Dagiti Galad a Masapul a Surotentayo

“Surotem ti kinalinteg, nadiosan a debosion, pammati, ayat, panagibtur, [ken] kinaalumamay.”​—1 TIM. 6:11.

 1. Ania a bambanag ti sursuroten ita ti adu a tattao?

ANIA a bambanag ti sursuroten ita ti adu a tattao? Kas ipakita ti Biblia, adu ti “mangsursurot iti awanan pateg a bambanag” kas iti pananggun-od iti nangatngato nga edukasion, narang-ay a panggedan, ken adu a material a sanikua agsipud ta patienda a dagita ti mamagbalin kadakuada a pudpudno a naragsak. (Prov. 28:19) Dadduma met ti mangsursurot iti ‘nalulok a kababalinda,’ nga ipangpangrunada iti biagda ti panagragragsak, panaglinglingay, ken ti tarigagayda a makiinnartap. (Sal. 119:150, 1 Tim. 4:8) Adda met dagidiay sumursurot iti uso ken iti wagas ti panagbiag dagiti nabaknang ken nalatak a tattao. Ngem nupay napalalo ti panangikagumaanda a mangsurot kadagita a bambanag, kinapudnona, aminda ket ‘agkamkamat iti angin.’​—Ecl. 1:14.

 2. (a) Ania a gunggona ti inyawis ti Dios a pagreggetan a ragpaten ti dadduma a Kristiano? (b) Ania a namnama ti ituktukon ni Jehova iti kaaduan ita a Kristiano?

² Maisupadi iti dayta, dinakamat ni apostol Pablo ti maysa a napateg a kalat a pagreggetan a ragpaten dagiti Kristiano, idi insuratna: “Agregreggetak nga agturong iti kalat maipaay iti gunggona a panagpangato nga ayab ti Dios babaen ken Kristo Jesus.” (Fil. 3:14) Ipakita ti Biblia a ti umawat iti dayta a gunggona a biag idiay langit ket agdagup iti 144,000 a napulotan a Kristiano, a pakairamanan ni Pablo. Agturayda a kadua ni Jesu-Kristo iti Sangaribu a Tawen a panangiturayna iti daga. Anian a nagsayaat dayta a kalat nga inyawis ti Dios a pagreggetanda a ragpaten! Nupay kasta, kaaduan ita kadagiti pudno a Kristiano ket addaan iti naiduma a namnama wenno kalat. Siaayat nga ituktukon ni Jehova kadakuada ti napukaw da Adan ken Eva​—ti namnama nga agnanayon a biag nga addaan iti perpekto a salun-at iti paraiso a daga.​—Apoc. 7:4, 9; 21:1-4.

 3. Kasano a maipakitatayo ti apresasion iti di kaikarian a kinamanangngaasi ti Dios?

³ Gapu ta managbasol ken imperpekto dagiti tattao, saanda a magun-odan ti biag nga agnanayon uray kasano ti panagreggetda a mangaramid iti umiso. (Isa. 64:6) Ti pananggun-od iti biag nga agnanayon ket posible laeng babaen ti panangalagad iti pammati iti naayat a probision ti Dios a pannakaisalakan babaen ken Jesu-Kristo. Ania ti mabalintay nga aramiden tapno maipakitatayo ti apresasion iti dayta a di kaikarian a kinamanangngaasi ti Dios? Ti maysa ket ti panagtulnogtayo iti daytoy a bilin: “Surotem ti kinalinteg, nadiosan a debosion, pammati, ayat, panagibtur, [ken] kinaalumamay.” (1 Tim. 6:11) No usigentayo dagita a galad, agbalin a nabilbileg ti determinasion ti tunggal maysa kadatayo a mangsurot “nga ad-adda pay a naan-anay” kadagita a galad.​—1 Tes. 4:1.

“Surotem ti Kinalinteg”

 4. Apay a masiguradotayo a napateg ti panangsurot iti “kinalinteg,” ken ania dagiti umuna nga addang a nasken nga aramiden ti maysa a tao?

