Panangadal iti Sekreto ti Pannakapnek

Iti maysa a makaparegta a suratna kadagiti Kristiano idiay Filipos, kinuna ni apostol Pablo: “Kadagiti aniaman a kasasaadko, naadalko ti mapnek. . . . Iti amin a banag ken kadagiti amin a kasasaad naadalko ti palimed agpadpada no kasano ti mabsog ken no kasano ti mabisinan, agpadpada no kasano ti maaddaan iti kinaruay ken no kasano ti agsagaba iti kinakirang.”​—Filipos 4:11, 12.

Ania ti sekreto ti pannakapnek ni Pablo? No panunoten ti kangina dagiti gagatangen ken serbisio ken ti di natalged nga ekonomia iti tiempotayo, sigurado a pagimbagan dagiti pudno a Kristiano no sursuruenda ti mapnek tapno maitultuloyda a maipamaysa ti agserbi iti Dios.

ITI immun-una a paset ti suratna, dineskribir ni Pablo ti dati a naballigi a karerana. Kinunana: “No ti asinoman a sabali a tao pagarupenna nga addaan kadagiti pangibatayan iti panagtalek iti lasag, nangnangrunaak pay: nakugit iti maikawalo nga aldaw, nagtaud iti kapuonan ti pamilia ti Israel, iti tribu ni Benjamin, maysa a Hebreo a nayanak manipud kadagiti Hebreo; no maipapan iti linteg, maysa a Fariseo; no maipapan iti regta, nangidadanes iti kongregasion; no maipapan iti kinalinteg a babaen iti linteg, maysa a nangpaneknek iti bagina nga awan pakababalawanna.” (Filipos 3:4-6) Kanayonanna, kas maysa a napinget a Judio, ni Pablo ket inautorisaran ken supsuportaran dagiti panguluen a papadi idiay Jerusalem. Amin dagitoy ket nangipanamnama iti bileg ken kinatan-ok​—napolitikaan, narelihiosuan, ken awan duadua iti pinansial​—iti sistema dagiti Judio.​—Aramid 26:10, 12.

Ngem idi nagbalin ni Pablo a naregta a Kristiano a ministro, dakkel ti nagbaliwan ti bambanag. Maipaay iti naimbag a damag, situtulok a binaybay-anna ti naballigi a karerana ken amin a dati a napateg kenkuana iti sistema dagiti Judio. (Filipos 3:7, 8) Kasano a masuportaranna ita ti bagina? Masuelduan kadi kas maysa a ministro? Kasanona a magun-od dagiti personal a kasapulanna?

Intungpal ni Pablo ti ministeriona nga awan ti aniaman a bayad. Tapno saan a makapadagsen kadagiti pagserbianna, nakipagtrabaho kada Aquila ken Priscila iti panagaramid iti tolda bayat ti kaaddana idiay Corinto, ken nagaramid kadagiti dadduma pay a banag tapno adda pagbiagna. (Aramid 18:1-3; 1 Tesalonica 2:9; 2 Tesalonica 3:8-10) Adda tallo a nawatiwat a panagdaliasat ni Pablo kas misionero, ken nagsarungkar met kadagiti kongregasion a kasapulan a mabisita. Yantangay okupado unay iti panagserbi iti Dios, nanumo laeng ni Pablo. Masansan nga impaay dagiti kakabsat dagiti kasapulanna. Ngem no dadduma, nagsagaba iti kinakirang gapu iti narigat a kasasaad. (2 Corinto 11:27; Filipos 4:15-18) Agpapan pay kasta, di pulos nagreklamo ni Pablo maipapan iti kasasaadna, ken dina inapalan no ania ti adda kadagiti sabsabali. Situtulok ken siraragsak nga inggaedna ti nagtrabaho para iti pagimbagan dagiti padana a Kristiano. Kinapudnona, ni Pablo ti nangadaw iti nalatak a sasao ni Jesus: “Ad-adu ti kinaragsak iti panangted ngem iti panangawat.” Anian a naisangsangayan nga ulidan para kadatayo amin!​—Aramid 20:33-35.

