Agur-uray ti Rag-o Kadagidiay Makasarak iti Kinapudno
ITI attic-na (siled iti bubongan), nasarakan ti maysa a lalaki a Pinlandes ti libro a The Divine Plan of the Ages. Dagus a rinugianna a binasa dayta, ket di nagbayag kinunana iti bagina, ‘Daytoy ti kinapudno; daytoy ti kinapudno.’ Idi makaulog manipud iti attic, imbagana ken ni baketna, “Nasarakakon ti pudno a relihion.”
Karkarna daytoy a kapadasan iti pamay-an ti pannakasarak daytoy a lalaki iti kinapudno, ngem adu kadagiti Saksi ni Jehova ti makaisalaysay iti kasta met laeng a reaksion. Maibagada amin kadakayo ti maipapan iti rag-o a yeg ti pannakasarak iti kinapudno. Itampok daytoy dagiti sumaganad a kapadasan.
Mangyeg Rag-o Dagiti Pudno a Sursuro ti Biblia
Dimmakkel ni Margarita Königer idiay Munich, Alemania, idi panawen ti Gubat Sangalubongan II. Gagangay a buya dagiti nabomba ken napuoran a balbalay. Natay iti gubat ni manongna. Iti itatabunona kadagiti serbisio ti iglesia Katolika, nangngeganna dagiti kararag nga agpaay kadagiti soldado nga Aleman ken iti führer, ni Hitler. Kalpasan ti gubat, immawat iti scholarship tapno makapagadal iti maysa a kolehio idiay Estados Unidos kas paset ti maysa nga student-exchange program. Nariknana a mannakigayyem dagiti tattao kenkuana, isu a nasdaaw no ania ti kasla nangtignay kadagiti tao, a ti natural a tarigagayda ket agbiag iti kinatalna, tapno agiinninap ken aggiginnura idi panawen ti gubat. Idi nagsubli idiay Munich, nasarakan dagiti Saksi ni Jehova, ket babaen ti pannakipagadalna iti Biblia kadakuada, nasarakanna ti sungbat dagiti saludsodna. Kunana: “Naipakita kaniak manipud Biblia a nairaman dagiti dakes nga espiritu a puersa . . . Aw-awagan ida ti Biblia a ‘dagiti agturay iti lubong,’ ken, iti kinapudnona, maikuna a ni Satanas ‘ti mangyaw-awan iti intero a mapagnaedan a daga.’ . . . No ibatay iti kinadakes, sinasairo a panagtignay dagiti nasion ken ili, nainkalintegan ken makapnek ngarud daytoy a sungbat!”—Efeso 6:12; Apocalipsis 12:9.
Kuna pay ni Margarita: “Nangipaay kaniak iti dakkel a rag-o ti pannakaammo maipapan iti probision ti Dios a pangrisut kadagiti parikut ditoy daga. Saan, pulos a saan a babaen ti ideolohia wenno panangiwanwan ti tao, kas ituktukon dagiti edukador iti lubong. Imbes ketdi, ipakpakita ti Biblia a ti maysa a baro a nailangitan a gobierno ti mangiturong iti bambanag ditoy daga. . . . Insuro ni Jesu-Kristo dagiti pasurotna nga agkararag: ‘Umay koma ti pagariam.’ . . . Nangrugi a maawatak a daytoy a pagarian ket maysa a pudpudno a gobierno ken babaen laeng iti dayta a magun-odan ti pudpudno, sangalubongan a talna.” Iti las-ud ti agarup 30 a tawen, nagserbi ni Margarita kas maysa a misionera iti lima a pagilian ti Africa—ti naudi a 19 a tawen ket binusbosna iti panangiwaragawag ti kinapudno kadagiti napakumbaba a tattao ti Ouagadougou, Burkina Faso.
Saan a naidumduma ti kapadasan ni Margarita. Adu met laeng ti nagtigay a sipopositibo idi masarakanda a ti klero ti Kakristianuan iti agsinnumbangir a dasig ti panagdadangadang ket agkarkararag iti Dios maipaay iti panagballigi. Makita dagiti nasingpet-panagpuspusona a tattao ti kinanainkalintegan ti panangilawlawag ti Biblia a saan a makiramraman ti Dios kadagiti gubat ti tao no di ket mapaspasamak dagitoy gapu ta “ti intero a lubong adda iti pannakabalin daydiay nadangkes.” Masursuro dagitoy nga agsapsapul iti kinapudno a dagiti pudno a Kristiano rumbeng a “saanda a paset ti lubong” no di ket agtalinaedda a neutral iti ar-aramid daytoy. Gapu ta nabigbigda ti kastoy a takder dagiti Saksi ni Jehova, nakumbinsir dagitoy kabbaro nga interesado a nasarakanda ti kinapudno. Rimmang-ayda iti namnama ken rag-o bayat a gumunggun-odda iti rumangrang-ay a pannakaammo no apay a pinalubosan ti Dios ti kinadakes ken no kasano nga iti di agbayag, agrairanton dagiti natalna ken nalinteg a kasasaad ditoy daga babaen ti Pagarianna.—1 Juan 5:19; Juan 17:16; Mateo 6:9, 10.
