‘Dikayo Paalis a Sipapardas Manipud iti Panunotyo’

“Dawatenmi kadakayo a dikayo paalis a sipapardas iti panunotyo ket dikayo pariribuk unay iti maipaltiing a sasao wenno uray gapu iti sao wenno uray gapu iti surat a kas naggapu kadakami.”​—2 TESALONICA 2:1, 2.

 1. Ania a nakaay-ayat a laglagip ti umay iti isip bayat a subliantayo a lagipen ti tiempo idi damo a naammuantay ti kinapudno?

DAGITI nakaay-ayat a laglagip awan duadua maipalagipda no datayo kas Kristiano laglagipentayo ti tiempo idi damo a naammuantayo ti kinapudno manipud Sao ti Dios. Dayta ti nagpintas, nainkalintegan, makapnek. Ket anian ti panagubbog dagiti puspusotayo iti panangapresiar idi maammuantayo ti maipapan ken Jehova ken dagiti natan-ok a kualidadna, agraman ti naindaklan nga ayatna ken kinamanangngaasina! Nagrag-otayo idi a naitimpuyogtayo kadagiti kapammatiantayo a mangipakpakita iti pudpudno a Nakristianuan nga ayat ken agbibiagda babaen kadagiti prinsipio iti Biblia.

 2. Ania a panginanamaan ti adda kadatayo kas ad-adipen ni Jehova, ken iti ania a naespirituan a kasasaad ti pakasarakantay kadagiti bagbagitayo?

² Anian a yamantayo a makaammo nga iti mabiiten ikkaten ni Jehova ti ut-ot, ladingit, ken uray pay ni patay. (Apocalipsis 21:3, 4) Agasenyo dayta, agbiag nga agnanayonen iti paraiso a daga, iti perpekto a salun-at ken naan-anay a kinaragsak! Kasla ngangngani nakasaysayaat unay nga agbalin a pudno dayta. Ngem dayta ti pudno. Supsuportaran dayta ti Sao ti Dios. Dayta ti makaparagsak! Awan duadua mariknatayo ti kas panagrikna dagiti adalan ni Jesus idi a nagparang kadakuada kalpasan ti panagungarna. Kunada iti maysa ken maysa: “Saan aya a rumayrayray ti pusota iti unegta itay madama nga agsasao iti dalan ken itay ilawlawagna kadata dagiti Sursurat?” (Lucas 24:32) Wen, idi naammuantayo ti kinapudno ken indedikartay dagiti biagtayo ken Jehova, masarakantay ti bagbagitayo iti naespirituan a paraiso. Anian a bendision dayta!

 3. Kasano a sapsapulen ti Diablo ken dagiti dadduma a bumusbusor a paglibakandatayo kadagiti gunggona iti naespirituan a paraiso ni Jehova?

³ Ngem ti kaaddatayo iti naespirituan a paraiso ni Jehova ket saan a banag a mabalin a laglag-anen laeng. Immaytayo iti daytoy a paraiso a sibuboluntario; mabalintay ti rummuar iti dayta wenno mabalin a maparuartayo no maawanantay ti pammati wenno agsalungasingtay a sipapakinakem kadagiti nalinteg a pagalagadan ni Jehova. Siempre, saan a mapasamak daytoy no salimetmetantayo a sipipigsa ti ‘ayattay idi damo,’ no agtultuloytay a mangapresiar kadagiti amin a probision ni Jehova tapno agtalinaedtay a napigsa iti naespirituan. (Apocalipsis 2:4) Ngem ti Diablo ken dagiti dadduma a kabkabusor ti pudno a panagdayaw nalalaingda iti panangallilaw. Ditay koma liplipatan nga isudat’ sisasagana a kanayon a mangdadael iti kinatarnawtayo inggat’ kabaelanda. Dagiti propagandada ti nairanta a mangpakapuy iti pammatitayo tapno lumammiis ti ayattayo iti Dios, tapno agimula ti panagduadua iti is-isiptayo​—wen, tapno pagbalinenda a ti naespirituan agparang a saan a paraiso a pulos.

