Ur-urayem Kadi ti “Siudad nga Addaan Kadagiti Agpaypayso a Pundasion”?

 1. Ania dagiti sakripisio nga inaramid ti adu, ken apay nga inaramidda dagita?

MINILION nga adipen ti Dios ita ti agsaksakripisio. Inkeddeng ti adu a kakabsat a lallaki ken babbai ti agtalinaed nga awanan asawa. Adu nga agassawa ti dida pay la kayat ti maaddaan iti annak. Adda dagiti pamilia a pagtaltalinaedenda a simple ti panagbiagda. Inaramidda dagita a desision gapu iti maysa a napateg a rason​—kayatda ti naan-anay a makapagserbi ken Jehova. Kontentoda ken agtalekda nga ipaay ni Jehova ti amin a kasapulanda. Mapaaydanto kadi? Saan! Apay a masiguradotayo dayta? Ti maysa a rason ket binendisionan idi ni Jehova ni Abraham, ti “ama ti amin a naideklara a nalinteg gapu iti pammatida.”​—Roma 4:11.

 2. (a) Sigun iti Hebreo 11:8-10, 16, apay a situtulok ni Abraham a nangpanaw iti Ur? (b) Ania ti pagsasaritaantayo iti daytoy nga artikulo?

² Situtulok a pinanawan ni Abraham ti komportable a biagna iti siudad ti Ur. Apay? Gapu ta inur-urayna ti “siudad nga addaan kadagiti agpaypayso a pundasion.” (Basaen ti Hebreo 11:8-10, 16.) Ania dayta a “siudad”? Ania dagiti pakarigatan a nakaipasanguan ni Abraham bayat nga ur-urayenna ti pannakaibangon dayta a siudad? Ken kasanotayo a matulad ni Abraham ken dagidiay nangsurot iti ulidanna iti kaaldawantayo?

 3. Ania ti siudad nga inur-uray ni Abraham?

³ Ti siudad nga inur-uray ni Abraham ket ti Pagarian ti Dios. Ni Jesu-Kristo ken ti 144,000 a napulotan a Kristiano ti mangbukel iti dayta a Pagarian. Tinukoy dayta ni Pablo kas “siudad ti sibibiag a Dios, ti nailangitan a Jerusalem.” (Heb. 12:22; Apoc. 5:8-10; 14:1) Dayta met la a Pagarian ti insuro ni Jesus nga ikararag dagiti adalanna, a kiddawenda nga umay dayta tapno maaramid ti pagayatan ti Dios ditoy daga a kas sadi langit.​—Mat. 6:10.

 4. Sigun iti Genesis 17:1, 2, 6, kasano kaadu ti ammo ni Abraham maipapan iti siudad, wenno Pagarian, nga inkari ti Dios?

⁴ Ammo kadi ni Abraham dagiti detalye ti pannakaorganisar ti Pagarian ti Dios? Saan. Dagita a detalye ket “sagrado a palimed” iti adu a siglo. (Efe. 1:8-10; Col. 1:26, 27) Ngem ammo ni Abraham nga agbalinto nga ari ti dadduma a kaputotanna. Espesipiko nga inkari dayta kenkuana ni Jehova. (Basaen ti Genesis 17:1, 2, 6.) Nakabilbileg ti pammatina kadagiti kari ti Dios nga uray la kasla makitkitana Daydiay Napulotan, wenno Mesias, nga agbalin nga Ari ti Pagarian ti Dios. Gapu iti dayta, naibaga ni Jesus kadagiti Judio idi kaaldawanna: “Magagaran unay ni Abraham nga amayo a makakita iti iyaayko, ket nakitana dayta ken nagrag-o.” (Juan 8:56) Nalawag nga ammo ni Abraham a sumagmamano kadagiti kaputotanna ti mangbukelto iti maysa a Pagarian nga ipasdek ni Jehova, ket situtulok nga aguray a tungpalen ni Jehova dayta a kari.

 5. Kasanotayo nga ammo nga inur-uray ni Abraham ti siudad nga inyurnos ti Dios?

⁵ Kasano nga impakita ni Abraham nga ur-urayenna ti siudad, wenno Pagarian, nga inyurnos ti Dios? Umuna, saan a nagbalin ni Abraham nga umili iti aniaman a pagarian ditoy daga. Nagakar-akar, saan a nagnaed iti maymaysa a lugar, ken dina sinuportaran ti asinoman nga ari ditoy daga. Saan met a nangipasdek iti bukodna a pagarian. Intultuloyna ketdi ti agtulnog ken Jehova ken aguray a tungpalenna ti karina. Kasta ti panangipakita ni Abraham iti naisangsangayan a pammatina ken Jehova. Usigentayo ti dadduma a pakarigatan a nakaipasanguanna ken dagiti masursurotayo iti ulidanna.

