Salsaludsod Dagiti Agbasbasa

Apay nga insurat ni Pablo ti maipapan iti Kristiano nga asawa a babai: “Isu maitalimengto a sitatalged babaen ti panagpasngay iti anak”?​—1 Timoteo 2:15.

Ania ti kayat a sawen ni Pablo sigun iti konteksto daytoy a bersikulo? Isu ket napaltiingan a mangbalakad mainaig iti akem ti Kristiano a babai iti kongregasion. Insuratna: “Tarigagayak a dagiti babbai arkosanda ti bagbagida iti naimbag-pannakaurnosna a kawes, buyogen ti kinaemma ken kinasimbeng ti panunot, saan a kadagiti estilo a panangsallapid iti buok ken balitok wenno kadagiti perlas wenno nangina unay a lupot, no di ket iti wagas a maitutop kadagiti babbai nga agkunkuna nga agraemda unay iti Dios, awan sabali, babaen iti naimbag nga ar-aramid.” (1 Timoteo 2:9, 10) Parparegtaen ni Pablo dagiti kakabsatna a Kristiano a babbai nga agbalinda a naemma, a natimbengda koma iti panagpili kadagiti pagarkosda, ken ‘naarkosanda’ koma kadagiti naimbag nga ar-aramid.

Kalpasanna, inlawlawag ni Pablo ti urnos ti kinaulo iti kongregasion, a kunkunana: “Saanko nga ipalubos a ti babai mangisuro, wenno mangwatwat iti autoridad iti lalaki, no di ket agulimek koma.” (1 Timoteo 2:12; 1 Corinto 11:3) Inlawlawagna ti nakaibatayan daytoy nga urnos babaen ti panangipakitana a nupay ni Adan ket saan a naallilaw ken ni Satanas, ni Eva ket ‘naan-anay a naallilaw ken nagsalungasing.’ Kasano a maliklikan ti Kristiano a babai ti panagkamali a kas iti naaramid ni Eva? Sumungbat ni Pablo: “Nupay kasta, isu maitalimengto a sitatalged babaen ti panagpasngay iti anak, no la ket agtalinaedda iti pammati ken ayat ken pannakasantipikar agraman ti kinasimbeng ti panunot.” (1 Timoteo 2:14, 15) Ania ti kayat a sawen ni Pablo kadagitoy a sasao?

Dadduma a managipatarus ti agparang a mangipasimudaag a kasapulan a maaddaan ti babai iti annak tapno maisalakan. Kas pagarigan, kuna ti Today’s English Version: “Maisalakan ti babai no adda annakna.” Nupay kasta, saan nga umiso dayta a pannakaipatarus ti sasao ni Pablo. Adu a teksto ti mangipakita a tapno maisalakan ti maysa a tao, masapul a maam-ammona ni Jehova, patienna ni Jesus, ken paneknekanna ti pammatina babaen kadagiti aramid. (Juan 17:3; Aramid 16:30, 31; Roma 10:10; Santiago 2:26) Kanayonanna, saan met nga ibagbaga ni Pablo a maipasigurado kadagiti manamati a babbai ti natalged a panaganak. Dadduma a babbai ti sitatalged a nakalasat iti panaganak, manamatida man wenno saan. Ken nakalkaldaang ta natay ti dadduma a nagpasngay, manamatida man wenno saan.​—Genesis 35:16-18.

Ad-adda a matarusantayo ti kayat a sawen ni Pablo no kitaentayo ti kanayonan a balakadna kadagiti babbai iti maud-udi a paset daytoy met laeng a suratna. Namakdaar maipapan kadagiti sumagmamano nga ub-ubing a balo a “di makumikom, nga umalla-allatiwda iti balbalay; wen, saan laeng a di makumikom, no di ket manangidanondanon ken mannakibiangda pay iti ar-aramid ti sabsabali a tattao, a sarsaritaenda ti bambanag a saanda a rebbeng.” Ania ti balakad ni Pablo? Ituloyna: “Gapuna tarigagayak a dagiti ub-ubing a balo a babbai makiasawada, nga agipasngayda iti annak, nga agaywanda iti sangakabbalayan, a saanda nga ikkan ti bumusbusor iti pakagutugotan a mangrabngis.”​—1 Timoteo 5:13, 14.

Itampok ni Pablo ti makagunggona nga akem dagiti babbai iti uneg ti pamilia. No okupado kadagiti annongen a kas iti ‘panagpasngay iti anak ken panagtagibalay,’ saan nga agannayas ti babai iti kondukta a saan a makapabileg bayat nga isu ket agtalinaed “iti pammati ken ayat ken pannakasantipikar agraman ti kinasimbeng ti panunot.” “Maitalimengto a sitatalged” ti espiritualidadna. (1 Timoteo 2:15) No aramidenda dayta, maliklikan ti adu nga agtutubo a babbai dagiti silo ni Satanas.

Ti sasao ni Pablo ken ni Timoteo ipalagipda kadatayo amin, lallaki ken babbai, nga agbalintayo koma nga okupado kadagiti makagunggona nga aramid. Ti Sao ti Dios balakadanna ti amin a Kristiano: “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib a tattao.”​—Efeso 5:15.