 4. Aniat’ mapasamak no palubosantayo a kumapuy ti pammatitayo ken palubosan a tumanor dagiti serioso a panagduadua?

⁴ Kas panangbulod manipud iti maysa a pagsasao ti proverbio, mabalintay ti makagteng iti punto a sadiay makitatay a narigat, nalabit imposible pay ketdi, a makita ti kabakiran ti naespirituan a paraiso gapu iti panangmingmingmingtayo a naimbag kadagiti imperpekto a natauan a kaykayo nga addan iti dayta. Ti ragsak nga adda kadatayo idi naammuantayo ti kinapudno ti Sao ti Dios, ti engrande a namnama nga adda kadatayo, ti ayat a napatanortayo iti Dios ken kadagiti naespirituan a kakabsattayo, ken ti regtatayo iti serbisio ni Jehova, ti mabalin a kumupas. No awan insigida a panagaddang nga alaen a mangbalbaliw iti aniaman a naespirituan a panagkapuy, di agbayag agbalinton a kasla makairurumen aminen dagiti naayat a pagannurotan ti Dios. Dagiti nasasayaat a naespirituan a taraon manipud “ti matalek ken naannad nga adipen”agbalinto metten a kasla awan kuentana, ket ti panagkakabsat dagiti naayat nga ad-adipen ni Jehova ti kasla agparangen a kas sangakabbalayan dagiti agbibinnusor. Kalpasanna ti kakaisuna a pakapnekan, a dakes a kita, ti sumrek a rugianna a parigaten dagiti padana nga ad-adipen babaen kadagiti pammarpardaya ken kadagiti kagudua a kinapudno.​—Mateo 24:45-51.

 5. Kasano a ti pukaw ti maysa maiyarig iti pukaw da Adan ken Eva idi napagtalawda manipud Paraiso ti Eden?

⁵ Wen, saantay laeng a mabalin a mapukaw dagiti gunggona ti naespirituan a paraiso itan no di ket, dakdakes pay, mapukawtayo pay ti namnama nga agbiag nga agnanayon iti naindagaan a Paraiso. Ket mabalin a mapukawantayo gapu iti isu met laeng a rason a nakapukawan da Adan ken Eva iti Paraiso ti Eden. Adda amin kadakuada a kasapulan tapno agbalinda a naan-anay a naragsak ket nabalinanda koma ti nagbiag nga agnanayon. Ngem ti panagwaywayas​—a ti kinapudnona maysa a naidumduma a pannursuro​—ti ad-adda ketdi a napatpateg kadakuada ngem ti panagtulnogda ken Jehova ken kadagiti bembendision idiay Eden. Naallilaw ni Eva. Nupay saan a naallilaw ni Adan, pinalubosanna dagiti puersa ti kasasaad, agraman ti napigsa nga impluensia ni baketna, a mangiguyod met kenkuana iti panagbasol. Gapuna, naparuarda iti Paraiso tapno agbiag iti nakaay-ay-ay a biag agingga iti ipapatayda. Napukawda ti namnamada iti biag nga agnanayon ken impatawidda ti basol ken ipapatay kadagiti annakda. (Genesis 3:1-7, 14-19, 24; 1 Timoteo 2:14; Roma 5:12) Anian a nakaam-amak a presio a pagbayad iti makunkuna a panagwaywayasda!

 6. (a) Ania a pakaseknan ti inyebkas ni Pablo maipapan iti dadduma idiay kongregasion ti Corinto? (b) Kasano a daytoy met la a pakaseknan naiparangarang iti naisurat iti kongregasion idiay Tesalonica?

⁶ Inyebkas ni apostol Pablo daytoy a pakaseknanna: “Ngem maamakak, di la ket ta kas iti panagulbod daydi uleg ken Eva iti kinasikapna, kasta met dagiti panunotyo madadaelda ken maisinada iti nadalus a singgalut a maipaay ken Kristo.” (2 Corinto 11:3) Nakita ni Pablo a nasesita ti panagsuratna maipapan iti sumagmamano kadagiti ulbod a pannursuro nga agrakrakurak idi kaaldawanna. Iti maikadua a suratna iti kongregasion ti Tesalonica, nagsurat: “Dawatenmi kadakayo a dikayo koma paalis a sipapardas iti panunotyo ket dikay pariribuk uray gapu iti naipaltiing a sasao wenno uray gapu iti surat a kas naggapu kadakami a kasla asidegen ti aldaw ni Jehova. Dikayo paallilaw iti uray siasino iti uray aniaman.”​—2 Tesalonica 2:1-3.

Dikay Makibibiang kadagiti Apostata

 7. (a) Ania a salsaludsod ti tumaud no maawat dagiti literatura ti apostata babaen iti koreo? (b) No maipapan iti panangsalwad ti maysa iti bagina manipud kadagiti impluensia dagiti apostata apay a ti aglablabes a panagtalek ket napeggad?

