Agtulnogkayo Kadagiti Mangidalan Kadakayo

“Agtulnogkayo kadagiti mangidalan kadakayo ket paiturayankayo, ta igagada dagiti kararuayo a kas la isuda ti mangidatagto.”​—HEBREO 13:17.

 1. Kasanotay a magunggonaan manipud iti trabaho dagiti manangaywan a Kristiano?

NI Jehova nangipaay kadagiti manangaywan iti organisasionna iti daytoy “panawen ti panungpalan.” (Daniel 12:4) Isudat’ mangidadaulo iti panangaywan kadagidiay kimmarnero, ket ti panangaywanda makapabang-ar. (Isaias 32:1, 2) Mainayon pay, ti naayat a panangaywan dagiti panglakayen a mangtartrato iti arban ti Dios a siaanus agserbi kas pannalaknib manipud ken Satanas ken iti daytoy dakes a sistema dagiti bambanag.​—Aramid 20:28-30; 1 Pedro 5:8; 1 Juan 5:19.

 2. Kasanot’ panangmatmat dagiti dadduma ken apostol Pablo, ngem ania a kababalin ti maikari kadagiti panglakayen?

² Ngem kasanot’ panangmatmatyo kadagiti panglakayen? Iti pusoyo, ibagbagayo aya: ‘Diakto pulos mapmapan iti sabali a panglakayen iti daytoy a kongregasion no addaanak ti problema, ta awan talekko iti asinoman kadakuada’? No kastat’ panagrikriknayo, nalabes aya ti panangipagpaganetgetyo iti kinaimperpektoda? Idiay kadaanan a Corinto, dadduma kunada maipapan ken apostol Pablo: “Dagiti sursuratna nadagsen ken napigsada, ngem ti panagparangna a sibabagi nakapuy ket ti saona nanumo.” Kaskasdi, ti Dios tinudinganna ni Pablo iti maysa a ministerio ket inusarna kas “apostol kadagiti nasnasion.” (2 Corinto 10:10; Roma 11:13; 1 Timoteo 1:12) Ngarud, manamnama, a kaskay la koma daydiay kabsat a babai a nagkuna: “Addaankam ti kasasayaatan a bagi dagiti panglakayen iti intero a lubong. Addada ditoy a tumulong no isudat’ kasapulan.”

Apay nga Agtulnog Kadakuada?

 3. Tapno ti Apo ket adda iti espiritu nga ipakpakitatayo, kasanot’ rebbeng a panangmatmattay kadagiti Kristiano a nababbaba a papastor?

³ Idinto a dagiti Kristiano a nababbaba a papastor impaay ida ti Naindaklan a Pastor, a ni Jehova a Dios, kasanot’ panagkunayo a kayatna a panangmatmattay kadakuada? Pudno unay, namnamaen ti Dios a surotentay ti naibatay iti Biblia a pannakaiwanwan nga inawattayo babaen kadagiti naayat a manangaywan iti sidong ti panangiturong ti Bagi a Manarawidwid dagiti Saksi ni Jehova. Iti kasta ‘ti Apo ti kumuyog iti espiritu nga ipakpakitatayo,’ tagiragsakentayo ti kinatalna, ken mapapigsatayo iti naespirituan.​—2 Timoteo 4:22; idiligyo ti Aramid 9:31; 15:23-32.

 4. Kasanot’ personal a panangiyaplikartay iti Hebreo 13:7?

⁴ Inggunamgunam ni Pablo: “Lagipenyo dagiti manangipangulo kadakayo, isuda a nangipakaammo kadakayo ti sao ti Dios, ket tuladenyo ti pammatida a pampanunotenyo no ania ti nagtungpalan ti panagbiagda.” (Hebreo 13:7) Kadagidi immuna a Kristiano, dagiti apostol ti nangnangruna a nangidaulo. Itatta, mapaliiwtayo a dagidiay mangbukel ti Bagi a Manarawidwid dagiti Saksi ni Jehova, dagiti dadduma a napulotan a manangaywan, ken lallaki iti “dakkel nga umariwekwek” ti mangidadaulo kadatayo. (Apocalipsis 7:9) Nupay saantay a madagdagdag a mangtulad iti kualidad ti timek wenno bosesda, posturada, wenno dadduma pay a natauan a kababalinda, rebbeng a mapagbalintayo a nasayaat ti kababalintayo babaen ti intay panangtulad ti pammatida.

