Tagiragsakenyo ti Personal a Panagadal iti Sao ti Dios

“Pudno unay a mennamennaekto ti isuamin nga aramidmo, ket kadagiti pannakilangenmo maseknanakto.”​—SALMO 77:12.

1, 2. (a) Apay a masapul nga iwayaantayo ti panagmennamenna? (b) Ania ti kaipapanan ti “panagmennamenna” ken “panangutob”?

KAS ad-adalan ni Jesu-Kristo, maseknantayo koma unay iti relasiontayo iti Dios ken ti motibotayo nga agserserbi Kenkuana. Kaskasdi, okupado unay ti kaaduan a tattao ita ket awan gundawaydan nga agmennamenna. Naan-anay a naigamerda iti materialismo, panag-shopping, ken awan kaes-eskanna a ragragsak. Kasano a maliklikantayo dagita a minamaag nga aramid? No kasano a masapul nga iwayaantayo dagiti napateg nga aktibidad iti kada aldaw, kas iti pannangan ken pannaturog, masapul met nga iwayaantayo kada aldaw ti panangmennamenna kadagiti aramid ken pannakilangen ni Jehova.​—Deuteronomio 8:3; Mateo 4:4.

² Adda kadi tiempoyo nga agmennamenna? Ania ti kaipapanan ti panagmennamenna? Depinaren ti maysa a diksionario dayta a sao kas “panangipamaysa iti panunot: panangusig wenno panangutob.” Ken ti sao a “panangutob” kaipapananna “panunoten: usigen . . . amirisen a siuulimek, siaannad, ken naimbag.” Ania ti kaipapanan dayta kadatayo?

 3. Iti ania a direkta a nainaig ti naespirituan a panagrang-ay?

³ Dayta koma ti mangipalagip kadatayo iti insurat ni apostol Pablo iti padana nga adipen a ni Timoteo: “Bayat nga um-umayak, itultuloymo nga igaed ti bagim iti panagbasa iti publiko, iti panangbagbaga, iti panangisuro. . . . Utobem dagitoy a banag; maipamaysaka kadakuada, tapno ti panagrang-aymo maiparangarang iti amin a tattao.” Wen, manamnama ti panagrang-ay, ket ipakita ti sasao ni Pablo a direkta nga agkanaig ti panangutob kadagiti naespirituan a banag ken panagrang-ay. Kasta met ita. Tapno matagiragsaktayo ti naespirituan a panagrang-ay, masapul nga ‘utoben’ ken ‘naipamaysatayo’ kadagiti bambanag a mainaig iti Sao ti Dios.​—1 Timoteo 4:13-15.

 4. Aniada nga alikamen ti makatulong kadakayo a mangutob a regular iti Sao ni Jehova?

⁴ Agpannuray kadakayo ken iti eskediul ti pamiliayo no ania ti kasayaatan a tiempo nga agmennamennakayo. Adu ti mangutob iti maysa a teksto ti Biblia iti agsapa no basaenda ti bokleta a Panangsukimat Kadagiti Kasuratan iti Inaldaw. Kinapudnona, agarup 20,000 a boluntario kadagiti pagtaengan a Bethel iti intero a lubong ti mangirugi iti aldawda babaen ti 15-minuto a panangusig iti teksto ti Biblia iti dayta nga aldaw. Nupay manmano laeng kadagiti kameng ti pamilia ti Bethel ti agkomento kada bigat, dagiti dadduma utobenda dagiti komento ken dagiti maibasa. Adda dagiti Saksi a mangutob iti Sao ni Jehova bayat nga agturongda iti pagtrabahuan. Denggenda dagiti audiocassette ti Biblia ken Pagwanawanan ken Agriingkayo! a magasin a magun-od iti dadduma a lenguahe. Kasta ti aramiden ti adu nga assawa a babbai bayat ti panagtagibalayda. No an-anagen, tultuladenda ni salmista Asaf, a nagsurat: “Lagipekto ti ar-aramid ni Jah; ta lagipekto ti nakaskasdaaw a gapuanam iti nabayagen a tiempo. Ket pudno unay a mennamennaekto ti isuamin nga aramidmo, ket kadagiti pannakilangenmo maseknanakto.”​—Salmo 77:11, 12.

