IMORTALIDAD

Ti Griego a sao nga a·tha·na·siʹa ket buklen ti negatibo a pangrugian a sao nga a ken ti maysa a porma ti sao maipaay iti “ipapatay” (thaʹna·tos). Gapuna, ti pamunganayan a kaipapananna ket “kinaawan ipapatay,” ken tumukoy iti matagiragsak a kualidad ti biag, awan sabali, ti awan patinggana ken awan pannakadadaelna a biag. (1Co 15:53, 54, Rbi8 ftn; 1Ti 6:16, Rbi8 ftn) Ti Griego a sao nga a·phthar·siʹa, a kaipapananna ti “di panagrupsa,” tumukoy iti daydiay saan nga agrunot wenno agrupsa, daydiay saan nga agrakaya.​—Ro 2:7; 1Co 15:42, 50, 53; Efe 6:24; 2Ti 1:10.

Ti sasao nga “imortal” wenno “imortalidad” saan a masarakan iti Hebreo a Kasuratan. Nupay kasta, ipakita daytoy a paset ti Kasuratan a ni Jehova a Dios, kas Gubuayan ti isuamin a biag, ket saan a matay, ngarud, imortal. (Sal 36:7, 9; 90:1, 2; Hab 1:12) Daytoy a kinapudno impaganetget met ti Kristiano nga apostol Pablo iti panangtukoyna iti Dios kas ti “Ari ti kinaagnanayon, di agrupsa.”​—1Ti 1:17.

Kas ipakita ti artikulo a KARARUA, ibatad met ti Hebreo a Kasuratan a ti tao saan a nainkasigudan nga imortal. Adu dagiti pannakatukoy ti natauan a kararua (Heb., neʹphesh) kas matay, agturong iti tanem, ken madadael. (Ge 17:14; Jos 10:32; Job 33:22; Sal 22:29; 78:50; Eze 18:4, 20) Siempre, tumunos iti dayta ti Kristiano a Griego a Kasuratan ken aglaon met kadagiti pannakatukoy ti ipapatay ti kararua (Gr., psy·kheʹ). (Mt 26:38; Mr 3:4; Ara 3:23; San 5:20; Apo 8:9; 16:3) Gapuna, ti Kristiano a Griego a Kasuratan saanna a supiaten wenno baliwan ti naipaltiing a sursuro ti Hebreo a Kasuratan a ti tao, ti natauan a kararua, ket mortal, matay. Nupay kasta, ti Kristiano a Griego a Kasuratan aglaon iti pannakaipalgak ti panggep ti Dios a mangipaay iti imortalidad iti sumagmamano kadagiti adipenna.

Kasano a ni Jesus “daydiay kakaisuna nga agik-ikut iti imortalidad”?

Ni Jesu-Kristo ti kaunaan a nadeskribir iti Biblia kas nagunggonaan iti sagut nga imortalidad. Sakbay ti panangpagungar kenkuana ti Dios, saan pay idi nga agik-ikut iti imortalidad, kas paneknekan ti naipaltiing a sasao ti apostol iti Roma 6:9: “Ni Kristo, ita ta naibangonen manipud kadagiti natay, saanen a matay; ti ipapatay saanen nga agturay kenkuana.” (Idiligyo ti Apo 1:17, 18.) Gapuna, iti pannakadeskribirna iti 1 Timoteo 6:15, 16 bilang “Ari dagidiay agturay kas ar-ari ken Apo dagidiay agturay kas ap-appo,” naipakita a ni Jesus naiduma iti amin a kakasta a sabsabali pay nga ar-ari ken ap-appo ta isu “daydiay kakaisuna nga agik-ikut iti imortalidad.” Gapu ta mortalda, ti sabsabali pay nga ar-ari ken ap-appo matayda, kas met laeng idi dagiti nangato a padi ti Israel. Nupay kasta, ti naipadayag a ni Jesus, ti Nangato a Padi a dinutokan ti Dios mayannurot iti wagas ni Melquisedec, ket addaan iti “di madadael a biag.”​—Heb 7:15-17, 23-25.

Ti sao a “di madadael” ditoy isu ti pakaipatarusan ti Griego a termino nga a·ka·taʹly·tos, a literal a kaipapananna ti “di marunot.” (Heb 7:16, Rbi8 ftn) Ti sao ket buklen ti napagtipon a negatibo a pangrugian a sao nga a ken ti sabali pay a sasao a nainaig iti “pannakarakrak,” kas iti sasao ni Jesus maipapan iti pannakarakrak wenno pannakarebba dagiti bato ti templo idiay Jerusalem (Mt 24:1, 2), kasta met iti panangtukoy ni Pablo iti pannakarakrak ti naindagaan a “tolda” dagiti Kristiano, kayatna a sawen ti pannakadadael ti naindagaan a biagda nga adda kadagiti natauan a bagi. (2Co 5:1) Gapuna, ti imortal a biag a naipaay ken Jesus apaman a nagungar ket saan laeng nga awan patinggana no di ket saan a pulos agrakaya wenno agrunot ken saan a pulos madadael.

Dagiti Agtawid iti Pagarian Maipaayanda iti Imortalidad. Kadagiti napulotan a Kristiano a naayaban a makipagturay ken Kristo iti langlangit (1Pe 1:3, 4), naikari kadakuada a makiramanda ken Kristo iti kaasping ti panagungarna. (Ro 6:5) Gapuna, kas iti kasasaad ti Apo ken Uloda, dagiti napulotan a kameng ti kongregasion Kristiano a matay a simamatalek umawatda iti panagungar iti imortal nga espiritu a biag, iti kasta “daytoy a mortal agkawes iti imortalidad.” (1Co 15:50-54) Kas ken Jesus, saan laeng nga agnanayon a biag ti kaipapanan ti imortalidad iti kasasaadda, saan met a pannakawayawaya laeng manipud ipapatay. Maipaayanda met iti “pannakabalin ti di madadael a biag” kas kakadua a makipagtawid ken Kristo. Makita daytoy iti panamagnaig ni apostol Pablo iti di panagrupsa ken ti imortalidad a maragpatda. (1Co 15:42-49) Kadakuada “awan autoridad ti maikadua nga ipapatay.”​—Apo 20:6; kitaenyo ti DI PANAGRUPSA.

Ad-adda pay a naisangsangayan daytoy a pannakaipaay ti imortalidad kadagiti agtawid iti Pagarian, ta uray dagiti anghel ti Dios naipakita a mortalda numan pay agik-ikutda iti espiritu a bagi, saan a nainlasagan. Nabatad a mortal dagiti anghel, kas ipasimudaag ti pannakaukom nga ipapatay a naipataw iti espiritu nga anak a nagbalin a Satanas, a Kabusor ti Dios, ken kasta met kadagidiay sabsabali pay nga anghel a nangsurot iti sataniko a dana ken “saan a nangtaginayon iti nakaisigudan a kasasaadda no di ket pinanawanda ti bukodda nga umiso a lugar a pagnaedan.” (Jud 6; Mt 25:41; Apo 20:10, 14) Gapuna, ti pannakaipaay ti “di madadael a biag” (Heb 7:16) wenno “di marunot a biag” kadagidiay Kristiano a makagun-od iti pribilehio a makipagturay iti Anak ti Dios iti nailangitan a Pagarian iparangarangna, iti nakaskasdaaw a pamay-an, a ti Dios agtalek kadakuada.​—Kitaenyo ti BIAG; LANGIT (Ti dalan nga agturong iti nailangitan a biag).