 5. Ditoy daga itatta, iti siasinot’ nakaitalkan ti kangrunaan a responsabilidad iti panangaywan iti kongregasion Kristiano, ket aniat’ maikari kadakuada?

⁵ Ditoy daga itatta, ti kangrunaan a responsabilidad ti panangaywan kadagiti naespirituan a kasapulantayo ket naitalek iti “matalek ken naannad nga adipen.” Ti pannakabagina a Bagi a Manarawidwid ti mangidadaulo ken mangiyur-urnos iti sangalubongan a trabaho ti panangikaskasaba ti Pagarian. (Mateo 24:14, 45-47) Nangnangruna a mabalin a matmatan dagitoy napulotan ti espiritu a panglakayen kas dagiti naespirituan a gobernador, ta mabalin a maipaulog ti Hebreo 13:7 a: “Pampanunotenyo dagidiay manggob-gobernar . . . kadakayo.” (Kingdom Interlinear) Iti nasurok a 60,000 a kongregasion ken nasurok a 3,500,000 a manangiwaragawag ti Pagarian, dagiti 12 a panglakayen a mangbukel ti Bagi a Manarawidwid ket ‘aduanda iti aramid ti Apo.’ (1 Corinto 15:58) Gapu iti inted-Dios a trabahoda, maikarida iti naan-anay a pannakitunostayo, kas ti bagi a manarawidwid idi umuna a siglo a naaddaan met ti pannakitunos dagidi immuna a Kristiano.​—Aramid 15:1, 2.

 6. Ania dagiti sumagmamano a bambanag nga ar-aramiden dagiti panglakayen a pakagunggonaan ti ili ni Jehova?

⁶ Dagiti manangaywan ket dinutokan ida ti espiritu a mangaywan kadagiti naespirituan a kasapulan ti kongregasion. (Aramid 20:28) Kitaenda a ti mensahe ti Pagarian ti maikaskasaba iti teritoria ti lokal a kongregasion. Dagitoy Nainkasuratan a kualipikado a lallaki mangipapaayda met ti naespirituan a panangiwanwan iti naayat a pamay-an. Mamagbagada, mangliwliwada, ken mangpaneknekda kadagiti naespirituan a kakabsatda a lallaki ken babbai, tapno dagitoy agtultuloy a magnada a maikari iti Dios. (1 Tesalonica 2:7, 8, 11, 12) Uray inton masukalan ti maysa a nakaaramid ti panagsalungasing sakbay nga ammona dayta, kitaen dagitoy a lallaki nga isut’ baliwan “iti espiritu ti kinatakneng.”​—Galacia 6:1.

 7. Ania a balakad ti inted ni Pablo idiay Hebreo 13:17?

⁷ Dagiti puspusotayo ti matignay a makitunos kadagita a naayat a manangaywan. Daytoy ti maiyanatup, kas insurat ni Pablo: “Agtulnogkayo kadagiti mangidalan kadakayo ket paiturayankayo, ta igagada dagiti kararuayo a kasla isuda ti mangidatagto iti Dios; tapno aramidenda daytoy a sirarag-o ket saan a sililiday, ta daytoy ti makadadael kadakayo.” (Hebreo 13:17) Kasanot’ rebbeng a panangtarustayo iti daytoy a balakad?

8, 9. (a) Idiay Hebreo 13:17, apay a rebbeng nga agtulnogtayo kadagidiay mangidalan kadatayo? (b) Ti panagtulnog ken panagpaituraytayo ti maaddaan kadagiti ania a naimbag nga epekto?