Mangyeg Kadagiti Positibo a Resulta ti Umiso a Panangmatmat

 5. Apay a nasken nga ipategtayo ti personal a panagadal?

⁵ Iti moderno a panawentayo a nasaknap ti telebision, video, ken kompiuter, saanen a managbasa dagiti tattao. Saan koma a kasta dagiti Saksi ni Jehova. Kinapudnona, arig nayangklatayo ken ni Jehova gapu iti panagbasatayo iti Biblia. Rinibu a tawenen ti napalabas, ni Josue ti simmuno ken ni Moises kas lider ti Israel. Tapno magun-od ni Josue ti pamendision ni Jehova, masapul a basaenna ti Sao ti Dios. (Josue 1:8; Salmo 1:1, 2) Makalikaguman pay la dayta ita. Ngem gapu iti limitado nga edukasion, marigatan nga agbasa ti dadduma wenno ipapanda a makabannog dayta. No kasta, ania ti makatulong kadatayo nga agtarigagay a mangbasa iti Sao ti Dios? Masarakan ti sungbat iti sasao ni Ari Solomon a nairekord iti Proverbio 2:1-6. Pangngaasiyo ta luktanyo ti Bibliayo ket basaenyo dagitoy a bersikulo. Kalpasanna, sangsangkamaysa nga usigentayo.

 6. Ania ti rumbeng a panangmatmattayo iti pannakaammo a naggapu iti Dios?

⁶ Umuna iti amin, naidagadag kadatayo: “Anakko, no awatemto ti sasaok ket idulinmo kenka dagiti bukodko a bilin, tapno ti sirib ipangagmo babaen ti lapayagmo, iti kasta mapagannayasmo ta pusom iti panangilasin; . . .” (Proverbio 2:1, 2) Ania ti maadaltayo kadagitoy a sasao? Maadaltayo a responsabilidad ti tunggal maysa kadatayo nga adalen ti Sao ti Dios. Imutektekanyo ti kondision a “no awatemto ti sasaok.” Napateg dayta yantangay kaaduan a tattao ti saan a mangipangag iti Sao ti Dios. Tapno makaparagsak ti agadal iti Sao ti Dios, masapul a sidadaantayo nga umimdeng iti sasao ni Jehova ken ibilang dagita kas gameng a ditay kayat a mapukaw. Ditay koma agbalin nga okupado wenno masinga kadagiti inaldaw nga aktibidadtayo nga uray la mapukaw ti interestayo iti Sao ti Dios, wenno pagduaduaan pay ketdi.​—Roma 3:3, 4.

 7. Agingga a mabalin, apay a nasken a tumabuno ken umimdengtayo kadagiti Nakristianuan a gimong?

⁷ Talaga kadi nga ‘ipangag’ ken imdengantayo a naimbag no mailawlawag ti Sao ti Dios kadagiti Nakristianuan a gimong? (Efeso 4:20, 21) ‘Pagannayasentayo kadi ti puso’ a gumun-od iti pannakaawat? Nalabit saan pay unay nga adu ti kapadasan ti ispiker, ngem maiparbeng a naan-anay nga ipangagtayo bayat nga ilawlawagna ti Sao ti Dios. Siempre, tapno maipangagtayo ti sirib ni Jehova, masapul nga ikagumaantayo a tabunuan dagiti Nakristianuan a gimong. (Proverbio 18:1) Panunotenyo ti pannakadismaya ti asinoman a saan a dimmar-ay iti makinngato a siled idiay Jerusalem idi Pentecostes 33 K.P.! Nupay mas simple dagiti gimongtayo ita, ti ad-adalentayo ket ti Biblia, ti kangrunaan a librotayo. Gapuna, magunggonaantayo iti tunggal gimong no umimdeng ken sumurottayo a mangbasa iti Bibliatayo.​—Aramid 2:1-4; Hebreo 10:24, 25.