⁴ Kadagiti surat ni apostol Pablo kenni Timoteo, agpadpada nga insuratna dagiti galad a rumbeng a suroten, ket ti “kinalinteg” ti umuna kadagita a dinakamatna. (1 Tim. 6:11; 2 Tim. 2:22) Kanayonanna, iti dadduma a teksto, maulit-ulit a paregtaennatayo ti Biblia a mangsurot iti kinalinteg. (Prov. 15:9; 21:21; Isa. 51:1) Ti maysa a pamay-an a mairugitayo dayta ket ti ‘pananggun-od iti pannakaammo maipapan iti maymaysa a pudno a Dios, ken iti daydiay imbaonna, ni Jesu-Kristo.’ (Juan 17:3) Ti panangsurot iti kinalinteg gutugotenna ti maysa a tao nga agtignay​—agbabawi kadagiti napalabas a basolna ken ‘agbaw-ing’ tapno aramidennan ti pagayatan ti Dios.​—Ara. 3:19.

 5. Ania ti masapul nga aramidentayo tapno maaddaantayo iti nalinteg a takder iti imatang ti Dios ken tapno mataginayontayo dayta?

⁵ Minilion a tattao a pudno a mangsursurot iti kinalinteg ti nangidedikar iti biagda ken Jehova ken insimboloda dayta a desisionda babaen ti panagbautisarda iti danum. No maysakan a bautisado a Kristiano, napanunotmo kadin a ti wagas ti panagbiagmo ket rumbeng nga iparangarangna ti agtultuloy a panangsurotmo iti kinalinteg? Mabalin a kasta ti iparparangarang ti wagas ti panagbiagmo. Ti maysa nga aspeto dayta ket ti panangammom manipud iti Biblia no ania ti “umiso ken di umiso” kaanoman a mangaramidka kadagiti napateg a desision maipapan iti aramidem iti biagmo. (Basaen ti Hebreo 5:14.) Kas pagarigan, no baro wenno balasangka ket nadanonmon ti edad a mabalinmon ti makiasawa, naan-anay kadi a determinadoka a mangliklik iti aniaman a romantiko a pannakirelasion iti maysa a saan a bautisado a Kristiano? Determinadoka no sursurotem ti kinalinteg.​—1 Cor. 7:39.

 6. Ania ti iraman ti pudno a panangsurot iti kinalinteg?

⁶ Ti maysa a makuna a nalinteg ket saan nga aginlilinteg wenno “nalabes ti kinalintegna.” (Ecl. 7:16) Namakdaar ni Jesus maibusor iti panangipakita iti kasta a kinalinteg tapno laeng agparang a nasaysayaattayo ngem iti sabsabali. (Mat. 6:1) Ti pudno a panangsurot iti kinalinteg iramanna ti puso​—ti panangilinteg kadagiti di umiso a pampanunot, kababalin, motibo, ken tarigagay. No itultuloytayo a pagreggetan dayta, saan a kaskarina a makaaramidtayo kadagiti nadagsen a basol. (Basaen ti Proverbio 4:23; idilig ti Santiago 1:14, 15.) Kanayonanna, bendisionan ken tulongannatayo ni Jehova iti panangsurottayo iti dadduma pay a napateg a Nakristianuan a galad.

“Surotem ti . . . Nadiosan a Debosion”

 7. Ania ti “nadiosan a debosion”?

⁷ Ti debosion iramanna ti nasged a dedikasion ken kinasungdo. Kuna ti maysa a diksionario ti Biblia a ti Griego a sao a naipatarus kas “nadiosan a debosion” ket deskribirenna “ti nasayaat a kababalin a mangipasimudaag iti naannad a panangtaginayon iti panagbuteng iti Dios.” Masansan a napaay dagiti Israelita a mangipakita iti kasta a debosion, kas ibatad dagiti panagsukirda uray kalpasan a winayawayaan ida ti Dios manipud Egipto.

 8. (a)  Gapu iti panagbasol ni Adan, ania ti tumaud a saludsod? (b) Kasano a naipalgak ti sungbat iti daytoy a “sagrado a palimed”?

⁸ Iti rinibribu a tawen kalpasan ti panagbasol ti perpekto a tao a ni Adan, mabalin a mayimtuod, “Adda kadi siasinoman a tao a makaipakita iti perpekto a nadiosan a debosion?” Bayat dayta a tiempo, awan ti managbasol a tao a nakaiparangarang iti perpekto a nadiosan a debosion. Ngem iti tiempo nga intudingna, impalgak ni Jehova ti sungbat iti daytoy a “sagrado a palimed.” Ti biag ti bugbugtong nga Anakna idiay langit ket inyakarna iti aanakan ni Maria tapno maipasngay kas perpekto a tao. Iti intero a biagna ditoy daga, agraman ti nakababain a pannakapapatayna, impakita ni Jesus no ania ti kaipapanan ti nasged a dedikasion ken naan-anay a kinasungdo iti pudno a Dios. Ipalgak dagiti kararagna ti kasta unay a panagraemna iti naayat a nailangitan nga Amana. (Mat. 11:25; Juan 12:27, 28) Gapuna, pinaltiingan ni Jehova ni Pablo nga agsao maipapan iti “nadiosan a debosion” iti panangdeskribirna iti mapagulidanan a wagas ti panagbiag ni Jesus.​—Basaen ti 1 Timoteo 3:16.

