagdalananna. Daytoy makaay-ayo a sayamusom kaipapananna dagiti dayaw ken nataltalged a biag para kadagiti naballigi a soldado. Ngem kaipapananna ti patay kadagiti di napakawan a balud a mapapatayto kalpasan ti prusision. Daytoy ti mangilawlawag iti naespirituan a panangiyaplikar ni Pablo iti ilustrasion idiay 2 Corinto 2:14-16. Dayta a ladawan ipresentarna ni Pablo ken dagiti padana a Kristiano kas napasnek a sakop ti Dios, “a makikadua ken Kristo,” a sumursurotda amin iti naballigi a parada ti Dios ket Isut’ mangiturturong kadakuada iti grande a prusision a magna kadagiti napabanglo a dalan.

Banglo iti Biag wenno Angot ni Patay

 7, 8. (a) Kasanot’ panangisaksaknap dagiti Saksi ni Jehova iti sayamusom ti pannakaammo ti Dios? (b) Bayat nga isaksaknap dagiti Saksi ti piguratibo a sayamusom, aniat’ tignay dagidiay maisalsalakan? (c) Aniat’ tignay dagidiay agsagsagaba?

⁷ Babaen iti panangisaknap iti isuamin a lugar kadagiti kinapudno ti Biblia maipapan iti Pagarian ti Dios iti sidong ni Kristo, dagiti Saksi ni Jehova isaksaknapda, iparparangarangda, ken ipampamatmatda iti sadinoman ti makaay-ayo a sayamusom ti pannakaammo ti bendito a Dios a ti kinapudno manipud kenkuana winayawayaanna ida manipud ulbod a relihion. Agmarmartsada a sibaballigi iti panagserbi ken Jehova. Ti sagsagutda ti panagserbi kas dagiti Saksina ken ti Arina ket kaslada makaay-ayo nga insienso ken Jehova. Gapuna, maapresiartayo ti kayat a sawen ti apostol idi a kinunana: “Iti Dios dakami ti maysa a makaay-ayo a banglo ni Kristo kadagiti maisalakan ken kadagiti mapukaw; kadagiti naud-udi dakami ti angot ni patay a maipaay iti ipapatay, kadagiti immun-una dakami ti banglo ti biag a maipaay iti biag [“maysa a napateg a sayamusom a mangiyeg iti biag,” The New English Bible; “ti makagin-awa a sayamusom ti biag a mismo,” Phillips].”​—2 Corinto 2:15, 16.

⁸ Dagiti napudno a tattao nga addaan marakarnero a takder mariknada ti kinasam-it ti pannakaammo ni Jehova nga insaknap dagiti Saksina. Kadagita a tattao ti trabaho a panangaskasaba adda angotna a salun-at ken biag, iti panagbiag, makaited-biag a kinapudno. Agyamanda ken Jehova ken ti Arina, a ti prusisionda iti panagballigi ket makiramanda, ket ipukkawda a nalaing: “Ti pannakaisalakan nagtaud iti Diostayo, nga agtugtugaw iti trono, ken iti Kordero.” (Apocalipsis 7:10) Sumay-opda iti atmospera ti kinapudno ti Pagarian, a makapabang-ar a sayamusom ti biag a mangiturong iti biag. Ngem ni Satanas ken dagiti demoniona binallikogda ti panagsay-op dagidiay agkamkammatalek iti ulbod a relihion, gapuna appotenda ti agongda ket silalais a pagkedkedanda ti kinapudno. “Kadagiti di maisalakan,” ti kinapudno ken dagiti matalek nga agik-ikut iti dayta isaknapda ti sayamusom ni patay a mangiturong iti ipapatay. Wenno kas panagkuna ti New International Version: “Iti maysa datayo ket angotnatayo ni patay.” Ti patarus a Phillips ipaulogna dayta nga: “Iti naud-udi kasla iti makapapatay nga angot ti pannakadadael.”

