Sursuruenyo ti Agtulnog Bayat nga Umad-adani ti Panungpalan

“[Ti Silo] ti pagpaayan ti panagtulnog dagiti ili.”​—GENESIS 49:10.

 1. (a) Iti naglabas, ania ti masansan nga iraman ti panagtulnog ken ni Jehova? (b) Ania ti impadto ni Jacob mainaig iti panagtulnog?

TI PANAGTULNOG ken ni Jehova masansan nga iramanna ti panagtulnog kadagiti pannakabagina. Karaman kadagitoy dagiti anghel, patriarka, ukom, padi, propeta, ken ari. Naawagan pay ketdi ti trono dagiti ari ti Israel kas trono ni Jehova. (1 Cronicas 29:23) Ngem nakalkaldaang ta adu a nagturay iti Israel ti simmukir iti Dios, a nangyeg iti didigra kadakuada ken kadagiti iturayanda. Ngem saan a binaybay-an ni Jehova nga awanan iti namnama dagiti nasungdo kenkuana; liniwliwana ida babaen ti karina a mangisaad iti agnanayon nga Ari, a naragsak a pagtulnogan dagiti nalinteg. (Isaias 9:6, 7) Idi dandani matay ni patriarka a Jacob, impadtona dayta a masanguanan nga agturay, a kunkunana: “Ti setro saanto a sumina ken Juda, uray ti sarukod ti komandante iti baet dagiti sakana, agingga nga umay ti Silo; ket isunto ti pagpaayan ti panagtulnog dagiti ili.”​—Genesis 49:10.

 2. Ania ti kaipapanan ti “Silo,” ken ania ti saklawen ti natan-ok a turayna?

² Ti “Silo” ket Hebreo a termino a kaipapananna “Iti Daydiay Pakaikarianna.” Wen, ti Silo ti naan-anay a maikari nga agtawid iti turay, kas isimbolo ti setro, ken ti pannakabalin a mangidaulo, kas irepresentar ti sarukod ti komandante. Maysa pay, ti natan-ok a turayna saklawenna saan laeng a dagiti kaputotan ni Jacob, no di ket ti amin nga “ili.” Maitunos daytoy iti kari ni Jehova ken ni Abraham: “Ti bin-im tagikuaennanto ti ruangan dagiti kabusorna. Ket babaen ti bin-im pudno unay a dagiti amin a nasion iti daga bendisionandanto ti bagbagida.” (Genesis 22:17, 18) Impabigbig ni Jehova no siasino daytoy a “bin-i” idi 29 K.P., idi pinulotanna ni Jesus a taga Nazaret iti nasantuan nga espiritu.​—Lucas 3:21-23, 34; Galacia 3:16.

Ti Umuna a Pagarian ni Jesus

 3. Ania a turay ti inawat ni Jesus idi nagsubli idiay langit?

³ Idi nagsubli ni Jesus idiay langit, saanna a dagus nga innala ti setro ti panangiturayna kadagiti tattao iti lubong. (Salmo 110:1) Ngem inawatna ti maysa a “pagarian” nga addaan kadagiti iturayan a natulnog kenkuana. Tinukoy ni apostol Pablo dayta a pagarian idi insuratna: “[Ti Dios] inispalnatayo [a napulotan iti espiritu a Kristiano] manipud iti autoridad ti sipnget ket inyalisnatayo iti pagarian ti Anak ti ayatna.” (Colosas 1:13) Nangrugi daytoy a panangispal idi Pentecostes 33 K.P., idi naiparukpok ti nasantuan nga espiritu kadagiti matalek a pasurot ni Jesus.​—Aramid 2:1-4; 1 Pedro 2:9.

 4. Kadagiti ania a wagas nga impakita dagiti nagkauna nga adalan ni Jesus ti kinatulnogda, ken ania ti awag ni Jesus kadakuada kas maysa a grupo?

