No Agpegpeggad ti Talna iti Panagasawa

“Di sumina ti babai ken asawana;. . . ket ti lalaki saanna koma nga isina ni asawana.”​—1 CORINTO 7:10, 11.

 1. Aniat’ panggep ni Jehova maipapan iti panagasawa?

PINAGKALLAYSA ni Jehova a Dios ti immuna a natauan a paris iti panagasawa ket pinanggepna a daytoy a maymaysa-lasag a singgalut ti agtalinaed nga agnanayon. Dayta komat’ agtalinaed a nabendisionan a panagtipon a mangibunganto ti ragsakda ken mangpataud kadagiti nalinteg nga annak, amin agpaay iti pakaidayawan ti Dios.​—Genesis 1:27, 28; 2:24.

 2. Aniat’ maysa a makagapu a mangiturong iti pannakawaswas dagiti singgalut ti panagasawa?

² Dayta ulidan nga urnos ti panagasawa ti nasinga gapu iti agwaywayas a panagpampanunot ken ti basol. (Genesis 3:1-19; Roma 5:12) Kinapudnona, ti espiritu ti panagwaywayas ket maysa kadagiti banag a mangiturong ti pannakawaswas dagiti singgalut ti panagasawa itatta. Gapuna, idiay Estados Unidos bayat ti 1985, addan 5 a diborsio​—no iyar-arig kadagiti 10.2 a panagasawa​—iti tunggal 1,000 a tattao. Idi 1986 ti report manipud Moscow ipamatmatna met a 37 porsiento laeng kadagiti panagasawa idiay Union Soviet ti agpaut ti tallo tawen ket 70 porsiento ti agpatingga iti lasud ti sangapulo a tawen.

 3. (a) Aniat’ mabalin a mangpataud ti panagsuppiat ti agasaawa? (b) Maipapan iti panagasawa, asino ti kangrunaan a manangdadael ti talna?

³ Ti espiritu ti panagwaywayas ti makapataud iti suppiat iti panagasawa. Lapdan met dayta ti naespirituan nga irarang-ay, ta “ti bunga ti kinalinteg maimula iti talna a maipaay kadagiti agar-aramid ti talna.” (Santiago 3:18) Ngem asinot’ kangrunaan a manangdadael ti talna? Ni Satanas. Ket anian a nakalkaldaang no adda asinoman kadagiti adipen ti Dios “ikkan[da] ti lugar ti Diablo” ket iti kasta didanto tagiragsaken dagiti pagtaengan ti inana ken talna!​—Efeso 4:26, 27.

 4. No ti Kristiano a pagassawaan addaanda ti nakaro a parparikut iti panagasawa, aniat’ rebbeng a bigbigenda ken aniat’ rebbeng nga aramidenda?

⁴ No dagiti Kristiano nga assawa matmatanda ti panagsina kas kakaisuna a solusion dagiti parikut ti panagasawada, agpegpeggadda a matnagen kadagiti ganuat ni Satanas, ket adda banag a serioso a di umiso iti naespirituan. (2 Corinto 2:11) Dagiti prinsipio ti Dios ti saan nga iyap-aplikar a naan-anay ti maysa wenno dua kadakuada. (Proverbio 3:1-6) Gapuna rebbeng nga insigida a mangaramidda ti buyogen panagkararag a panagregget a mangresolbar kadagiti dida pagkinkinnaawatan. No dagitoy ket kasla saanda a makapagkappia, mabalin a pagkonsultaran dagiti panglakayen ti kongregasion. (Mateo 18:15-17) Nupay dagitoy a lallaki saanda nga autorisado a mangibaga kadagiti kapammatianda no aniat’ eksakto nga aramidenda maipapan iti parparikut ti panagasawada, mabalinda nga iturong ti atension no aniat’ ibagbaga ti Kasuratan.​—Galacia 6:5.

