DEMAS

[mabalin a napaababa a porma ti “Demetrio,” kaipapananna ti “Ken (Kukua ni) Demeter”].

Sigud a katrabahuan ni apostol Pablo. Adda idi ni Demas idiay Roma a kadua ti apostol bayat ti immuna a pannakaibaludna sadiay, a dagiti kablaawna nairaman iti sursurat kadagiti taga Colosas ken iti surat nga agpaay ken Filemon. (Col 4:14; Flm 24) Idi a ni Pablo nagsurat ken Timoteo bayat ti maikadua a pannakaibaludna, ni Demas binaybay-anna ti apostol ket pimmanaw a nagturong idiay Tesalonica, nalabit ti ilina.​—2Ti 4:10.

Saan a naipanayag ti apag-isu a wagas a panangbaybay-a ni Demas ken Pablo ‘gapu iti panagayatna iti agdama a sistema ti bambanag.’ Saan nga ibaga ti apostol no nagbalin ni Demas nga apostata wenno bumusbusor. Nalabit ti panagayat ni Demas iti material a bambanag ken iti nailubongan a ragragsak nagbalin a napigpigsa ngem iti panagayatna iti naespirituan a bambanag. Mabalin a ti panagbutengna a mapapatay kas martir a maikanunong ken Pablo ti makagapu a nagsapul ni Demas iti nataltalged a lugar ket iti kasta mataginayonna ti biagna iti agdama idi a sistema ti bambanag. Aniaman ti napasamak, idi nagbalin a di mainugot dagiti kasasaad, saan nga inusar ni Demas ti naisangsangayan a gundawayna a mangpabileg iti kabsatna a ni Pablo.