16, 17. (a) Kasano a naaddaan ni Pablo iti tured a mangasaba? (b) Ania ti aramidentayo no adda benneg ti Nakristianuan a ministeriotayo a pagamkantayo?

¹⁶ Iti suratna kadagiti Kristiano idiay Tesalonica, kinuna ni Pablo: “Kalpasan nga immuna a nagsagabakami ken natrato a sikukuspag (kas iti pagaammoyo) idiay Filipos, a nagurnongkami iti kinatured babaen iti Diostayo tapno sawenmi kadakayo ti naimbag a damag ti Dios buyogen ti kasta unay a pannakidangdangadang.” (1 Tesalonica 2:2) Kasano a “natrato a sikukuspag” ni Pablo ken dagiti kakaduana idiay Filipos? Sigun iti dadduma nga eskolar, ti Griego a sao nga inaramat ni Pablo kaipapananna ti makapainsulto, nakababain, wenno naulpit a pannakatrato. Pinangpang-or ida dagiti agtuturay ti Filipos, impisokda ida iti pagbaludan, ken inkabilda ida iti tul-ong. (Aramid 16:16-24) Kasano a naapektaran ni Pablo iti dayta a nasaem a kapadasan? Nagbuteng kadi ni Pablo idi adda idiay Tesalonica, ti simmaruno a siudad a nangaskasabaanna kas misionero? Saan, ‘nagurnong iti kinatured.’ Pinarmekna ti buteng ket situtured nga intultuloyna ti nangasaba.

¹⁷ Naggapuan ti kasta a tured ni Pablo? Kenkuana met laeng? Saan. Kinunana nga isu ket nagurnong iti tured “babaen iti Diostayo.” Sigun iti maysa a reperensia para kadagiti agipatpatarus iti Biblia, mabalin nga ipatarus dagitoy a sasao iti, “Inikkat ti Dios ti buteng iti pusomi.” Isu a no mariknayo a saankayo a natured a mangasaba, wenno adda partikular a benneg ti ministerioyo a kasla pagamkanyo, apay a diyo iyararaw ken Jehova a pakirdenna ti nakemyo? Dawatenyo kenkuana nga ikkatenna ti buteng iti pusoyo. Dawatenyo a tulongannakayo nga agurnong iti tured a mangasaba. Mainayon pay, mangaramidkayo kadagiti praktikal nga addang. Kas pagarigan, makikaduakayo iti maysa a kabsat a nasigo iti wagas ti panangasaba a pakaseknanyo, nalabit iti lugar ti negosio, iti lansangan, di pormal a panangasaba, wenno panangasaba babaen ti telepono. Mabalin a kayat ti kaduayo nga isu ti umuna a sumango. No kasta, paliiwen ken agsursurokayo kenkuana. Ngem iturturedyo met a padasen dayta.

18. Aniada a bendision ti mabalin a sagrapentayo no agurnongtayo iti tured iti ministeriotayo?

¹⁸ Panunotenyo ti mabalin a resulta dagiti bambanag no pakirdenyo ti pakinakemyo. No agporsegikayo ken dikay maupay, mabalin a maaddaankayto kadagiti nasayaat a kapadasan iti panangiranud iti kinapudno, kapkapadasan a nalabit saanyo a matagiragsak no dikay agporsegi. (Kitaenyo ti panid 25.) Maragsakankayto agsipud ta ammoyo a naay-ayoyo ni Jehova iti panangaramidyo iti banag a narigat kadakayo. Bendisionan ken tulongannakayto a mangparmek iti butengyo. Ad-adda a bumilegto ti pammatiyo. Kinapudnona, saanyo a mapabileg ti pammati dagiti dadduma no diyo pabilgen ti mismo a pammatiyo.​—Judas 20, 21.

Nagurnongda iti Tured

SAAN a kanayon a nalaka ti maaddaan iti tured a mangasaba. Kinapudnona, kinuna ni apostol Pablo nga iti naminsan, inaramidna dayta “buyogen ti kasta unay a pannakidangdangadang.” (1 Tesalonica 2:2) Makagunggona kadi ti ‘pannakidangadang’ a mangasaba? Di namnamaen dagiti tattao ti Dios dagiti naisangsangayan a kapadasan, ngem masansan a maragsakanda ta maituredda nga aramiden dayta. Usigenyo ti sumagmamano nga ehemplo.