8, 9. (a) Ania ti kalikaguman kadatayo ti personal a panagadal? (b) Pagdiligenyo ti pateg ti balitok ken ti pannakaawat maipapan iti pannakaammo iti Dios.

⁸ Kastoy ti simmaruno a sasao ti masirib nga ari: “Mainayon pay, no agpukkawka maipaay iti mismo a pannakaawat ket iyesngawmo ti timekmo maipaay iti mismo a panangilasin, . . .” (Proverbio 2:3) Ania a panangmatmat wenno kababalin ti ibinsabinsa dagitoy a sasao kadatayo? Siempre, ti nasged a tarigagay a maawatan ti Sao ni Jehova! Ipasimudaagda ti situtulok a panagadal tapno gumun-od iti pannakaawat, a tarusan no ania ti pagayatan ni Jehova. Siempre, kalikagumanna ti panagregget, ket dayta ti mangiturong kadatayo iti sumaruno a sasao ken ilustrasion ni Solomon.​—Efeso 5:15-17.

⁹ Intuloyna: “No itultuloymo a sapulen dayta [ti pannakaawat] kas iti pirak, ken kas kadagiti nalmeng a gameng itultuloymo a biroken dayta, . . .” (Proverbio 2:4) Ipalagipna kadatayo ti panagminas dagiti tattao, a sinigsiglo a nagkali kadagiti makunkuna a napapateg a metal a pirak ken balitok. Pimmatay ti tao gapu iti balitok. Dadduma ti nangbusbos iti intero a biagda a mangsapsapul iti dayta. Ngem ania ti pudpudno a pateg ti balitok? No napukawkayo iti desierto ken mawaw unayen, ania ti pilienyo: maysa a bareta ti balitok wenno sangabaso a danum? Kaskasdi, ti balitok ti inggaed a binirok dagiti tattao, nupay saan a natalged ti balorna!a Ad-adda koma a pagreggetantayo a biroken ti sirib, abilidad a mangilasin, ken pannakaawat maipapan iti Dios ken iti pagayatanna! Ngem ania dagiti gunggona ti kasta a panagbirok?​—Salmo 19:7-10; Proverbio 3:13-18.

10. Ania ti magun-odtayo no adalentayo ti Sao ti Dios?

¹⁰ Intuloy nga inlawlawag ni Solomon: “Iti kasta maawatamto ti panagbuteng ken Jehova, ket masarakamto ti mismo a pannakaammo iti Dios.” (Proverbio 2:5) Anian a makaliwliwa a panunoten nga uray managbasoltayo, masarakantayo ti “pannakaammo iti Dios,” ni Jehova, ti Soberano nga Apo iti uniberso! (Salmo 73:28; Aramid 4:24) Dagiti pilosopo ken makunkuna a masirib a tattao ditoy lubong ket sinigsiglon nga ikagkagumaanda a tarusan dagiti misterio ti biag ken ti uniberso. Ngem dida nasarakan ti “pannakaammo iti Dios.” Apay? Nupay rinibu a tawenen a mabalin a magun-od dayta iti Sao ti Dios, ti Biblia, ibilangda a simple unay. Gapuna, dida nagun-od ken naawatan dayta.​—1 Corinto 1:18-21.