⁸ Igunamgunam ni Pablo kadatayo nga agtulnogtay kadagidiay mangituray kadatayo iti naespirituan. Datayo ti “agpasakop,” a tumuloktay kadagitoy a nababbaba a papastor. Apay? Ngamin ta ‘igagada ti kararuatayo,’ wenno dagiti biag a naidedikar iti Dios. Ken kasano ti ‘panangigagada’? Ditoy ti present active indicative iti verbo a Griego nga a·gru·pneʹo literal a kaipapananna a dagiti panglakayen ti “boluntario a saanda a matmaturog.” Ipalagip daytoy kadatayo ti agsolsolo a pastor nga idianna ti pannaturog tapno salaknibanna ti arbanna manipud kadagiti peggad iti rabii. No maminsan mangbusbos dagiti panglakayen ti awan pannaturogna a rabii a maseknan a mangikarkararag iti arban ti Dios wenno mangipapaay ti naespirituan a tulong kadagiti kapammatian. Anian ti panangapresiartayo iti matalek a serbisioda! Kaawatan, ditay kayat ti agbalin a kas kadagiti “nadangkes a tattao” idi kaaldawan ni Judas nga ‘umsienda ti agturay ken agbassawangda kadagiti natan-ok,’ dagiti napulotan a Kristiano a panglakayen nga addaan inted ti Dios a kinadayag, wenno dayaw.​—Judas 3, 4, 8.

⁹ Saan a maay-ayo ni Jehova no ditay agtulnog ken agpaituray kadagiti manangaywan a Kristiano. Agbalin met daytoy a babantot kadakuada ken makadangran iti naespirituan kadatayo. No ditay mannakitunos, mabalin nga aramiden dagiti panglakayen dagiti annongenda a sililiday, nalabit iti espiritu ti pannakaupay a mangibunga iti pannakapukaw ti rag-o kadagiti Nakristianuan nga ar-aramidtayo. Ngem ti kinamanagtulnog ken kinamanagpaituraytayo ti mangparang-ay iti nadiosan a kababalin ken mamapigsa ti pammatitayo. ‘Ti Apo kumuyog iti espiritu nga ipakpakitatayo,’ ket rumang-ay ti ragsak iti kasta a klima ti panagtutunos, kinatalna, ken panagkaykaysa.​—2 Timoteo 4:22; Salmo 133:1.

10. Sigun iti 1 Timoteo 5:17, apay a dagidiay mangidaulo iti nasayaat a pamay-an maikarida iti dayaw?

¹⁰ Ti panagtulnog ken panagpaituraytayo kadagiti panglakayen ti kongregasion dina kayat a sawen a manangay-ayotayo ti tattao. Saan a nainkasuratan ti kasta, ta naibaga kadagiti immuna siglo a Kristiano nga ad-adipen nga agtulnogda kadagiti appoda, “saan la nga iti imatangda a kas kadagiti agayat a mangay-ayo kadagiti tattao, no di ket buyogen ti kinadalus ti puso, nga addaan panagbuteng ken Jehova.” (Colosas 3:22; Efeso 6:5, 6) Dagiti manangaywan a ‘mangituray a naimbag ken nagagetda iti panagsao ken panangisuro’ maikarida iti dayaw nangnangruna gapu ta ti pannursuroda ket naibatay iti Sao ti Dios. Kas insurat ni Pablo: “Dagiti panglakayen a mangituray a naimbag, maibilangda koma a maikari iti dakkel a dayaw, nangruna dagiti agtrabaho iti sao ken pannursuro. Ta kuna ti kasuratan: ‘Dikanto busalan ti baka nga agirik babaen kadagiti saksakana’; ken: ‘Ti mangmangged maikari iti tangdanna.’”​—1 Timoteo 5:17, 18.