 5. Maibatay iti ania a iti diborsio nga addaan posibilidad a mangasawa manen iti sabali ket maakseptar a Nainkasuratan?

⁵ No ti kasasaad ti panagasawa ket nakadakdakes unay a pampanunoten payen ti pagassawaan a Kristiano ti diborsio, mabalin nga itudo dagiti panglakayen a ti diborsio ken panagasawa manen ti Nainkasuratan a maakseptar laeng no ti asawa ti maysa ket nakaaramid ti “pannakiabig.” Daytoy a termino ket saklawenna ti pannakikamalala ken ti dadduma pay a langa dagiti imoral a seksual a relasion ken ballikog nga ar-aramid. (Mateo 19:9; Roma 7:2, 3; kitaenyo Ti Pagwanawanan, Setiembre 15, 1983, panid 24.) Kaskasdi, anian no ti “pannakiabig” saan met a naaramid ngem kaskasdi nga agpegpeggad pay latta unay ti talna ti panagasawa? Aniat’ kunaen ti Kasuratan maipapan iti legal wenno de facto a panagsina?

Ti Naipaltiing a Balakad ni Pablo

 6. (a) Aniat’ kababagas ti balakad ni Pablo idiay 1 Corinto 7:10, 11? (b) Kasanot’ rebbeng a panangresolbar dagiti Kristiano a pagassawaan ti parparikut ti panagasawada?

⁶ Iti panagregget a matulongan ti Kristiano a pagassawaan nga agpegpeggad ti singgalut ti panagasawada, mabalin nga iturong dagiti panglakayen ti atension kadagiti sasao ni apostol Pablo: “Ngem kadagiti addaan asawa ibilinko, ngem saan a siak, no di ti Apo, a di sumina ti babai ken asawana; ngem no sumina, agtaeng a di makiasawa wenno makikappia koma ken asawana; ket ti lalaki saanna koma nga isina ni asawana.” (1 Corinto 7:10, 11) Dagiti assawa a Kristiano rebbengna a kabaelanda a risuten ti parparikutda, nga ilugaranda dagiti natauan a kinaimperpekto. Rebbeng nga awan koma dagiti parikut a nakadakdakkel unay a di maresolbar babaen ti napasnek a panagkararag, panangiyaplikar kadagiti prinsipio ti Biblia, ken panangipakita ti ayat nga isut’ bunga ti espiritu ti Dios.​—Galacia 5:22; 1 Corinto 13:4-8.

 7. (a) No dagiti Kristiano a pagassawaan agsinada, aniat’ Nainkasuratan a takderda? (b) Ti panagsina dagiti dua a kasado a Kristiano ti mabalin nga addaantot’ ania a koneksion kadagiti pribilehioda ti serbisio?

⁷ Ngem kasanon no dagiti Kristiano nga assawa ket agsinada? Masapul nga “agtaeng a di makiasawa, wenno makikappia koma manen ken asawana.” Malaksid no daytat’ diborsio a nagun-odan maibatay iti “pannakiabig,s” awan kadakuada a dua ti Nainkasuratan a siwayawaya a makiasawa manen. Gapu itoy ken gapu it “kasaknap ti pannakiabig,” nasaysayaat koma kadakuada a “makikappia koma manen” nga insigida. (1 Corinto 7:1, 2) Saan a biang dagiti panglakayen nga ipilit a pagpatinggaen ti lalaki ken ti babai ti panagsinada, ngem mabalin a saanda a makakualipikar kadagiti dadduma a pribilehio ti serbisio gapu kadagiti parparikutda iti panagasawa. Kas pangarigan, no ti maysa a lalaki “dina ammo ti mangurnos iti balayna met laeng,” kaawatan nga isut’ agkurang iti abilidad a “panangaywan iti kongregasion ti Dios” kas maysa a manangaywan.​—1 Timoteo 3:1-5, 12.