11. Ania ti dadduma a gunggona ti personal a panagadal?

¹¹ Daytoy ti sabali pay a gunggona nga impaganetget ni Solomon: “Ni met laeng Jehova mangted iti sirib; manipud ngiwatna adda pannakaammo ken panangilasin.” (Proverbio 2:6) Situtulok ken sipaparabur nga iburay ni Jehova ti sirib, pannakaammo, ken pannakaawat iti asinoman a sidadaan a mangbirok iti dayta. Sigurado nga adda rasontayo a mangipateg iti personal a panagadal iti Sao ti Dios, uray kalikagumanna ti panagregget, disiplina, ken panagsakripisio. Agyamantayo ta addaantayo kadagiti nayimprenta a kopia ti Biblia ket ditay kasapulan ti agisurat iti kopiatayo kas inaramid dagiti nagkauna a tattao!​—Deuteronomio 17:18, 19.

Tapno Magna a Maikari ken Jehova

12. Ania koma ti motibotayo iti pananggun-od iti pannakaammo iti Dios?

¹² Ania koma ti motibotayo iti personal a panagadaltayo? Tapno agparang a nasaysayaattayo ngem iti dadduma? Tapno maipakita nga ad-adu ti pannakaammotayo? Tapno makuna a nalaingtayo iti Biblia? Saan. Ti panggeptayo ket tapno makapagtignaytayo kas Kristiano, a kanayon a sidadaan a tumulong iti sabsabali, a makapabang-ar kas ken Kristo. (Mateo 11:28-30) Impakdaar ni apostol Pablo: “Ti pannakaammo mamagtangsit, ngem ti ayat mangpabileg.” (1 Corinto 8:1) Gapuna, masapul a napakumbabatayo kas ken Moises idi kinunana ken ni Jehova: “Ipakaammom kaniak, pangngaasim, ti daldalanmo, iti kasta maam-ammoka, tapno makasarakak iti pabor kadagita matam.” (Exodo 33:13) Wen, tarigagayantayo koma ti pannakaammo tapno maay-ayotayo ti Dios, saan a tapno agpakalaing kadagiti tattao. Kayattayo ti agbalin a maikari, napakumbaba nga adipen ti Dios. Kasanotayo a maitungpal dayta a kalat?

13. Ania ti masapul nga aramiden ti maysa tapno maikari nga agbalin nga adipen ti Dios?

¹³ Binalakadan ni Pablo ni Timoteo no kasano a maay-ayo ti Dios, idi kinunana: “Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna, nga aramatem a siuumiso ti sao ti kinapudno.” (2 Timoteo 2:15) Ti sasao nga ‘aramaten a siuumiso’ ket naggapu iti Griego nga ebkas a kaipapananna “nalinteg a tabas,” wenno ‘tabasen a diretso.’ (Kingdom Interlinear) Sigun iti dadduma nga eskolar, ipasimudaagna ti maysa a dumadait a mangtabas iti tela sigun iti pagtuladan, wenno ti maysa a mannalon nga agarado iti talon, ken dadduma pay. Aniaman kadagita, masapul a ti resultana ket husto, wenno nalinteg. Ti punto isu daytoy: tapno agbalin a maikari ken naanamongan nga adipen ti Dios, masapul nga ‘aramiden ni Timoteo ti amin a kabaelanna’ a mangsigurado a dagiti isursuro ken konduktana ket maitunos iti sao ti kinapudno.​—1 Timoteo 4:16.

14. Ania koma ti epektona kadagiti aramid ken sasaotayo ti personal a panagadaltayo?

¹⁴ Kasta met laeng ti punto ni Pablo idi indagadagna kadagiti pada a Kristiano idiay Colosas a ‘magnada a maikari ken Jehova iti panggep a mangay-ayo a naan-anay kenkuana,’ babaen ti ‘panagbunga iti tunggal naimbag nga aramid ken rumang-ay iti umiso a pannakaammo iti Dios.’ (Colosas 1:10) Ti panagbalin a maikari ken Jehova ket innaig ni Pablo iti ‘panagbunga iti tunggal naimbag nga aramid’ ken iti ‘panagrang-ay iti umiso a pannakaammo iti Dios.’ Iti sabali a pannao, ti napateg ken ni Jehova ket saan laeng a no kasano kadakkel ti panangipategtayo iti pannakaammo no di pay ket no kasano kadakkel ti panagreggettayo a mangitunos kadagiti aramid ken sasaotayo iti Sao ti Dios. (Roma 2:21, 22) Kaipapananna a ti personal a panagadaltayo masapul nga apektaranna ti pampanunot ken konduktatayo no kayattayo a maay-ayo ti Dios.