11. Kasano nga umay ti “dakkel a dayaw” iti maysa a panglakayen, ngem aniat’ masapul a liklikanna?

¹¹ Ti kaad-adaw pay laeng a sasao ni Pablo ipamatmatna a nainkalintegan ti pannakaipaay ti material a tulong kadagidiay mangtamtaming kadagiti naespirituan nga intereses ti dadduma. Nupay kasta, di kayat a sawen daytoy a rebbeng nga umawat dagiti panglakayen ti sueldo, ket ti “dakkel a dayaw” kaawatan saan a maysa a banag a singiren ti panglakayen. Daytat’ mabalin nga aggapu a di pinilpilit kadagiti miembro ti kongregasion, ngem nikaanoman dina us-usaren ti rebbengenna tapno manggun-od ti pannakabalin wenno material a sanikua. Saanna a rebbeng a biruken ti bukodna a dayaw wenno makitimpuyog a nangnangruna kadagiti nababaknang a maipaay iti namaterialan a gunggona ket maliwayan met dagiti dadduma. (Proverbio 25:27; 29:23; Judas 16) Imbes ketdi, ti manangaywan ipastoranna ti arban ti Dios ‘saan a mapilpilit, saan met nga iti naalas a panagsapul, no di ket iti nasiglat a nakem.’​—1 Pedro 5:2.

12. Babaen ti pananglaglagip ti ania a matulongantayo nga agtulnog kadagidiay mangidadaulo kadatayo?

¹² Matulongantayo nga agtulnog ken mangdayaw kadagidiay mangidadaulo no lagipentayo a ti Dios a mismo ti nangipaay kadagiti panglakayen. (Efeso 4:7-13) Yantangay dagitoy a lallaki ket napulotanda ti espiritu ken ti organisasion ti Dios okuparanna ti nagpateg a paset iti biag dagiti Saksi ni Jehova, sigurado a kayattayo nga idemostra ti panagyamantayo ken panagraemtayo kadagiti nateokratikuan nga urnos. Mainayon pay, matulongantay dagiti kabbaro a mangpatanor iti daytoy a kababalin no mangipakitatayo ti nagsayaat nga ulidan ti panagtulnog ken panagpaituray kadagidiay mangidalan kadatayo.

Apay a Patgen ti Serbisioda?

13. (a) Ania nga aggiddiat a panangmatmat iti panangidaulo ti adda iti lubong ken iti organisasion ti Dios? (b) Addaantay iti ania a naimbag a rason iti panagtalek kadagiti lallaki a mangidaldalan kadatayo? (c) Imbes a padakkelen dagiti kinaimperpekto dagiti nagagaget a panglakayen, aniat’ rebbeng nga aramidentayo?

¹³ Ditoy lubong, adda pagannayasan a manglaksid iti panangidaulo. Kas kinuna ti maysa a managpalawag: “Ti agpangpangato a rukod ti edukasion ti nangparang-ay iti bilang dagiti nalalaing a gapu itoy dagiti paspasurot nagbalinda a manangbabalaw a ngangngani imposiblen ti panangidaulo kadakuada.” Ngem ti espiritu ti agwaywayas a panagpampanunot awan iti organisasion ti Dios, ket addaantay kadagiti naimbag a rason ti panagtalek kadagiti lallaki a mangidadaulo kadatayo. Kas pangarigan, dagidiay laeng nakaragpat kadagiti Nainkasuratan a pagannurotan ti madutokan a papanglakayen. (1 Timoteo 3:1-7) Masanayda nga agbalin a naasi, managayat, ken manangtulong, ngem natibker iti panangitandudo kadagiti nalinteg a pagannurotan ni Jehova. Salimetmetan dagiti panglakayen ti Nainkasuratan a kinapudno, ‘a salimetmetanda a sititibker ti sao a napudno, tapno iti kasta mabalinda ti mamalbalakad babaen ti nadalus a sursuro.’ (Tito 1:5-9) Siempre, ditay rebbeng a padakkelen dagiti natauan a kinaimperpektoda, ta amintayo ket imperpekto. (1 Ar-ari 8:46; Roma 5:12) Imbes a mapaaytay kadagiti pagkurkuranganda ken tratuen a silalag-an ti balakadda, apresiarentay ketdi ken akseptarentayo ti naibatay iti Biblia a panangiwanwan dagiti panglakayen kas aggapgapu iti Dios.

14. Maigapu iti kunaen ti 1 Timoteo 1:12, kasanot’ rebbeng a panangmatmat ti panglakayen iti ministerio a naituding kenkuana?