 9. Kasanotayo a masurot ti nadiosan a debosion?

⁹ Gapu iti kinamanagbasoltayo, saantayo a maipakita ti perpekto a nadiosan a debosion. Ngem mabalintay a suroten dayta. Tapno maaramidtay dayta, nasken a surotentayo a sisisinged ti ulidan ni Kristo agingga iti mabalin. (1 Ped. 2:21) Iti kasta, saantayo a kas kadagiti managinsisingpet nga ‘addaan iti langa ti nadiosan a debosion ngem libakenda ti pannakabalin dayta.’ (2 Tim. 3:5) Dina kaipapanan dayta a ti pudno a nadiosan a debosion ket saanna a ramanen ti makinruar a langa. Sigurado a saklawenna dayta. Kas pagarigan, no agpilitayo iti bado a pagkasartayo wenno kawes a gatangentayo, ti langatayo no isuottayto dagita ket rumbeng a kanayon nga ipakitana nga ‘agraemtayo unay iti Dios.’ (1 Tim. 2:9, 10) Wen, no surotentayo ti nadiosan a debosion, kaipapanan dayta nga annurotentayo dagiti nalinteg a pagalagadan ti Dios iti inaldaw a panagbiagtayo.

“Surotem ti . . . Pammati”

10. Ania ti masapul nga aramidentayo tapno agtultuloy a nabileg ti pammatitayo?

¹⁰ Basaen ti Roma 10:17. Tapno maaddaan ti maysa a tao iti nabileg a pammati ken mataginayonna dayta, masapul nga itultuloyna nga utoben dagiti nagpateg a kinapudno a masarakan iti Sao ti Dios. Nangipaay “ti matalek ken masirib nga adipen” iti adu a nasayaat a publikasion. Ti tallo a nakasaysayaat a libro ket Ti Katan-okan a Tao a Nagbiag Pay Laeng, Agsursuroka iti Naindaklan a Mannursuro, ken “Umayka Agbalinka a Pasurotko.” Nadisenio dagita a libro a tumulong kadatayo nga ad-adda a mangam-ammo ken Kristo tapno matuladtayo ti ulidanna. (Mat. 24:45-47) Ti klase adipen ket mangyur-urnos met kadagiti gimong, asamblea, ken kombension, ket adu kadagita ti mangitamtampok “iti sao maipapan ken Kristo.” Adda kadi dagiti mapanunotmo a pamay-an tapno ad-adda a magunggonaanka kadagita bayat nga ‘ipangpangagmo nga ad-adda ngem iti gagangay’ dagiti ipapaay ti Dios?​—Heb. 2:1.

11. Ania ti maitulong ti kararag ken panagtulnog iti panangsurottayo iti pammati?

¹¹ Ti panagkararag ti maysa pay a makatulong kadatayo a maaddaan iti nabileg a pammati. Naminsan, dagiti pasurot ni Jesus impakaasida kenkuana: “Ikkannakami iti ad-adu pay a pammati.” Mabalintay met a sipapakumbaba a kiddawen dayta iti Dios. (Luc. 17:5) Tapno bumileg ti pammatitayo, masapul nga ikararagtayo a tulongannatayo ti nasantuan nga espiritu ti Dios. Ngamin, ti pammati ket maysa a paset “ti bunga ti espiritu.” (Gal. 5:22) Kanayonanna, mapabileg ti pammatitayo no agtulnogtayo kadagiti bilin ti Dios. Kas pagarigan, no ad-adda a suportarantayo ti trabaho a panangasaba, agbalintayo la ketdi a naragragsak. Ket bayat a pampanunotentayo dagiti bendision nga itden ti ‘panangsapul nga umuna iti pagarian ken iti kinalinteg ti Dios,’ bumileg ti pammatitayo.​—Mat. 6:33.