15. Kasano a masalakniban ken makontroltayo ti isip ken pampanunottayo?

¹⁵ Ita, desidido ni Satanas a mangdadael iti espiritualidadtayo babaen ti panangriribukna iti panunot. (Roma 7:14-25) No kasta, masapul a salakniban ken kontrolentayo ti isip ken pampanunottayo tapno maikaritayo ken ni Jehova a Dios. Ti igam nga adda kadatayo isu ti “pannakaammo iti Dios,” a ‘mangkautibo iti tunggal panunot tapno pagbalinenna a natulnog iti Kristo.’ Daytoy ti kanayonan a rason no apay nga ipaayantayo iti atension ti inaldaw a panagadal iti Biblia, yantangay kayattayo nga ikkaten iti isiptayo dagiti managimbubukodan, nainlasagan a panagpampanunot.​—2 Corinto 10:5.

Dagiti Katulongan iti Panagadal

16. Kasanotayo a magunggonaan iti panangisuro ni Jehova?

¹⁶ Mangyeg iti naespirituan ken pisikal a gunggona ti sursuro ni Jehova. Saan dayta a teolohia a makauma ken awan serserbina. Gapuna, mabasatayo: “Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam.” (Isaias 48:17) Kasanonatayo a tulongan ni Jehova a magna iti makagunggona a dalanna? Umuna, adda kadatayo ti naipaltiing a Saona, ti Nasantuan a Biblia. Isu daytoy ti kangrunaan a librotayo, a kanayon a pagpannurayantayo. Dayta ti makagapu a nasayaat no ukagentayo ti Biblia bayat ti panagimdengtayo kadagiti Nakristianuan a gimong. Ti gunggona nga iyegna ket makita iti salaysay maipapan iti Etiope a eunuko, a nairekord iti Aramid kapitulo 8.

17. Ania ti kapadasan ti Etiope a eunuko, ken ania ti ipakita daytoy?

¹⁷ Nakomberte iti Judaismo ti Etiope a eunuko. Napasnek ti pammatina iti Dios, ken inadalna ti Kasuratan. Iti panagdaliasatna a nakakaruahe, basbasaenna ti libro nga Isaias idi immasideg kenkuana ni Felipe ket nagimtuod: “Ammom kadi nga agpayso no ania ti basbasaem?” Ania ti sungbat ti eunuko? “‘Pudno unay, kasano koma a maawatak, malaksid no adda nangidalan kaniak?’ Ket nagpakaasi ken Felipe a lumugan ken makikatugaw kenkuana.” Babaen ti panangiwanwan ti nasantuan nga espiritu, impakaawat ni Felipe iti eunuko ti padto ni Isaias. (Aramid 8:27-35) Ania ti ipakita daytoy? Saan nga umdas ti personal a panagbasatayo iti Biblia. Babaen ti espirituna, us-usaren ni Jehova ti matalek ken masirib nga adipenna tapno tumulong kadatayo a mangtarus iti Saona iti umiso a tiempo. Kasano a maaramidan daytoy?​—Mateo 24:45-47; Lucas 12:42.