 8. Aniat’ kababagas ti balakad ni Pablo idiay 1 Corinto 7:12-16?

⁸ Maikabkabil ti panangipaganetget iti panangipreserbar ti panagasawa uray no maymaysa laeng ti asawa a manamati. Insurat ni Pablo: “No ti lalaki a kabsat adda asawana a di mamati, ket ti babai siaayat a makikabbalay kenkuana, dina koma isina; ket ti babai nga adda asawana a di mamati, ket ti lalaki siaayat a makikabbalay kenkuana, ti babai dina koma panawan ni asawana. . . . Ngem no ti di mamati suminanto, sumina laeng; saan a paadipen ti kabsat a lalaki wenno babai kadagitoy a banag, ngem ti Dios inayabannatayo nga agbiag iti talna. Ta kasano ti pannakaammom, babai, no maisalakanmonto ni asawam? Wenno, kasano ti pannakaammom, lalaki, no maisalakanmonto ni asawam?” (1 Corinto 7:12-16) No ti di mamati pilienna nga isut’ pumanaw, ti Kristiano ti mamalubos kenkuana. Ngem ti mamati, a manginanama a ti di mamati maallukoyto met laeng iti Kinakristiano, ket saan nga isut’ mangirugi ti panagsinada. Ni Eunice, nga ina ni Timoteo, ti kaawatan nakipagtaeng a kadua ti di manamati nga asawana ngem nangted ti naespirituan a pannursuro iti anakna.​—2 Timoteo 1:5; 3:14, 15.

Dagiti Pakaibatayan ti Panagsina

 9, 10. (a) Gapu iti 1 Timoteo 5:8, aniat’ maysa a pakaibatayan ti panagsina dagiti pagassawaan? (b) Aniat’ rebbeng nga aramiden dagiti nadutokan a panglakayen no ti maysa a lalaki a Kristiano naakusar a madina suportaran ti asawana ken annakna?

⁹ Ti sasao ni Pablo idiay 1 Corinto 7:10-16 iparegtana ti panagtipon ti agassawa. Kaskasdi, dadduma, kalpasan ti panagreggetda a mangipreserbar ti relasion ti panagasawada, maikeddengdanto latta nga, iti amin a konsiensiada, awanen mabalinanda no di agsina. Aniat’ mabalin a pakaibatayan ti kasta nga addang?

¹⁰ Ti sipapakinakem a di panangsuportar ti maysa a pangibatayan ti panagsina. No makiasawa, ibaklay ti lalaki ti responsabilidad a mangipaay ti kasapulan ti asawana ken aniamanto nga annak a maadda kadakuada. Ti lalaki a di mangipaay ti kasapulan dagiti kameng ti sangakabbalayanna “naglikudanna ti pammati ket dakdakes ngem iti saan a mammati.” (1 Timoteo 5:8) Gapuna posible ti panagsina no adda sipapakinakem a di panangsuportar. Siempre, rebbeng nga ikkan dagiti nadukotan a panglakayen ti naannad a panangusig iti akusasion a ti maysa a Kristiano saanna a supsuportaranen ti asawana ken pamiliana. Ti sipapakinakem a di panangsuportar iti pamilia ket mabalin a mangibunga iti pannakailaksid.

11. Ania pay ti sabali a pakaibatayan ti panagsina, ngem aniat’ mabalin a mangaramid a maibturan ti kasta a situasion?

¹¹ Ti aglablabes a pisikal a panangabuso ti sabali pay a pangibatayan ti panagsina. Kas pangarigan ti di mamati nga asawa masansan a mabartek, makapungtot unay, ket dangdangranna a pisikal ti manamati. (Proverbio 23:29-35) Babaen iti kararag ken babaen ti panangiparangarang ti bunga ti espiritu ni Jehova, mabalin a malapdan ti manamati ti kakasta a panagpungtot ken maibturanna ti kasta a kasasaad. Ngem no madanonen ti punto a ti salun-at ken ti biag ti maab-abusar nga asawa ti aktual nga agpeligron, maipalubos a Nainkasuratan ti panagsina. Ditoy manen, rebbeng a kitaen dagiti panglakayen ti kongregasion dagiti darum maipapan ti pisikal a panangabuso no dagiti dua a Kristiano ti nairaman iti nagulo a panagasawa, ket mabalin nga alaen ti tignay a panangilaksid.​—Idiligyo ti Galacia 5:19-21; Tito 1:7.