“Surotem ti . . . Ayat”

12, 13. (a) Ania ti baro a bilin ni Jesus? (b) Kadagiti ania a napateg a pamay-an a masapul nga ipakitatayo ti ayat a kas ken Kristo?

¹² Basaen ti 1 Timoteo 5:1, 2. Nangipaay ni Pablo iti praktikal a balakad no kasano a maipakita dagiti Kristiano ti ayat iti maysa ken maysa. Ti nadiosan a debosiontayo nasken nga iramanna ti panagtulnog iti baro a bilin ni Jesus nga ‘ayatentayo ti maysa ken maysa’ kas iti panagayatna kadatayo. (Juan 13:34) Inggunamgunam ni apostol Juan: “Siasinoman nga addaan kadagiti sanikua daytoy a lubong a pangtaginayon iti biag ket makitana ti kabsatna nga agkasapulan ket kaskasdi a punitanna ti ruangan dagiti nadungngo a panangngaasi kenkuana, iti ania a pamay-an nga agtalinaed kenkuana ti ayat ti Dios?” (1 Juan 3:17) Adda kadi malagipmo a gundaway a naipakitamon ti ayat iti praktikal a pamay-an?

¹³ Ti sabali pay a pamay-an a masurot wenno maipakitatayo ti ayat ket babaen ti panagbalintayo a manangpakawan, a ditay agimulmula iti sakit ti nakem kadagiti kakabsattayo. (Basaen ti 1 Juan 4:20.) Ipangagtayo koma ngarud daytoy a naipaltiing a balakad: “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo.” (Col. 3:13) Adda kadi kabsat iti kongregasion a mabalinmo a pangyaplikaran iti dayta a balakad? Pakawanem kadi?

“Surotem ti . . . Panagibtur”

14. Ania ti masursurotayo iti kongregasion ti Filadelfia?

¹⁴ Mabalin a maikagumaantayo a ragpaten ti maysa a kalat, ngem saan a kaskarina a kasta no ti kalat ket narigrigat wenno nabaybayag a ragpaten ngem iti ipagaruptayo. Nalawag a kasapulan ti panagibtur no pagreggetantayo a ragpaten ti biag nga agnanayon. Kinuna ni Apo Jesus iti kongregasion ti Filadelfia: “Agsipud ta tinaginayonmo ti sao maipapan iti panagibturko, taginayonenkanto met iti oras ti pannakasubok.” (Apoc. 3:10) Wen, insuro ni Jesus ti kinapateg ti panagibtur​—maysa a galad a tumulong kadatayo a di sumuko no maipasangotayo kadagiti suot ken sulisog. Dagiti kakabsat iti kongregasion ti Filadelfia idi umuna a siglo ket mapagulidananda la ketdi no iti panangibtur iti adu a nakasubokan ti pammatida. Gapuna, impanamnama kadakuada ni Jesus ti kanayonan a tulong bayat ti narigrigat a pannubok.​—Luc. 16:10.

15. Ania ti insuro ni Jesus maipapan iti panagibtur?

¹⁵ Ammo ni Jesus a dagiti pasurotna ket guraento dagiti di manamati a kakabagianda ken ti dadduma pay ditoy lubong. Gapuna, iti di kumurang a dua a gundaway, pinaregtana ida a kunkunana: “Ti nakapagibtur agingga iti panungpalan isunto ti maisalakan.” (Mat. 10:22; 24:13) Impakita pay ni Jesus no kasano a makagun-od dagiti adalanna iti kasapulan a bileg tapno makapagibturda kabayatan dayta a tiempo. Iti maysa nga ilustrasion, inyarigna ti nabato a daga kadagiti indibidual a ‘mangawat iti sao ti Dios buyogen ti rag-o’ ngem sumukoda no masuot ti pammatida. Ngem inyarigna dagiti matalek a pasurotna iti nasayaat a daga gapu ta ‘pinagtalinaedda’ ti sao ti Dios ken ‘nagbungada buyogen ti panagibtur.’​—Luc. 8:13, 15.