⁴ Kas “embahador a mangisunsuno ken Kristo,” dagiti adalan a napulotan iti espiritu situtulnog a rinugianda nga inummong dagiti ‘kailianda’ iti dayta a naespirituan a pagarian. (2 Corinto 5:20; Efeso 2:19; Aramid 1:8) Kanayonanna, nasken nga agtalinaedda a ‘naan-anay a nagkaykaysa iti isu met laeng a panunot ken iti isu met laeng a wagas ti panagpampanunot’ tapno matagiragsakda ti anamong ti Arida a ni Jesu-Kristo. (1 Corinto 1:10) Kas maysa a grupo, buklenda ti “matalek ken masirib nga adipen,” wenno ti klase matalek a mayordomo.​—Mateo 24:45; Lucas 12:42.

Nabendisionan Gapu iti Panagtulnogda iti “Mayordomo” ti Dios

 5. Sipud idi ugma, kasano nga insuro ni Jehova ti ilina?

⁵ Kanayon a mangipaay ni Jehova kadagiti mannursuro iti ilina. Kas pagarigan, idi nagsubli dagiti Judio manipud Babilonia, ni Esdras ken ti adu a kualipikado a lallaki dida basta binasa ti Linteg ti Dios kadagiti tattao. ‘Imbinsabinsada’ ti linteg, nga ‘impaayda ti kaipapanan ken pannakaawat’ iti Sao ti Dios.​—Nehemias 8:8.

6, 7. Kasano a mangipapaay ti klase adipen kadagiti naintiempuan a naespirituan a taraon babaen ti Bagi a Manarawidwidna, ken apay a maiparbeng ti agpasakup iti klase adipen?

⁶ Idi 49 K.P., idi timmaud ti isyu maipapan iti panagkugit, ti bagi a manarawidwid ti nagkauna a klase adipen sikakararag nga inusigda dayta a banag ket nakaaramidda iti Nainkasuratan a konklusion. Idi impakaammoda ti desisionda babaen ti surat, nagtulnog dagiti kongregasion iti naipaulog a direktiba ket tinagiragsakda ti nabaknang a bendision ti Dios. (Aramid 15:6-15, 22-29; 16:4, 5) Iti moderno met a panawen, ti matalek nga adipen babaen ti Bagi a Manarawidwidna inlawlawagda nga ad-adda dagiti napateg nga isyu kas iti Nakristianuan a neutralidad, ti kinasagrado ti dara, ken ti panangusar iti droga ken tabako. (Isaias 2:4; Aramid 21:25; 2 Corinto 7:1) Binendisionan ni Jehova ti ilina gapu iti panagtulnogda iti Saona ken iti matalek nga adipen.

⁷ Babaen ti panagpasakup iti klase adipen, ipakpakita ti ili ti Dios nga agpaspasakupda iti Apo, ni Jesu-Kristo. Naun-uneg ti kaipapanan dayta a panagpasakup iti agdama a panawen gapu iti dakdakkel nga autoridad ni Jesus, kas naipadto idi dandani matay ni Jacob.

Nagbalin ti Silo a Nainkalintegan nga Ari Ditoy Daga

 8. Kasano ken kaano nga ad-adda a simmaknap ti autoridad ni Kristo?

⁸ Impakpakauna ti padto ni Jacob a ti Silo ket ‘pagtulnogan ti ili.’ Nalawag a saan laeng a ti naespirituan nga Israel ti iturayan ni Kristo. Siasinoda pay ti iturayanna? Sumungbat ti Apocalipsis 11:15: “Ti pagarian ti lubong nagbalinen a pagarian ni Apotayo ken ni Kristona, ket agturayto kas ari iti agnanayon ken awan inggana.” Ipalgak ti Biblia nga inawat ni Jesus dayta nga autoridad iti ngudo ti naipadto a “pito a panawen”​—“ti naituding a pampanawen dagiti nasion”​—idi 1914.a (Daniel 4:16, 17; Lucas 21:24) Iti dayta a tawen, nangrugi ti di makita a ‘kaadda’ ni Kristo kas Mesianiko nga Ari, ken ti tiempo tapno ‘mapan mangparukma iti tengnga dagiti kabusorna.’​—Mateo 24:3; Salmo 110:2.

 9. Ania ti inaramid ni Jesus idi naisaad iti Pagarianna, ket ania ti epektona daytoy iti sangatauan, nangnangruna kadagiti adalanna?