12. (a) Kasano a ti espiritualidad ti manamati mabalin nga adda pakainaiganna iti panagsina? (b) Aniat’ maisingasing no adda ti nakaro unay a di nasalun-at a kasasaad iti Nakristianuan a pagtaengan?

¹² Ti naan-anay a panagpeggad ti espiritualidad ti makaipaay met ti pangibatayan ti panagsina. Rebbeng nga aramiden ti manamati iti nasinasina a pagtaengan gapu iti relihion ti amin a mabalin a pamay-an tapno gundawayan dagiti naespirituan a sagana ti Dios. Ngem ti panagsina ti maipalubos no ti ibubusor ti di mamati nga asawa (nalabit agraman pisikal a pananglapped) pudno a pagbalinenna nga imposible a suroten ti pudno a panagdayaw ken aktualmente a pagpeligruenna ti espiritualidad ti manamati. Kaskasdi, kasanon no adda di nasalun-at a naespirituan a kasasaad iti pagtaengan a sadiay dagiti agassawa ket agpadpadada a manamati? Rebbeng a tumulong dagiti panglakayen, ngem nangnangruna a ti bautisado nga asawa a lalaki pagreggetanna a remediuan ti kasasaad. Siempre, no ti maysa a bautisado nga asawa ket agtigtignay kas maysa nga apostata ket padpadasenna a lapdan ti asawana nga agserbi ken Jehova, rebbeng a tamingen dagiti panglakayen dagiti bambanag sigun iti Kasuratan. No adda ti panangilaksid iti maysa a kaso a nakairamanan ti naan-anay a panagpeggad ti espiritualidad, sipapakinakem a di panangsuportar, wenno aglablabes a pisikal a panangabuso, ti matalek a Kristiano nga agsapsapul ti legal a pannakisina ket saan a sumupsupring iti balakad ni Pablo maipapan ti panangidarum ti manamati iti pangukoman.​—1 Corinto 6:1-8.

13. Kadagiti ania a sirkumstansia a mabalin mapalubosan ti panagsina ti pagassawaan?

¹³ No aglablabesen dagiti sirkumstansia, no kasta, maipalubos ti panagsina. Ngem dagiti nakapuy laeng a pambar kaawatan rebbeng a di mausar tapno makagun-od ti panagsina. Asinoman kadagiti Kristiano nga agsina rebbeng nga ibaklayda ti personal a responsabilidad iti dayta a tignay ken bigbigenda met nga amintayo agsungbattayto amin ken Jehova.​—Hebreo 4:13.

Maysa a Nainsiriban nga Addang?

14. (a) Ania a parikut ti mabalin a patauden ti panagsina? (b) Kasano a ti panagsina mabalin nga apektaranna dagiti annak?

¹⁴ Ti sikakararag a panagpampanunot ti rebbeng a maited met kadagiti parikut a mabalin patauden ti panagsina. Kas pangarigan, ti maymaysa-a-naganak a pamilia mammano a maipaayna ti mabalinan ti dua-a-nagannak a pampamilia iti kinatimbeng ken panangdisiplina. Ken ti panagsina ti mabalin nga ad-addaan ti umas-asping nga epekto kadagiti annak kas iti diborsio, a gapu iti dayta kinuna ti pagiwarnakan nga India Today: “Ni Sheena, a nagdadakkel ti matana a kasla malaonna ti intero a lubong, ket agtawen ti innem. Nagdiborsio dagiti dadakkelna dua a tawen ti napalabasen kalpasan ti nakaal-alas a laban iti korte. Di nagbayag kalpasan dayta, ni amana ti nangasawa ti sabali a babai. Iti maysa a tawen nakaro unay ti panagangkitna ket masansan a sussusopenna ti tanganna. Isut’ makipaggigian ken nanangna idiay South Delhi. Ti ina: ‘Ti ladingitko ti immakar ken ni Sheena. . . . Mailiw unay ken amana. . . . Isut’ natataengan ngem ti kaaduan nga ubbing a katawenanna. Ngem nakaro unay ti panagsangsangitna, a kasla adda kayatna nga iruar manipud unegna. Problema ti panageskuelana. Agbalin a nakauy-uyong dagiti ubbing. Masansan, isut’ agturong iti lubong ti panagar-arapaap: isut’ mangaramid ti estoria maipapan kadakam amin a sangsangkamaysa a mapan kadagiti gagayyemna.’”