 9. Ania a saludsod ti iyimtuod ita ni Pablo, ket kasanoyo a sungbatan, ken apay?

⁹ “Ket kadagitoy a bambanag siasino ti makaanay?” inyimtuod ti apostol. (2 Corinto 2:16) Kayat dayta a sawen, “siasino ti makakualipikar iti kastoy a trabaho?” (The Jerusalem Bible) “Ket iti serbisio a kas itoy siasinot’ makabael?” (Weymouth) Ti Nainkasuratan a sungbat ket: Dagiti Saksi ni Jehova! Apay? Gapu ta dagiti laeng dedikado a tattao a napudno, napasnek, ken awanan naagum a panggep ken agsasao iti kinapudno, di pagduaduaan ken awanan pannakikompromisona iti ulbod a relihion, isudat’ kualipikado iti daytoy a trabaho a panangisaknap ti sayamusom iti pannakaammo ti Dios.​—Colosas 1:3-6, 13; 2 Timoteo 2:15.

10. Apay a saan a makakualipikar dagiti klero iti trabaho a panangisaknap iti sayamusom ti pannakaammo ti Dios?

¹⁰ Ti klero ti Kakristianuan, a mangsapsapul iti nasayaat a takder iti daytoy a lubong, napaay nga agbalin a kualipikado ken maikari iti daytoy awan-agumna a serbisio. Apay? Agsipud ta saanda a naabot ti pagalagadan nga impamatmat ti sasao ni apostol Pablo: “Saankami a kas kadagiti adu nga agilaklako iti sao ti Dios, no di ket agsaokami iti biang ni Kristo a buyogen ti kinapudno a kas nagtaud iti Dios, ken kas iti imatang ti Dios.” (2 Corinto 2:17) Wenno kas panagkuna ti New International Version: “Saan a kas iti kaaduan, dikam ilaklako ti sao ti Dios tapno pagganansiaan. Imbes ketdi, iti biang ni Kristo agsaokami iti imatang ti Dios buyogen ti kinapasnek, kas tattao nga imbaon ti Dios.”

11, 12. (a) Apay a dagiti Saksi saanda nga “aglaklako ti sao ti Dios” gaput’ panangakseptarda kadagiti donasion? (b) Maigiddiat iti nagamporan a bersion ti Kinakristiano a ginatang ti adu, aniat’ idiaya dagiti Saksi ni Jehova?

¹¹ Dagiti Saksi ni Jehova imbaon ida ti Dios, ket ar-aramidenda ti panangaskasaba iti sidong ti imatang ti Dios. Nupay no mangipaayda kadagiti interesado a tattao kadagiti napateg a libro ken dadduma a publikasion a mangilawlawag iti Sao ti Dios ken akseptarenda dagiti donasion a maipaay iti sangalubongan a trabaho ti panangikaskasaba ti Pagarian, dayta nga aramid ket saan a panangilako wenno pananggampor iti Sao ti Dios. Kinapudnona, dagita a donasion ket basta tulongda laeng maipaay iti panangisaknap ti pannakaammo iti Dios kadagiti dadduma pay.

¹² Nakaad-adu ita, sipupuotda man wenno saan, ti gimmatang iti nagamporan a bersion ti Kinakristiano, ta maitunosda kadagiti naagum a tarigagayda ken saanna a paileten ti estilo ti panagbiagda. Mamatida nga akseptaren ida ti Dios gapu iti panagkunada nga addaandat’ naimpusuan nga ayat kenkuana. Nupay kasta, no maipakita a ti Sao ti Dios ket maikaniwas kadagiti pammati ken konduktada, tiritirenda ti Kasuratan tapno itandudoda dagiti personal nga opinion iti ngatuen ti umiso a pannakaawat ti Biblia. (Mateo 15:8, 9; 2 Pedro 3:16)) Ngem dagiti Saksi ni Jehova ipaayda ti puro, awan gamporna a kinapudno manipud iti Biblia, iti kasta mangpataudda iti makaay-ayo a sayamusom a maakseptar iti Dios ken kadagiti pudno a managdaydayawna. Gapuna inwaksida dagiti amin a narelihiusuan a tradision ken lapped iti pannakaadda iti pudno a pannakaammo iti Dios.