⁹ Ti immuna nga inaramid ni Jesus idi naisaad kas ari isu ti panangitapuakna ‘ditoy daga’ ti mismo a personipikasion ti kinasukir​—ni Satanas​—agraman dagiti demoniona. Sipud idin, inyeg dagitoy a dakes nga espiritu ti awan kaaspingna nga ut-ot iti sangatauan, malaksid pay iti panangyegda kadagiti kasasaad a mamagbalin a narigat ti panagtulnog ken ni Jehova. (Apocalipsis 12:7-12; 2 Timoteo 3:1-5) Kinapudnona, ti kangrunaan a puntiria ti naespirituan a pannakigubat ni Satanas isu dagiti pinulotan ni Jehova, “a mangtungtungpal kadagiti bilin ti Dios ken addaan iti trabaho a panangsaksi ken Jesus,” ken dagiti kakaduada a “sabsabali a karnero.”​—Apocalipsis 12:17; Juan 10:16.

10. Ti pannakatungpal dagiti ania a padto iti Biblia ti mangsigurado a mapaay ti pannakigubat ni Satanas kadagiti pudno a Kristiano?

¹⁰ Ngem sigurado a mapaay ni Satanas gapu ta addatayon iti “aldaw ti Apo,” ket awan ti makalapped ken ni Jesus a ‘mangan-anay iti panagballigina.’ (Apocalipsis 1:10; 6:2) Kas pagarigan, siguraduenna ti maudi a pannakaselio ti 144,000 a naespirituan nga Israel ita. Salaknibanna met ti “maysa a dakkel a bunggoy, nga awan ti tao a nakabael a mangbilang, manipud kadagiti amin a nasion ken kadagiti tribu ken kadagiti ili ken kadagiti pagsasao.” (Apocalipsis 7:1-4, 9, 14-16) Ngem saan a kas kadagiti napulotan a kakaduada, dagitoy ti natulnog nga iturayan ni Jesus ditoy daga. (Daniel 7:13, 14) Ti mismo a kaaddada iti intero a lubong ket pudno a pammaneknek a ti Silo ti Agturay iti ‘pagarian ti lubong.’​—Apocalipsis 11:15.

Itan ti Tiempo nga “Agtulnog iti Naimbag a Damag”

11, 12. (a) Asino laeng dagiti makalasat iti panungpalan ti agdama a sistema ti bambanag? (b) Ania a kababalin ti adda kadagidiay mangagsep iti “espiritu ti lubong”?

¹¹ Amin nga agtarigagay iti biag nga agnanayon nasken a sursuruenda ti agtulnog, ta nalawag ti kuna ti Biblia a ‘dagidiay saan a makaammo iti Dios ken dagidiay saan nga agtulnog iti naimbag a damag maipapan ken Apotayo a Jesus’ didanto malasatan ti aldaw ti panagibales ti Dios. (2 Tesalonica 1:8) Ngem maysa a karit ti agtulnog iti naimbag a damag gapu iti agdama a dakes a kasasaad ken ti agwaywayas nga espirituna maibusor kadagiti linteg ken prinsipio ti Biblia.

¹² Deskribiren ti Biblia daytoy nga espiritu ti iyaalsa iti Dios kas “ti espiritu ti lubong.” (1 Corinto 2:12) Kas panangilawlawagna iti epekto daytoy kadagiti tattao, kastoy ti insurat ni apostol Pablo kadagiti Kristiano idiay Efeso idi umuna a siglo: “Nagna[kayo] idi naminsan maitunos iti sistema ti bambanag daytoy a lubong, maitunos iti agturay iti autoridad ti angin, ti espiritu nga agtigtignay ita iti annak ti kinasukir. Wen, iti tengngada datayo amin idi naminsan nagbibiagtayo maitunos kadagiti derrep ti lasagtayo, nga ar-aramidentayo ti bambanag a nagayatan ti lasag ken ti pampanunot, ket nainkasigudan nga annaknatayo ti pungtot a kas kadagiti dadduma.”​—Efeso 2:2, 3.