15. Aniat’ mabalin nga epekto ti panagsina iti Kristiano nga asawa a lalaki wenno babai?

¹⁵ Masansan, ti panagsina ket di met agtungpal a nasayaat no maminsan para iti Kristiano nga asawa a lalaki wenno babai. Di agbayag maammuandanto a no awan asawada wenno ti annakda adda daydiay kasla rikna ti kinaongaong a mangrirriribuk. Ti saan met a mabalin a di ikankano isuda dagiti rigat nga ibunga ti panagsina. Posible kadi wenno saan ti panangaywan kadagiti bambanag manipud pinansial a punto? Ket anian no ti dagsen ti panagsina agbunganto ti pannakatnag iti imoralidad? Kuna ni Jesus: “Ngem ti kinasirib mapaneknekan gapu kadagiti gapuananna.” (Mateo 11:19) Nangnangruna no agpadpada a Kristiano dagiti agassawa, ti naaramidan babaen ti panagsina no maminsan napaneknekan a di nainsiriban unay.

Pagreggetan a Parmeken ti Parparikut

16. Dagiti Kristiano a pagassawaan a makitada nga agpegpeggad ti talna ti panagasawada ti rebbeng a mangaramid ti ania?

¹⁶ Dagiti assawa a Kristiano a makitada nga agpegpeggad unay ti kinatalna ti panagasawada ket rebbeng a pagsasaritaanda ti saanda a pagkikinnaawatan iti wagas a maikari kadagidiay agserserbi iti Dios. Ken rebbengna nga iwayaan dagiti kinaimperpekto. (Filipos 2:1-4) Ngem ania pay ti maaramidan?

17. Kasano a ti panangiparangarang ti kinasirib maipapan kadagiti material a bambanag makatulong iti talna ti panagasawa?

¹⁷ Ti panangipamatmat ti kinasirib maipapan kadagiti material a bambanag ti makatulong met iti talna ti panagasawa. Kas panangiyilustrar: Kalpasan panangusigna iti negatibo a punto de vista ti asawana, mabalin a maikeddeng ti lalaki, nupay kasta, a nainsiriban para iti pamiliana nga umakar iti sabali a lugar. Kasla maiparbeng daytoy gapu kadagiti ekonomiko a rason, ngem mabalin met a tulonganna ti pamilia a mangiyadelantar kadagiti intereses ti Pagarian babaen ti panagserbi idiay dakdakkel pakasapulan. (Mateo 6:33) Ti asawana a Kristiano mabalin saanna nga anamongan ti iyaakar gapu ta mapanawanna dagiti dadakkelna wenno dagiti nakairuamannan nga aglawlaw. Ngem ti babai nainsiriban a makitunos a naan-anay ken lakayna, nga isut’ ulo ti sangakabbalayan ken addaan responsabilidad a mangdeterminar no sadinot’ pagnaedan ti pamiliana. Mainayon pay, ti kinamanagpasakop ti babai ken naayat a pannakitunosna makatulong iti talna ti pagtaengan.​—Efeso 5:21-24.

