PANAGIBTUR

Ti Griego a berbo a hy·po·meʹno, literal a kaipapananna ti “agtalinaed wenno agyan iti sidong,” ket naipatarus nga ‘agbati, [wenno, agtalinaed]’ iti Lucas 2:43 ken Aramid 17:14. Naaddaan met dayta iti kaipapanan nga “agtalinaed a di maisin; agregget; agtalinaed a sititibker,” ket ngarud naipatarus nga ‘agibtur.’ (Mt 24:13) Ti nombre a hy·po·mo·neʹ gagangay nga ipasimudaagna ti natured, natibker, wenno naanus a “panagibtur” a saan a mapukawan iti namnama iti sango dagiti tubeng, pannakaidadanes, suot, wenno sulisog.

No Apay a Kasapulan. Karaman iti bambanag a mabalin a pakaipasanguan dagiti Kristiano ket ti panangyaleng-aleng ti sabsabali, panangumsi, pammadakes, nakaro a pannakabusor, pananggura dagiti nasinged a kameng ti pamilia, di nasayaat a pannakatrato, pannakaibalud, ken uray pay ti ipapatay. (Mt 5:10-12; 10:16-22; 24:9, 10, 39; Mr 13:9, 12, 13; Apo 13:10) Agkasapulan daytoy iti panagibtur. No awan daytoy nasken a kualidad, saan a makapagikut ti maysa a tao ti agnanayon a biag. (Ro 2:7; Heb 10:36; Apo 14:12) Ti makagapu ket napatpateg ngamin ti kamaudianan, saan a ti kinasayaat ti panangrugi ti maysa a tao kas Kristiano nga adalan. Maitunos dayta iti kinuna ni Jesu-Kristo: “Ti nakapagibtur agingga iti panungpalan isunto ti maisalakan.” (Mt 24:13) “Babaen ti panagibturyo magun-odanyonto dagiti kararuayo.”​—Lu 21:19.

Awanan ti panagibtur dagiti tattao a sidadaras a mangawat iti “sao ti Dios,” ngem parparawpaw laeng ti panangawatda. Di agbayag sumukoda no maipasangoda iti rigat wenno pannakaidadanes, iti kasta mapukawda ti anamong ken pamendision ti Dios. Ngem agibtur a sititibker dagidiay mangpatanor iti nauneg a panangipateg iti “sao ti Dios.” “Agbungada buyogen ti panagibtur,” a simamatalek nga agtultuloyda a mangiwaragawag iti mensahe ti Dios iti laksid ti kinarigat, panagsagaba, ken pannakaupay.​—Lu 8:11, 13, 15.

No Kasano a Mataginayon. Ti panangut-utob iti nasayaat nga ulidan nga impasdek dagiti adipen ti Dios​—dagiti mammadto sakbay ti panawen Kristiano, ni Job, da apostol Pablo ken Juan, ken adu a sabsabali pay​—ken ti pananglaglagip iti nagbanagan ti kinamatalekda ket dakkel a pammaregta iti panagtultuloy ti maysa a tao nga agibtur no agsagsagaba. (2Co 6:3-10; 12:12; 2Te 1:4; 2Ti 3:10-12; San 5:10, 11; Apo 1:9) Ti awan pakapilawanna a panagibtur ni Jesu-Kristo ti kangrunaan koma a laglagipen kas ulidan.​—Heb 12:2, 3; 1Pe 2:19-24.

Napateg met a di pulos liplipatan ti Nakristianuan a namnama, ti agnanayon a biag iti maysa nga awanan basol a kasasaad. Uray ti ipapatay iti im-ima dagiti manangidadanes saanna a mapunas daytoy a namnama. (Ro 5:4, 5; 1Te 1:3; Apo 2:10) Kasla nagbassitto laengen a banag ti panagsagaba a mapaspasaran ita no idilig iti kaitungpalan dayta naindaklan a namnama. (Ro 8:18-25) Aniaman a panagsagaba, nupay nakaro iti agdama, ket “apagkanito ken nalag-an” no idilig iti awan patinggana a tiempo. (2Co 4:16-18) No laglagipen ti maysa a tao a temporario laeng dagiti suot ken petpetanna a sititibker ti Nakristianuan a namnama, maliklikanna ti pannakaupay ken ti panagbalin a di matalek ken Jehova a Dios.