13. Kasano a sieepektibo a masaranget dagiti Kristiano ti espiritu ti lubong, ken ania dagiti makagunggona a resultana?

¹³ Makaparagsak ta dagiti Kristiano idiay Efeso dida nagtultuloy a nagpaadipen iti dayta nga espiritu ti kinasukir. Imbes ketdi, nagbalinda a natulnog nga annak ti Dios babaen ti panagpasakupda iti espirituna ken inapitda ti aglaplapusanan ken makagunggona a bungana. (Galacia 5:22, 23) Umasping met itatta, ti espiritu ti Dios​—ti kabilgan a puersa iti uniberso​—tumultulong iti minilion nga agbalin a natulnog ken ni Jehova, iti kasta matagiragsakda ti “naan-anay a pammasiguro iti namnama agingga iti panungpalan.”​—Hebreo 6:11; Zacarias 4:6.

14. Kasano a pinakdaaran ni Jesus dagiti amin a Kristiano nga agbibiag kadagiti maudi nga al-aldaw maipapan kadagiti espesipiko a bambanag a mangsubok iti kinatulnogda?

¹⁴ Laglagipentayo met a nabileg ti suporta kadatayo ti Silo, ket dida ipalubos ken ni Amana nga adda asinoman a kabusor​—demonio wenno tao​—a mangsubok iti kinatulnogtayo a nalablabes ngem iti kabaelantayo nga ibturan. (1 Corinto 10:13) Kinapudnona, tapno matulongannatayo iti naespirituan a pannakigubattayo, dinakamat ni Jesus ti sumagmamano nga espesipiko a parikut a sanguentayo kadagitoy maudi nga al-aldaw. Inaramidna dayta babaen ti pito a surat, nga intedna ken ni apostol Juan babaen ti maysa a sirmata. (Apocalipsis 1:10, 11) Sigurado a naglaon dagitoy iti napateg a balakad para kadagiti Kristiano idi, nupay ti kangrunaan nga aplikasionda ket bayat ti “aldaw ti Apo,” a nangrugi idi 1914. Anian a mayanatup ngarud nga ipaayantayo iti atension dagitoy a mensahe!b

Liklikan ti Panangyaleng-aleng, Imoralidad, Materialismo

15. Apay a nasken nga agannadtayo no maipapan iti parikut a nangapektar iti kongregasion iti Efeso, ken kasanotayo a maaramid dayta? (2 Pedro 1:5-8)

¹⁵ Ti umuna a surat ni Jesus ket agpaay iti kongregasion iti Efeso. Kalpasan a kinomendaranna ti panagibtur ti kongregasion, kinuna ni Jesus: “Nupay kasta, adda daytoy a busorek kenka, ta pinanawam ti ayat nga adda kenka idi damo.” (Apocalipsis 2:1-4) Iti kaaldawantayo, adda dagiti dati a naregta a Kristiano a bimmaaw ti nasged a panagayatda iti Dios. Ti kasta a panagbaaw ti ayat pakapuyenna ti relasion ti maysa iti Dios ket masapul a dagus a maikkan iti atension. Kasano a mapabara manen ti kasta nga ayat? Babaen ti regular a panagadal iti Biblia, pannakigimong, panagkararag, ken panagmennamenna. (1 Juan 5:3) Pudno, agkalikagum daytoy iti “napasnek a panagregget,” ngem sigurado a di masayang. (2 Pedro 1:5-8) No ti napudno a panangsukimat iti bagi ipalgakna a bimmaaw ti ayatyo, aturenyo a dagus ti kasasaad, kas panagtulnog iti balakad ni Jesus: “Lagipem no manipud ania ti nakatnagam, ket agbabawika ken aramidem dagiti immuna nga aramid.”​—Apocalipsis 2:5.

16. Ania a mamagpeggad nga impluensia iti naespirituan ti timmaud idi kadagiti kongregasion ti Pergamo ken Tiatira, ket apay a mayanatup ita dagiti sinao ni Jesus kadakuada?