 6. Ania a klase a siudad ti Ur?

⁶ Ti siudad a pinanawan ni Abraham ket natalged, narang-ay, ken nanam-ay. Napalawlawan iti dadakkel a pader ken adda kanal iti tallo a sikiganna. Nalaing dagiti umili ti Ur iti panagsurat ken matematika. Nalawag met a ti siudad ket sentro ti komersio ta adu ti nasarakan sadiay a dokumento ti negosio. Dagiti pribado a balbalay ket naaramid iti ladrilio; napalitadaan dagiti didingda sa napinturaan iti puraw. Dadduma kadagita a balay ket addaan iti 13 wenno 14 a siled a nangpalawlaw iti napalanas a paraangan.

 7. Apay a masapul nga agtalek ni Abraham a salakniban isuna ni Jehova agraman ti pamiliana?

⁷ Masapul nga agtalek ni Abraham a salakniban isuna ni Jehova agraman ti pamiliana. Apay? Laglagipentayo a pinanawan da Abraham ken Sara ti natalged ken komportable a balay iti siudad ti Ur tapno agnaedda kadagiti tolda iti nawayang a luglugar iti Canaan. Awanen dagiti napupuskol a pader ken nauuneg a kanal a mangsalaknib kenkuana ken iti pamiliana isu a nalaka laengen a rauten ida dagiti kabusor.

 8. Ania a pakarigatan ti naminsan a nakaipasanguan ni Abraham?

⁸ Inaramid ni Abraham ti pagayatan ti Dios, ngem naminsan, narigatan a mangipaay iti taraon ti pamiliana. Adda idi nakaro a bisin iti daga a nangibaonan kenkuana ni Jehova. Nagkaro dayta a bisin nga uray la inkeddeng ni Abraham nga iyakarna pay laeng ti pamiliana idiay Egipto. Ngem bayat nga addada sadiay, ti agturay iti pagilian a ni Faraon innalana ti asawa ni Abraham. Permi la ketdi ti danag ni Abraham! Ngem nabang-aran idi tinignay ni Jehova ni Faraon a mangisubli ken Sara.​—Gen. 12:10-19.

 9. Ania dagiti problema ti pamilia nga inibturan ni Abraham?

⁹ Adda dagiti timmaud a problema ti pamilia ni Abraham. Awan ti anak ti dungdungnguenna nga asawa a ni Sara. Adu a dekada nga inib-ibturanda ti nakaro a pannakaupay. Idi agangay, inted ni Sara ken Abraham ti adipenna a ni Hagar tapno maaddaan iti anak para kadakuada nga agassawa. Ngem idi masikogen ni Hagar, nangrugin a laisenna ni Sara. Saanen a maibturan dayta ni Sara isu a pinapanawna ni Hagar.​—Gen. 16:1-6.

10. Ania dagiti pasamak maipapan kada Ismael ken Isaac a nangsubok iti panagtalek ni Abraham ken Jehova?

¹⁰ Idi agangay, nagsikog ni Sara ket nangyanak iti lalaki a pinanaganan ni Abraham iti Isaac. Agpada a dungdungnguen ni Abraham dagiti annakna a da Ismael ken Isaac. Ngem gapu ta dakes ti panangtrato ni Ismael ken Isaac, kapilitan a pinapanaw ni Abraham da Ismael ken Hagar. (Gen. 21:9-14) Idi agangay, kiniddaw ni Jehova ken Abraham nga idatonna ti anakna a ni Isaac. (Gen. 22:1, 2; Heb. 11:17-19) Kadagita a kaso, masapul nga agtalek ni Abraham a tungpalento ni Jehova ti inkarina para kadagiti annakna.