16. Ania a naayat a probision ti tumultulong iti minilion a tattao tapno makapagibturda?

¹⁶ Nasiputam kadi no ania ti sekreto ti panagibtur? Ti sao ti Dios ket masapul a ‘pagtalinaedentayo’ a sibibiag iti puspuso ken pampanunottayo. Posible ken nalaklakan nga aramiden dayta gapu iti kaadda ti Baro a Lubong a Patarus ti Nasantuan a Kasuratan​—maysa nga umiso ken nalaka a basaen a patarus ti Biblia, a mabalin a magun-odan iti umad-adu pay a lenguahe. No usigentayo ti maysa a paset ti Sao ti Dios iti kada aldaw, matulongantayo a maaddaan iti kasapulantayo a bileg tapno agtultuloytayo a makapagbunga “buyogen ti panagibtur.”​—Sal. 1:1, 2.

“Surotem ti . . . Kinaalumamay” ken Talna

17. (a) Apay a nakapatpateg ti “kinaalumamay”? (b) Kasano nga impakita ni Jesus nga isu ket naalumamay?

¹⁷ Awan ti mayat a maakusaran iti banag a saanna nga imbaga wenno inaramid. Gagangay a makaunget ti maysa a tao no adda mangkritikar kenkuana nga awan gapgapuna. Ngem adayo a nasaysayaat ti panagbalin a “naalumamay”! (Basaen ti Proverbio 15:1.) Kasapulan ti dakkel a panangikagumaan tapno agbalintayo a naalumamay no adda mangkritikar kadatayo nga awan gapgapuna. Nangipaay ni Jesus iti perpekto nga ulidan iti panagbalin a naalumamay. “Idi narabrabngis, saanna a sinubadan iti panangrabngis. Idi agsagsagaba, saan a nagipangpangta, no di ket intultuloyna nga intalek ti bagina iti daydiay mangukom a sililinteg.” (1 Ped. 2:23) Ditay naan-anay a masurot dayta nga inyulidan ni Jesus, ngem mabalintay kadi a maparang-ay pay nga ad-adda ti kinaalumamaytayo?

18. (a) Ania ti nasayaat a maaramidan ti kinaalumamay? (b) Ania ti sabali pay a galad a maidagdagadag a surotentayo?

¹⁸ Kas panangtulad ken Jesus, ‘kankanayon koma a sisasaganatayo a mangikalintegan’ kadagiti patpatientayo, nga ‘aramidentayo ti kasta buyogen ti naalumamay a kababalin ken nauneg a panagraem.’ (1 Ped. 3:15) Wen, no naalumamaytayo, dagiti agduduma a kapanunotan ket saan nga agtungpal iti nabara a pannakisupiat, agpadpada kadagiti kaskasabaantayo ken kadagiti kapammatiantayo. (2 Tim. 2:24, 25) Ti kinaalumamay tulongannatayo a maaddaan iti talna. Nalabit a dayta ti makagapu nga iti maikadua a surat ni Pablo ken Timoteo, inramanna ti “talna” kadagiti galad a nasken a masurot. (2 Tim. 2:22; idilig ti 1 Timoteo 6:11.) Wen, ti “talna” ti sabali pay a galad nga iparparegta ti Kasuratan a surotentayo.​—Sal. 34:14; Heb. 12:14.

19. Kalpasan ti panangusigtayo iti pito a Nakristianuan a galad, ania ti determinado a surotem, ken apay?

¹⁹ Nausigtayo ti pito a Nakristianuan a galad a maiparparegta a surotentayo​—kinalinteg, nadiosan a debosion, pammati, ayat, panagibtur, kinaalumamay, ken talna. Anian a bendision iti tunggal kongregasion no ikagkagumaan dagiti kakabsat ti rumang-ay iti panangiparangarang kadagita a nagpapateg a galad! Mangyeg dayta iti pakaidayawan ni Jehova ken iti gundaway tapno sukogennatayo agpaay iti pannakaipadayagna.

Usigem

• Ania ti ramanen ti panangsurot iti kinalinteg ken nadiosan a debosion?

• Ania ti tumulong kadatayo a mangsurot iti pammati ken panagibtur?

• Ania ti rumbeng nga epekto ti ayat iti pannakilangentayo iti sabsabali?

• Apay a masapul a surotentayo ti kinaalumamay ken talna?

[Ladawan iti panid 12]

Namakdaar ni Jesus maibusor iti panaginlilinteg ti maysa tapno agparammag

[Ladawan iti panid 13]

Masurottayo ti pammati no utobentayo dagiti kinapudno iti Sao ti Dios

[Ladawan iti panid 15]

Kabaelantay a suroten ti ayat ken kinaalumamay