¹⁶ Nakomendaran ti kinatarnaw, panagibtur, ken kinaregta dagiti Kristiano idiay Pergamo ken Tiatira. (Apocalipsis 2:12, 13, 18, 19) Kaskasdi, naimpluensiaanda kadagiti dadduma a mangiparparangarang iti dakes nga espiritu ni Balaam ken ni Jezebel, dua a dakes nga impluensia iti nagkauna nga Israel a nangitandudo iti seksual nga imoralidad ken panagdayaw ken ni Baal. (Numeros 31:16; 1 Ar-ari 16:30, 31; Apocalipsis 2:14, 16, 20-23) Ngem komusta met iti panawentayo​—“iti aldaw ti Apo”? Adda kadi dagiti umasping a dakes nga impluensia? Adda, ta imoralidad ti kangrunaan a pakaigapuan ti pannakailaksid ti dadduma iti ili ti Dios. Anian a nagpateg ngarud a liklikan ti pannakitimpuyog kadagiti tattao​—iti uneg ken ruar ti kongregasion​—a dakes nga impluensia iti moral! (1 Corinto 5:9-11; 15:33) Dagiti agtarigagay nga agbalin a natulnog nga iturayan ti Silo nasken a liklikanda met dagiti di nasayaat a paglinglingayan ken nayimprenta ken adda iti Internet a pornograpia.​—Amos 5:15; Mateo 5:28, 29.

17. Ania ti nagdumaan ti panangmatmat ken kababalin dagidiay taga Sardis ken Laodicea iti panangmatmat ni Jesus iti naespirituan a kasasaadda?

¹⁷ Nupay adda sumagmamano a mapagguadan nga indibidual a naitimpuyog, awan a pulos ti naited a komendasion iti kongregasion sadi Sardis. Nupay ‘adda naganna,’ wenno agparang a sibibiag, inyaleng-alengna ti naespirituan a bambanag isu a kasla “natay” iti panangmatmat ni Jesus. Rutina laengen ti panagtulnogda iti naimbag a damag. Anian a pannakababalaw! (Apocalipsis 3:1-3) Kasta met laeng ti kasasaad ti kongregasion sadi Laodicea. Impannakkelna ti material a kinabaknangna, a kunkunana, “Nabaknangak,” ngem iti panangmatmat ni Kristo isu ket ‘nakaay-ay-ay ken nakakaasi ken napanglaw ken bulsek ken lamolamo.’​—Apocalipsis 3:14-17.

18. Kasano a maliklikan ti maysa nga agbalin nga apag-anem-em iti naespirituan iti imatang ti Dios?

¹⁸ Iti kaaldawantayo, adda met dagiti dati a matalek a Kristiano a natnag iti kasta met laeng a kinasukir. Nalabit pinalubosanda ti espiritu ti lubong a mangikkat iti pannakariknada iti kinaganat iti biagda. Iti kasta, nagbalin nga apag-anem-em ti naespirituan a panangmatmatda iti panagadal iti Biblia, panagkararag, Nakristianuan a gimong, ken ministerio. (2 Pedro 3:3, 4, 11, 12) Anian a nagpateg nga agtulnog ken Kristo dagiti kasta a tattao babaen ti panagurnongda iti naespirituan a kinabaknang​—wen, ‘gumatangda [ken Kristo] iti balitok a napasudi babaen iti apuy’! (Apocalipsis 3:18) Dagiti kasta a pudpudno a kinabaknang iramanna ti panagbalin a ‘nabaknang iti nasayaat nga ar-aramid, naparabur, sisasagana a mangiranud.’ Babaen ti panagurnong kadagitoy a pudpudno a kinabaknang, ‘sitatalged nga agur-urnongtayo maipaay iti bagbagitayo iti nasayaat a pamuon maipaay iti masanguanan tapno mapetpetantayo a sititibker ti pudpudno a biag.’​—1 Timoteo 6:17-19.