⁷ Ita, ania ngay ti aramidenyo no naipasangokayo iti pannursuro nga apostata​—dagiti nasikap a panagrasrason​—nga agkunkuna a ti adda a pinatpatiyo kas maysa kadagiti Saksi ni Jehova ket saan nga isu ti kinapudno? Kas pangarigan, aniat’ aramidenyo no immawatkay ti surat wenno pagbasaan, linuktanyo, ket nakitayo a dagus a daytat’ naggapu iti maysa a nagapostata? Basaenyo aya dayta gaput’ panagusiuso, tapno makita no aniat’ ibagbagana? Mabalin pay ketdi a mairasonyo: ‘Dinakto apektaran dayta; napigsaakon iti kinapudno. Ngem, malaksid pay iti dayta, no adda kadatayo ti kinapudno, awan ti pagbutngantayo. Ti kinapudno ket maitakderannanto dayta a pannakasuot.’ Iti kastoy a panagpampanunot, dadduma tinaraonanda ti is-isipda kadagiti apostata a panagrasrason ket nasiloanda kadagiti serioso a panagsalsaludsod ken panagduadua. (Idiligyo iti Santiago 1:5-8.) Gapuna laglagipenyo ti pakdaar idiay 1 Corinto 10:12: “Ti mangipagarup nga adda a sitatakder kitaenna ta di maikulbo.”

 8. Ania a tulong ti kasapulan dagiti dadduma a pinakapuy dagiti panagduadua?

⁸ Babaen iti naayat a tulong manipud kadagiti naayat a kakabsat, dadduma kadagiti naaddaan iti panagduadua nga immula dagiti apostata nakaungarda kalpasan ti sumagmamano a panawen iti naespirituan a panagpapaut-ot ken pannakadangran. Ngem naliklikan koma dayta nga ut-ot. Idiay Proverbio 11:9 naibaga kadatayo: “Ti apostata a tao dadaelenna gapu iti ngiwatna ti kaarrubana, ngem gapu iti pannakaammo maispalto ti nalinteg.” Ibaga met ni Judas kadagiti padana a Kristiano a “kaasianyo dagiti dadduma nga adda iti panagduadua; ket isalakanyo dagiti dadduma nga iyadayuyo ida iti apuy.” (Judas 22, 23) Binagbagaan ni Pablo ni manangaywan a Timoteo a mamatigmaan a “sieemma kadagiti sumalungasing; bareng no ti Dios ipaayanna ida ti panagbabawi a maipaay iti pannakaammo iti kinapudno, ken makalapsutda iti silo ti Diablo, isu a nangkayaw kadakuada a maipaay iti pagayatanna.”​—2 Timoteo 2:25, 26.

 9. Ania dagiti nakalkaldaang a nagbanagan dagidiay a nangpanaw iti pudno a panagdayaw?

⁹ Nakalkaldaang ta, dadduma nagturongda payen iti naan-anay a kinasipnget, a nagsublida payen kadagiti di umiso a pannursuro iti Kakristianuan. Nagsurat ni apostol Pedro maipapan iti nakalkaldaang a napasamak kadagiti sumagmamano nga immuna a nagnan iti kinapudno ngem simiasida. Kunana: “Ta no, iti kalpasan iti pannakalapsutda kadagiti pakarugitan ti lubong gapu iti naan-anay a pannakaammoda ken Apo ken Manangisalakan a Jesu-Kristo, masiloanda manen kadakuada ken maabakda, nagbalin a dakdakes ti maudi a kasasaadda ngem iti immuna.” Kuna ni Pedro a kasla da aso a nagsubli iti sarwana met laeng ken kas nadigosen a takong a naglublob met laeng iti lugnak.​—2 Pedro 2:20-22.

10. (a) Ania ti makuna ni Jehova maipapan iti panagdengngeg kadagiti apostata? (b) Ti panagbasa iti pagbasaan dagiti apostata kaipapananna ti panagaramid iti ania?