18. Ania dagiti gundaway nga adda kadagiti Kristiano a pagassawaan nga agaramid kadagiti bambanag a sangsangkamaysa?

¹⁸ Ti talna ti pamilia rumang-ay ken dagiti parikut kasla basbassitda no ti pagassawaan sangsangkamaysa nga aramidenda dagiti bambanag. Kas pangarigan, addaan nagsayaat a gundaway dagiti pagassawaan a Kristiano nga agtrabaho nga agkadua iti tay-ak ti ministerio. No aramidenda a regular daytoy ken ikuyogda dagiti annakda kadakuada, magunggonaan ti intero a pamilia. Mabalin nga adda pay met nadumaduma a gundaway a mangpasingked ti singgalut ti panagasawa babaen ti pannakiraman kadagiti dadduma pay a makaay-ayo nga aktibidades a nangnangruna a tagtagiragsaken ti maysa kadagiti agassawa.

19. Ania a kita ti kinaulo ti mangparang-ay ti talna ti pamilia?

¹⁹ Ti umisot’ pannakawatwatna a kinaulo ti mamabileg met iti singgalut ti panagasawa. Siempre, ti nataengan a Kristiano nga asawa a lalaki saan nga agbalin a diktador. Imbes ketdi, ‘itultuloyna nga ayaten ti asawana ket dina pagungtan ti kasta unay.’ Ni Jehova ti mangnamnama kenkuana a mangwatwat ti naayat a kinaulo. (Colosas 3:18, 19) Kasta met, ti kasta a kinaulo mangparang-ay ti kinatalna ti pamilia.

Kadagiti Nasinasina a Sangakabbalayan

20, 21. Kasano a napaneknekan a ti kinarasonable ti makagunggona no agpegpeggad ti talna iti sangakabbalayan a nasinasina gapu iti relihion?

²⁰ Ti kinarasonable ket makatulong iti panangresolbar ti parparikut ti panagasawa dagiti Kristiano. (Filipos 4:5) Ngem ti kinarasonable ti nasken met no agpegpeggad ti kinatalna iti nasinasina a sangakabbalayan gapu iti relihion. No ti di mamati a lalaki lapdanna ti Kristiano nga asawana nga agserbi ken Jehova, mabalin a pagreggetan ti babai ti makirinnason kenkuana, a sitataktika nga itudo nga isut’ ik-ikkanna ti narelihiusuan a wayawaya ket nainkalintegan nga isu (ti babai) ti umawat ti umas-asping a pannakatrato. (Mateo 7:12) Nupay ti babai ti mangipakita ti adda pagbednganna a panagpasakop iti di mamati nga asawana, ti pagayatan ti Dios ti rebbeng pay met a maaramidan no adda panagsuppiat. (1 Corinto 11:3; Aramid 5:29) Pudno unay, ti itatabuno kadagiti Nakristianuan a panaggigimong a mamitlo iti maysa a lawas ket saan nga agsobsobra. Ngem ti manamati nga asawa a babai mabalin a makitana a nainsiriban ti kaaddana idiay balayda kadagiti dadduma a rabii ken iyeskediolna ti kaaduan a panagserbina iti tay-ak kadagiti oras nga agtartrabaho ni lakayna ken bayat nga adda idiay eskuelaan dagiti annakna. Babaen ti kinarasonable ken nasayaat a panangiplano, rebbeng a ti babai di “mabannog iti panagaramid ti naimbag.”​—Galacia 6:9.

²¹ Ti kinarasonable dumanon pay met kadagiti dadduma a bambanag. Kas pangarigan, ti maysa a tao addaan kalintegan a mangannurot iti maysa a relihion. Ngem saan metten a rasonable ken nainsiriban para iti Kristiano nga asawa a babai nga ikabil dagiti Bibliana ken dagiti katulongan iti panagadal ti Biblia idiay lugar a di pagayatan ti napalalo ti busorna nga asawana. Mabalin a maliklikan dagiti panagsuppiat no dagita a publikasion maidulinda a kadua dagiti personal a gargaretna ken adalenna ida iti pribada. Siempre, saan met a makikompromiso kadagiti nalinteg a prinsipio.​—Mateo 10:16.

22. Aniat’ mabalin a maaramidan no ti pannakasinga ti talna ti pagtaengan naisentro iti narelihiusuan a panangisuro kadagiti annak?

