Ti Panangmatmat ti Biblia

Manggunggona Kadi ti Dios?

WEN, manggunggona. Inaagum kadi, ngarud, ti agserbi iti Dios a matmatmatan ti gunggona? Saan, ta isu a mismo ti nangidiaya iti gunggona iti sanguanan dagiti matalek nga adipenna. Kinapudnona, kas maysa a Dios ti kinahustisia ken ayat, obligaren ni Jehova ti bagina a manggunggona kadagidiay agserbi kenkuana. Ti Saona, idiay Hebreo 11:6, kunaenna iti pasetna: “Ti tao nga umadani iti Dios masapul a mamati iti dua a banag, umuna nga adda Dios ken maikadua a ti Dios gunggonaanna dagidiay agsapsapul kenkuana.”​—Phillips.

Magun-odan ti pannakipagayam ti Dios iti panangipakita iti napudno a pammati, ket daytoy a pannakipagayam mangiturong iti gunggona. Bendisionan ti Dios dagidiay a sipapasnek a mangsapul iti anamongna.

Dagiti Gunggona Ket Ar-aramid ti Ayat

Kayat ni Jehova a maammuantayo nga isut’ kita ti Dios a manggunggona kadagidiay agayat kenkuana. Kas pagarigan, sapulen ti nakonsiderasion a nagannak dagiti pamay-an ti pananggunggonada iti anakda a situtulok a mangaramid iti trabaho iti aglawlaw ti balay gapu iti ayatda iti nagannakda. Mabalin a saan laeng a mangipaay dagiti nagannak kadagiti kasapulan iti biag, a gunggonaanda ti ubing iti naisangsangayan a sagut. No dadduma, ti sagut mabalin a kuarta a maikabil iti banko tapno mangipaay iti natalged a masakbayan ti ubing. Gapuna, ti Dios saan a kas iti tattao nga awanan iti panangapresiar wenno konsiderasion kadagidiay agaramid iti bambanag gapu iti ayat wenno kinasungdo. Manangipateg ni Jehova ket sisisinged nga umadani iti gagayyemna. No salimetmetam a sititibker ti pammatim kenkuana, isu ‘saannakanto a pulos panawan ket saannakanto a pulos baybay-an.’​—Hebreo 13:5.

Apresiaren ken anamongan ti Dios amin dagidiay a mangaramid uray ti kababassitan a panagserbi kenkuana, nga ikkanna ida ti ad-adu pay a gundaway a mangammo kenkuana. Dagiti sasao ni Jesus idiay Mateo 10:40-42 yilustrarna ti punto: “Ti umawat kadakayo awatennak met, ket ti umawat kaniak awatenna met ti nangibaon kaniak. Ti umawat iti maysa a mammadto agsipud ta isu maysa a mammadto makaalanto iti gunggona ti mammadto, ket ti umawat iti maysa a nalinteg a tao agsipud ta isu maysa a nalinteg a tao makaalanto iti gunggona ti nalinteg a tao. Ket siasinoman a mangted iti maysa kadagitoy babassit iti sangakopa laeng a nalamiis a danum nga inumen agsipud ta isu maysa nga adalan, ibagak kadakayo a pudno, dinanto pulos mapukaw ti gunggonana.”

Ni Jesus ket imbaon ni Amana, ni Jehova. Gapuna, ti maysa a tao a mangawat a buyogen ti pananganamong kadagiti adalan ni Kristo​—mammadtoda man, nalinteg a tao, wenno babassit​—aw-awatenda ni Kristo agraman ti Dios, a nangibaon ken Kristo. Sigurado a mabendisionanto dayta a tao; di bumurong a magunggonaanto. Ti paggamenganna iti naespirituan a bambanag mapnonto. Apay? Agsipud ta malagip ni Jehova uray ti kababassitan a panagserbi a naipaay iti panangsuportar iti Pagarianna, ket dayta nga aramid di bumurong a magunggonaanto.​—Hebreo 6:10.

Makapainteres, ni Pedro, maysa nga adalan ni Jesus, nagimtuod a mismo ken Jesus no addanto gunggonana agraman dagiti padana nga apostol: “Adtoy! Pinanawanmi dagiti amin a sanikua ket sinurotdaka; ania nga agpayso ti addanto a maipaay kadakami?” (Mateo 19:27) Di imbilang ni Jesus ti saludsod a di maitutop no di ket nangted iti positibo a sungbat, a kunkunana: “Tunggal maysa a nangpanaw kadagiti balbalay wenno kakabsat a lallaki wenno kakabsat a babbai wenno ama wenno ina wenno annak wenno dagdaga maigapu iti naganko umawatto iti adu a daras nga ad-adu ken tawidennanto ti agnanayon a biag.”​—Mateo 19:29.