¹⁰ No kunaen ti padatayo a tao kadatayo, ‘Dikay basbasaen daytoy’ wenno, ‘Dikay dengdenggen dayta,’ mabalin a masulisogtayo a di mangikankano iti pammagbagana. Ngem laglagipenyo, iti daytoy a kaso ni Jehova Daydiay mangibagbaga kadatayo, iti Saona no aniat’ aramidentayo. Ket aniat’ kunana maipapan kadagiti apostata? “Umadayukayo koma kadakuada” (Roma 16:17, 18); “dikay makikadkadua” kadakuada (1 Corinto 5:11); ken “dikay awaten [ida] iti balayyo ket dikay met kablaawan [ida]” (2 Juan 9, 10). Naganetget dagitoy a sasao, nalawagda a pammagbaga. No, gapu iti panagusiuso, basaentayo ti literatura ti pagaammon nga apostata, saan kadi a daytat’ kasla met laeng panangawis iti maysa a kabusor ti pudno a panagdayaw iti uneg ti balayyo tapno makikatugaw kadatayo ket isalaysayna dagiti apostata a kapampanunotanna?

11, 12. (a) Ania nga ilustrasion ti naited a mangtulong kadatayo a mangapresiar a ditay mabalin a basaen ti pagbasaan dagiti apostata nga awan basbasolna? (b) Kasano a maiyaplikar daytoy iti pannakaseknan ni Jehova iti ilina?

¹¹ Iyilustrartayo daytoy a banag iti kastoy: Kas pangarigan ngay ti anakyo a lalaki a tin-edyer immawat iti pornograpiko a pagbasaan iti koreo. Ania ngay ti aramidenyo? No adda pagannayasanna a mangbasa iti dayta gaput’ panagusiuso, kunaenyo ngata: ‘Wen anak, basaem dayta. Saannaka a madangran dayta. Manipud kinaubingmo sinursuruandaka a dakes ti imoralidad. Sa, masapul met a maammuam no aniat’ maar-aramid iti lubong tapno makita a pudno a nagdakes dayta’? Kastanto aya ti panagrasonyo? Pulos a saan! Imbes ketdi, sigurado nga ipakitayo dagiti peggad ti panagbasbasa kadagiti pornograpiko a pagbasaan ken dayta ti padadaelyo. Apay? Agsipud ta, nupay kasano ti kinapigsa ti maysa a tao iti kinapudno, no subuanna ti is-isipna kadagiti binaballikug a kapanunotan a masarsarakan kadagita a pagbasaan, daytat’ mangapektarto iti isip ken pusona. Ti agay-ay-ayam a dakes a tarigagay a naimula kadagiti kaungan ti puspuso ti agangayto mangpartuat iti binaballikug a seksual a tarigagay. Ket ania ti resultana? Kuna ni Santiago a no ti dakes a tarigagay ti mainginaw wenno maisikog, ipasngaynanto ti basol ket ti basol isu ti mangiturong ken patay. (Santiago 1:15) Gapuna apay a rugianyo dagita nga agsasaganad a pakatignayan?

¹² Ngem no agtignaytayo nga insigida tapno masalakniban dagiti annaktayo iti pannakaisarangda iti pornograpia, ditay aya namnamaen a ti naayat a nailangitan nga Amatayo ti mangsalaknib met kadatayo manipud naespirituan a pannakiabig, agraman ti apostasia? Kunana, Umadayukayo iti dayta!

13. Aniat’ maaramidan no dagiti makakarit a salsaludsod, a naibatay kadagiti masasao wenno sursurat dagiti apostata ti mapataud bayat a mangaskasabatayo?

¹³ Ngem kasanon no intay ikaskasaba ti naimbag a damag ket dagiti tattao mamataudda kadagiti salsaludsod wenno isusuppiat nga umas-asping kadagidiay patpatauden dagiti kabusor? Siempre, no ti maysa a tao ket saan a napasnek ket kayatna laeng ti makirikiar, masansan a nasaysayaaten nga agpadespensartayo ket mapantayon iti sumaruno a balay. Ngem no ti maysa ket talaga a sipapasnek a saludsodennatayo maipapan iti kunkuna dagiti apostata, ania ngay ti maaramidan? Umuna, imtuodentayo met no ania a talaga, ti makagapu iti pakaseknanda. Mabalin a daytat’ maysa wenno dua laeng a punto. Kalpasanna agtalinaed laeng kadagitoy ket sumungbat manipud iti Kasuratan, manipud kadagiti publikasion ti Sosiedad, ken manipud ti pudpudno nga ammotayo maipapan iti dayta a tema. Ditay koma pampanunotenen a masapul a basaentayo ti maysa a libro wenno polieto a napunno kadagiti pammardayada ken kagudua a kinapudno tapno masungbatantayo dagiti ulbod a pammadpadakesda ken pannursuro dagiti bumusbusor.