13. Siasino, malaksid kadagiti napulotan a Kristiano, ti adda iti prusision ti panagballigi ti Dios, ket aniat’ ar-aramidenda sadinoman ti papananda?

¹³ Pudno unay, ti kaadda iti prusision ti panagballigi ti Dios a kadua ni Kristo ket maysa a di maartapan a pribilehio a tinagiragsak saan laeng a dagiti napulotan a Kristiano no di ket kasta met ti “dakkel a bunggoy” dagiti “sabsabali a karnero” uray pay itan, ta ti panagballigi ti Pagarian ket asidegen. (Apocalipsis 7:4, 9; Juan 10:16) Bayat nga ur-urayentayo ti ad-adu pay a panagbiktoria ti naballigi nga Aritayo, sadinoman a papanantayo isaknaptayo ti makaited-biag a pannakaammo ti Dios a kas bangbanglo, wenno napateg nga insienso, kadagidiay ti puspusoda ket gumawgawawa iti kinapudno ken kinalinteg. Anian a pribilehio para kadagidiay kualipikado iti daytoy nakaskasdaaw a trabaho!​—Juan 17:3; Colosas 3:16, 17.

Autorisado kas Tattao a Manangisaknap iti Bangbanglo

14. Apay a dagidiay mangisaksaknap iti sayamusom ti pannakaammo ti Dios saanda a kasapulan ti sertipiko ti pannaka-autorisar manipud kadagiti tattao?

¹⁴ Ngem dagidiay ngata mangisaknap ti sayamusom ti pannakaammo iti Dios ken ti Pagarianna kasapulanda ti diploma wenno sertipiko ti autorisasion manipud iti tattao? Saan! Naipaayantayon iti kalintegan, wenno nadutokantayon, kas Saksi maipaay iti Daydiay Kangatuan iti uniberso. Ngarud, ditay agkedked a mapan iti tay-ak a mangisaknap ti sayamusom iti naimbag a damag ti Pagarian ti Dios. Laglagipenyo nga iturturongnatayo ni Jehova. Naisayangkat ti ministerio ni Jesus iti imatang ti “panangsupring dagiti managbasol.” (Hebreo 12:3) Kaskasdi, ti rekord ti trabaho ni Jesus iti tay-ak, kas masarakan iti Biblia, pudno pay laeng, ket ti trabahona iti tay-ak agserbi a pakakomendaranna ken mangikalintegan a mangsuportar kenkuana kas maysa a pudno a ministro ni Jehova a Dios.

15. Kasanot’ panangipakita ni apostol Pablo a dagiti pudno a Kristiano saanda a kasapulan ti “surat ti rekomendasion”?

¹⁵ Ni apostol Pablo naipasango met iti umasping a makakarit a kasasaad idi kaaldawanna babaen iti panangipaayna iti daytoy nga argumento: “Baliwanmi manen aya nga irekomendar dagiti bagimi met laeng? Wenno masapul ngata, a kas kadagiti dadduma, dagiti sursurat ti rekomendasion a maipaay kadakayo wenno iti biangyo? Ti suratmi dakayo met laeng, a naisurat iti puspusomi, nga ammo ken basaen dagiti isuamin a tattao. Ta maiparangarang a dakayo ti maysa a surat ni Kristo nga insuratmi kas ministro, a nasuratan saan nga iti tinta no di ket iti espiritu ti Dios a sibibiag, saan a kadagiti taptapi a bato, no di ket kadagiti taptapi a puspuso a naglasag.”​—2 Corinto 3:1-3.

16. Ania a kita ti surat ti ipresentar dagiti Saksi ni Jehova kas testimonial a pammaneknek a ti ministerioda ket aggapu iti Dios?