Dagiti Gunggona Ita ken iti Masanguanan

Ipakita ti sungbat nga inted ni Jesus a dagiti pasurotna magunggonaanda nga agpadpada ita ken iti masanguanan. Maysa a gunggona ita isu ti panagbalinda a paset ti lumawlawa nga internasional a pamilia dagiti naespirituan a kakabsat a lallaki ken babbai. Nupay dagiti iglesia ti Kakristianuan agsasaibbekda maipapan iti bumasbassit a miembroda ken kinakurang iti panangsaranay, piguratibo nga agliplippias dagiti paggigimongan dagiti Saksi ni Jehova. Ginasut a ribo a baro a Saksi ti mababautisaran iti tinawen.

Ti sabali pay a gunggona isu ti talna ti panunot a buyogen ti kinakontento ken ti kinaragsak nga ipaay ti pannakipagayam iti Dios ken pannakaammo kenkuana. Wen, ti “nadiosan a debosion agraman ti pannakapnek” ket dakkel a gunggona. (1 Timoteo 6:6) Pudno nga iparangarang dayta ti naragsak a kasasaad ti panunot no ti maysa mabalinna a kunaen, kas ken apostol Pablo: “Kadagiti aniaman a kasasaad a yanko, naadalko ti mapnek,” kayatna a sawen, makontento.​—Filipos 4:11.

Sakbay la unay ti ipapatayna, nagsurat ni Pablo maipapan iti masanguanan a gunggona agpaay iti “bassit nga ipastoran” dagiti napulotan a pasurot ni Jesus​—ti gunggona a panagungar iti nailangitan a biag: “Manipuden itoy a tiempo sisasaganan maipaay kaniak ti korona ti kinalinteg, nga itdento kaniak ti Apo, ti nalinteg nga ukom, kas maysa a gunggona iti dayta nga aldaw, ngem saan laeng a kaniak, no di ket kasta met kadagidiay amin a nagayat iti pannakaiparangarangna.”​—Lucas 12:32; 2 Timoteo 4:7, 8.

Dagiti minilion a pasurot ni Jesus a “sabsabali a karnero[na]” inanamaenda ti masanguanan a gunggona a biag nga agnanayon iti maysa a daga a napagbalinen a maysa a paraiso. (Juan 10:16) Ket impanamnama ni Jesus a dagiti matay a pasurotna “magunggonaandanto inton panagungar dagiti nalinteg.”​—Lucas 14:14.

Iladawan ti Gunggona

Maitutop a padasen nga iladawan dagita a bendision, nupay awan ti eksakto a makaammo no anianto ti kasasaadda. Dikay kadi marikna ti kinaragsak a nadeskribir idiay Isaias 25:8: “Isu inalimonna nga agnanayon ni patay, ket ti Soberano nga Apo Jehova punasennanto dagiti lulua kadagiti isuamin a ruprupada”? Padasenyo nga iladawan dagiti sasao idiay Isaias 32:17: “Ti aramid ti kinalinteg isunto ti talna; ket ti patauden ti kinalinteg kinaulimek ken panagtalek nga agnanayon.” Wen, amin a tattao agtrabahodanto a sangsangkamaysa iti pudno a pannakipagayam. (Isaias 65:21-25) Uray pay itatta, ti nagaget a panagtrabaho agbanag kadagiti nasayaat a pagtaengan ken nagsayaatan ti kualidadda a produkto. Ngarud, idiay baro a lubong ti Dios, kabaelanton ti nasalun-at a tattao iti sidong dagiti naan-anay a kasasaad ti agparnuay iti aniaman a kasapulan a mamagbalin iti panagbiag a naragsak.​—Salmo 37:4.

Dagiti gunggona nga ipaay ti Dios ket saan a maigapu iti serbisio a maikari iti dayaw iti biangtayo no di ket gapu iti ayatna kas maysa a sagut nupay natawidtayo ti kinamanagbasol. (Roma 5:8-10) Nupay kasta, adda pakainaigan ti mainanama a gunggona ken ti kababalintayo. Masapul a sipapasnek a sapulentayo ni Jehova a buyogen ti natibker a pammati ken panagibtur. (Hebreo 10:35-39) Iti sabali a pannao, “aniaman ti ar-aramidenyo, aramidenyo dayta nga amin-kararua a kas maipaay ken Jehova, ket saan a maipaay kadagiti tattao, ta ammoyo a manipud ken Jehova awatenyonto ti maitutop a gunggona ti tawid.” Wen, talaga nga isut’ manggunggona.​—Colosas 3:23, 24.