Panagtalek ken Jehova

14. Ania a naayat a pakaseknan ti adda iti nailangitan nga Amatayo nga agpaay kadatayo, ket apay a maitedtayo ti naan-anay a panagtalek kenkuana?

¹⁴ Bayat ti panagabantetayo, a pabpabilgen ti pammatitayo ken agtalinaed nga okupado iti serbisio iti Pagarian, simamatalek nga agpannuraytayo ken Jehova a pagaammo a, kas ti naayat a nailangitan nga Amatayo, tarigagayanna ti kasasayaatan nga agpaay kadatayo. Ti Dios ti mangisursuro kadatayo; pakpakdaarannatayo. Ar-aramidenna daytoy babaen iti Saona ken babaen kadagiti nalawag a pannursuro nga ipapaay ti makitkita nga organisasionna. No agdawattayo iti maysa a naayat a naganak iti tinapay ken ikan, saannatayo nga ikkan ti bato wenno uleg. Kasta met ti Dios, dinatay luklukuen wenno allilawen (Mateo 7:7-11) Kaskasdi, ti Dios dinatayo salakniban a naan-anay manipud kadagiti pakasulisogan wenno kadagiti makaallilaw a kinaulbod ken kadagiti dinidiablo a propaganda. Kunana maipapan iti bagina: “Siak, ni Jehova, a Diosmo, Daydiay mangisuro kenka a maipaay iti gunggonam, Daydiay mangiturong kenka iti dalan a papanam koma.” (Isaias 48:17) Wen, ni Jehova ‘sursuruannatayo a maipaay iti pakagunggonaantayo.’ Ibagana kadatayo a suminatayo manipud kadagiti apostata ken kadagiti pannursuroda, ket daytoy agpaay iti mismo a pakasalaknibantayo. Kaipapanan dayta ti biagtayo.

15. Ania dagiti pakdaar nga inted ni apostol Pablo maipapan iti sumagmamano a padpadasenda a guyoguyen nga iyadayo dagiti ad-adalan?

¹⁵ Pinakdaaran ni apostol Pablo dagiti padana a Kristiano a papanglakayen: “Ket kadakayo met laeng addanto tumakder a tattao nga agsao kadagiti nakas-ang a banag tapno guyoguyenda dagiti adalan a sumurot kadakuada.” (Aramid 20:30) No dengdenggentayo a kanayon dagiti nasikap nga argumentoda ken aginsasanto a panagrasrasonda, dagiti “nakas-ang a bambanag” ket mabalin a kasla nakalinlinteg. Bayat nga ad-adda a mingmingmingan ni Eva ti naiparit a bunga ken dengdenggen ti tiritir a panagrasrason ti Diablo, ad-adda met nga isut’ kumbinsido nga umiso ti Diablo. Namakdaar ni Pablo: “Agannadkayo: di la ket ta adda mangkayaw kadakayo gapu iti pilosopiana ken makaallilaw a sursuro kas maiyallubog kadagiti sarsarita a natauan, ken maiyallubog kadagiti nailubongan a pamunganayan ken saan a maiyannurot ken Kristo.” (Colosas 2:8) Impamatmat pay met ti apostol a “gapu kadagiti nalinis ken nasayaat a palpalawag [dagiti apostata] allilawenda dagiti puspuso dagiti nanengneng.” (Roma 16:17, 18; idiligyo met iti 2 Corinto 11:13-15.) Siempre, ti kinaagpaysona nga adda sumagmamano met a naallukoyda iti dayta a kita iti propaganda dina kayat a sawen a surotentayo met ida. Imbes ketdi, masapul nga agannadtayo a kanayon.

16. Ti panangiyaplikar iti ania a Nainkasuratan a pakdaar tulongannatayto a mangibtur iti panagregget ni Satanas a mangallilaw ken mangiyadayo kadagiti tattao manipud pudno a panagdayaw?