²² No ti pannakasinga ti talna ti pagtaengan naisentro iti panangisuro ti relihion kadagiti ubbing, mabalin a naintaktikaan nga iyurnos ti manamati nga asawa a babai ti panangikuyogna kadakuada iti panaggigimong ken iti tay-ak ti ministerio. Ngem no ti di mamati nga asawa a lalaki ken ama lapdanna daytoy, mabalin a sursuruan ti ina dagiti annakna kadagiti prinsipio ti Biblia tapno inton dumakkeldan ken pumanawdanton iti balay, mabalin a surotendanto ti pudno a panagdaydayaw. No ti asawa a lalaki ti manamati, kas ulo ti sangakabbalayan, isut’ addaan. Nainkasuratan nga obligasion a padakkelen dagiti annakna kas Kristiano. Gapuna rebbeng a makipagadal ti Biblia kadakuada, ikuyogna ida iti panaggigimong, ken sursuruanna ida iti tay-ak ti ministerio. (Efeso 6:4) Natural, rebbeng nga isut’ naasi, naayat, ken rasonable a makilangen iti di mamati nga asawana.

Taginayonen ti Talna kas Nagkaykaysa a Pamilia

23. No agpegpeggad ti talna ti panagasawa, aniat’ mabalin a makatulong?

²³ Yantangay ti pagassawaan ket “maymaysada a lasag,” rebbeng nga agtiponda iti kinatalna sigun kadagiti urnos ti Dios a maipaay kadagiti kasado a tattao, nangnangruna no dagiti agassawa ket Kristianoda. (Mateo 19:5; 1 Corinto 7:3-5) Ngem no ti talna ti panagasawa agpegpeggad iti kasoyo, sikakararag a repasuenyo dagiti napalabas a Nainkasuratan a punto. Mabalin a makatulong met no sublian a panunoten idi tiempo nga agin-innaremkay pay laeng. Anian ti panangikarkarigatan ti tunggal maysa kadakayo a nangpadpadas a mangaramid no aniat’ umiso ken insaadyo ti pundasion ti naragsak a panagasawa! Aramidenyo met laeng aya ti kasta ita a panagregget tapno di masina ti panagasawayo?

24. Ania a kababalin ti rebbeng nga adda koma kadagiti Kristiano maipapan iti panagasawa?

²⁴ Dagiti Kristiano a nagkaykaysa iti panagasawa ti addaan nakaskasdaaw a sagut manipud iti Dios​—ti panagasawada! No salimetmetanyo ti kariyo iti panagasawa ken taginayonen ti kinatarnawyo ken Jehova, adda iti sanguananyo ti nalinteg a baro a lubong a sadiay ti makapasakit-puso a panagsina ken diborsio ti saanton a mangsaplit iti sangatauan. Gapuna ipakita ti panagyaman iti panagasawa kas piguratibo a “tinallo a lubid,” a sadiay ni Jehova isut’ nasken a paset dayta. (Eclesiastes 4:12) Ket sapay koma ta amin a kameng ti sangsangkamaysa a sangakabbalayanyo tagiragsakenna ti bendision ti ragsak ti pamilia iti maysa a pagtaengan a lugar ti inana ken talna.

Ania dagiti Sungbatyo?

◻ Kasanoyo a gupgupen ti balakad ni Pablo idiay 1 Corinto 7:10-16?

◻ Ania dagiti mabalin a rason a maipaay iti panagsina dagiti pagassawaan?

◻ Kasanot’ mabalin a panangresolbar dagiti Kristiano ti parikutda no agpegpeggad ti talna ti panagasawa?

◻ Kadagiti sangakabbalayan a nasinasina babaen iti relihion, kasano a ti kinarasonable makatulong iti talna?

[Ladawan iti panid 23]

Dagiti Kristiano a pagassawaan nga agpegpeggad ti talna ti panagasawada rebbeng a pagsasaritaanda ti parikutda iti wagas a maibagay kadagidiay agserserbi ken Jehova