¹⁶ Dagiti agturay ti lubong saanda a bigbigen ti pannakaibaontayo a kas dagiti Saksi ni Jehova. Ngem bay-antayo a ti trabahotayo a panangisaknap ti sayamusom ti pannakaammo ni Jehova ti mangpaneknek a mismo iti dayta! Saan a mabalin a mapunas daytoy a trabaho, nupay dadduma a tattao agkitakitda a mangbasa iti daytoy testimonial a pammaneknek ti ministeriotayo. Dagiti klero iparangda dagiti dokumentoda ti sertipikasion manipud iti mangituray a bagi dagiti klero. Dagita, nupay kasta, ket basta papelda laeng, sao ti tao. Dagiti Saksi ni Jehova, malaksid iti panangadawda ti suporta manipud iti Sao ti Dios, agserbida a kas pammaneknek iti lasag ken dara. Ti dakkel a bunggoy dagiti sabsabali a karnero a nakaidanonan ti naimbag a damag ti Pagarian naurnongda metten iti kannawan a dasig ti Ari ni Jehova. (Mateo 25:33, 34) Amin dagitoy isudat’ surat ti rekomendasiontayo, maysa a surat a datayo a kas Saksi ni Jehova ikuykuyogtayo iti sadinoman iti puspuso ken is-isiptayo ken mabalin a maiparangarangtayo buyogen ti panagtalek. Dagidiay agtakder iti dasig ti sapasap a kinasoberano ti Dios ken makipaset iti panagserbi iti Dios a kadua dagiti Saksi ni Jehova ket dokumentoda a mismo iti rekomendasion a di maliklikan a mabasa ken maam-ammo ti amin a tao.

17. Kasano a naisurat ti “surat ni Kristo” kadatayo, ket apay a kunaen ni Pablo a naisurat dayta kadagiti puspuso?

¹⁷ Siempre, daytoy ti mamagpungtot ken mamagimun kadagiti ulbod a relihionista no basaenda dayta. Nupay kasta, ti umad-adu a dakkel a bunggoy dagiti sabsabali a karnero ket surat iti rekomendasion manipud ken Kristo, ti Naimbag a Pastor, a mangus-usar kadagiti amin a Saksi ni Jehova iti panangpastor a trabaho. Datayo ti pluma, wenno tattao nga instrumento, nga usarenna a mangaramid itoy a surat. Ti surat ket saan a naikor-it iti tinta a mabalin a maburar, no di ket naikor-it babaen iti tulong ti aktibo a puersa, wenno espiritu, ti Dios, nga agtignay para kadatayo. Saan a kas iti kaso ni Moises idi a ti linteg dagiti Sangapulo a Bilin ket naisuratda babaen iti ramay ti Dios kadagiti dua a tapi ti bato. Ti surattayo ket naikor-it kadagiti nainlasagan a tapi ti puspuso ti tao, ta ti naespirituan a ministeriotayo pataudenna ti panagbalbaliw iti isip ken puso kadagiti umawat iti sayamusom ti naimbag a damag.

18. Ania a resulta ti mamagbalin kadagiti nakaawat iti naimbag a damag a surat ti rekomendasion?

¹⁸ Ti trabahotayo maipapan iti Sao ti Dios nakaaramid iti impresion kadagiti manangapresiar nga immawat ti naimbag a damag ket nakaipaay kadagiti nakaskasdaaw a panagbalbaliw. Ti pangngeddengda nga agserbi iti Dios ket napaneknekan a saan a basta apagbiit a regta gaput’ panangtukay kadakuada ti emosional nga ebanghelista. Imbes ketdi, irepresentarna ti naan-anay a panagbalbaliw ti biagda a naibatay iti kasla kristal ti kasin-awna a kinapudno iti Santa Biblia. Ti panagayat iti pudno a Dios, a ni Jehova, tignayenna ida a ‘mangikkat ti daan a personalidad agraman dagiti derrep a mangallilaw ket ikawes ti baro a personalidad,’ a mangiparangarang “ti bunga dagiti espiritu.” (Efeso 4:20-24; Galacia 5:22, 23) Nupay kasta, ti resultana pagbalinenna ida a surat ti rekomendasion. Nalawlawag ti panangiyebkasna ngem iti aniaman a surat nga inkor-ittayo wenno babaen iti aniaman a makitkita nga organisasion a mabalin a mangibaon kadatayo.

