LIDIA

Daytoy a babai ken ti sangakabbalayanna ket karaman kadagiti umuna a tattao idiay Europa a nagbalin a Kristiano kas resulta ti trabaho ni apostol Pablo idiay Filipos idi agarup 50 K.P. Sigud nga agnanaed ni Lidia idiay Tiatira, maysa a siudad iti Asia Menor a nalatak gapu iti industria a panagtina. Idi agangay, idiay Filipos iti Macedonia, naglako ni Lidia iti purpura, mabalin a ti tina wenno ti kawkawes ken luplupot a namarisan iti dayta. Agparang nga isu ti pannakaulo ti sangakabbalayanna (mabalin a mairaman ditoy dagiti katulong ken adipen), ket ngarud mabalin a balo wenno awanan asawa.​—Ara 16:14, 15.

Kas “managdaydayaw iti Dios,” nalabit Judio a proselita ni Lidia. Mabalin nga adda sumagmamano a Judio idiay Filipos ken awan ti sinagoga sadiay isu nga iti aldaw ti Sabbath, ni Lidia ken ti dadduma pay a debotado a babbai naguummongda iti igid ti maysa a karayan iti ruar ti siudad. Idi kinasabaan ni apostol Pablo dagitoy a babbai, sipapasnek a nagimdeng ni Lidia. Kalpasan a nabautisaran agraman ti sangakabbalayanna, impakaasina ken Pablo ken iti kakaduana nga agdagusda iti pagtaenganna, a kinunana: “No impatoyo a matalekak ken Jehova, sumrekkayo iti balayko ket agyankayo.” Saan la ketdi a mapagkedkedan ti kasta a naimpusuan nga awis a panangpadagus. Ti mannurat iti Aramid, ni Lucas a kadua ni Pablo iti panagdaliasat, innayonna: “Impapilitna nga umaykami.”​—Ara 16:11-15.

Idi agangay, kalpasan a naluk-atan da Pablo ken Silas manipud pagbaludan, napanda manen iti pagtaengan ni Lidia. Sadiay pinaregtada dagiti kakabsat ket kalpasanna pinanawanda ti Filipos.​—Ara 16:36-40.

Mabalin a gapu iti kinamanagpadagus ni Lidia, insurat ni Pablo kadagiti taga Filipos: “Agyamanak a kankanayon iti Diosko iti tunggal pannakalagipko kadakayo iti tunggal ararawko a maipaay kadakayo amin, bayat nga ipapaayko ti ararawko a buyogen ti rag-o, gapu iti kontribusion nga impaayyo iti naimbag a damag nanipud idi umuna nga aldaw agingga itoy a kanito.”​—Fil 1:3-5.