Ti Nakristianuan panagibtur ket saan nga agpannuray iti kabukbukodan a pigsa. Ti Kangatuan isu ti mangsaranay ken mangpatibker kadagiti adipenna babaen ti espirituna ken ti liwliwa nga agtaud iti Kasuratan. Isu “mangipaay iti panagibtur” kadagidiay naan-anay nga agtalek kenkuana, ket ngarud maiparbeng nga ikararag dagiti Kristiano ti tulongna, agraman ti sirib a kasapulan tapno masaranget ti maysa a masinunuo a suot. (Ro 15:4, 5; San 1:5) Saanto a pulos ipalubos ni Jehova a maipasango ti maysa iti suot a saanna a kabaelan nga ibturan. No manginanama Kenkuana ti maysa a tao maipaay iti tulong, a saan a mapukaw ti pammatina no di ket naan-anay nga agtalek ken Jehova, mangaramidto ti Mannakabalin-amin iti dalan a pagruaran tapno makapagibtur dayta a tao.​—1Co 10:13; 2Co 4:9.

No agsagsagaba dagiti Kristiano, saan a nakedngan ti pigsa a mabalinda a gun-oden. Ti inkararag ni apostol Pablo maipaay kadagiti taga Colosas ket ‘mapabilegda iti isuamin a pannakabalin iti madanon ti nadayag a pannakabalin ti Dios tapno naan-anay a makapagibturda ken maaddaanda iti mabayag a panagitured buyogen ti rag-o.’ (Col 1:11) Ti maysa a pagarigan ti panagtignay daytoy ‘nadayag a pannakabalin’ ket isu ti pannakapagungar ni Jesu-Kristo manipud kadagiti natay ken ti pannakaitan-okna iti makannawan ti Ama.​—Efe 1:19-21.

Kayat ni Jehova a Dios ken ti Anakna nga agballigi ti isuamin. Naipakita daytoy iti pammaregta maipapan iti panagibtur nga impaay ni Jesu-Kristo kadagiti kameng dagiti kongregasion Kristiano idiay Efeso, Smirna, Pergamo, Tiatira, Sardis, Filadelfia, ken Laodicea.​—Apo 2:1-3, 8-10, 12, 13, 18, 19; 3:4, 5, 7, 10, 11, 14, 19-21.

Umiso a Panangmatmat Kadagiti Suot. Yantangay pagaammo dagiti Kristiano a ti agnanayon a masanguanan ti maysa a tao ket agpannuray iti panagibtur ken mabalinna ti agtalek iti tulong nga aggapu iti ngato, saanda a rebbeng a pagamkan dagiti suot ken rigat, a pakaldaanganda dagita wenno agreklamoda, ay-ayenda ti bagbagida, wenno agrurodda. Imbalakad ni apostol Pablo: “Agrag-otayo bayat nga addatayo kadagiti rigat, yantangay ammotayo a ti rigat mangpataud iti panagibtur.” (Ro 5:3) Ipalgak dagiti suot a naanusan ken naibturan ti maysa a Kristiano gapu iti tulong ti Dios nga isu ket addaan iti nasken a kualidad a panagibtur​—kualidad a saan a maammuan a mismo ken mapadasan sakbay ti panagpasar iti rigat.

Masapul a bay-an nga “an-anayen [ti panagibtur] ti aramidna” babaen ti panangipalubos nga agtultuloy ti suot agingga nga agpatingga, a saan a gandaten a pasardengen a dagus babaen ti panagaramat kadagiti di nainkasuratan a pamay-an. Kalpasanna, masubok ken magugoran ti pammati, ket maiparangarang ti mangpabileg a pannakabalin dayta a pammati. Maipalgak dagiti pagkapuyan, iti kasta makita ti Kristiano dagiti pakapilawanna ken makaaramid kadagiti nasken a panagbalbaliw. Babaen kadagiti suot a simamatalek a naibturan, mabalin a mamolde ti maysa a tao nga agbalin nga ad-adda a naanus, mannakipagrikna, naasi, naayat, ken nadungngo no makilanglangen iti padana a tattao. Ngarud, babaen ti panangipalubos nga “an-anayen [ti panagibtur] ti aramidna,” ti maysa a tao saanto nga “agkurang iti aniaman” kadagiti bambanag a kalkalikaguman ni Jehova a Dios kadagiti naanamongan nga adipenna.​—San 1:2-4.