¹⁴ Ni Pablo, maysa a tao a manangipateg, ti nagkuna: “Agyamanak iti daydiay namapigsa kaniak, a ni Kristo Jesus nga Apotayo, gapu ta imbilangnak a matalek, a dinutokannak iti panangaywan.” (1 Timoteo 1:12) Dayta a panangaywan, wenno serbisio, ramanenna ti trabaho a panangaskasaba ken panagserbi kadagiti kapammatian. Nupay natudingan ti manangaywan babaen iti nasantuan nga espiritu tapno agserbi kas pastor, saan koma a mamagbalin daytoy a riknaenna nga isut’ natantan-ok ngem kadagiti dadduma, ta isu a mismo ket paset dagiti kimmarnero nga arban ti Dios. (1 Pedro 5:4) Imbes ketdi, rebbeng nga isut’ agyaman a ti Ulo ti kongregasion, ni Jesu-Kristo, ti nangibilang kenkuana a maikari nga agserbi kadagiti kamkameng ti arban ken isut’ kinualipikar ti Dios babaen ti panangtedna kenkuana ti rukod ti pannakaammo, kinasirib, ken pannakaawat. (2 Corinto 3:5) Idinto ta addaan rason ti panglakayen nga agyaman kadagiti inted-Dios a pribilehiona, dadduma a miembro ti kongregasion rebbeng nga apresiarenda daytoy a ministerio, wenno serbisio.

15. Aniat’ kababagas ti balakad ni Pablo idiay 1 Tesalonica 5:12, 13?

¹⁵ Siyayaman dagiti Saksi ni Jehova iti organisasion a binangon ti Dios kadagitoy maudi nga al-aldaw, ket dayta a panangapresiar ti mangtignay kadatayo a pagraeman dagiti panglakayen. Rebbeng a naragsaktayo koma a makitunos a naan-anay kadagiti urnos nga ar-aramidenda nga agpaay a pakagunggonaantayo. Kuna ni Pablo: “Ket dawatenmi kadakayo, kakabsat, a bigbigenyo dagiti agbannog iti tengngayo ken mamangulo kadakayo iti Apo ken mamalbalakad kadakayo; ket patgenyo koma unay ida babaen ti ayat maipanggep iti aramidda.” (1 Tesalonica 5:12, 13) Ti panangiyaplikar iti daytoy a balakad ti mangyeg rag-o ken bendision ni Jehova.

Nasiglatkay Koma a Mangiyaplikar ti Balakad

16, 17. Ania a balakad ti mabalin nga ipaay dagiti panglakayen maipapan iti panagasawa, ket aniat’ ibunga iti panangsurot iti dayta?

¹⁶ Indagadag ni Pablo ken Tito a ‘mangbalakad ken mangtubngar a buyogen ti amin a kinaturay.’ (Tito 2:15) Umar-arngi, dagiti pannakabagi ti Dios itatta iturturongdatayo kadagiti prinsipio ken linlinteg ti Dios. Addada naimbag a rason nga akseptaren dagiti maulit-ulit a pammagbaga nga iyaplikar dagiti balakad ken panangiturong ti organisasion ni Jehova ken dagiti nadutokan a panglakayen.

¹⁷ Kas panangiyilustrar: Mabalin nga igunamgunam dagiti panglakayen iti maysa a Kristiano a surotenda ti balakad ti Biblia a mangasawa “laeng iti Apo.” (1 Corinto 7:39; Deuteronomio 7:3, 4) Mabalin nga itudoda a ti panangasawa ti di pay nabautisaran a tao mabalin a mangiturong kadagiti serioso a problema, kas ti nasaem a panagbiddut ni Ari Salomon a nangala kadagiti ganggannaet nga assawa, a nangiturong iti pusona kadagiti ulbod a didiosen ket immadayo ken ni Jehova. (1 Ar-ari 11:1-6) Mabalin met nga ilawlawag dagiti panglakayen a ni Esdras pinapagtalawna kadagiti lallaki a Judio dagiti pagano nga asawada, ket kinuna ni Nehemias a dagidiay mangasawa ti di kapammatian ket ‘dakkel a panaglabsing iti maikaniwas iti Dios.’ (Nehemias 13:23-27; Esdras 10:10-14; kitaenyo Ti Pagwanawanan, Setiembre 15, 1982, panid 31; Nobiembre 15, 1986, panid 26-30.) Dagiti bendision ken pannakapnek iti panangparagsak ken Jehova ti ibunga ti panangiyaplikar kadagita a Nainkasuratan a balakad nga ipapaay dagiti naayat a papanglakayen.