Mangyeg Rag-o Dagiti Pudno a Prinsipio iti Biblia
Narikna ni Daniel Rosero a taga-Ecuador nga awan-serserbi ti biag, isu a rinugianna ti agbartek. Insuro kenkuana ti relihion a nakaikamenganna a ti kakaisuna a banag a manamnamana isu ti ipapatay ken ti umap-apuy nga impierno. Simmungbat, “Mapuoranak met la gayam, bay-andak ngarud nga aginum!” Walo dagiti mangbukel iti pamiliana a mabaybay-annan, ken kankanayon a makiringringgor ken ni baketna, a Delia. Maysa a dakkel a panagbalbaliw ti napasamak iti maysa nga agsapa ti Domingo idi sinarungkaran ida dagiti Saksi ni Jehova ken narugian ti panagadal iti Biblia. Idi damo a gundaway a timmabuno ni Daniel iti maysa nga asamblea sirkito dagiti Saksi ni Jehova, nabigbigna a nasarakannan ti kinapudno. Kunana: “Nasdaawak iti urnos. Agtutunos dagiti tattao, ti adu kadakuada. Mariknayo ti ayat iti kaaduan. Awan ti agsigarilio. Awan naalas a sasao. . . . Malagipko pay a pampanunotek idi, ‘Daytoy ti kinapudno!’ Saan a ti buteng iti ipapatay wenno buteng iti panagngudo ti lubong ti nangguyugoy kaniak. Isut’ kinadalus ti organisasion.”
Nagbalin a Saksi ni Jehova ti intero a pamilia a Rosero. Dimmur-as ti biag ti pamilia ken ti kasasaadda iti ekonomia bayat nga impakatda dagiti prinsipio iti Biblia. Kuna ni Delia Rosero: “Ammoyo, utangko amin dagitoy iti kinapudno ti Biblia. Siasino ti makaammo no sadinot’ yan koman dagiti annakko no awan ti Sao ti Dios? Aminda a pito ket nabautisaran ken natibkerda. Ti kinapudno kaipapanannat’ maysa a naan-anay a baro a biag, baro a kinaragsak, para kaniak.”
Saan a naidumduma ti kapadasan ti pamilia a Rosero. Adu iti kaaldawantayo ti maaburido kadagiti parikut. Maysa a rason ti gagangay a kinaawan-panagraem kadagiti pagalagadan iti moral a nailanad iti Biblia, saan a kas kadagiti nagkauna a kaputotan. Sinurot ti kaaduan a relihion daytoy a kababalin, iti kinalulok man wenno gapu ta mariknada a gapu iti panagbalbaliw ti panawen naglabasen ti moraltayo. Gapuna, kas iti dadduma, nabaybay-an dagiti Rosero nga agar-arikap [iti kasipngetan] nga awan panangiwanwan ti Biblia. Nupay kasta, no matarusan ti kakasta a napakumbaba a tattao ti panangmatmat ti Dios iti moral ken biag ti pamilia, ipakatda a di agtantan ti maad-adalda. Manipud kadagiti salaysayda makitatayo dagiti pagimbagan ti panangaramid iti daytoy.
Masapul a Patanoren ti Rag-o
Nupay kasta, di kayat a sawen daytoy a ti maysa a Kristiano ket kankanayon nga adda iti naragsak a kasasaad. Nalawag, maapektaran met dagiti Kristiano kadagiti parikut a sangsanguen dagiti kaaduan a tattao, kas ti kinaawan-trabaho, sakit, ken ipapatay. Kasapulan met nga agtultuloy a makidangadang dagiti Kristiano maibusor iti bukodda a pagkurkurangan ken pagkapkapuyan. Kunaen ti salaysay iti Biblia a ni Lot ket “mariribukan unay idi iti panagpennek dagiti managsalungasing-linteg a tattao iti nalulok a kababalin” iti siudad ti Sodoma. Saan a maliklikan dagiti matalek a Kristiano dagiti umasping a rikna no makitada nga agraraira dagiti dakes a kasasaad.—2 Pedro 2:7, 8.
Nupay kasta, adda pagsayaatan dagidiay nakasarak iti kinapudno. Kas pagarigan, ti maysa a manamati nga agledleddaang gapu iti maysa a tao a natay saanen a kasapulan nga “agladingit a kas met kadagiti dadduma nga awanan namnama.” Adda pagpatinggaan ti panagladingitna. Pudno met daytoy no maipapan iti dadduma pay a parikut. Ammo ti tao a nakasarak iti kinapudno a temporario laeng dagiti agdama a kinarigat. Ti namnama ti mamagbalin a nalaklaka ti agibtur iti sidong dagiti pakarigatan. Makatulong met ti maysa a natimbeng nga estilo ti panagbiag.—1 Tesalonica 4:13.
Impaay ni Pablo daytoy a balakad kadagiti Kristiano: “Kankanayon nga agrag-okayo iti Apo. Maminsan pay a kunaek, Agrag-okayo!” (Filipos 4:4) Ipakpakita daytoy a bayat a magun-odantay amin ti rag-o, posible met ti saantay a pannakagun-od iti dayta. Dagiti pakaringgoran daytoy daan a sistema ti bambanag ket napaneknekan a lapped. Mainayon pay, ibagbaga kadatayo ti Biblia a kasapulan a sukayentayo ti rag-o, a maysa kadagiti bunga ti espiritu ti Dios. (Galacia 5:22) No agtultuloykayo a gumun-od iti pannakaammo iti kinapudno ken ipalagip iti bagiyo dagiti naespirituan a kinabaknang a yeg daytoy ken yegnanto pay, pulos a dinto kumapuy ti rag-oyo. Agbalinto daytoy a napigpigsa bayat nga umas-asidegtayo iti panawen inton “punasennanto [ti Dios] ti amin a lua” kadagiti mata dagiti tattao ken inton uray ti “panagleddaang wenno panagsangit wenno ut-ot” naglabasdan.—Apocalipsis 21:4.
[Dagiti Ladawan iti panid 8]
Adu ti maawis iti rag-o ken nasayaat nga urnos kadagiti asamblea dagiti Saksi ni Jehova