Sipapasnek a nagimdeng ti walo ti tawenna nga ubing a babai a ni Tara bayat nga isalsalaysay ti maestrana iti klase nga idi Gubat Sangalubongan  II, naikapet iti kawes dagiti Judio nga adda kadagiti kampo konsentrasion ti duyaw nga Star of David a pakabigbiganda. Nagpangadua ni Tara no nasken nga agsao. “Nagkararagak a nakamata,” kunana. Kalpasanna, intayagna ti imana ket kinunana nga adda met dagiti Saksi ni Jehova kadagidiay a kampo, ket adda naikapet iti kawesda a kolor ubi a trianggulo. Natukay ti interes ti maestra ket nagyaman kenkuana. Ti komento ni Tara ti nangiruangan iti ad-adu pay a pannakidiskusion iti maestra. Idi agangay impabuya pay ketdi ti maestra kadagiti estudiantena ti video a Jehovah’s Witnesses Stand Firm Against Nazi Assault.

Idiay Guinea, Makinlaud nga Africa, kayat ni Irène, maysa nga agtutubo a di bautisado nga agibumbunannag, a parang-ayen ti ministeriona. Pinaregta ti misionera a nangyadal kenkuana iti Biblia a padasenna idiay eskuelaan nga ipaima ti magasin a Pagwanawanan ken Agriingkayo! kadagiti kaeskuelaanna. Bimdeng ni Irène gapu ta saan nga interesado a makisarita dagiti kaklasena. Nupay kasta, gapu iti pammaregta ti misionera, inasitgan nga umuna ni Irène ti estudiante a kasla kangrunaan a bumusbusor. Nasdaaw ni Irène ta immannugot ti babai a makisarita ken sigagagar a nangawat kadagiti magasin. Nangala met dagiti dadduma pay nga estudiante. Ad-adu ti magasin a naipaima ni Irène iti dayta a bulan ngem iti dagup ti magasin a naipaimana iti immun-una a lima a bulan.

Idiay Trinidad, nagalikaka ti maysa a panglakayen nga umasideg iti prinsipal ti maysa nga eskuelaan tapno ipakitana ti edukasional a pateg ti magasin nga Agriingkayo! Ngem inturturedna. Kinunana: “Nagkararagak a simrek iti eskuelaan. Diak impagpagarup a nakaim-imbag ti prinsipal.” Nangala iti magasin nga Agriingkayo! a naglaon iti topiko nga “Ania ti Namnama Dagiti Agtutubo Itatta?” ken inkeddengna pay ketdi nga usaren dayta iti panangisuro kadagiti estudiante. Uppat a pulo a nadumaduma a ruar ti magasin ti naalanan manipud idi.

Kas agtutubo, kanayon a marigatan a mangasaba ni Vaughn. “Agnerbiosak, agbabasa ti dakulapko, ken matartaranta ti panagsaok​—diak makapagtanang.” Nupay kasta, nagbalin nga amin-tiempo a ministro. Ngem saan latta a kanayon a nalaka kenkuana ti agsao a situtured. Naminsan, idi awan nasarakanna kalpasan ti agmalmalem a panagbirokna iti trabaho, kayatna nga adda koma makasabaanna iti tren, “tapno uray kaskasano adda naimbag a magapuananna iti dayta makapaupay nga aldaw.” Ngem nagamak idi makitana a saan a bastabasta dagiti negosiante a kaluganna iti subway train. Kamaudiananna, inturturedna ti nakisao iti maysa a lakay a kaabayna. Nagbanag dayta iti napaut a saritaan. “Nasayaat dagiti saludsodmo nupay ubingka pay,” kinuna ti negosiante, sana insaludsod, “Maysaka kadi a teologo?” Insungbat ni Vaughn, “Saan, maysaak kadagiti Saksi ni Jehova.” “Isu met la gayam,” nakaisem a kinuna ti lakay.

Maragsakan amin dagitoy ken adu a dadduma pay a Saksi ta naituredda ti mangasaba. Aramidenyo met kadi dayta?