18. No us-usigen ti insurat ni Pablo idiay 1 Corinto 5:9-13, kasano ti rebbeng a panagtignaytayo no nailaksid ti maysa a miembro ti pamiliatayo?

¹⁸ Maiyanatup met ti panangrespeto kadagiti hudisial a pangngeddeng dagiti panglakayen. Imbaga ni Pablo kadagiti taga Corinto a “dikay makikadkadua iti uray siasino a managanan kabsat no isut’ mannakikamalala wenno naagum wenno agrukbab kadagiti ladawan wenno managsao ti dakes wenno managbartek wenno nagaramugam, iti kasta a tao, uray makipangan kenkuana, saan.” Kasapulan nga ‘ikkatenda daydiay tao a dakes iti tengngayo.’ (1 Corinto 5:9-13) Ngem kasanot’ panagtignayyo no maysa kadagiti kabagianyo ti nailaksid? Nupay mabalin nga adda met pannakasapul ti limitado a pannakilangen kas panangaywan kadagiti bambanag ti pamilia, amin a naespirituan a pannakilangen iti kabagian a nailaksid ket rebbeng a gupden. (Kitaenyo Ti Pagwanawanan, Abril 15, 1988, panid 26-31.) Pudno unay, ti kinasungdo iti Dios ken iti organisasionna ti rebbeng a mangtignay kadatayo a pagraeman ti hudisial a pangngeddeng dagiti manangaywan.

19. Aniat’ rebbeng nga aramidentayo no ipakita dagiti panglakayen kadatayo a di umiso ti turturongentayo no iti naespirituan?

¹⁹ Saan a nalaka ti agtalinaed iti akikid a dalan nga agturong iti biag. Tapno maaramid dayta, masapul a surotentay ti panangiwanwan a naited iti Sao ti Dios ken kadagidiay nakaitalkan ti responsabilidad a panangipastor iti organisasionna. (Mateo 7:13, 14) No agbibiahetayo manipud maysa a siudad a mapan iti sabali babaen iti kotse ket nagkamalitayo iti nagsikkuan, kasapulan ti panagtignay a mangkorehir iti pappapanantayo. No saan, ditayto pulos makagteng iti papanantayo. Umasping iti dayta, no ipakita dagiti panglakayen kadatayo nga agturturongtayo iti di umiso a dalan iti naespirituan, nalabit gaput’ panagar-arem ti di kapammatian, dagdagus koma nga iyaplikartay ti Nainkasuratan a balakadda. Maysa daytoy a pamay-an a panangipakita a pudpudno nga “agtalekka ken ni Jehova.”​—Proverbio 3:5, 6.

Panagraem Uray iti Babassit a Banag

20. Ti panangimtuod ti ania a salsaludsod iti bagitayo ti makatulong kadatayo a mangipakita ti panagraem iti panangiwanwanwan dagiti panglakayen uray kadagiti babassit a banag?

²⁰ Kasapulan ti panangipakitatayo ti panagraem iti panangiwanwan dagiti panglakayen uray kadagiti babassit a banag. Gapuna mabalintay a saludsodan ti bagbagitayo: ‘Mannakikooperarak aya no kalikagumandak dagiti panglakayen a mangsarungkar iti masakit wenno mangsanay kadagiti kabbaro iti tay-ak ti ministerio? Sisasaganaak aya a mangakseptar kadagiti paset iti gimong ken isagana ida a naimbag? Nalakaak aya a tumungpal iti direksion dagiti panglakayen maipapan ti panagireserba ti pagtugawan kadagiti kumbension, ti panagkawkawes, ken dadduma pay? Makituntunosak met laeng aya no dawatenda ti itutulongtayo ti panagdalus idiay Kingdom Hall, panagreport a nasapa iti serbisio ti tay-ak, wenno idadateng iti oras ti panaggigimong?’