Ti Kaipapanan ti Pannakapnek

Ti pannakapnek ni Pablo ti maysa a kangrunaan a makagapu iti kinaragsak ken kinakontentona. Ngem ania ti kaipapanan ti pannakapnek? Iti simple a panangibaga, kaipapananna ti kinakontento kadagiti kangrunaan a banag. Maipapan iti daytoy, kinuna ni Pablo ken ni Timoteo, ti kaduana iti ministerio: “Iti kinaagpaysuanna, dayta ket panggun-od iti dakkel a gunggona, daytoy nadiosan a debosion agraman iti pannakapnek. Ta awan ti inyegtayo iti lubong, ket saantay met a mabalin ti mangitugot iti aniaman a banag. Gapuna, no adda pagtaraon ken pagkawestayo, mapnektayon kadagitoy a banag.”​—1 Timoteo 6:6-8.

Imutektekanyo ta innaig ni Pablo ti pannakapnek iti nadiosan a debosion. Nabigbigna a ti napaypayso a kinaragsak ket agtaud iti nadiosan a debosion, kayatna a sawen, ti panangipangpangruna iti panagserbitayo iti Dios, saan a kadagiti namaterialan a sanikua wenno kinabaknang. Kasapulan laeng ti ‘taraon ken pagkawes’ tapno maitultuloyna a maiparangarang ti nadiosan a debosion. Gapuna, para ken ni Pablo, ti sekreto ti pannakapnek isu ti panagpannuray ken ni Jehova, aniaman ti kasasaad.

Adu a tattao ita ti kasta unay a maringgoran ken naladingit gapu ta saanda nga ammo dayta a sekreto wenno saanda nga ikankano dayta. Imbes a sukayenda ti pannakapnek, pilienda ti agtalek iti kuarta ken iti magatang ti kuarta. Ti industria ti patalastas ken ti media ipariknada kadagiti tattao a saanda a naragsak no awananda kadagiti kabaruan ken de kalidad a produkto ken alikamen​—ken gun-odenda a dagus dagitoy. Kas resulta, adu ti maigamer iti pananggun-od iti kuarta ken material a bambanag. Imbes a maaddaanda iti ragsak ken kinakontento, “matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba.”​—1 Timoteo 6:9, 10.

Naammuanda ti Sekreto

Iti kaaldawantayo, posible kadi a talaga a makasarak iti ragsak ken kinakontento no agbiag buyogen ti nadiosan a debosion ken pannakapnek? Wen, posible. Kinapudnona, minilion a tao ita ti talaga a mangar-aramid iti dayta. Naammuanda ti sekreto no kasano ti mapnek kadagiti banag nga adda kadakuada. Isuda dagiti Saksi ni Jehova, a nangidedikar iti biagda iti Dios, a mangar-aramid iti pagayatanna ken mangisursuro kadagiti tattao iti sadinoman mainaig kadagiti panggepna.

Kas pagarigan, utobenyo dagidiay nagboluntario a masanay ken naibaon kas misionero kadagiti ganggannaet a pagilian tapno ikasabada ti naimbag a damag ti Pagarian ti Dios. (Mateo 24:14) Saan a kas iti nakairuamanda, masansan a narigrigat ti kasasaad kadagiti pagilian a nakaibaonanda. Kas pagarigan, idi nakagteng dagiti misionero iti maysa a pagilian ti Asia idi rugrugi ti 1947, mapaspasaran pay laeng dagiti epekto ti gubat, ken manmano dagiti pagtaengan nga addaan kadagiti de koriente a silaw. Kadagiti adu a pagilian, nakita dagiti misionero a saggaysa a malabaan dagiti kawes iti maysa a tabla wenno bato iti karayan imbes a labaanda iti de koriente a washing machine. Ngem immayda tapno isuroda kadagiti tattao ti kinapudno iti Biblia, isu a nakibagayda kadagiti lokal a kasasaad ken nagbalinda nga okupado iti ministerio.