Nakomendaran Gapu iti Kinatulnogda

19. Ania a komendasion ken balakad ti impaay ni Jesus kadagiti Kristiano sadi Smirna ken Filadelfia?

¹⁹ Mapagulidanan ti kinatulnog dagiti kongregasion sadi Smirna ken Filadelfia, ta awan ti pannubngar a linaon ti surat ni Jesus kadakuada. Kinunana kadagidiay taga Smirna: “Ammok ti rigat ken kinakurapaymo​—ngem nabaknangka.” (Apocalipsis 2:9) Anian a naiduma kadagidiay taga Laodicea a nangipannakkel iti nailubongan a kinabaknangda ngem kinaagpaysuanna napanglawda! Siempre, saan a maragsakan ti Diablo a makakita iti asinoman a matalek ken natulnog ken ni Kristo. Gapuna, namakdaar ni Jesus: “Dika pagamkan ti bambanag a dandanimon sagabaen. Adtoy! Ti Diablo agtultuloyto a mangipisok iti sumagmamano kadakayo iti pagbaludan tapno naan-anay a masubokkayo, ken tapno maaddaankayo iti rigat iti sangapulo nga aldaw. Paneknekam ta bagim a matalek uray agingga ken patay, ket itedkonto kenka ti korona ti biag.” (Apocalipsis 2:10) Umasping iti dayta, kinomendaran ni Jesus dagidiay taga Filadelfia, a kunkunana: “Tinaginayonmo ti saok [wenno, nagtulnogka kaniak] ken saanmo a naglibakan ti naganko. Umayak a sidadaras. Itultuloymo a salimetmetan a sititibker ti adda kenka, tapno awan ti mangala iti koronam.”​—Apocalipsis 3:8, 11.

20. Kasano a ti minilion a tattao ita impangagda ti sasao ni Jesus, ken iti laksid dagiti ania a kasasaad?

²⁰ “Iti aldaw ti Apo,” a nangrugi idi 1914, maysa a grupo dagiti matalek a natda ken dagiti kakaduada a sabsabali a karnero, nga agdagup ita iti minilion, impangagda met ti sasao ni Jesus babaen ti naregta a pannakiramanda iti ministerio ken panangtaginayon iti kinatarnawda. Kas kadagiti kakabsatda idi umuna a siglo, nagsagaba ti dadduma gapu iti panagtulnogda ken Kristo, a naipupokda pay kadagiti pagbaludan ken kampo konsentrasion. Impangag ti dadduma ti sasao ni Jesus babaen ti panangsalimetmetda iti ‘simple a mata,’ nupay nasaknap ti kinasaliwanwan ken kinaagum. (Mateo 6:22, 23) Wen, iti tunggal aglawlaw ken iti aniaman a kasasaad, agtultuloy a paragsaken dagiti pudno a Kristiano ti puso ni Jehova babaen ti kinatulnogda.​—Proverbio 27:11.

21. (a) Ania a naespirituan nga annongen ti agtultuloy nga itungpal ti klase adipen? (b) Kasanotayo a maipakita a pudpudno a kayattayo ti agtulnog iti Silo?

²¹ Bayat nga umas-asidegtayo iti dakkel a rigat, agtultuloy a determinado ti “matalek ken masirib nga adipen” a di mangikompromiso iti kinatulnogda iti Apo, ni Kristo. Karaman ditoy ti panangisaganada kadagiti naintiempuan a naespirituan a taraon para iti sangakabbalayan ti Dios. Itultuloytayo ngarud koma nga apresiaren ti nagsayaat a teokratiko nga organisasion ni Jehova ken ti ipapaay daytoy. Iti kasta, ipakpakitatayo ti panagpasakuptayo iti Silo, a manggunggona iti amin a natulnog nga iturayanna iti biag nga agnanayon.​—Mateo 24:45-47; 25:40; Juan 5:22-24.

[Footnotes]

Malagipyo Pay?

• Ania nga akem ti tungpalen ni Jesus kas naipadto idi dandani matay ni Jacob?

• Kasano a maipakitatayo a bigbigentayo ni Jesus kas ti Silo, ken ania nga espiritu ti masapul a liklikantayo?

• Ania a maitutop a balakad para iti kaaldawantayo ti linaon dagiti surat kadagiti pito a kongregasion iti Apocalipsis?

• Kadagiti ania a wagas a matuladtayo dagiti kongregasion sadi nagkauna nga Smirna ken Filadelfia?

[Dagiti Ladawan iti panid 18]

Bembendisionan ni Jehova ti ilina gapu iti panagtulnogda iti matalek a “mayordomo”

[Ladawan iti panid 19]

Makakarit ti agtulnog iti Dios gapu iti impluensia ni Satanas

[Dagiti Ladawan iti panid 21]

Ti natibker a relasion iti Dios tulongannatayo nga agbalin a natulnog kenkuana