18. Kasanonatayo a tulongan ti matalek ken masirib nga adipen?

¹⁸ Nupay naawagan ti klase adipen kas “matalek ken masirib,” saan nga imbaga ni Jesus a di agkamali daytoy nga adipen. Imperpekto pay la a Kristiano ti mangbukel iti dayta a grupo dagiti matalek a napulotan a kakabsat. Uray aramidenda ti amin a kabaelanda, dida maliklikan ti agkamali, kas kadagiti matalek a napulotan idi umuna a siglo. (Aramid 10:9-15; Galacia 2:8, 11-14) Ngem nadalus ti motiboda, ket us-usaren ida ni Jehova a mangipaay kadagiti katulongan iti panagadal iti Biblia tapno mapabileg ti pammatitayo iti Sao ti Dios ken kadagiti karina. Ti kangrunaan a katulongan iti personal a panagadal nga inted kadatayo dayta nga adipen isu ti Baro a Lubong a Patarus ti Nasantuan a Kasuratan. Magun-od dayta itan, kompleto man wenno pasetna, iti 42 a lenguahe, ken 114 milion a kopia iti nadumaduma a bersion ti nayimprentan. Kasano a mausartayo nga epektibo iti personal a panagadaltayo?​—2 Timoteo 3:14-17.

19. Ania ti sumagmamano a benneg ti New World Translation​—With References a makatulong iti personal a panagadal?

¹⁹ Alaentayo a pagarigan ti New World Translation of the Holy Scriptures​—With References. Addaan kadagiti benneg a cross-reference, footnote, napaababa a konkordansia babaen ti “Bible Words Indexed” ken “Footnote Words Indexed,” ken Apendise a mangsaklaw iti 43 a suheto, agraman kadagiti mapa ken tsart. Addaan met iti “Introduction,” a mangilawlawag iti adu a gubuayan a nausar iti naisangsangayan a pannakaipatarus ti Biblia. No magun-od dayta iti lenguahe a matarusanyo, ikagumaanyo nga adalen ken usaren dagita a bennegna. Aniaman kadagita, ti Biblia ti pundasion ti panagadaltayo, ket babaen ti Baro a Lubong a Patarus, addaantayo iti bersion a siuumiso a mangipaganetget iti nagan ti Dios ken mangitampok iti panagturay ti Pagarian ti Dios.​—Salmo 149:1-9; Daniel 2:44; Mateo 6:9, 10.

20. Ania a salsaludsod maipapan iti personal a panagadal ti masapul a masungbatan?

²⁰ Ita, mabalin a mayimtuodtayo: ‘Ania a kanayonan a tulong ti kasapulantayo tapno matarusantayo ti Biblia? Kasano a maiwayaantayo ti personal a panagadal? Kasano a mapagbalintayo nga ad-adda nga epektibo ti panagadaltayo? Ania koma ti epektona iti sabsabali ti panagadaltayo?’ Ti sumaruno nga artikulo usigenna dagitoy a napateg nga aspeto ti panagrang-aytayo kas Kristiano.

[Footnote]

Malagipyo Kadi?

• Ania ti kaipapanan ti “agmennamenna” ken “utoben”?

• Ania ti nasken a panangmatmattayo iti panagadal iti Sao ti Dios?

• Ania koma ti motibotayo iti personal a panagadaltayo?

• Ania dagiti mausartayo a katulongan iti panagadal iti Biblia?

[Ladawan iti panid 15]

Dagiti kameng ti pamilia ti Bethel matmatanda a makapabileg iti naespirituan no marugian ti kada aldaw babaen ti panangusig iti maysa a teksto ti Biblia

[Dagiti Ladawan iti panid 15]

Saan a masayang dagiti napateg nga oras no agdengngeg kadagiti audiocassette ti Biblia bayat ti panagbiahetayo

[Ladawan iti panid 16]

Awan sardayna ti panagregget dagiti tattao nga agbirok iti balitok. Kasano kadakkel ti panagreggetyo nga agadal iti Sao ti Dios?

[Credit Line]

Iti pammalubos ti California State Parks, 2002

[Dagiti Ladawan iti panid 17]

Ti Biblia ket maysa a gameng a mangiturong iti biag nga agnanayon