11. Apay a masapul a siaanus nga aguray ni Abraham ken Jehova?

¹¹ Agingga iti dayta a tiempo, masapul a sursuruen ni Abraham ti siaanus nga aguray ken Jehova. Mabalin a nasurok a 70 ti tawenna idi pimmanaw idiay Ur a kadua ti pamiliana. (Gen. 11:31–12:4) Nasurok met a 100 a tawen a naggigian kadagiti tolda ken nagakar-akar iti daga ti Canaan. Natay ni Abraham idi agtawen iti 175. (Gen. 25:7) Ngem dina nakita ti kaitungpalan ti kari ni Jehova nga itedna kadagiti kaputotanna ti daga a nagnagnaanna. Dina met nakita ti pannakaipasdek ti siudad, ti Pagarian ti Dios. Nupay kasta, natay ni Abraham kalpasan ti ‘napaut ken makapnek’ a panagbiagna. (Gen. 25:8) Iti laksid ti amin a rigat a napasaran ni Abraham, nagtalinaed a nabileg ti pammatina ken siraragsak a naguray ken Jehova. Apay a nakapagibtur? Gapu ta iti unos ti panagbiagna, sinalakniban ni Jehova ken imbilangna kas gayyem.​—Gen. 15:1; Isa. 41:8; Sant. 2:22, 23.

12. Ania ti ur-urayentayo, ken ania ti usigentayo?

¹² Kas ken Abraham, ur-urayentayo ti siudad nga addaan kadagiti agpaypayso a pundasion​—ti Pagarian ti Dios. Ngem ditay ur-urayen a maibangon dayta ta naipasdeken idi 1914 ken agturturayen idiay langit. (Apoc. 12:7-10) Ngem ur-urayentayo nga iturayan dayta ti intero a daga. Bayat nga ur-urayentayo a mapasamak dayta, adu ti pakaipasanguantayo nga umasping kadagiti napasaran da Abraham ken Sara. Natulad kadi dagiti adipen ni Jehova iti kaaldawantayo ti ulidan ni Abraham? Makita kadagiti pakasaritaan ti biag a naipablaak iti Pagwanawanan nga adu ita ti mangtultulad iti pammati ken kinaanus da Abraham ken Sara. Usigentayo ti dadduma kadagitoy a pakasaritaan ket kitaentayo dagiti masursurotayo.

13. Ania dagiti masursurom iti kapadasan ni Brother Walden?

¹³ Situtulokka koma nga agsakripisio. Tapno mayun-unatayo ti siudad ti Dios, ti Pagarian, masapul a tuladentayo ni Abraham, a situtulok a nagsakripisio tapno maparagsakna ti Dios. (Mat. 6:33; Mar. 10:28-30) Usigentayo ti ulidan ni Brother Bill Walden.b Idi rinugian ni Bill ti nakipagadal kadagiti Saksi ni Jehova idi 1942, dandanin aggraduar iti kurso nga architectural engineering iti maysa nga unibersidad idiay United States. Inyurnos ti propesor ni Bill a maaddaan iti trabaho kalpasan nga aggraduar ngem saan nga inawat dayta ni Bill. Inlawlawagna nga inkeddengnan a naan-anay nga agserbi iti Dios imbes nga awatenna ti trabaho a dakkel ti sueldona. Di nagbayag kalpasanna, naawagan ni Bill nga agserbi iti militar. Siraraem a nagkedked isu a namulta iti $10,000 (agarup ₱500,000) ken nasentensiaan iti lima a tawen a pannakaibalud. Nawayawayaan tallo a tawen kalpasanna. Idi agangay, naawis nga ageskuela iti Gilead School ken nagserbi kas misionero idiay Africa. Kalpasanna, inkasarna ni Eva ket nagserbida a dua idiay Africa. Adu a panagsakripisio ti inaramidda. Idi agangay, nagsublida idiay U.S. tapno aywananda ti ina ni Bill. Kinuna ni Bill maipapan iti pakasaritaan ti biagna: “Makaluaak no lagipek ti nakaskasdaaw a pribilehiok nga agserbi ken Jehova iti nasurok a 70 a tawen. Kanayon a pagyamanak ti panangiwanwanna tapno mapagbalinko a karera ti panagserbi kenkuana.” Mapagbalinmo met kadi a kareram ti amin-tiempo a serbisio?

14-15. Ania dagiti masursurom iti kapadasan da Brother ken Sister Apostolidis?

