Dagiti Saludsod Manipud Kadagiti Managbasa

◼ Nagsao kadi a direkta ni Jehova a Dios ken Adan, wenno nagsao babaen ti Verbo, ti bugbugtong nga Anak ti Dios?

Di mangted ti Biblia ti nalawag a sungbat iti daytoy a saludsod. Nupay nabalinan koma ti Dios ti nagsao a direkta iti perpekto a natauan nga anakna idiay Eden, mabalbalin nga Isut’ nakikomunikar ken Adan babaen ti Verbo.

Ti Biblia masansan a sawenna ti panagar-aramid ti Dios kadagiti bambanag idinto nga aktual nga ar-aramidenna ida babaen iti maysa wenno ad-adu pay nga anghel. Kas pangarigan, kunaen ti Genesis 1:1 kadatayo: “Idi punganay ti Dios pinarsuana dagiti langlangit ken ti daga.” No dayta la komat’ nasao ti Biblia maipapan ti namunganayan ti uniberso, maipatotay koman a ti Dios ti nangparsua a direkta iti dayta, a kaslattay babaen kadagiti mismo nga imana. Ti Kristiano a Griego a Kasuratan, nupay kasta, pinalawana ti pannakaawattayo. Mabasatayo: “Ta babaen [ti Anak ti Dios] naparsua dagiti amin nga adda kadagiti langlangit ken daga, makita ken saan a makita . . . Ket isuamin a dadduma a bambanag naparsua babaen kenkuana ken para kenkuana.” (Colosas 1:16, 17) Dadduma pay a teksto ti mangpatalged ti akem ti Anak iti panangparsua ti uniberso. (Juan 1:3, 10; Hebreo 1:1, 2) Kaskasdi, ti akemna ket kas trabahador nga addat’ babaen ni Jehova, a namunganay, nangted pannakabalin, ken nangiturong ti panamarsua.​—Salmo 19:1.

Ti Dios kunana iti umuna a tao: “Kadagiti amin a kayo iti minuyongan mangankanto a siwayawaya.” (Genesis 2:16, 17) Saan a kasapulan ni Jehova ti maysa a mekanikal wenno elektroniko a pamay-an, kas ti megaphone wenno shortwave radio. Kas kinuna Ti Pagwanawanan ti Agosto 1, 1989: “Awan nakita ti tao a mangar-aramid ti panagsao. Ti timek naggapu iti di makita, iti di makita a disso, ket daytat’ agsasao kenkuana. Daytat’ timek ti Nangaramid ti tao, ti Namarsua kenkuana! . . . Saan a kasapulan ti tao ti moderno a sientipiko a radio receiver tapno mangngegna ti nadiosan a timek. Ti Dios nakipatang a direkta kenkuana.”

Ti kadi Dios nagsao babaen iti maysa nga anghel, nalabit ti Logos, nga isut’ nagbalin a Jesus? Mabalin a posible dayta. Nupay saan a dogmatiko, insurat ni C. T. Russell: “Nalabit ni Jesus idi ti Pannakabagi ti Dios idiay Minuyongan ti Eden ken Adan.” (The Watch Tower, Pebrero 1, 1915) Ti inauna nga Anak ti Dios nabayagen a nagserbi iti natan-ok a kapasidad kas “Verbo,” wenno Pannakangiwat ni Amana, kadagiti anghel ken kadagiti tao. (Juan 1:1; 12:49, 50; Apocalipsis 1:1, 2) Gapuna uray no ti salaysay ti Genesis itdenna ti impresion a ti Dios nagsao a direkta ken agsolsolo nga Adan, daytat’ saan a mangilaksid iti panagsaona babaen iti maysa nga anghel, agraman ti Verbo, ti nailangitan nga Anak ni Jehova. Nangnangruna a pudno daytoy no panunoten nga inusar ni Jehova ti Logos a nangparsua ti tao idi damo, ket daytoy ‘pagrag-oanna ti pannakiadda kadagiti anak dagiti tao.’​—Proverbio 8:22, 31; Juan 1:3.

Usigenyo, kas pangarigan, ti okasion idi napan ni Moises idiay Bantay Sinai. Salaysayen ti Exodo 19:21-24: “Ket ni Jehova kinunana ken Moises . . . Ket ni Moises kinunana ken Jehova . . . Ket ni Jehova kinunana kenkuana.” Kalpasanna ti salaysay maipapan ti pannakaited ti Sangapulo a Bilbilin ket nangrugi iti kastoy: “Ket ti Dios sinaona amin dagitoy a balikas.” (Exodo 20:1) Arig kadi dayta a kasla ti Dios ti personal a nangiyebkas kadagiti sasao ti Linteg? Ti kasta nga impresion masuportaran gapu ta naibaga kadatayo a ti Dios nagsao ken Moises a “rupan-rupa.”​—Exodo 33:11.

Kaskasdi, addaantay pay ti kanayonan a palgaak maipapan iti daytoy. Nagsurat ni apostol Pablo maipapan ti Linteg: “Ket naiyallatiw babaen kadagiti anghel iti ima ti maysa a manangibabaet.” (Galacia 3:19) Kamaudiananna, espesipiko a pinagsupadi ni Pablo dagiti bilbilin nga inted ti Dios iti Linteg ken no aniat’ inawat dagiti Kristiano baeten ken Jesus: “Ta no ti sao a naisao gapu kadagiti anghel natdada a sititibker, ket amin a basol ken kinasukir inawatda ti maitutop a supapak . . . , kasanonto ti panaglisitayo no ditay ikankano ti kasta unay nagdakkel a pakaisalakanan isu nga idinto nga impakaammo ti Apo [a ni Jesus] idi damo ket paneknekan kadatayo dagiti nakangngeg kenkuana.” (Hebreo 2:2, 3) Ngarud ti Dios saanna a binalikas dagiti sasao ti Linteg babaen iti personal a timekna, wenno inusarna met ketdi ti Logos. Imbes ketdi, pinilina nga inusar ti dadduma kadagiti anghel.

Ngem, ania a talaga ti kangrunaan a punto? Masansan no mabasatay ti Dios nga agsasao kadagiti tattao, ammotayon nga inaramidna ti kasta babaen kadagiti natulnog nga espiritu a parparsua a nagsao para kenkuana. (Idiligyo ti Genesis 18:2, 3, 33; 19:1; Exodo 3:2-4; Oc-ocom 6:11, 12, 20-22.) Ti designasion ni Jesus kas ti Verbo isingasingna nga isu daydiay inusar a masansan ti Dios a makikomunikar kadagiti dadduma a parparsua. Iraman kadi dayta ti perpekto nga Anak ti Dios a ni Adan? Mabalin.​—Lucas 3:38.

Pudno nga idi adda ti Logos ditoy daga iti kamaudianan, nagsao ti Ama a silalawag iti tallo a daras tapno daytoy “maudi nga Adan” mangngegna. (1 Corinto 15:45; Mateo 3:16, 17; 17:1-5; Juan 12:28-30) Kadagitoy nga okasion, apay a ti Dios makisao wenno agsaot’ maipapan ti nasudi nga Anakna babaen ti bumallaet nga anghel? Ad-adda a lohikal, agsao ni Jehova a direkta; ti perpekto nga Anakna, ken uray pay kadagiti imperpekto a tattao iti asideg, nangngegda ti mismo a timek ti Dios. Gapuna idi a naparsua ti perpekto a tao a ni Adan, ti naayat nga Amana mabalin a nakilangen a direkta iti daytoy perpekto a baro a parsua. Nupay kasta, gapu iti nasaon iti ngato, nalabit nga inusarna ti Verbo.