Dadduma ti simrek iti amin-tiempo a ministerio wenno immakarda kadagiti lugar a di pay naikasaba ti naimbag a damag. Nagserbi ni Adulfo kas amin-tiempo a ministro iti nasurok a 50 a tawen iti nagduduma a paset ti Mexico. Kunana: “Kas ken apostol Pablo, nasursuromi ken ni baketko no kasano ti makibagay iti kasasaad. Kas pagarigan, ti maysa kadagiti kongregasion a binisitami ket adayo iti siudad wenno tiendaan. Iti kada pannangan, mapneken dagiti kakabsat iti maysa laeng a tortilia a namantekaan ken naasinan bassit ken sangatasa a kape. Dayta laeng ti kanenda​—tallo a tortilia kada aldaw. Isu a nasursuromi ti agbiag a kas kadagiti kakabsat. Natagiragsakko ti adu a kapadasan a kas iti dayta bayat ti 54 a tawen nga amin-tiempo a panagserbik ken ni Jehova.”

Malagip ni Florentino no kasano a kasapulan idi a makibagay ti pamiliana kadagiti narikut a kasasaad. Iti pananglagipna iti kinaagtutubona, kunana: “Naballigi a negosiante ni tatangko. Adu ti lotena. Malaglagipko pay la ti counter iti groseriami. Adda drawer nga agarup 20  a pulgada ti kalawana ken 8 a pulgada ti kaunegna, ken addaan iti uppat a benneg. Ikabilmi dita ti mapaglakuanmi. Iti ngudo ti aldaw, kanayon a napno dayta iti sinsilio ken papel de banko.

“Di nagbayag, nabangkarotekami, ket pimmanglawkami. Napukawmi ti amin malaksid iti pagtaenganmi. Malaksid iti dayta, naaksidente ti maysa a manongko ket naparalisa ti dua a sakana. Saanen a nagsubli ti nanam-ay a kasasaadmi. Adda tiempo a naglakoak iti prutas ken karne. Naganiak met iti kapas, ubas, ken alfalfa, ken timmulongak a mangpadanum iti talon. Minatmatandak dagiti tattao kas nasigo iti adu a banag. Masansan a liwliwaennakami ni nanangko babaen ti panangibagana nga adda kadakami ti kinapudno, ti naespirituan a kinabaknang a manmano ti mangtagtagiragsak. Isu a naadalko ti agbiag a nanam-ay ken agbiag a nakurapay wenno awanan. Ita ta amin-tiempo a nagserbiak ken ni Jehova iti agarup 25 a tawen, maibagak a kanayon a nabendisionanak iti pannakaammo a napilik ti kasayaatan a dalan iti biag​—ti panagserbi ken ni Jehova iti amin-tiempo.”

Ipagpaganetget kadatayo ti Biblia a “ti buya daytoy a lubong agbaliwbaliw.” Gapu iti daytoy a rason, idagadagna pay kadatayo: “Dagidiay agrag-o kas [koma] kadagidiay di agrag-o, ken dagidiay gumatang kas kadagidiay di agtagtagikua, ket dagidiay mangus-usar iti lubong kas kadagidiay di mangus-usar a naan-anay iti dayta.”​—1 Corinto 7:29-31.

Gapuna, itan ti tiempo tapno sukimatem ti panagbiagmo. No saan a nanam-ay ti kasasaadmo, kitaem ta dika agrurod, ken mapno iti sakit ti nakem ken apal. Iti sabali a bangir, aniaman ti material a sansanikua a nalabit adda kenka, nainsiriban a maaddaanka iti umiso a panangmatmat kadagita tapno saan a dagita ti mangituray iti biagmo. Kas imbalakad ni apostol Pablo, masapul nga isadagmo ti namnamam “saan nga iti pagduaduaan a kinabaknang, no di ket iti Dios, a sibabaknang a mangipaay kadatayo iti amin a bambanag a pagragsakantayo.” No aramidem dayta, maikunam met ngarud a naadalmo ti sekreto ti pannakapnek.​—1 Timoteo 6:17-19.

[Ladawan iti panid 9]

Nagtrabaho ni Pablo tapno saan a makapadagsen iti sabsabali

[Dagiti Ladawan iti panid 10]

Rinibu dagiti nakasarak iti kinaragsak iti biag a nabuyogan iti “nadiosan a debosion agraman iti pannakapnek”