¹⁴ Dimo ekspektaren ti biag nga awanan problema. Iti ulidan ni Abraham, masursurotayo nga uray dagidiay mangusar iti intero a biagda nga agserbi ken Jehova ket makapasar met kadagiti problema. (Sant. 1:2; 1 Ped. 5:9) Pudno dayta iti kapadasan ni Aristotelis Apostolidis.c Nabautisaran idi 1946 idiay Greece, ket idi 1952, nakitulag nga ikasarna ni Eleni, a kapadpadana iti kalat. Nupay kasta, nagsakit ni Eleni ket nadayagnos nga adda tumor ti utekna. Naikkat ti tumor, ngem sumagmamano la a tawen kalpasan ti panagkasarda, nagsubli ti tumor. Inopera manen dagiti doktor, ngem paralisadon ti kagudua ti bagi ni Eleni ken naapektaran ti panagsaona. Nagtalinaed a naregta ni Eleni iti laksid ti sakitna ken ti panangidadanes ti gobierno idi a tiempo.

¹⁵ Inaywanan ni Aristotelis ni baketna iti 30 a tawen. Iti dayta a tiempo, nagserbi kas panglakayen, miembro ti assembly committee, ken timmulong a nagibangon iti Assembly Hall. Ngem idi 1987, naaksidente ni Eleni bayat a mangaskasaba. Na-comatose iti tallo a tawen, sa natay. Kuna ni Aristotelis maipapan iti kapadasanna: “Iti napalabas a tawtawen, dagiti narigat a kasasaad, narikut a karit, ken di mapakpakadaan a pasamak ket agkasapulan iti kasta unay a kired ken panagibtur. Ngem kanayon nga impaay ni Jehova ti bileg a kasapulak tapno maparmek dagitoy a problema.” (Sal. 94:18, 19) Talaga nga ay-ayaten ni Jehova dagidiay mangar-aramid iti amin a kabaelanda nga agserbi kenkuana iti laksid dagiti pakasuotan!

16. Ania ti nasayaat nga imbalakad ni Brother Knorr iti asawana?

¹⁶ Kanayon a panunotem ti masanguanan. Kanayon a pinampanunot ni Abraham dagiti gunggona nga ited kenkuana ni Jehova iti masanguanan, isu a naibturanna dagiti problema. Kanayon a pinampanunot ni Sister Audrey Hyde ti namnamana iti masanguanan uray no natay iti kanser ti umuna nga asawana a ni Nathan H. Knorr ken naaddaan iti Alzheimer’s disease ti maikadua nga asawana a ni Glenn Hyde.d Kinunana a nakatulong kenkuana ti imbaga ni Brother Knorr sumagmamano laeng a lawas sakbay a natay. Kinuna ni Audrey: “Impalagip kaniak ni Nathan: ‘Sigurado ti namnamatayo kalpasan ni patay, ket saantayton nga agsagaba iti saem.’ Sana indagadag: ‘Kumitaka iti masanguanan, ta adda iti masanguanan ti gunggonam.’ . . . Innayonna: ‘Agtultuloyka nga okupado​—ikagumaam nga usaren ti biagmo a tumulong kadagiti sabsabali. Dayta ti tumulong kenka nga agbiag a naragsak.’” Talaga a praktikal a balakad ti agtalinaed nga okupado iti panangaramid iti naimbag iti sabsabali ken ‘agrag-o iti namnama’!​—Roma 12:12.

17. (a) Ania ti nasayaat a rason a kanayon a panunotentayo ti masanguanan? (b) Kasano a matulongannatayo ti Mikias 7:7 tapno masagraptayo dagiti bendision iti masanguanan?

¹⁷ Ad-adu ti rasontayo ita a kanayon a sipapanunot iti masanguanan. Nalawag nga ipakita dagiti pasamak ditoy lubong nga agbibiagtayon iti maudi a paset ti maudi nga al-aldaw daytoy a sistema ti bambanag. Din agbayag, saantayton a kasapulan nga urayen ti siudad nga addaan kadagiti agpaypayso a pundasion a naan-anay a mangituray iti intero a daga. Karaman iti adu a bendision a masagraptayto ket ti pannakakita nga agungar dagiti natay nga ipatpategtayo. Iti dayta a tiempo, gunggonaanto ni Jehova ni Abraham gapu iti pammati ken kinaanusna babaen ti panangpagungarna kenkuana ken iti pamiliana ditoy daga. Addakanto kadi sadiay a mangabrasa kadakuada? Wen, no kas ken Abraham, situtulokka nga agsakripisio para iti Pagarian ti Dios, no nabileg latta ti pammatim iti laksid dagiti problema, ken no sursuruem ti aguray a siaanus ken Jehova.​—Basaen ti Mikias 7:7.