21. Ti panagraemtayo kadagiti panglakayen ipalagipna kadatayo ti ania a sasao ni Jesus?

²¹ Apresiaren unay dagiti manangaywan ti kongregasion ti kooperasiontayo, ket dakkel ti pagimbagan nga ibunga dayta. Kinapudnona, ti panagraemtayo ken kooperasiontayo uray kadagiti babassit a banag ti mangipalagip kadatayo ti sasao ni Jesus: “Ti mapagtalkan iti bassit unay, mapagtalkan met iti adu.” (Lucas 16:10) Pudno unay, kayattayo a maibilang a matalek.

Itultuloyyo nga Awaten ti Naayat a Panangaywan

22. Ania dagiti sumagmamano a gunggona nga ipaay ti naayat a panangaywan ti matalek nga adipen ken dagiti panglakayen ti kongregasion?

²² Dagiti gunggona a bunga ti naayat a panangaywan ti matalek nga adipen ken dagiti panglakayen ti kongregasion paneknekanda a ti nabaknang a bendision ni Jehova ket adda iti naindagaan nga organisasion. Mainayon pay, ti nalaing a panangiwanwan dagiti panglakayen pagtitiponenna dagiti abilidadda ket parang-ayenna ti panagkaykaysa kadatayo. Dayta met ti mangibunga iti naipamaysa ken naballigi a panagregget a mangiyadelantar kadagiti intereses ti Pagarian. Pudno unay, maysa a positibo a bunga ti addaan panangapresiar a panangawattayo ti panangaywan dagidiay mangidadaulo ket isut’ panangbendision ti Dios iti trabahotayo a panangaskasaba ken panagaramid-adalan. (Mateo 28:19, 20) Ti pannakitunostay kadagiti panglakayen ti mangisagsagana met kadatayo a maipaay iti biag nga awan inggana idiay baro a sistema dagiti bambanag.

23. Iti lawag ti 1 Juan 5:3, aniat’ rebbeng a pakatignayantayo nga aramiden?

²³ Yantangay ayatentayo ni Jehova, ti panagtulnog kenkuana ket maysa a makaay-ayo nga annongen. Insurat ni apostol Juan: “Ta daytoy ti ayat ti Dios, a tungpalentayo koma dagiti bilbilinna; ket dagiti bilbilinna saanda a makapadagsen.” (1 Juan 5:3) Dagiti nasungdo a Kristiano siraragsakda nga agtulnog iti bilbilin ni Jehova ket matignayda a makitunos kadagidiay nangitalkanna ti panangaywan ti kongregasion. Anian ti panagyamantayo nga addatay iti organisasion ti Dios ken maaddaan kadagita a “sagsagut kadagiti lallaki”! (Efeso 4:8) Buyogen iti naan-anay a panagtalek a ti Dios iwanwanwanna ti ilina, ngarud, agtulnogtay koma a kankanayon kadagiti naikkan ti pribilehio a mangidaulo kadagiti Saksi ni Jehova.

Ania dagiti Komentoyo?

◻ Apay nga agtulnog kadagidiay mangidaldalan kadatayo?

◻ Aniat’ adda koma a kababalintayo maipapan iti serbisio nga ipapaay dagiti nagagaget a panglakayen?

◻ Apay a nasiglattay koma a mangiyaplikar ti balakad nga ipapaay dagiti panglakayen?

◻ Ania dagiti gunggona nga ibunga ti manangipateg a panangawattayo ti naayat a panangaywan?

[Blurb iti panid 24]

Makituntunoskay met laeng aya kadagiti panglakayen babaen ti panangakseptaryo kadagiti paspaset iti gimgimong, babaen ti itutulongyo nga agdalus iti Kingdom Hall, babaen ti panangireportyo a nasapa ti serbisioyo iti tay-ak, ken iti dadduma pay a pamay-an?

[Ladawan iti panid 23]

Maragsakan ni Pablo nga ikaskasaba ti naimbag a damag ken agserbi kadagiti kapammatianna. Kas panglakayen, pagyamyamananyo aya dagiti pribilehio ti serbisio nga inted ti Dios kadakayo?