19. Kasanot’ panangdeskribir ni Pablo kadagiti kualipikasion dagiti “ministro ti baro a tulag,” ket aniat’ epekto ti trabahoda iti dakkel a bunggoy?

¹⁹ Idiay 2 Corinto 3:4-6 ituloy ni Pablo: “Ket iti kasta a panagtalek iti Dios adda kadakami gapu ken Kristo. Saankam a makakualipikar a dakdakami laeng a mangpanunot iti aniaman a kas aggapu kadakami met laeng, no di ket ti pannakakualipikarmi aggapu iti Dios, a nangaramid met kadakami a makakualipikar a kas ministro ti baro a tulag.” Nupay no dagidiay laeng napulotan a natda ti “ministro ti baro a tulag,” ti trabahoda addaan epekto iti dakkel a bunggoy dagiti sabsabali a karnero, ket apektarannanto pay dagiti di mabilang kadagita a sabsabali a karnero a kasapulan pay a matipon. Daytoy ti panagtalek nga adda kadagiti amin a Saksi ni Jehova babaen ken Kristo Jesus a maiturong ken Jehova. Ti natda pabilgenda a siyayaman ti dakkel a bunggoy dagiti sabsabali a karnero a makipaset a naimpusuan iti ‘panangaramid-surat’ a ministerio nga impadto ni Jesu-Kristo idiay Mateo 24:14 ken Mateo 28:19, 20.

20. (a) Aniat’ ipakita ti report ti Yearbook maipapan kadagidiay mangisaksaknap iti sayamusom ti pannakaammo ti Dios? (b) Aniat’ mabalintay amin a maibaga maipapan iti kualipikasiontayo iti ministerio a panangaramid-surat?

²⁰ Daytat’ naaramidanda, kas nalawag iti report ti 1990 Yearbook a mangipakita a dagiti Saksi ni Jehova isaksaknapda ti sayamusom ti pannakaamo ti Dios iti 212 a pagpagilian. Ti bilangda nasurok a 3,787,000 nga aktibo a manangibumbunannag, ket idi napan a tawen laeng nangbusbusda iti agarup 835,000,000 nga oras iti panangikaskasaba ti naimbag a damag ti Pagarian. Iti Pangrabii ti Apo idi napan a tawen, 9,479,064 ti timmabuno. Agpadpada a dagiti napulotan ken dagiti miembro ti dakkel a bunggoy dagiti sabsabali a karnero mabalinda a kunaen: “Ti pannakakualipikarmi aggapu iti Dios.” Wenno kas panangikunat’ The Jerusalem Bible: “Amin dagiti kualipikasionmi naggapuda iti Dios.”

21. Aniat’ masapul nga ar-aramidentayo koma amin, ken apay?

²¹ Gapuna, isaknaptayo ti makaay-ayo, makaited-biag a sayamusom ti pannakaammo ti Dios iti isuamin a lugar! Pagbalinen ti atmospera ti teritoria ti kongregasionyo a napnuan iti sayamusom ti pannakaammo ken Jehova. Kalpasanna, kas naballigi a teokratiko a Heneral, iturongnakayto iti prusision ti panagballigi bayat nga amin dagiti Saksina umabanteda iti daytoy moderno-aldaw a ministerio ti kinadayag!

[Dagiti Footnote]

Kasanoyo a Sungbatan?

◻ Ania nga ilustrasion ti inusar ni Pablo idiay 2 Corinto 2:14-16?

◻ Ania ti epektona kadagiti sabsabali ti panangisaknap ti sayamusom ti pannakaammo ti Dios?

◻ Siasinoda laeng ti kualipikado iti daytoy a trabaho, ken apay?

◻ Apay a dagiti mangisaksaknap iti sayamusom saanda a kasapulan ti naisurat iti papel a rekomendasion maipaay iti trabahoda?