¹⁶ Dagiti taktika ti Diablo saan a nagbalbaliw nanipud pay idiay Eden. Agus-usar pay laeng kadagiti nasikap a panagsalsaludsod ken agapelar iti kabukbukodan a paginteresan. Nagsurat ni Pedro: “Addanto dagiti saan a pudno a mannursuro iti tengngayo. Isuda a mangiserrekto a sililimed kadagiti nakillo ken makadadael a pammati . . . Ket iti inaagum ken kadagiti sasao a makaallilaw pagbalinendakayto a pagsapulan.” (2 Pedro 2:1-3) Ti palsipikado a banag ti nadisenio nga agparang a kasla pudpudno. Idiay 2 Timoteo 2:14-19, impaganetget ni Pablo ti kinapateg ti panangusar ti Sao ni Jehova nga isut’ mangpalinteg kadagiti bambanag ngem namakdaar maipapan ti panangliklik kadagiti apostata, a ‘dagiti sasaoda awan pagimbaganna a mangsalungasing iti banag a nasantuan,’ a kunana, “ti saoda agdadaelto a kas iti gangrena.”

17, 18. (a) Kasano a ti apostata a pannursuro maiyarig kas gangrena? (b) Ania a pammakdaar ti inted ni apostol Pedro maipapan kadagidiay a mangpadpadas a mangiyadayo kadatayo manipud pudno a panagdayaw? (c) Ania a salsaludsod ti masungbatan iti sumaganad a panagadal?

¹⁷ Anian a nagsayaat a panangiyasping dayta! Kas gangrena, ti apostata a panagrasrason awan sabali no di maysa a nagdaras panagsaknapna a naespirituan nga ipapatay. Ket yantangay dagiti kamkameng ti kongregasion naiyarigda a maysa a bagi, adda ti peggad a maimpektaran met dagiti dadduma. No daydiay mangiwarwaras kadagiti apostata a pannursuro ket saanda a maisubli iti naespirituan a salun-at babaen iti naayat ngem natibker a panangiyaplikar iti sapsapo manipud Sao ti Dios, ti panangguped iti daytoy a miembro (ti panangilaksid) mabalin nga isu ti kakaisuna laeng a pagpilian a maipaay a pakasalakniban dagiti dadduma a kamkameng ti bagi. (Idiligyo iti Tito 1:10, 11.) Dikay koma paimpektaran iti makapapatay a naespirituan a kita ti gangrena! Salimetmetanyo ti naimbag a naespirituan a salun-atyo babaen iti panangliklikyo iti pannangkontaminar ti apostata a panagpampanunot. Ipangagyo ti pammagbaga idiay 2 Pedro 3:17, 18: “Dakay ngarud, ay-ayaten, yantangay ammoyo dagitoy a bambanag a naipakpakauna, agaluadkayo di la ket ta maikanunongkayo iti pannakaallilaw dagiti managdakdakes ket mapasagkayo iti kinatibkeryo met laeng. No di ket rumang-aykayo koma iti di kaikarian a kinamanangngaasi ken iti pannakaammo iti Apotayo ken iti Manangisalakan a ni Jesu-Kristo.”

¹⁸ Ngem kasanotay a masalakniban dagiti bagbagitayo manipud apostasia? Kasanotay a maannadan dagiti puspusotayo manipud iti panangawat kadagiti apostata a panagrasrason? Dagitoy a salsaludsod mausigda iti sumaganad nga artikulo.

18. No maipasango kadagiti pannursuro dagiti apostata, aniat’ rebbeng a sasaaden dagiti ad-adipen ni Jehova?

¹⁸ Wen, kadagiti isuamin a matalek ken sisusungdo nga agib-ibtur iti Nakristianuan a dalan, makasigurotayo a ti kinapudno ni Jehova ti kaskasdi pay met laeng a nagpintas, makapnek​—nga ad-adda pay ngem idi umuna a nangngeganda dayta. Ngarud, ikeddengyo koma kadagiti puspusoyo a nikaanoman dikay kudkuditen ti sabidong nga ituktukon dagiti bumusbusor nga apostata. Ipangagyo ti nainsiriban ngem nainget a bilin ni Jehova a liklikanyo a naan-anay dagidiay mangallilaw kadakayo, mangyaw-awan kadakayo, nga ibaw-ingdakayo nga agturong kadagiti daldalan ni patay. No ayatentayo ni Jehova iti amin a pusotayo, kararuatayo ken isiptayo, ken ay-ayatentayo met dagiti kaarrubatayo kas ti bagitayo, daytat’ di mangted ti lugar a serken dagiti apostata a panagpampanunot. (Mateo 22:37-39) Ditayto “ikkan lugar ti Diablo” ket awanto ti tarigagaytayo a tumaliaw iti sabali. Saantayo a ‘paalis a sipapardas ti pampanunottayo’ babaen iti aniaman a palso a pannursuro.​—2 Tesalonica 2:1, 2.